Utshovঅধ্যায় 306
306.1
যাজ্ঞবল্ক্য উবাচ
অব্যক্তস্থং পরং যত্তত্পৃষ্টস্তেঽহং নরাধিপ
পরং গুহ্যমিমং প্রশ্নং শৃণুষ্বাবহিতো নৃপ
306.2
যথার্ষেণেহ বিধিনা চরতাবমতেন হ
ময়াদিত্যাদবাপ্তানি যজূংষি মিথিলাধিপ
306.3
মহতা তপসা দেবস্তপিষ্ঠঃ সেবিতো ময়া
প্রীতেন চাহং বিভুনা সূর্যেণোক্তস্তদানঘ
306.4
বরং বৃণীষ্ব বিপ্রর্ষে যদিষ্টং তে সুদুর্লভম্
তত্তে দাস্যামি প্রীতাত্মা মত্প্রসাদো হি দুর্লভঃ
306.5
ততঃ প্রণম্য শিরসা ময়োক্তস্তপতাং বরঃ
যজূংষি নোপয়ুক্তানি ক্ষিপ্রমিচ্ছামি বেদিতুম্
306.6
ততো মাং ভগবানাহ বিতরিষ্যামি তে দ্বিজ
সরস্বতীহ বাগ্ভূতা শরীরং তে প্রবেক্ষ্যতি
306.7
ততো মামাহ ভগবানাস্যং স্বং বিবৃতং কুরু
বিবৃতং চ ততো মেঽঽস্যং প্রবিষ্টা চ সরস্বতী
306.8
ততো বিদহ্যমানোঽহং প্রবিষ্টোঽম্ভস্তদানঘ
অবিজ্ঞানাদমর্ষাচ্চ ভাস্করস্য মহাত্মনঃ
306.9
ততো বিদহ্যমানং মামুবাচ ভগবান্রবিঃ
মুহূর্তং সহ্যতাং দাহস্ততঃ শীতীভবিষ্যসি
306.10
শীতীভূতং চ মাং দৃষ্ট্বা ভগবানাহ ভাস্করঃ
প্রতিষ্ঠাস্যতি তে বেদঃ সোত্তরঃ সখিলো দ্বিজ
306.11
কৃত্স্নং শতপথং চৈব প্রণেষ্যসি দ্বিজর্ষভ
তস্যান্তে চাপুনর্ভাবে বুদ্ধিস্তব ভবিষ্যতি
306.12
প্রাপ্স্যসে চ যদিষ্টং তত্সাংখ্যয়োগেপ্সিতং পদম্
এতাবদুক্ত্বা ভগবানস্তমেবাভ্যবর্তত
306.13
ততোঽনুব্যাহৃতং শ্রুত্বা গতে দেবে বিভাবসৌ
গৃহমাগত্য সংহৃষ্টোঽচিন্তয়ং বৈ সরস্বতীম্
306.14
ততঃ প্রবৃত্তাতিশুভা স্বরব্যঞ্জনভূষিতা
ওংকারমাদিতঃ কৃত্বা মম দেবী সরস্বতী
306.15
ততোঽহমর্ঘ্যং বিধিবত্সরস্বত্যৈ ন্যবেদয়ম্
তপতাং চ বরিষ্ঠায় নিষণ্ণস্তত্পরায়ণঃ
306.16
ততঃ শতপথং কৃত্স্নং সরহস্যং সসংগ্রহম্
চক্রে সপরিশেষং চ হর্ষেণ পরমেণ হ
306.17
কৃত্বা চাধ্যয়নং তেষাং শিষ্যাণাং শতমুত্তমম্
বিপ্রিয়ার্থং সশিষ্যস্য মাতুলস্য মহাত্মনঃ
306.18
ততঃ সশিষ্যেণ ময়া সূর্যেণেব গভস্তিভিঃ
ব্যাপ্তো যজ্ঞো মহারাজ পিতুস্তব মহাত্মনঃ
306.19
মিষতো দেবলস্যাপি ততোঽর্ধং হৃতবানহম্
স্ববেদদক্ষিণায়াথ বিমর্দে মাতুলেন হ
306.20
সুমন্তুনাথ পৈলেন তথা জৈমিনিনা চ বৈ
পিত্রা তে মুনিভিশ্চৈব ততোঽহমনুমানিতঃ
306.21
দশ পঞ্চ চ প্রাপ্তানি যজূংষ্যর্কান্ময়ানঘ
তথৈব লোমহর্ষাচ্চ পুরাণমবধারিতম্
306.22
বীজমেতত্পুরস্কৃত্য দেবীং চৈব সরস্বতীম্
সূর্যস্য চানুভাবেন প্রবৃত্তোঽহং নরাধিপ
306.23
কর্তুং শতপথং বেদমপূর্বং কারিতং চ মে
যথাভিলষিতং মার্গং তথা তচ্চোপপাদিতম্
306.24
শিষ্যাণামখিলং কৃত্স্নমনুজ্ঞাতং সসংগ্রহম্
সর্বে চ শিষ্যাঃ শুচয়ো গতাঃ পরমহর্ষিতাঃ
306.25
শাখাঃ পঞ্চদশেমাস্তু বিদ্যা ভাস্করদর্শিতাঃ
প্রতিষ্ঠাপ্য যথাকামং বেদ্যং তদনুচিন্তয়ম্
306.26
কিমত্র ব্রহ্মণ্যমৃতং কিং চ বেদ্যমনুত্তমম্
চিন্তয়ে তত্র চাগত্য গন্ধর্বো মামপৃচ্ছত
306.27
বিশ্বাবসুস্ততো রাজন্বেদান্তজ্ঞানকোবিদঃ
চতুর্বিংশতিকান্প্রশ্নান্পৃষ্ট্বা বেদস্য পার্থিব
পঞ্চবিংশতিমং প্রশ্নং পপ্রচ্ছান্বীক্ষিকীং তথা
306.28
বিশ্বাবিশ্বং তথাশ্বাশ্বং মিত্রং বরুণমেব চ
জ্ঞানং জ্ঞেয়ং তথাজ্ঞো জ্ঞঃ কস্তপা অতপাস্তথা
সূর্যাদঃ সূর্য ইতি চ বিদ্যাবিদ্যে তথৈব চ
306.29
বেদ্যাবেদ্যং তথা রাজন্নচলং চলমেব চ
অপূর্বমক্ষয়ং ক্ষয্যমেতত্প্রশ্নমনুত্তমম্
306.30
অথোক্তশ্চ ময়া রাজন্রাজা গন্ধর্বসত্তমঃ
পৃষ্টবাননুপূর্বেণ প্রশ্নমুত্তমমর্থবৎ
306.31
মুহূর্তং মৃষ্যতাং তাবদ্যাবদেনং বিচিন্তয়ে
বাঢমিত্যেব কৃত্বা স তূষ্ণীং গন্ধর্ব আস্থিতঃ
306.32
ততোঽন্বচিন্তয়মহং ভূয়ো দেবীং সরস্বতীম্
মনসা স চ মে প্রশ্নো দধ্নো ঘৃতমিবোদ্ধৃতম্
306.33
তত্রোপনিষদং চৈব পরিশেষং চ পার্থিব
মথ্নামি মনসা তাত দৃষ্ট্বা চান্বীক্ষিকীং পরাম্
306.34
চতুর্থী রাজশার্দূল বিদ্যৈষা সাংপরায়িকী
উদীরিতা ময়া তুভ্যং পঞ্চবিংশেঽধি ধিষ্ঠিতা
306.35
অথোক্তস্তু ময়া রাজন্রাজা বিশ্বাবসুস্তদা
শ্রূয়তাং যদ্ভবানস্মান্প্রশ্নং সংপৃষ্টবানিহ
306.36
বিশ্বাবিশ্বেতি যদিদং গন্ধর্বেন্দ্রানুপৃচ্ছসি
বিশ্বাব্যক্তং পরং বিদ্যাদ্ভূতভব্যভয়ংকরম্
306.37
ত্রিগুণং গুণকর্তৃত্বাদবিশ্বো নিষ্কলস্তথা
অশ্বস্তথৈব মিথুনমেবমেবানুদৃশ্যতে
306.38
অব্যক্তং প্রকৃতিং প্রাহুঃ পুরুষেতি চ নির্গুণম্
তথৈব মিত্রং পুরুষং বরুণং প্রকৃতিং তথা
306.39
জ্ঞানং তু প্রকৃতিং প্রাহুর্জ্ঞেয়ং নিষ্কলমেব চ
অজ্ঞশ্চ জ্ঞশ্চ পুরুষস্তস্মান্নিষ্কল উচ্যতে
306.40
কস্তপা অতপাঃ প্রোক্তঃ কোঽসৌ পুরুষ উচ্যতে
তপাঃ প্রকৃতিরিত্যাহুরতপা নিষ্কলঃ স্মৃতঃ
306.41
তথৈবাবেদ্যমব্যক্তং বেদ্যঃ পুরুষ উচ্যতে
চলাচলমিতি প্রোক্তং ত্বয়া তদপি মে শৃণু
306.42
চলাং তু প্রকৃতিং প্রাহুঃ কারণং ক্ষেপসর্গয়োঃ
অক্ষেপসর্গয়োঃকর্তা নিশ্চলঃ পুরুষঃ স্মৃতঃ
306.43
অজাবুভাবপ্রজৌ চ অক্ষয়ৌ চাপ্যুভাবপি
অজৌ নিত্যাবুভৌ প্রাহুরধ্যাত্মগতিনিশ্চয়াঃ
306.44
অক্ষয়ত্বাত্প্রজননে অজমত্রাহুরব্যয়ম্
অক্ষয়ং পুরুষং প্রাহুঃ ক্ষয়ো হ্যস্য ন বিদ্যতে
306.45
গুণক্ষয়ত্বাত্প্রকৃতিঃ কর্তৃত্বাদক্ষয়ং বুধাঃ
এষা তেঽঽন্বীক্ষিকী বিদ্যা চতুর্থী সাংপরায়িকী
306.46
বিদ্যোপেতং ধনং কৃত্বা কর্মণা নিত্যকর্মণি
একান্তদর্শনা বেদাঃ সর্বে বিশ্বাবসো স্মৃতাঃ
306.47
জায়ন্তে চ ম্রিয়ন্তে চ যস্মিন্নেতে যতশ্চ্যুতাঃ
বেদার্থং যে ন জানন্তি বেদ্যং গন্ধর্বসত্তম
306.48
সাঙ্গোপাঙ্গানপি যদি পঞ্চ বেদানধীয়তে
বেদবেদ্যং ন জানীতে বেদভারবহো হি সঃ
306.49
যো ঘৃতার্থী খরীক্ষীরং মথেদ্গন্ধর্বসত্তম
বিষ্ঠাং তত্রানুপশ্যেত ন মণ্ডং নাপি বা ঘৃতম্
306.50
তথা বেদ্যমবেদ্যং চ বেদবিদ্যো ন বিন্দতি
স কেবলং মূঢমতির্জ্ঞানভারবহঃ স্মৃতঃ
306.51
দ্রষ্টব্যৌ নিত্যমেবৈতৌ তত্পরেণান্তরাত্মনা
যথাস্য জন্মনিধনে ন ভবেতাং পুনঃ পুনঃ
306.52
অজস্রং জন্মনিধনং চিন্তয়িত্বা ত্রয়ীমিমাম্
পরিত্যজ্য ক্ষয়মিহ অক্ষয়ং ধর্মমাস্থিতঃ
306.53
যদা তু পশ্যতেঽত্যন্তমহন্যহনি কাশ্যপ
তদা স কেবলীভূতঃ ষড্বিংশমনুপশ্যতি
306.54
অন্যশ্চ শশ্বদব্যক্তস্তথান্যঃ পঞ্চবিংশকঃ
তস্য দ্বাবনুপশ্যেত তমেকমিতি সাধবঃ
306.55
তেনৈতন্নাভিজানন্তি পঞ্চবিংশকমচ্যুতম্
জন্মমৃত্যুভয়াদ্যোগাঃ সাংখ্যাশ্চ পরমৈষিণঃ
306.56
বিশ্বাবসুরুবাচ
পঞ্চবিংশং যদেতত্তে প্রোক্তং ব্রাহ্মণসত্তম
তথা তন্ন তথা বেতি তদ্ভবান্বক্তুমর্হতি
306.57
জৈগীষব্যস্যাসিতস্য দেবলস্য চ মে শ্রুতম্
পরাশরস্য বিপ্রর্ষের্বার্ষগণ্যস্য ধীমতঃ
306.58
ভিক্ষোঃ পঞ্চশিখস্যাথ কপিলস্য শুকস্য চ
গৌতমস্যার্ষ্টিষেণস্য গর্গস্য চ মহাত্মনঃ
306.59
নারদস্যাসুরেশ্চৈব পুলস্ত্যস্য চ ধীমতঃ
সনত্কুমারস্য ততঃ শুক্রস্য চ মহাত্মনঃ
306.60
কশ্যপস্য পিতুশ্চৈব পূর্বমেব ময়া শ্রুতম্
তদনন্তরং চ রুদ্রস্য বিশ্বরূপস্য ধীমতঃ
306.61
দৈবতেভ্যঃ পিতৃভ্যশ্চ দৈত্যেভ্যশ্চ ততস্ততঃ
প্রাপ্তমেতন্ময়া কৃত্স্নং বেদ্যং নিত্যং বদন্ত্যুত
306.62
তস্মাত্তদ্বৈ ভবদ্বুদ্ধ্যা শ্রোতুমিচ্ছামি ব্রাহ্মণ
ভবান্প্রবর্হঃ শাস্ত্রাণাং প্রগল্ভশ্চাতিবুদ্ধিমান্
306.63
ন তবাবিদিতং কিংচিদ্ভবাঞ্শ্রুতিনিধিঃ স্মৃতঃ
কথ্যতে দেবলোকে চ পিতৃলোকে চ ব্রাহ্মণ
306.64
ব্রহ্মলোকগতাশ্চৈব কথয়ন্তি মহর্ষয়ঃ
পতিশ্চ তপতাং শশ্বদাদিত্যস্তব ভাষতে
306.65
সাংখ্যজ্ঞানং ত্বয়া ব্রহ্মন্নবাপ্তং কৃত্স্নমেব চ
তথৈব যোগজ্ঞানং চ যাজ্ঞবল্ক্য বিশেষতঃ
306.66
নিঃসংদিগ্ধং প্রবুদ্ধস্ত্বং বুধ্যমানশ্চরাচরম্
শ্রোতুমিচ্ছামি তজ্জ্ঞানং ঘৃতং মণ্ডময়ং যথা
306.67
যাজ্ঞবল্ক্য উবাচ
কৃত্স্নধারিণমেব ত্বাং মন্যে গন্ধর্বসত্তম
জিজ্ঞাসসি চ মাং রাজংস্তন্নিবোধ যথাশ্রুতম্
306.68
অবুধ্যমানাং প্রকৃতিং বুধ্যতে পঞ্চবিংশকঃ
ন তু বুধ্যতি গন্ধর্ব প্রকৃতিঃ পঞ্চবিংশকম্
306.69
অনেনাপ্রতিবোধেন প্রধানং প্রবদন্তি তম্
সাংখ্যয়োগাশ্চ তত্ত্বজ্ঞা যথাশ্রুতিনিদর্শনাৎ
306.70
পশ্যংস্তথৈবাপশ্যংশ্চ পশ্যত্যন্যস্তথানঘ
ষড্বিংশঃ পঞ্চবিংশং চ চতুর্বিংশং চ পশ্যতি
ন তু পশ্যতি পশ্যংস্তু যশ্চৈনমনুপশ্যতি
306.71
পঞ্চবিংশোঽভিমন্যেত নান্যোঽস্তি পরমো মম
ন চতুর্বিংশকোঽগ্রাহ্যো মনুজৈর্জ্ঞানদর্শিভিঃ
306.72
মত্স্যেবোদকমন্বেতি প্রবর্ততি প্রবর্তনাৎ
যথৈব বুধ্যতে মত্স্যস্তথৈষোঽপ্যনুবুধ্যতে
সস্নেহঃ সহবাসাচ্চ সাভিমানশ্চ নিত্যশঃ
306.73
স নিমজ্জতি কালস্য যদৈকত্বং ন বুধ্যতে
উন্মজ্জতি হি কালস্য মমত্বেনাভিসংবৃতঃ
306.74
যদা তু মন্যতেঽন্যোঽহমন্য এষ ইতি দ্বিজঃ
তদা স কেবলীভূতঃ ষড্বিংশমনুপশ্যতি
306.75
অন্যশ্চ রাজন্নবরস্তথান্যঃ পঞ্চবিংশকঃ
তত্স্থত্বাদনুপশ্যন্তি এক এবেতি সাধবঃ
306.76
তেনৈতন্নাভিনন্দন্তি পঞ্চবিংশকমচ্যুতম্
জন্মমৃত্যুভয়াদ্ভীতা যোগাঃ সাংখ্যাশ্চ কাশ্যপ
ষড্বিংশমনুপশ্যন্তি শুচয়স্তত্পরায়ণাঃ
306.77
যদা স কেবলীভূতঃ ষড্বিংশমনুপশ্যতি
তদা স সর্ববিদ্বিদ্বান্ন পুনর্জন্ম বিন্দতি
306.78
এবমপ্রতিবুদ্ধশ্চ বুধ্যমানশ্চ তেঽনঘ
বুদ্ধশ্চোক্তো যথাতত্ত্বং ময়া শ্রুতিনিদর্শনাৎ
306.79
পশ্যাপশ্যং যোঽনুপশ্যেত্ক্ষেমং তত্ত্বং চ কাশ্যপ
কেবলাকেবলং চাদ্যং পঞ্চবিংশাত্পরং চ যৎ
306.80
বিশ্বাবসুরুবাচ
তথ্যং শুভং চৈতদুক্তং ত্বয়া ভোঃ; সম্যক্ক্ষেম্যং দেবতাদ্যং যথাবৎ
স্বস্ত্যক্ষয়ং ভবতশ্চাস্তু নিত্যং; বুদ্ধ্যা সদা বুদ্ধিয়ুক্তং নমস্তে
306.81
যাজ্ঞবল্ক্য উবাচ
এবমুক্ত্বা সংপ্রয়াতো দিবং স; বিভ্রাজন্বৈ শ্রীমতা দর্শনেন
তুষ্টশ্চ তুষ্ট্যা পরয়াভিনন্দ্য; প্রদক্ষিণং মম কৃত্বা মহাত্মা
306.82
ব্রহ্মাদীনাং খেচরাণাং ক্ষিতৌ চ; যে চাধস্তাত্সংবসন্তে নরেন্দ্র
তত্রৈব তদ্দর্শনং দর্শয়ন্বৈ; সম্যক্ক্ষেম্যং যে পথং সংশ্রিতা বৈ
306.83
সাংখ্যাঃ সর্বে সাংখ্যধর্মে রতাশ্চ; তদ্বদ্যোগা যোগধর্মে রতাশ্চ
যে চাপ্যন্যে মোক্ষকামা মনুষ্যা;স্তেষামেতদ্দর্শনং জ্ঞানদৃষ্টম্
306.84
জ্ঞানান্মোক্ষো জায়তে পূরুষাণাং; নাস্ত্যজ্ঞানাদেবমাহুর্নরেন্দ্র
তস্মাজ্জ্ঞানং তত্ত্বতোঽন্বেষিতব্যং; যেনাত্মানং মোক্ষয়েজ্জন্মমৃত্যোঃ
306.85
প্রাপ্য জ্ঞানং ব্রাহ্মণাত্ক্ষত্রিয়াদ্বা; বৈশ্যাচ্ছূদ্রাদপি নীচাদভীক্ষ্ণম্
শ্রদ্ধাতব্যং শ্রদ্দধানেন নিত্যং; ন শ্রদ্ধিনং জন্মমৃত্যূ বিশেতাম্
306.86
সর্বে বর্ণা ব্রাহ্মণা ব্রহ্মজাশ্চ; সর্বে নিত্যং ব্যাহরন্তে চ ব্রহ্ম
তত্ত্বং শাস্ত্রং ব্রহ্মবুদ্ধ্যা ব্রবীমি; সর্বং বিশ্বং ব্রহ্ম চৈতত্সমস্তম্
306.87
ব্রহ্মাস্যতো ব্রাহ্মণাঃ সংপ্রসূতা; বাহুভ্যাং বৈ ক্ষত্রিয়াঃ সংপ্রসূতাঃ
নাভ্যাং বৈশ্যাঃ পাদতশ্চাপি শূদ্রাঃ; সর্বে বর্ণা নান্যথা বেদিতব্যাঃ
306.88
অজ্ঞানতঃ কর্ময়োনিং ভজন্তে; তাং তাং রাজংস্তে যথা যান্ত্যভাবম্
তথা বর্ণা জ্ঞানহীনাঃ পতন্তে; ঘোরাদজ্ঞানাত্প্রাকৃতং যোনিজালম্
306.89
তস্মাজ্জ্ঞানং সর্বতো মার্গিতব্যং; সর্বত্রস্থং চৈতদুক্তং ময়া তে
তস্থৌ ব্রহ্মা তস্থিবাংশ্চাপরো য;স্তস্মৈ নিত্যং মোক্ষমাহুর্দ্বিজেন্দ্রাঃ
306.90
যত্তে পৃষ্টং তন্ময়া চোপদিষ্টং; যাথাতথ্যং তদ্বিশোকো ভবস্ব
রাজন্গচ্ছস্বৈতদর্থস্য পারং; সম্যক্প্রোক্তং স্বস্তি তেঽস্ত্বত্র নিত্যম্
306.91
ভীষ্ম উবাচ
স এবমনুশাস্তস্তু যাজ্ঞবল্ক্যেন ধীমতা
প্রীতিমানভবদ্রাজা মিথিলাধিপতিস্তদা
306.92
গতে মুনিবরে তস্মিন্কৃতে চাপি প্রদক্ষিণে
দৈবরাতির্নরপতিরাসীনস্তত্র মোক্ষবিৎ
306.93
গোকোটিং স্পর্শয়ামাস হিরণ্যস্য তথৈব চ
রত্নাঞ্জলিমথৈকং চ ব্রাহ্মণেভ্যো দদৌ তদা
306.94
বিদেহরাজ্যং চ তথা প্রতিষ্ঠাপ্য সুতস্য বৈ
যতিধর্মমুপাসংশ্চাপ্যবসন্মিথিলাধিপঃ
306.95
সাংখ্যজ্ঞানমধীয়ানো যোগশাস্ত্রং চ কৃত্স্নশঃ
ধর্মাধর্মৌ চ রাজেন্দ্র প্রাকৃতং পরিগর্হয়ন্
306.96
অনন্তমিতি কৃত্বা স নিত্যং কেবলমেব চ
ধর্মাধর্মৌ পুণ্যপাপে সত্যাসত্যে তথৈব চ
306.97
জন্মমৃত্যূ চ রাজেন্দ্র প্রাকৃতং তদচিন্তয়ৎ
ব্রহ্মাব্যক্তস্য কর্মেদমিতি নিত্যং নরাধিপ
306.98
পশ্যন্তি যোগাঃ সাংখ্যাশ্চ স্বশাস্ত্রকৃতলক্ষণাঃ
ইষ্টানিষ্টবিয়ুক্তং হি তস্থৌ ব্রহ্ম পরাত্পরম্
নিত্যং তমাহুর্বিদ্বাংসঃ শুচিস্তস্মাচ্ছুচির্ভব
306.99
দীয়তে যচ্চ লভতে দত্তং যচ্চানুমন্যতে
দদাতি চ নরশ্রেষ্ঠ প্রতিগৃহ্ণাতি যচ্চ হ
দদাত্যব্যক্তমেবৈতত্প্রতিগৃহ্ণাতি তচ্চ বৈ
306.100
আত্মা হ্যেবাত্মনো হ্যেকঃ কোঽন্যস্ত্বত্তোঽধিকো ভবেৎ
এবং মন্যস্ব সততমন্যথা মা বিচিন্তয়
306.101
যস্যাব্যক্তং ন বিদিতং সগুণং নির্গুণং পুনঃ
তেন তীর্থানি যজ্ঞাশ্চ সেবিতব্যাবিপশ্চিতা
306.102
ন স্বাধ্যায়ৈস্তপোভির্বা যজ্ঞৈর্বা কুরুনন্দন
লভতেঽব্যক্তসংস্থানং জ্ঞাত্বাব্যক্তং মহীপতে
306.103
তথৈব মহতঃ স্থানমাহংকারিকমেব চ
অহংকারাত্পরং চাপি স্থানানি সমবাপ্নুয়াৎ
306.104
যে ত্বব্যক্তাত্পরং নিত্যং জানতে শাস্ত্রতত্পরাঃ
জন্মমৃত্যুবিয়ুক্তং চ বিয়ুক্তং সদসচ্চ যৎ
306.105
এতন্ময়াপ্তং জনকাত্পুরস্তা;ত্তেনাপি চাপ্তং নৃপ যাজ্ঞবল্ক্যাৎ
জ্ঞানং বিশিষ্টং ন তথা হি যজ্ঞা; জ্ঞানেন দুর্গং তরতে ন যজ্ঞৈঃ
306.106
দুর্গং জন্ম নিধনং চাপি রাজ;ন্ন ভূতিকং জ্ঞানবিদো বদন্তি
যজ্ঞৈস্তপোভির্নিয়মৈর্ব্রতৈশ্চ; দিবং সমাসাদ্য পতন্তি ভূমৌ
306.107
তস্মাদুপাসস্ব পরং মহচ্ছুচি; শিবং বিমোক্ষং বিমলং পবিত্রম্
ক্ষেত্রজ্ঞবিত্পার্থিব জ্ঞানয়জ্ঞ;মুপাস্য বৈ তত্ত্বমৃষির্ভবিষ্যসি
306.108
উপনিষদমুপাকরোত্তদা বৈ; জনকনৃপস্য পুরা হি যাজ্ঞবল্ক্যঃ
যদুপগণিতশাশ্বতাব্যয়ং ত;চ্ছুভমমৃতত্বমশোকমৃচ্ছতীতি