অধ্যায় 305

305.1

যাজ্ঞবল্ক্য উবাচ
তথৈবোত্ক্রমমাণং তু শৃণুষ্বাবহিতো নৃপ
পদ্ভ্যামুত্ক্রমমাণস্য বৈষ্ণবং স্থানমুচ্যতে

জঙ্ঘাভ্যাং তু বসূন্দেবানাপ্নুয়াদিতি নঃ শ্রুতম্
জানুভ্যাং চ মহাভাগান্দেবান্সাধ্যানবাপ্নুয়াৎ

পায়ুনোত্ক্রমমাণস্তু মৈত্রং স্থানমবাপ্নুয়াৎ
পৃথিবীং জঘনেনাথ ঊরুভ্যাং তু প্রজাপতিম্

পার্শ্বাভ্যাং মরুতো দেবান্নাসাভ্যামিন্দুমেব চ
বাহুভ্যামিন্দ্রমিত্যাহুরুরসা রুদ্রমেব চ

গ্রীবায়াস্তমৃষিশ্রেষ্ঠং নরমাপ্নোত্যনুত্তমম্
বিশ্বেদেবান্মুখেনাথ দিশঃ শ্রোত্রেণ চাপ্নুয়াৎ

ঘ্রাণেন গন্ধবহনং নেত্রাভ্যাং সূর্যমেব চ
ভ্রূভ্যাং চৈবাশ্বিনৌ দেবৌ ললাটেন পিতৄনথ

ব্রহ্মাণমাপ্নোতি বিভুং মূর্ধ্না দেবাগ্রজং তথা
এতান্যুত্ক্রমণস্থানান্যুক্তানি মিথিলেশ্বর

অরিষ্টানি তু বক্ষ্যামি বিহিতানি মনীষিভিঃ
সংবত্সরবিয়োগস্য সংভবেয়ুঃ শরীরিণঃ

যোঽরুন্ধতীং ন পশ্যেত দৃষ্টপূর্বাং কদাচন
তথৈব ধ্রুবমিত্যাহুঃ পূর্ণেন্দুং দীপমেব চ
খণ্ডাভাসং দক্ষিণতস্তেঽপি সংবত্সরায়ুষঃ

পরচক্ষুষি চাত্মানং যে ন পশ্যন্তি পার্থিব
আত্মচ্ছায়াকৃতীভূতং তেঽপি সংবত্সরায়ুষঃ

অতিদ্যুতিরতিপ্রজ্ঞা অপ্রজ্ঞা চাদ্যুতিস্তথা
প্রকৃতের্বিক্রিয়াপত্তিঃ ষণ্মাসান্মৃত্যুলক্ষণম্

দৈবতান্যবজানাতি ব্রাহ্মণৈশ্চ বিরুধ্যতে
কৃষ্ণশ্যাবচ্ছবিচ্ছায়ঃ ষণ্মাসান্মৃত্যুলক্ষণম্

শীর্ণনাভি যথা চক্রং ছিদ্রং সোমং প্রপশ্যতি
তথৈব চ সহস্রাংশুং সপ্তরাত্রেণ মৃত্যুভাক্

শবগন্ধমুপাঘ্রাতি সুরভিং প্রাপ্য যো নরঃ
দেবতায়তনস্থস্তু ষড্রাত্রেণ স মৃত্যুভাক্

কর্ণনাসাবনমনং দন্তদৃষ্টিবিরাগিতা
সংজ্ঞালোপো নিরূষ্মত্বং সদ্যোমৃত্যুনিদর্শনম্

অকস্মাচ্চ স্রবেদ্যস্য বামমক্ষি নরাধিপ
মূর্ধতশ্চোত্পতেদ্ধূমঃ সদ্যোমৃত্যুনিদর্শনম্

এতাবন্তি ত্বরিষ্টানি বিদিত্বা মানবোঽঽত্মবান্
নিশি চাহনি চাত্মানং যোজয়েত্পরমাত্মনি

প্রতীক্ষমাণস্তত্কালং যত্কালং প্রতি তদ্ভবেৎ
অথাস্য নেষ্টং মরণং স্থাতুমিচ্ছেদিমাং ক্রিয়াম্

সর্বগন্ধান্রসাংশ্চৈব ধারয়েত সমাহিতঃ
তথা হি মৃত্যুং জয়তি তত্পরেণান্তরাত্মনা

সসাংখ্যধারণং চৈব বিদিত্বা মনুজর্ষভ
জয়েচ্চ মৃত্যুং যোগেন তত্পরেণান্তরাত্মনা

গচ্ছেত্প্রাপ্যাক্ষয়ং কৃত্স্নমজন্ম শিবমব্যয়ম্
শাশ্বতং স্থানমচলং দুষ্প্রাপমকৃতাত্মভিঃ