অধ্যায় 304

304.1

যাজ্ঞবল্ক্য উবাচ
সাংখ্যজ্ঞানং ময়া প্রোক্তং যোগজ্ঞানং নিবোধ মে
যথাশ্রুতং যথাদৃষ্টং তত্ত্বেন নৃপসত্তম

304.2

নাস্তি সাংখ্যসমং জ্ঞানং নাস্তি যোগসমং বলম্
তাবুভাবেকচর্যৌ তু উভাবনিধনৌ স্মৃতৌ

304.3

পৃথক্পৃথক্তু পশ্যন্তি যেঽল্পবুদ্ধিরতা নরাঃ
বয়ং তু রাজন্পশ্যাম একমেব তু নিশ্চয়াৎ

304.4

যদেব যোগাঃ পশ্যন্তি তত্সাংখ্যৈরপি দৃশ্যতে
একং সাংখ্যং চ যোগং চ যঃ পশ্যতি স তত্ত্ববিৎ

304.5

রুদ্রপ্রধানানপরান্বিদ্ধি যোগান্পরংতপ
তেনৈব চাথ দেহেন বিচরন্তি দিশো দশ

304.6

যাবদ্ধি প্রলয়স্তাত সূক্ষ্মেণাষ্টগুণেন বৈ
যোগেন লোকান্বিচরন্সুখং সংন্যস্য চানঘ

304.7

বেদেষু চাষ্টগুণিতং যোগমাহুর্মনীষিণঃ
সূক্ষ্মমষ্টগুণং প্রাহুর্নেতরং নৃপসত্তম

304.8

দ্বিগুণং যোগকৃত্যং তু যোগানাং প্রাহুরুত্তমম্
সগুণং নির্গুণং চৈব যথাশাস্ত্রনিদর্শনম্

304.9

ধারণা চৈব মনসঃ প্রাণায়ামশ্চ পার্থিব
প্রাণায়ামো হি সগুণো নির্গুণং ধারণং মনঃ

304.10

যত্র দৃশ্যেত মুঞ্চন্বৈ প্রাণান্মৈথিলসত্তম
বাতাধিক্যং ভবত্যেব তস্মাদ্ধি ন সমাচরেৎ

304.11

নিশায়াঃ প্রথমে যামে চোদনা দ্বাদশ স্মৃতাঃ
মধ্যে সুপ্ত্বা পরে যামে দ্বাদশৈব তু চোদনাঃ

304.12

তদেবমুপশান্তেন দান্তেনৈকান্তশীলিনা
আত্মারামেণ বুদ্ধেন যোক্তব্যোঽঽত্মা ন সংশয়ঃ

304.13

পঞ্চানামিন্দ্রিয়াণাং তু দোষানাক্ষিপ্য পঞ্চধা
শব্দং স্পর্শং তথা রূপং রসং গন্ধং তথৈব চ

304.14

প্রতিভামপবর্গং চ প্রতিসংহৃত্য মৈথিল
ইন্দ্রিয়গ্রামমখিলং মনস্যভিনিবেশ্য হ

304.15

মনস্তথৈবাহংকারে প্রতিষ্ঠাপ্য নরাধিপ
অহংকারং তথা বুদ্ধৌ বুদ্ধিং চ প্রকৃতাবপি

304.16

এবং হি পরিসংখ্যায় ততো ধ্যায়েত কেবলম্
বিরজস্কমলং নিত্যমনন্তং শুদ্ধমব্রণম্

304.17

তস্থুষং পুরুষং সত্ত্বমভেদ্যমজরামরম্
শাশ্বতং চাব্যয়ং চৈব ঈশানং ব্রহ্ম চাব্যয়ম্

304.18

যুক্তস্য তু মহারাজ লক্ষণান্যুপধারয়েৎ
লক্ষণং তু প্রসাদস্য যথা তৃপ্তঃ সুখং স্বপেৎ

304.19

নিবাতে তু যথা দীপো জ্বলেত্স্নেহসমন্বিতঃ
নিশ্চলোর্ধ্বশিখস্তদ্বদ্যুক্তমাহুর্মনীষিণঃ

304.20

পাষাণ ইব মেঘোত্থৈর্যথা বিন্দুভিরাহতঃ
নালং চালয়িতুং শক্যস্তথা যুক্তস্য লক্ষণম্

304.21

শঙ্খদুন্দুভিনির্ঘোষৈর্বিবিধৈর্গীতবাদিতৈঃ
ক্রিয়মাণৈর্ন কম্পেত যুক্তস্যৈতন্নিদর্শনম্

304.22

তৈলপাত্রং যথা পূর্ণং করাভ্যাং গৃহ্য পূরুষঃ
সোপানমারুহেদ্ভীতস্তর্জ্যমানোঽসিপাণিভিঃ

304.23

সংয়তাত্মা ভয়াত্তেষাং ন পাত্রাদ্বিন্দুমুত্সৃজেৎ
তথৈবোত্তরমাণস্য একাগ্রমনসস্তথা

304.24

স্থিরত্বাদিন্দ্রিয়াণাং তু নিশ্চলত্বাত্তথৈব চ
এবং যুক্তস্য তু মুনের্লক্ষণান্যুপধারয়েৎ

304.25

স যুক্তঃ পশ্যতি ব্রহ্ম যত্তত্পরমমব্যয়ম্
মহতস্তমসো মধ্যে স্থিতং জ্বলনসংনিভম্

304.26

এতেন কেবলং যাতি ত্যক্ত্বা দেহমসাক্ষিকম্
কালেন মহতা রাজঞ্শ্রুতিরেষা সনাতনী

304.27

এতদ্ধি যোগং যোগানাং কিমন্যদ্যোগলক্ষণম্
বিজ্ঞায় তদ্ধি মন্যন্তে কৃতকৃত্যা মনীষিণঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.