অধ্যায় 303

303.1

যাজ্ঞবল্ক্য উবাচ
ন শক্যো নির্গুণস্তাত গুণীকর্তুং বিশাং পতে
গুণবাংশ্চাপ্যগুণবান্যথাতত্ত্বং নিবোধ মে

গুণৈর্হি গুণবানেব নির্গুণশ্চাগুণস্তথা
প্রাহুরেবং মহাত্মানো মুনয়স্তত্ত্বদর্শিনঃ

গুণস্বভাবস্ত্বব্যক্তো গুণানেবাভিবর্ততে
উপয়ুঙ্ক্তে চ তানেব স চৈবাজ্ঞঃ স্বভাবতঃ

অব্যক্তস্তু ন জানীতে পুরুষো জ্ঞঃ স্বভাবতঃ
ন মত্তঃ পরমস্তীতি নিত্যমেবাভিমন্যতে

অনেন কারণেনৈতদব্যক্তং স্যাদচেতনম্
নিত্যত্বাদক্ষরত্বাচ্চ ক্ষরাণাং তত্ত্বতোঽন্যথা

যদাজ্ঞানেন কুর্বীত গুণসর্গং পুনঃ পুনঃ
যদাত্মানং ন জানীতে তদাব্যক্তমিহোচ্যতে

কর্তৃত্বাচ্চাপি তত্ত্বানাং তত্ত্বধর্মী তথোচ্যতে
কর্তৃত্বাচ্চৈব যোনীনাং যোনিধর্মা তথোচ্যতে

কর্তৃত্বাত্প্রকৃতীনাং তু তথা প্রকৃতিধর্মিতা
কর্তৃত্বাচ্চাপি বীজানাং বীজধর্মী তথোচ্যতে

গুণানাং প্রসবত্বাচ্চ তথা প্রসবধর্মবান্
কর্তৃত্বাত্প্রলয়ানাং চ তথা প্রলয়ধর্মিতা

বীজত্বাত্প্রকৃতিত্বাচ্চ প্রলয়ত্বাত্তথৈব চ
উপেক্ষকত্বাদন্যত্বাদভিমানাচ্চ কেবলম্

মন্যন্তে যতয়ঃ শুদ্ধা অধ্যাত্মবিগতজ্বরাঃ
অনিত্যং নিত্যমব্যক্তমেবমেতদ্ধি শুশ্রুম

অব্যক্তৈকত্বমিত্যাহুর্নানাত্বং পুরুষস্তথা
সর্বভূতদয়াবন্তঃ কেবলং জ্ঞানমাস্থিতাঃ

অন্যঃ স পুরুষোঽব্যক্তস্ত্বধ্রুবো ধ্রুবসংজ্ঞকঃ
যথা মুঞ্জ ইষীকায়াস্তথৈবৈতদ্ধি জায়তে

অন্যং চ মশকং বিদ্যাদন্যচ্চোদুম্বরং তথা
ন চোদুম্বরসংয়োগৈর্মশকস্তত্র লিপ্যতে

অন্য এব তথা মত্স্যস্তথান্যদুদকং স্মৃতম্
ন চোদকস্য স্পর্শেন মত্স্যো লিপ্যতি সর্বশঃ

অন্যো হ্যগ্নিরুখাপ্যন্যা নিত্যমেবমবৈহি ভোঃ
ন চোপলিপ্যতে সোঽগ্নিরুখাসংস্পর্শনেন বৈ

পুষ্করং ত্বন্যদেবাত্র তথান্যদুদকং স্মৃতম্
ন চোদকস্য স্পর্শেন লিপ্যতে তত্র পুষ্করম্

এতেষাং সহ সংবাসং বিবাসং চৈব নিত্যশঃ
যথা তথৈনং পশ্যন্তি ন নিত্যং প্রাকৃতা জনাঃ

যে ত্বন্যথৈব পশ্যন্তি ন সম্যক্তেষু দর্শনম্
তে ব্যক্তং নিরয়ং ঘোরং প্রবিশন্তি পুনঃ পুনঃ

সাংখ্যদর্শনমেতত্তে পরিসংখ্যাতমুত্তমম্
এবং হি পরিসংখ্যায় সাংখ্যাঃ কেবলতাং গতাঃ

যে ত্বন্যে তত্ত্বকুশলাস্তেষামেতন্নিদর্শনম্
অতঃ পরং প্রবক্ষ্যামি যোগানামপি দর্শনম্