অধ্যায় 302

302.1

যাজ্ঞবল্ক্য উবাচ
এতে প্রধানস্য গুণাস্ত্রয়ঃ পুরুষসত্তম
কৃত্স্নস্য চৈব জগতস্তিষ্ঠন্ত্যনপগাঃ সদা

শতধা সহস্রধা চৈব তথা শতসহস্রধা
কোটিশশ্চ করোত্যেষ প্রত্যগাত্মানমাত্মনা

সাত্ত্বিকস্যোত্তমং স্থানং রাজসস্যেহ মধ্যমম্
তামসস্যাধমং স্থানং প্রাহুরধ্যাত্মচিন্তকাঃ

কেবলেনেহ পুণ্যেন গতিমূর্ধ্বামবাপ্নুয়াৎ
পুণ্যপাপেন মানুষ্যমধর্মেণাপ্যধোগতিম্

দ্বংদ্বমেষাং ত্রয়াণাং তু সংনিপাতং চ তত্ত্বতঃ
সত্ত্বস্য রজসশ্চৈব তমসশ্চ শৃণুষ্ব মে

সত্ত্বস্য তু রজো দৃষ্টং রজসশ্চ তমস্তথা
তমসশ্চ তথা সত্ত্বং সত্ত্বস্যাব্যক্তমেব চ

অব্যক্তসত্ত্বসংয়ুক্তো দেবলোকমবাপ্নুয়াৎ
রজঃসত্ত্বসমায়ুক্তো মনুষ্যেষূপপদ্যতে

রজস্তমোভ্যাং সংয়ুক্তস্তির্যগ্যোনিষু জায়তে
রজস্তামসসত্ত্বৈশ্চ যুক্তো মানুষ্যমাপ্নুয়াৎ

পুণ্যপাপবিয়ুক্তানাং স্থানমাহুর্মনীষিণাম্
শাশ্বতং চাব্যয়ং চৈব অক্ষরং চাভয়ং চ যৎ

জ্ঞানিনাং সংভবং শ্রেষ্ঠং স্থানমব্রণমচ্যুতম্
অতীন্দ্রিয়মবীজং চ জন্মমৃত্যুতমোনুদম্

অব্যক্তস্থং পরং যত্তত্পৃষ্টস্তেঽহং নরাধিপ
স এষ প্রকৃতিষ্ঠো হি তস্থুরিত্যভিধীয়তে

অচেতনশ্চৈষ মতঃ প্রকৃতিস্থশ্চ পার্থিব
এতেনাধিষ্ঠিতশ্চৈব সৃজতে সংহরত্যপি

জনক উবাচ
অনাদিনিধনাবেতাবুভাবেব মহামুনে
অমূর্তিমন্তাবচলাবপ্রকম্প্যৌ চ নির্ব্রণৌ

অগ্রাহ্যাবৃষিশার্দূল কথমেকো হ্যচেতনঃ
চেতনাবাংস্তথা চৈকঃ ক্ষেত্রজ্ঞ ইতি ভাষিতঃ

ত্বং হি বিপ্রেন্দ্র কার্ত্স্ন্যেন মোক্ষধর্মমুপাসসে
সাকল্যং মোক্ষধর্মস্য শ্রোতুমিচ্ছামি তত্ত্বতঃ

অস্তিত্বং কেবলত্বং চ বিনাভাবং তথৈব চ
তথৈবোত্ক্রমণস্থানং দেহিনোঽপি বিয়ুজ্যতঃ

কালেন যদ্ধি প্রাপ্নোতি স্থানং তদ্ব্রূহি মে দ্বিজ
সাংখ্যজ্ঞানং চ তত্ত্বেন পৃথগ্যোগং তথৈব চ

অরিষ্টানি চ তত্ত্বেন বক্তুমর্হসি সত্তম
বিদিতং সর্বমেতত্তে পাণাবামলকং যথা