অধ্যায় 301

301.1

যাজ্ঞবল্ক্য উবাচ
পাদাবধ্যাত্মমিত্যাহুর্ব্রাহ্মণাস্তত্ত্বদর্শিনঃ
গন্তব্যমধিভূতং চ বিষ্ণুস্তত্রাধিদৈবতম্

301.2

পায়ুরধ্যাত্মমিত্যাহুর্যথাতত্ত্বার্থদর্শিনঃ
বিসর্গমধিভূতং চ মিত্রস্তত্রাধিদৈবতম্

301.3

উপস্থোঽধ্যাত্মমিত্যাহুর্যথায়োগনিদর্শনম্
অধিভূতং তথানন্দো দৈবতং চ প্রজাপতিঃ

301.4

হস্তাবধ্যাত্মমিত্যাহুর্যথাসাংখ্যনিদর্শনম্
কর্তব্যমধিভূতং তু ইন্দ্রস্তত্রাধিদৈবতম্

301.5

বাগধ্যাত্মমিতি প্রাহুর্যথাশ্রুতিনিদর্শনম্
বক্তব্যমধিভূতং তু বহ্নিস্তত্রাধিদৈবতম্

301.6

চক্ষুরধ্যাত্মমিত্যাহুর্যথাশ্রুতিনিদর্শনম্
রূপমত্রাধিভূতং তু সূর্যস্তত্রাধিদৈবতম্

301.7

শ্রোত্রমধ্যাত্মমিত্যাহুর্যথাশ্রুতিনিদর্শনম্
শব্দস্তত্রাধিভূতং তু দিশস্তত্রাধিদৈবতম্

301.8

জিহ্বামধ্যাত্মমিত্যাহুর্যথাতত্ত্বনিদর্শনম্
রস এবাধিভূতং তু আপস্তত্রাধিদৈবতম্

301.9

ঘ্রাণমধ্যাত্মমিত্যাহুর্যথাশ্রুতিনিদর্শনম্
গন্ধ এবাধিভূতং তু পৃথিবী চাধিদৈবতম্

301.10

ত্বগধ্যাত্মমিতি প্রাহুস্তত্ত্ববুদ্ধিবিশারদাঃ
স্পর্শ এবাধিভূতং তু পবনশ্চাধিদৈবতম্

301.11

মনোঽধ্যাত্মমিতি প্রাহুর্যথাশ্রুতিনিদর্শনম্
মন্তব্যমধিভূতং তু চন্দ্রমাশ্চাধিদৈবতম্

301.12

অহংকারিকমধ্যাত্মমাহুস্তত্ত্বনিদর্শনম্
অভিমানোঽধিভূতং তু ভবস্তত্রাধিদৈবতম্

301.13

বুদ্ধিরধ্যাত্মমিত্যাহুর্যথাবেদনিদর্শনম্
বোদ্ধব্যমধিভূতং তু ক্ষেত্রজ্ঞোঽত্রাধিদৈবতম্

301.14

এষা তে ব্যক্ততো রাজন্বিভূতিরনুবর্ণিতা
আদৌ মধ্যে তথা চান্তে যথাতত্ত্বেন তত্ত্ববিৎ

301.15

প্রকৃতির্গুণান্বিকুরুতে স্বচ্ছন্দেনাত্মকাম্যয়া
ক্রীডার্থং তু মহারাজ শতশোঽথ সহস্রশঃ

301.16

যথা দীপসহস্রাণি দীপান্মর্ত্যাঃ প্রকুর্বতে
প্রকৃতিস্তথা বিকুরুতে পুরুষস্য গুণান্বহূন্

301.17

সত্ত্বমানন্দ উদ্রেকঃ প্রীতিঃ প্রাকাশ্যমেব চ
সুখং শুদ্ধিত্বমারোগ্যং সংতোষঃ শ্রদ্দধানতা

301.18

অকার্পণ্যমসংরম্ভঃ ক্ষমা ধৃতিরহিংসতা
সমতা সত্যমানৃণ্যং মার্দবং হ্রীরচাপলম্

301.19

শৌচমার্জবমাচারমলৌল্যং হৃদ্যসংভ্রমঃ
ইষ্টানিষ্টবিয়োগানাং কৃতানামবিকত্থনম্

301.20

দানেন চানুগ্রহণমস্পৃহার্থে পরার্থতা
সর্বভূতদয়া চৈব সত্ত্বস্যৈতে গুণাঃ স্মৃতাঃ

301.21

রজোগুণানাং সংঘাতো রূপমৈশ্বর্যবিগ্রহে
অত্যাশিত্বমকারুণ্যং সুখদুঃখোপসেবনম্

301.22

পরাপবাদেষু রতির্বিবাদানাং চ সেবনম্
অহংকারস্ত্বসত্কারশ্চিন্তা বৈরোপসেবনম্

301.23

পরিতাপোঽপহরণং হ্রীনাশোঽনার্জবং তথা
ভেদঃ পরুষতা চৈব কামক্রোধৌ মদস্তথা
দর্পো দ্বেষোঽতিবাদশ্চ এতে প্রোক্তা রজোগুণাঃ

301.24

তামসানাং তু সংঘাতং প্রবক্ষ্যাম্যুপধার্যতাম্
মোহোঽপ্রকাশস্তামিস্রমন্ধতামিস্রসংজ্ঞিতম্

301.25

মরণং চান্ধতামিস্রং তামিস্রং ক্রোধ উচ্যতে
তমসো লক্ষণানীহ ভক্ষাণামভিরোচনম্

301.26

ভোজনানামপর্যাপ্তিস্তথা পেয়েষ্বতৃপ্ততা
গন্ধবাসো বিহারেষু শয়নেষ্বাসনেষু চ

301.27

দিবাস্বপ্নে বিবাদে চ প্রমাদেষু চ বৈ রতিঃ
নৃত্যবাদিত্রগীতানামজ্ঞানাচ্ছ্রদ্দধানতা
দ্বেষো ধর্মবিশেষাণামেতে বৈ তামসা গুণাঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.