অধ্যায় 300

300.1

যাজ্ঞবল্ক্য উবাচ
তত্ত্বানাং সর্গসংখ্যা চ কালসংখ্যা তথৈব চ
ময়া প্রোক্তানুপূর্ব্যেণ সংহারমপি মে শৃণু

যথা সংহরতে জন্তূন্সসর্জ চ পুনঃ পুনঃ
অনাদিনিধনো ব্রহ্মা নিত্যশ্চাক্ষর এব চ

অহঃক্ষয়মথো বুদ্ধ্বা নিশি স্বপ্নমনাস্তথা
চোদয়ামাস ভগবানব্যক্তোঽহংকৃতং নরম্

ততঃ শতসহস্রাংশুরব্যক্তেনাভিচোদিতঃ
কৃত্বা দ্বাদশধাত্মানমাদিত্যো জ্বলদগ্নিবৎ

চতুর্বিধং প্রজাজালং নির্দহত্যাশু তেজসা
জরায্বণ্ডস্বেদজাতমুদ্ভিজ্জং চ নরাধিপ

এতদুন্মেষমাত্রেণ বিনষ্টং স্থাণুজঙ্গমম্
কূর্মপৃষ্ঠসমা ভূমির্ভবত্যথ সমন্ততঃ

জগদ্দগ্ধ্বামিতবলঃ কেবলং জগতীং ততঃ
অম্ভসা বলিনা ক্ষিপ্রমাপূর্যত সমন্ততঃ

ততঃ কালাগ্নিমাসাদ্য তদম্ভো যাতি সংক্ষয়ম্
বিনষ্টেঽম্ভসি রাজেন্দ্র জাজ্বলীত্যনলো মহান্

তমপ্রমেয়োঽতিবলং জ্বলমানং বিভাবসুম্
ঊষ্মাণং সর্বভূতানাং সপ্তার্চিষমথাঞ্জসা

ভক্ষয়ামাস বলবান্বায়ুরষ্টাত্মকো বলী
বিচরন্নমিতপ্রাণস্তির্যগূর্ধ্বমধস্তথা

তমপ্রতিবলং ভীমমাকাশং গ্রসতেঽঽত্মনা
আকাশমপ্যতিনদন্মনো গ্রসতি চারিকম্

মনো গ্রসতি সর্বাত্মা সোঽহংকারঃ প্রজাপতিঃ
অহংকারং মহানাত্মা ভূতভব্যভবিষ্যবিৎ

তমপ্যনুপমাত্মানং বিশ্বং শংভুঃ প্রজাপতিঃ
অণিমা লঘিমা প্রাপ্তিরীশানো জ্যোতিরব্যয়ঃ

সর্বতঃপাণিপাদান্তঃ সর্বতোক্ষিশিরোমুখঃ
সর্বতঃশ্রুতিমাঁল্লোকে সর্বমাবৃত্য তিষ্ঠতি

হৃদয়ং সর্বভূতানাং পর্বণোঽঙ্গুষ্ঠমাত্রকঃ
অনুগ্রসত্যনন্তং হি মহাত্মা বিশ্বমীশ্বরঃ

ততঃ সমভবত্সর্বমক্ষয়াব্যয়মব্রণম্
ভূতভব্যমনুষ্যাণাং স্রষ্টারমনঘং তথা

এষোঽপ্যয়স্তে রাজেন্দ্র যথাবত্পরিভাষিতঃ
অধ্যাত্মমধিভূতং চ অধিদৈবং চ শ্রূয়তাম্