অধ্যায় 299

299.1

যাজ্ঞবল্ক্য উবাচ
অব্যক্তস্য নরশ্রেষ্ঠ কালসংখ্যাং নিবোধ মে
পঞ্চ কল্পসহস্রাণি দ্বিগুণান্যহরুচ্যতে

রাত্রিরেতাবতী চাস্য প্রতিবুদ্ধো নরাধিপ
সৃজত্যোষধিমেবাগ্রে জীবনং সর্বদেহিনাম্

ততো ব্রহ্মাণমসৃজদ্ধৈরণ্যাণ্ডসমুদ্ভবম্
সা মূর্তিঃ সর্বভূতানামিত্যেবমনুশুশ্রুম

সংবত্সরমুষিত্বাণ্ডে নিষ্ক্রম্য চ মহামুনিঃ
সংদধেঽর্ধং মহীং কৃত্স্নাং দিবমর্ধং প্রজাপতিঃ

দ্যাবাপৃথিব্যোরিত্যেষ রাজন্বেদেষু পঠ্যতে
তয়োঃ শকলয়োর্মধ্যমাকাশমকরোত্প্রভুঃ

এতস্যাপি চ সংখ্যানং বেদবেদাঙ্গপারগৈঃ
দশ কল্পসহস্রাণি পাদোনান্যহরুচ্যতে
রাত্রিমেতাবতীং চাস্য প্রাহুরধ্যাত্মচিন্তকাঃ

সৃজত্যহংকারমৃষির্ভূতং দিব্যাত্মকং তথা
চতুরশ্চাপরান্পুত্রান্দেহাত্পূর্বং মহানৃষিঃ
তে বৈ পিতৃভ্যঃ পিতরঃ শ্রূয়ন্তে রাজসত্তম

দেবাঃ পিতৄণাং চ সুতা দেবৈর্লোকাঃ সমাবৃতাঃ
চরাচরা নরশ্রেষ্ঠ ইত্যেবমনুশুশ্রুম

পরমেষ্ঠী ত্বহংকারোঽসৃজদ্ভূতানি পঞ্চধা
পৃথিবী বায়ুরাকাশমাপো জ্যোতিশ্চ পঞ্চমম্

এতস্যাপি নিশামাহুস্তৃতীয়মিহ কুর্বতঃ
পঞ্চ কল্পসহস্রাণি তাবদেবাহরুচ্যতে

শব্দঃ স্পর্শশ্চ রূপং চ রসো গন্ধশ্চ পঞ্চমঃ
এতে বিশেষা রাজেন্দ্র মহাভূতেষু পঞ্চসু
যৈরাবিষ্টানি ভূতানি অহন্যহনি পার্থিব

অন্যোন্যং স্পৃহয়ন্ত্যেতে অন্যোন্যস্য হিতে রতাঃ
অন্যোন্যমভিমন্যন্তে অন্যোন্যস্পর্ধিনস্তথা

তে বধ্যমানা অন্যোন্যং গুণৈর্হারিভিরব্যয়াঃ
ইহৈব পরিবর্তন্তে তির্যগ্যোনিপ্রবেশিনঃ

ত্রীণি কল্পসহস্রাণি এতেষামহরুচ্যতে
রাত্রিরেতাবতী চৈব মনসশ্চ নরাধিপ

মনশ্চরতি রাজেন্দ্র চরিতং সর্বমিন্দ্রিয়ৈঃ
ন চেন্দ্রিয়াণি পশ্যন্তি মন এবাত্র পশ্যতি

চক্ষুঃ পশ্যতি রূপাণি মনসা তু ন চক্ষুষা
মনসি ব্যাকুলে চক্ষুঃ পশ্যন্নপি ন পশ্যতি
তথেন্দ্রিয়াণি সর্বাণি পশ্যন্তীত্যভিচক্ষতে

মনস্যুপরতে রাজন্নিন্দ্রিয়োপরমো ভবেৎ
ন চেন্দ্রিয়ব্যুপরমে মনস্যুপরমো ভবেৎ
এবং মনঃপ্রধানানি ইন্দ্রিয়াণি বিভাবয়েৎ

ইন্দ্রিয়াণাং হি সর্বেষামীশ্বরং মন উচ্যতে
এতদ্বিশন্তি ভূতানি সর্বাণীহ মহায়শাঃ