Utshovঅধ্যায় 298
298.1
যুধিষ্ঠির উবাচ
ধর্মাধর্মবিমুক্তং যদ্বিমুক্তং সর্বসংশ্রয়াৎ
জন্মমৃত্যুবিমুক্তং চ বিমুক্তং পুণ্যপাপয়োঃ
298.2
যচ্ছিবং নিত্যমভয়ং নিত্যং চাক্ষরমব্যয়ম্
শুচি নিত্যমনায়াসং তদ্ভবান্বক্তুমর্হতি
298.3
ভীষ্ম উবাচ
অত্র তে বর্তয়িষ্যেঽহমিতিহাসং পুরাতনম্
যাজ্ঞবল্ক্যস্য সংবাদং জনকস্য চ ভারত
298.4
যাজ্ঞবল্ক্যমৃষিশ্রেষ্ঠং দৈবরাতির্মহায়শাঃ
পপ্রচ্ছ জনকো রাজা প্রশ্নং প্রশ্নবিদাং বরঃ
298.5
কতীন্দ্রিয়াণি বিপ্রর্ষে কতি প্রকৃতয়ঃ স্মৃতাঃ
কিমব্যক্তং পরং ব্রহ্ম তস্মাচ্চ পরতস্তু কিম্
298.6
প্রভবং চাপ্যয়ং চৈব কালসংখ্যাং তথৈব চ
বক্তুমর্হসি বিপ্রেন্দ্র ত্বদনুগ্রহকাঙ্ক্ষিণঃ
298.7
অজ্ঞানাত্পরিপৃচ্ছামি ত্বং হি জ্ঞানময়ো নিধিঃ
তদহং শ্রোতুমিচ্ছামি সর্বমেতদসংশয়ম্
298.8
যাজ্ঞবল্ক্য উবাচ
শ্রূয়তামবনীপাল যদেতদনুপৃচ্ছসি
যোগানাং পরমং জ্ঞানং সাংখ্যানাং চ বিশেষতঃ
298.9
ন তবাবিদিতং কিংচিন্মাং তু জিজ্ঞাসতে ভবান্
পৃষ্টেন চাপি বক্তব্যমেষ ধর্মঃ সনাতনঃ
298.10
অষ্টৌ প্রকৃতয়ঃ প্রোক্তা বিকারাশ্চাপি ষোডশ
অথ সপ্ত তু ব্যক্তানি প্রাহুরধ্যাত্মচিন্তকাঃ
298.11
অব্যক্তং চ মহাংশ্চৈব তথাহংকার এব চ
পৃথিবী বায়ুরাকাশমাপো জ্যোতিশ্চ পঞ্চমম্
298.12
এতাঃ প্রকৃতয়স্ত্বষ্টৌ বিকারানপি মে শৃণু
শ্রোত্রং ত্বক্চৈব চক্ষুশ্চ জিহ্বা ঘ্রাণং চ পঞ্চমম্
298.13
শব্দস্পর্শৌ চ রূপং চ রসো গন্ধস্তথৈব চ
বাক্চ হস্তৌ চ পাদৌ চ পায়ুর্মেঢ্রং তথৈব চ
298.14
এতে বিশেষা রাজেন্দ্র মহাভূতেষু পঞ্চসু
বুদ্ধীন্দ্রিয়াণ্যথৈতানি সবিশেষাণি মৈথিল
298.15
মনঃ ষোডশকং প্রাহুরধ্যাত্মগতিচিন্তকাঃ
ত্বং চৈবান্যে চ বিদ্বাংসস্তত্ত্ববুদ্ধিবিশারদাঃ
298.16
অব্যক্তাচ্চ মহানাত্মা সমুত্পদ্যতি পার্থিব
প্রথমং সর্গমিত্যেতদাহুঃ প্রাধানিকং বুধাঃ
298.17
মহতশ্চাপ্যহংকার উত্পদ্যতি নরাধিপ
দ্বিতীয়ং সর্গমিত্যাহুরেতদ্বুদ্ধ্যাত্মকং স্মৃতম্
298.18
অহংকারাচ্চ সংভূতং মনো ভূতগুণাত্মকম্
তৃতীয়ঃ সর্গ ইত্যেষ আহংকারিক উচ্যতে
298.19
মনসস্তু সমুদ্ভূতা মহাভূতা নরাধিপ
চতুর্থং সর্গমিত্যেতন্মানসং পরিচক্ষতে
298.20
শব্দঃ স্পর্শশ্চ রূপং চ রসো গন্ধস্তথৈব চ
পঞ্চমং সর্গমিত্যাহুর্ভৌতিকং ভূতচিন্তকাঃ
298.21
শ্রোত্রং ত্বক্চৈব চক্ষুশ্চ জিহ্বা ঘ্রাণং চ পঞ্চমম্
সর্গং তু ষষ্ঠমিত্যাহুর্বহুচিন্তাত্মকং স্মৃতম্
298.22
অধঃ শ্রোত্রেন্দ্রিয়গ্রাম উত্পদ্যতি নরাধিপ
সপ্তমং সর্গমিত্যাহুরেতদৈন্দ্রিয়কং স্মৃতম্
298.23
ঊর্ধ্বস্রোতস্তথা তির্যগুত্পদ্যতি নরাধিপ
অষ্টমং সর্গমিত্যাহুরেতদার্জবকং বুধাঃ
298.24
তির্যক্স্রোতস্ত্বধঃস্রোত উত্পদ্যতি নরাধিপ
নবমং সর্গমিত্যাহুরেতদার্জবকং বুধাঃ
298.25
এতানি নব সর্গাণি তত্ত্বানি চ নরাধিপ
চতুর্বিংশতিরুক্তানি যথাশ্রুতি নিদর্শনাৎ
298.26
অত ঊর্ধ্বং মহারাজ গুণস্যৈতস্য তত্ত্বতঃ
মহাত্মভিরনুপ্রোক্তাং কালসংখ্যাং নিবোধ মে