অধ্যায় 297

297.1

ভীষ্ম উবাচ
মৃগয়াং বিচরন্কশ্চিদ্বিজনে জনকাত্মজঃ
বনে দদর্শ বিপ্রেন্দ্রমৃষিং বংশধরং ভৃগোঃ

297.2

তমাসীনমুপাসীনঃ প্রণম্য শিরসা মুনিম্
পশ্চাদনুমতস্তেন পপ্রচ্ছ বসুমানিদম্

297.3

ভগবন্কিমিদং শ্রেয়ঃ প্রেত্য বাপীহ বা ভবেৎ
পুরুষস্যাধ্রুবে দেহে কামস্য বশবর্তিনঃ

297.4

সত্কৃত্য পরিপৃষ্টঃ সন্সুমহাত্মা মহাতপাঃ
নিজগাদ ততস্তস্মৈ শ্রেয়স্করমিদং বচঃ

297.5

মনসোঽপ্রতিকূলানি প্রেত্য চেহ চ বাঞ্ছসি
ভূতানাং প্রতিকূলেভ্যো নিবর্তস্ব যতেন্দ্রিয়ঃ

297.6

ধর্মঃ সতাং হিতঃ পুংসাং ধর্মশ্চৈবাশ্রয়ঃ সতাম্
ধর্মাল্লোকাস্ত্রয়স্তাত প্রবৃত্তাঃ সচরাচরাঃ

297.7

স্বাদুকামুক কামানাং বৈতৃষ্ণ্যং কিং ন গচ্ছসি
মধু পশ্যসি দুর্বুদ্ধে প্রপাতং নানুপশ্যসি

297.8

যথা জ্ঞানে পরিচয়ঃ কর্তব্যস্তত্ফলার্থিনা
তথা ধর্মে পরিচয়ঃ কর্তব্যস্তত্ফলার্থিনা

297.9

অসতা ধর্মকামেন বিশুদ্ধং কর্ম দুষ্করম্
সতা তু ধর্মকামেন সুকরং কর্ম দুষ্করম্

297.10

বনে গ্রাম্যসুখাচারো যথা গ্রাম্যস্তথৈব সঃ
গ্রামে বনসুখাচারো যথা বনচরস্তথা

297.11

মনোবাক্কর্মকে ধর্মে কুরু শ্রদ্ধাং সমাহিতঃ
নিবৃত্তৌ বা প্রবৃত্তৌ বা সংপ্রধার্য গুণাগুণান্

297.12

নিত্যং চ বহু দাতব্যং সাধুভ্যশ্চানসূয়তা
প্রার্থিতং ব্রতশৌচাভ্যাং সত্কৃতং দেশকালয়োঃ

297.13

শুভেন বিধিনা লব্ধমর্হায় প্রতিপাদয়েৎ
ক্রোধমুত্সৃজ্য দত্ত্বা চ নানুতপ্যেন্ন কীর্তয়েৎ

297.14

অনৃশংসঃ শুচির্দান্তঃ সত্যবাগার্জবে স্থিতঃ
যোনিকর্মবিশুদ্ধশ্চ পাত্রং স্যাদ্বেদবিদ্দ্বিজঃ

297.15

সত্কৃতা চৈকপত্নী চ জাত্যা যোনিরিহেষ্যতে
ঋগ্যজুঃসামগো বিদ্বান্ষট্কর্মা পাত্রমুচ্যতে

297.16

স এব ধর্মঃ সোঽধর্মস্তং তং প্রতিনরং ভবেৎ
পাত্রকর্মবিশেষেণ দেশকালাববেক্ষ্য চ

297.17

লীলয়াল্পং যথা গাত্রাত্প্রমৃজ্যাদ্রজসঃ পুমান্
বহুয়ত্নেন মহতা পাপনির্হরণং তথা

297.18

বিরিক্তস্য যথা সম্যগ্ঘৃতং ভবতি ভেষজম্
তথা নির্হৃতদোষস্য প্রেত্যধর্মঃ সুখাবহঃ

297.19

মানসং সর্বভূতেষু বর্ততে বৈ শুভাশুভে
অশুভেভ্যঃ সমাক্ষিপ্য শুভেষ্বেবাবতারয়েৎ

297.20

সর্বং সর্বেণ সর্বত্র ক্রিয়মাণং চ পূজয়
স্বধর্মে যত্র রাগস্তে কামং ধর্মো বিধীয়তাম্

297.21

অধৃতাত্মন্ধৃতৌ তিষ্ঠ দুর্বুদ্ধে বুদ্ধিমান্ভব
অপ্রশান্ত প্রশাম্য ত্বমপ্রাজ্ঞ প্রাজ্ঞবচ্চর

297.22

তেজসা শক্যতে প্রাপ্তুমুপায়সহচারিণা
ইহ চ প্রেত্য চ শ্রেয়স্তস্য মূলং ধৃতিঃ পরা

297.23

রাজর্ষিরধৃতিঃ স্বর্গাত্পতিতো হি মহাভিষঃ
যয়াতিঃ ক্ষীণপুণ্যশ্চ ধৃত্যা লোকানবাপ্তবান্

297.24

তপস্বিনাং ধর্মবতাং বিদুষাং চোপসেবনাৎ
প্রাপ্স্যসে বিপুলাং বুদ্ধিং তথা শ্রেয়োঽভিপত্স্যসে

297.25

স তু স্বভাবসংপন্নস্তচ্ছ্রুত্বা মুনিভাষিতম্
বিনিবর্ত্য মনঃ কামাদ্ধর্মে বুদ্ধিং চকার হ

Contains text from DharmicData, made available under the Open Database License (ODbL). Simple meanings are written by AI and can contain mistakes.