Utshovঅধ্যায় 296
296.1
বসিষ্ঠ উবাচ
অপ্রবুদ্ধমথাব্যক্তমিমং গুণবিধিং শৃণু
গুণান্ধারয়তে হ্যেষা সৃজত্যাক্ষিপতে তথা
296.2
অজস্রং ত্বিহ ক্রীডার্থং বিকুর্বন্তী নরাধিপ
আত্মানং বহুধা কৃত্বা তান্যেব চ বিচক্ষতে
296.3
এতদেবং বিকুর্বাণাং বুধ্যমানো ন বুধ্যতে
অব্যক্তবোধনাচ্চৈব বুধ্যমানং বদন্ত্যপি
296.4
ন ত্বেব বুধ্যতেঽব্যক্তং সগুণং বাথ নির্গুণম্
কদাচিত্ত্বেব খল্বেতদাহুরপ্রতিবুদ্ধকম্
296.5
বুধ্যতে যদি বাব্যক্তমেতদ্বৈ পঞ্চবিংশকম্
বুধ্যমানো ভবত্যেষ সঙ্গাত্মক ইতি শ্রুতিঃ
296.6
অনেনাপ্রতিবুদ্ধেতি বদন্ত্যব্যক্তমচ্যুতম্
অব্যক্তবোধনাচ্চৈব বুধ্যমানং বদন্ত্যুত
296.7
পঞ্চবিংশং মহাত্মানং ন চাসাবপি বুধ্যতে
ষড্বিংশং বিমলং বুদ্ধমপ্রমেয়ং সনাতনম্
296.8
সততং পঞ্চবিংশং চ চতুর্বিংশং চ বুধ্যতে
দৃশ্যাদৃশ্যে হ্যনুগতমুভাবেব মহাদ্যুতী
296.9
অব্যক্তং ন তু তদ্ব্রহ্ম বুধ্যতে তাত কেবলম্
কেবলং পঞ্চবিংশং চ চতুর্বিংশং ন পশ্যতি
296.10
বুধ্যমানো যদাত্মানমন্যোঽহমিতি মন্যতে
তদা প্রকৃতিমানেষ ভবত্যব্যক্তলোচনঃ
296.11
বুধ্যতে চ পরাং বুদ্ধিং বিশুদ্ধামমলাং যদা
ষড্বিংশো রাজশার্দূল তদা বুদ্ধত্বমাব্রজেৎ
296.12
ততস্ত্যজতি সোঽব্যক্তং সর্গপ্রলয়ধর্মিণম্
নির্গুণঃ প্রকৃতিং বেদ গুণয়ুক্তামচেতনাম্
296.13
ততঃ কেবলধর্মাসৌ ভবত্যব্যক্তদর্শনাৎ
কেবলেন সমাগম্য বিমুক্তোঽঽত্মানমাপ্নুয়াৎ
296.14
এতত্তত্তত্ত্বমিত্যাহুর্নিস্তত্ত্বমজরামরম্
তত্ত্বসংশ্রয়ণাদেতত্তত্ত্ববন্ন চ মানদ
পঞ্চবিংশতিতত্ত্বানি প্রবদন্তি মনীষিণঃ
296.15
ন চৈষ তত্ত্ববাংস্তাত নিস্তত্ত্বস্ত্বেষ বুদ্ধিমান্
এষ মুঞ্চতি তত্ত্বং হি ক্ষিপ্রং বুদ্ধস্য লক্ষণম্
296.16
ষড্বিংশোঽহমিতি প্রাজ্ঞো গৃহ্যমাণোঽজরামরঃ
কেবলেন বলেনৈব সমতাং যাত্যসংশয়ম্
296.17
ষড্বিংশেন প্রবুদ্ধেন বুধ্যমানোঽপ্যবুদ্ধিমান্
এতন্নানাত্বমিত্যুক্তং সাংখ্যশ্রুতিনিদর্শনাৎ
296.18
চেতনেন সমেতস্য পঞ্চবিংশতিকস্য চ
একত্বং বৈ ভবত্যস্য যদা বুদ্ধ্যা ন বুধ্যতে
296.19
বুধ্যমানোঽপ্রবুদ্ধেন সমতাং যাতি মৈথিল
সঙ্গধর্মা ভবত্যেষ নিঃসঙ্গাত্মা নরাধিপ
296.20
নিঃসঙ্গাত্মানমাসাদ্য ষড্বিংশকমজং বিদুঃ
বিভুস্ত্যজতি চাব্যক্তং যদা ত্বেতদ্বিবুধ্যতে
চতুর্বিংশমগাধং চ ষড্বিংশস্য প্রবোধনাৎ
296.21
এষ হ্যপ্রতিবুদ্ধশ্চ বুধ্যমানশ্চ তেঽনঘ
প্রোক্তো বুদ্ধশ্চ তত্ত্বেন যথাশ্রুতিনিদর্শনাৎ
নানাত্বৈকত্বমেতাবদ্দ্রষ্টব্যং শাস্ত্রদৃষ্টিভিঃ
296.22
মশকোদুম্বরে যদ্বদন্যত্বং তদ্বদেতয়োঃ
মত্স্যোঽম্ভসি যথা তদ্বদন্যত্বমুপলভ্যতে
296.23
এবমেবাবগন্তব্যং নানাত্বৈকত্বমেতয়োঃ
এতদ্বিমোক্ষ ইত্যুক্তমব্যক্তজ্ঞানসংহিতম্
296.24
পঞ্চবিংশতিকস্যাস্য যোঽয়ং দেহেষু বর্ততে
এষ মোক্ষয়িতব্যেতি প্রাহুরব্যক্তগোচরাৎ
296.25
সোঽয়মেবং বিমুচ্যেত নান্যথেতি বিনিশ্চয়ঃ
পরেণ পরধর্মা চ ভবত্যেষ সমেত্য বৈ
296.26
বিশুদ্ধধর্মা শুদ্ধেন বুদ্ধেন চ স বুদ্ধিমান্
বিমুক্তধর্মা মুক্তেন সমেত্য পুরুষর্ষভ
296.27
নিয়োগধর্মিণা চৈব নিয়োগাত্মা ভবত্যপি
বিমোক্ষিণা বিমোক্ষশ্চ সমেত্যেহ তথা ভবেৎ
296.28
শুচিকর্মা শুচিশ্চৈব ভবত্যমিতদীপ্তিমান্
বিমলাত্মা চ ভবতি সমেত্য বিমলাত্মনা
296.29
কেবলাত্মা তথা চৈব কেবলেন সমেত্য বৈ
স্বতন্ত্রশ্চ স্বতন্ত্রেণ স্বতন্ত্রত্বমবাপ্নুতে
296.30
এতাবদেতত্কথিতং ময়া তে; তথ্যং মহারাজ যথার্থতত্ত্বম্
অমত্সরত্বং প্রতিগৃহ্য চার্থং; সনাতনং ব্রহ্ম বিশুদ্ধমাদ্যম্
296.31
ন বেদনিষ্ঠস্য জনস্য রাজ;ন্প্রদেয়মেতত্পরমং ত্বয়া ভবেৎ
বিবিত্সমানায় বিবোধকারকং; প্রবোধহেতোঃ প্রণতস্য শাসনম্
296.32
ন দেয়মেতচ্চ তথানৃতাত্মনে; শঠায় ক্লীবায় ন জিহ্মবুদ্ধয়ে
ন পণ্ডিতজ্ঞানপরোপতাপিনে; দেয়ং ত্বয়েদং বিনিবোধ যাদৃশে
296.33
শ্রদ্ধান্বিতায়াথ গুণান্বিতায়; পরাপবাদাদ্বিরতায় নিত্যম্
বিশুদ্ধয়োগায় বুধায় চৈব; ক্রিয়াবতেঽথ ক্ষমিণে হিতায়
296.34
বিবিক্তশীলায় বিধিপ্রিয়ায়; বিবাদহীনায় বহুশ্রুতায়
বিজানতে চৈব ন চাহিতক্ষমে; দমে চ শক্তায় শমে চ দেহিনাম্
296.35
এতৈর্গুণৈর্হীনতমে ন দেয়;মেতত্পরং ব্রহ্ম বিশুদ্ধমাহুঃ
ন শ্রেয়সা যোক্ষ্যতি তাদৃশে কৃতং; ধর্মপ্রবক্তারমপাত্রদানাৎ
296.36
পৃথ্বীমিমাং যদ্যপি রত্নপূর্ণাং; দদ্যান্নদেয়ং ত্বিদমব্রতায়
জিতেন্দ্রিয়ায়ৈতদসংশয়ং তে; ভবেত্প্রদেয়ং পরমং নরেন্দ্র
296.37
করাল মা তে ভয়মস্তু কিংচি;দেতচ্ছ্রুতং ব্রহ্ম পরং ত্বয়াদ্য
যথাবদুক্তং পরমং পবিত্রং; নিঃশোকমত্যন্তমনাদিমধ্যম্
296.38
অগাধজন্মামরণং চ রাজ;ন্নিরাময়ং বীতভয়ং শিবং চ
সমীক্ষ্য মোহং ত্যজ চাদ্য সর্বং; জ্ঞানস্য তত্ত্বার্থমিদং বিদিত্বা
296.39
অবাপ্তমেতদ্ধি পুরা সনাতনা;দ্ধিরণ্যগর্ভাদ্গদতো নরাধিপ
প্রসাদ্য যত্নেন তমুগ্রতেজসং; সনাতনং ব্রহ্ম যথাদ্য বৈ ত্বয়া
296.40
পৃষ্টস্ত্বয়া চাস্মি যথা নরেন্দ্র; তথা ময়েদং ত্বয়ি চোক্তমদ্য
তথাবাপ্তং ব্রহ্মণো মে নরেন্দ্র; মহজ্জ্ঞানং মোক্ষবিদাং পুরাণম্
296.41
ভীষ্ম উবাচ
এতদুক্তং পরং ব্রহ্ম যস্মান্নাবর্ততে পুনঃ
পঞ্চবিংশো মহারাজ পরমর্ষিনিদর্শনাৎ
296.42
পুনরাবৃত্তিমাপ্নোতি পরং জ্ঞানমবাপ্য চ
নাববুধ্যতি তত্ত্বেন বুধ্যমানোঽজরামরঃ
296.43
এতন্নিঃশ্রেয়সকরং জ্ঞানানাং তে পরং ময়া
কথিতং তত্ত্বতস্তাত শ্রুত্বা দেবর্ষিতো নৃপ
296.44
হিরণ্যগর্ভাদৃষিণা বসিষ্ঠেন মহাত্মনা
বসিষ্ঠাদৃষিশার্দূলান্নারদোঽবাপ্তবানিদম্
296.45
নারদাদ্বিদিতং মহ্যমেতদ্ব্রহ্ম সনাতনম্
মা শুচঃ কৌরবেন্দ্র ত্বং শ্রুত্বৈতত্পরমং পদম্
296.46
যেন ক্ষরাক্ষরে বিত্তে ন ভয়ং তস্য বিদ্যতে
বিদ্যতে তু ভয়ং তস্য যো নৈতদ্বেত্তি পার্থিব
296.47
অবিজ্ঞানাচ্চ মূঢাত্মা পুনঃ পুনরুপদ্রবন্
প্রেত্য জাতিসহস্রাণি মরণান্তান্যুপাশ্নুতে
296.48
দেবলোকং তথা তির্যঙ্মানুষ্যমপি চাশ্নুতে
যদি শুধ্যতি কালেন তস্মাদজ্ঞানসাগরাৎ
296.49
অজ্ঞানসাগরো ঘোরো হ্যব্যক্তোঽগাধ উচ্যতে
অহন্যহনি মজ্জন্তি যত্র ভূতানি ভারত
296.50
যস্মাদগাধাদব্যক্তাদুত্তীর্ণস্ত্বং সনাতনাৎ
তস্মাত্ত্বং বিরজাশ্চৈব বিতমস্কশ্চ পার্থিব