Utshovঅধ্যায় 295
295.1
বসিষ্ঠ উবাচ
সাংখ্যদর্শনমেতাবদুক্তং তে নৃপসত্তম
বিদ্যাবিদ্যে ত্বিদানীং মে ত্বং নিবোধানুপূর্বশঃ
295.2
অবিদ্যামাহুরব্যক্তং সর্গপ্রলয়ধর্মি বৈ
সর্গপ্রলয়নির্মুক্তং বিদ্যাং বৈ পঞ্চবিংশকম্
295.3
পরস্পরমবিদ্যাং বৈ তন্নিবোধানুপূর্বশঃ
যথোক্তমৃষিভিস্তাত সাংখ্যস্যাস্য নিদর্শনম্
295.4
কর্মেন্দ্রিয়াণাং সর্বেষাং বিদ্যা বুদ্ধীন্দ্রিয়ং স্মৃতম্
বুদ্ধীন্দ্রিয়াণাং চ তথা বিশেষা ইতি নঃ শ্রুতম্
295.5
বিশেষাণাং মনস্তেষাং বিদ্যামাহুর্মনীষিণঃ
মনসঃ পঞ্চভূতানি বিদ্যা ইত্যভিচক্ষতে
295.6
অহংকারস্তু ভূতানাং পঞ্চানাং নাত্র সংশয়ঃ
অহংকারস্য চ তথা বুদ্ধির্বিদ্যা নরেশ্বর
295.7
বুদ্ধেঃ প্রকৃতিরব্যক্তং তত্ত্বানাং পরমেশ্বরম্
বিদ্যা জ্ঞেয়া নরশ্রেষ্ঠ বিধিশ্চ পরমঃ স্মৃতঃ
295.8
অব্যক্তস্য পরং প্রাহুর্বিদ্যাং বৈ পঞ্চবিংশকম্
সর্বস্য সর্বমিত্যুক্তং জ্ঞেয়ং জ্ঞানস্য পার্থিব
295.9
জ্ঞানমব্যক্তমিত্যুক্তং জ্ঞেয়ং বৈ পঞ্চবিংশকম্
তথৈব জ্ঞানমব্যক্তং বিজ্ঞাতা পঞ্চবিংশকঃ
295.10
বিদ্যাবিদ্যার্থতত্ত্বেন ময়োক্তং তে বিশেষতঃ
অক্ষরং চ ক্ষরং চৈব যদুক্তং তন্নিবোধ মে
295.11
উভাবেতৌ ক্ষরাবুক্তাবুভাবেতৌ চ নক্ষরৌ
কারণং তু প্রবক্ষ্যামি যথা খ্যাতৌ তু তত্ত্বতঃ
295.12
অনাদিনিধনাবেতাবুভাবেবেশ্বরৌ মতৌ
তত্ত্বসংজ্ঞাবুভাবেতৌ প্রোচ্যেতে জ্ঞানচিন্তকৈঃ
295.13
সর্গপ্রলয়ধর্মিত্বাদব্যক্তং প্রাহুরক্ষরম্
তদেতদ্গুণসর্গায় বিকুর্বাণং পুনঃ পুনঃ
295.14
গুণানাং মহদাদীনামুত্পদ্যতি পরস্পরম্
অধিষ্ঠানাত্ক্ষেত্রমাহুরেতত্তত্পঞ্চবিংশকম্
295.15
যদা তু গুণজালং তদব্যক্তাত্মনি সংক্ষিপেৎ
তদা সহ গুণৈস্তৈস্তু পঞ্চবিংশো বিলীয়তে
295.16
গুণা গুণেষু লীয়ন্তে তদৈকা প্রকৃতির্ভবেৎ
ক্ষেত্রজ্ঞোঽপি যদা তাত তত্ক্ষেত্রে সংপ্রলীয়তে
295.17
তদাক্ষরত্বং প্রকৃতির্গচ্ছতে গুণসংজ্ঞিতা
নির্গুণত্বং চ বৈদেহ গুণেষু প্রতিবর্তনাৎ
295.18
এবমেব চ ক্ষেত্রজ্ঞঃ ক্ষেত্রজ্ঞানপরিক্ষয়ে
প্রকৃত্যা নির্গুণস্ত্বেষ ইত্যেবমনুশুশ্রুম
295.19
ক্ষরো ভবত্যেষ যদা তদা গুণবতীমথ
প্রকৃতিং ত্বভিজানাতি নির্গুণত্বং তথাত্মনঃ
295.20
তদা বিশুদ্ধো ভবতি প্রকৃতেঃ পরিবর্জনাৎ
অন্যোঽহমন্যেয়মিতি যদা বুধ্যতি বুদ্ধিমান্
295.21
তদৈষোঽন্যত্বতামেতি ন চ মিশ্রত্বমাব্রজেৎ
প্রকৃত্যা চৈব রাজেন্দ্র নমিশ্রোঽন্যশ্চ দৃশ্যতে
295.22
যদা তু গুণজালং তত্প্রাকৃতং বিজুগুপ্সতে
পশ্যতে চাপরং পশ্যং তদা পশ্যন্ন সংজ্বরেৎ
295.23
কিং ময়া কৃতমেতাবদ্যোঽহং কালমিমং জনম্
মত্স্যো জালং হ্যবিজ্ঞানাদনুবর্তিতবাংস্তথা
295.24
অহমেব হি সংমোহাদন্যমন্যং জনাজ্জনম্
মত্স্যো যথোদকজ্ঞানাদনুবর্তিতবানিহ
295.25
মত্স্যোঽন্যত্বং যথাজ্ঞানাদুদকান্নাভিমন্যতে
আত্মানং তদ্বদজ্ঞানাদন্যত্বং চৈব বেদ্ম্যহম্
295.26
মমাস্তু ধিগবুদ্ধস্য যোঽহং মগ্নমিমং পুনঃ
অনুবর্তিতবান্মোহাদন্যমন্যং জনাজ্জনম্
295.27
অয়মত্র ভবেদ্বন্ধুরনেন সহ মোক্ষণম্
সাম্যমেকত্বমায়াতো যাদৃশস্তাদৃশস্ত্বহম্
295.28
তুল্যতামিহ পশ্যামি সদৃশোঽহমনেন বৈ
অয়ং হি বিমলো ব্যক্তমহমীদৃশকস্তথা
295.29
যোঽহমজ্ঞানসংমোহাদজ্ঞয়া সংপ্রবৃত্তবান্
সসঙ্গয়াহং নিঃসঙ্গঃ স্থিতঃ কালমিমং ত্বহম্
295.30
অনয়াহং বশীভূতঃ কালমেতং ন বুদ্ধবান্
উচ্চমধ্যমনীচানাং তামহং কথমাবসে
295.31
সমানয়ানয়া চেহ সহবাসমহং কথম্
গচ্ছাম্যবুদ্ধভাবত্বাদেষেদানীং স্থিরো ভবে
295.32
সহবাসং ন যাস্যামি কালমেতদ্ধি বঞ্চনাৎ
বঞ্চিতোঽস্ম্যনয়া যদ্ধি নির্বিকারো বিকারয়া
295.33
ন চায়মপরাধোঽস্যা অপরাধো হ্যয়ং মম
যোঽহমত্রাভবং সক্তঃ পরাঙ্মুখমুপস্থিতঃ
295.34
ততোঽস্মি বহুরূপাসু স্থিতো মূর্তিষ্বমূর্তিমান্
অমূর্তশ্চাপি মূর্তাত্মা মমত্বেন প্রধর্ষিতঃ
295.35
প্রকৃতেরনয়ত্বেন তাসু তাস্বিহ যোনিষু
নির্মমস্য মমত্বেন কিং কৃতং তাসু তাসু চ
যোনীষু বর্তমানেন নষ্টসংজ্ঞেন চেতসা
295.36
ন মমাত্রানয়া কার্যমহংকারকৃতাত্ময়া
আত্মানং বহুধা কৃত্বা যেয়ং ভূয়ো যুনক্তি মাম্
ইদানীমেষ বুদ্ধোঽস্মি নির্মমো নিরহংকৃতঃ
295.37
মমত্বমনয়া নিত্যমহংকারকৃতাত্মকম্
অপেত্যাহমিমাং হিত্বা সংশ্রয়িষ্যে নিরাময়ম্
295.38
অনেন সাম্যং যাস্যামি নানয়াহমচেতসা
ক্ষমং মম সহানেন নৈকত্বমনয়া সহ
এবং পরমসংবোধাত্পঞ্চবিংশোঽনুবুদ্ধবান্
295.39
অক্ষরত্বং নিয়চ্ছেত ত্যক্ত্বা ক্ষরমনাময়ম্
অব্যক্তং ব্যক্তধর্মাণং সগুণং নির্গুণং তথা
নির্গুণং প্রথমং দৃষ্ট্বা তাদৃগ্ভবতি মৈথিল
295.40
অক্ষরক্ষরয়োরেতদুক্তং তব নিদর্শনম্
ময়েহ জ্ঞানসংপন্নং যথাশ্রুতিনিদর্শনাৎ
295.41
নিঃসংদিগ্ধং চ সূক্ষ্মং চ বিবুদ্ধং বিমলং তথা
প্রবক্ষ্যামি তু তে ভূয়স্তন্নিবোধ যথাশ্রুতম্
295.42
সাংখ্যয়োগৌ ময়া প্রোক্তৌ শাস্ত্রদ্বয়নিদর্শনাৎ
যদেব শাস্ত্রং সাংখ্যোক্তং যোগদর্শনমেব তৎ
295.43
প্রবোধনকরং জ্ঞানং সাংখ্যানামবনীপতে
বিস্পষ্টং প্রোচ্যতে তত্র শিষ্যাণাং হিতকাম্যয়া
295.44
বৃহচ্চৈব হি তচ্ছাস্ত্রমিত্যাহুঃ কুশলা জনাঃ
অস্মিংশ্চ শাস্ত্রে যোগানাং পুনর্দধি পুনঃ শরঃ
295.45
পঞ্চবিংশাত্পরং তত্ত্বং ন পশ্যতি নরাধিপ
সাংখ্যানাং তু পরং তত্র যথাবদনুবর্ণিতম্
295.46
বুদ্ধমপ্রতিবুদ্ধং চ বুধ্যমানং চ তত্ত্বতঃ
বুধ্যমানং চ বুদ্ধং চ প্রাহুর্যোগনিদর্শনম্