Utshovঅধ্যায় 294
294.1
করালজনক উবাচ
নানাত্বৈকত্বমিত্যুক্তং ত্বয়ৈতদৃষিসত্তম
পশ্যামি চাভিসংদিগ্ধমেতয়োর্বৈ নিদর্শনম্
294.2
তথাপ্রবুদ্ধবুদ্ধাভ্যাং বুধ্যমানস্য চানঘ
স্থূলবুদ্ধ্যা ন পশ্যামি তত্ত্বমেতন্ন সংশয়ঃ
294.3
অক্ষরক্ষরয়োরুক্তং ত্বয়া যদপি কারণম্
তদপ্যস্থিরবুদ্ধিত্বাত্প্রনষ্টমিব মেঽনঘ
294.4
তদেতচ্ছ্রোতুমিচ্ছামি নানাত্বৈকত্বদর্শনম্
বুদ্ধমপ্রতিবুদ্ধং চ বুধ্যমানং চ তত্ত্বতঃ
294.5
বিদ্যাবিদ্যে চ ভগবন্নক্ষরং ক্ষরমেব চ
সাংখ্যং যোগং চ কার্ত্স্ন্যেন পৃথক্চৈবাপৃথক্চ হ
294.6
বসিষ্ঠ উবাচ
হন্ত তে সংপ্রবক্ষ্যামি যদেতদনুপৃচ্ছসি
যোগকৃত্যং মহারাজ পৃথগেব শৃণুষ্ব মে
294.7
যোগকৃত্যং তু যোগানাং ধ্যানমেব পরং বলম্
তচ্চাপি দ্বিবিধং ধ্যানমাহুর্বেদবিদো জনাঃ
294.8
একাগ্রতা চ মনসঃ প্রাণায়ামস্তথৈব চ
প্রাণায়ামস্তু সগুণো নির্গুণো মনসস্তথা
294.9
মূত্রোত্সর্গে পুরীষে চ ভোজনে চ নরাধিপ
ত্রিকালং নাভিয়ুঞ্জীত শেষং যুঞ্জীত তত্পরঃ
294.10
ইন্দ্রিয়াণীন্দ্রিয়ার্থেভ্যো নিবর্ত্য মনসা মুনিঃ
দশদ্বাদশভির্বাপি চতুর্বিংশাত্পরং ততঃ
294.11
তং চোদনাভির্মতিমানাত্মানং চোদয়েদথ
তিষ্ঠন্তমজরং তং তু যত্তদুক্তং মনীষিভিঃ
294.12
তৈশ্চাত্মা সততং জ্ঞেয় ইত্যেবমনুশুশ্রুম
দ্রব্যং হ্যহীনমনসো নান্যথেতি বিনিশ্চয়ঃ
294.13
বিমুক্তঃ সর্বসঙ্গেভ্যো লঘ্বাহারো জিতেন্দ্রিয়ঃ
পূর্বরাত্রে পরে চৈব ধারয়েত মনোঽঽত্মনি
294.14
স্থিরীকৃত্যেন্দ্রিয়গ্রামং মনসা মিথিলেশ্বর
মনো বুদ্ধ্যা স্থিরং কৃত্বা পাষাণ ইব নিশ্চলঃ
294.15
স্থাণুবচ্চাপ্যকম্পঃ স্যাদ্গিরিবচ্চাপি নিশ্চলঃ
বুধা বিধিবিধানজ্ঞাস্তদা যুক্তং প্রচক্ষতে
294.16
ন শৃণোতি ন চাঘ্রাতি ন রস্যতি ন পশ্যতি
ন চ স্পর্শং বিজানাতি ন সংকল্পয়তে মনঃ
294.17
ন চাভিমন্যতে কিংচিন্ন চ বুধ্যতি কাষ্ঠবৎ
তদা প্রকৃতিমাপন্নং যুক্তমাহুর্মনীষিণঃ
294.18
নিবাতে চ যথা দীপ্যন্দীপস্তদ্বত্স দৃশ্যতে
নিরিঙ্গশ্চাচলশ্চোর্ধ্বং ন তির্যগ্গতিমাপ্নুয়াৎ
294.19
তদা তমনুপশ্যেত যস্মিন্দৃষ্টে তু কথ্যতে
হৃদয়স্থোঽন্তরাত্মেতি জ্ঞেয়ো জ্ঞস্তাত মদ্বিধৈঃ
294.20
বিধূম ইব সপ্তার্চিরাদিত্য ইব রশ্মিমান্
বৈদ্যুতোঽগ্নিরিবাকাশে দৃশ্যতেঽঽত্মা তথাত্মনি
294.21
যং পশ্যন্তি মহাত্মানো ধৃতিমন্তো মনীষিণঃ
ব্রাহ্মণা ব্রহ্ময়োনিষ্ঠা হ্যয়োনিমমৃতাত্মকম্
294.22
তদেবাহুরণুভ্যোঽণু তন্মহদ্ভ্যো মহত্তরম্
তদন্তঃ সর্বভূতেষু ধ্রুবং তিষ্ঠন্ন দৃশ্যতে
294.23
বুদ্ধিদ্রব্যেণ দৃশ্যেত মনোদীপেন লোককৃৎ
মহতস্তমসস্তাত পারে তিষ্ঠন্নতামসঃ
294.24
স তমোনুদ ইত্যুক্তস্তত্ত্বজ্ঞৈর্বেদপারগৈঃ
বিমলো বিতমস্কশ্চ নির্লিঙ্গোঽলিঙ্গসংজ্ঞিতঃ
294.25
যোগমেতদ্ধি যোগানাং মন্যে যোগস্য লক্ষণম্
এবং পশ্যং প্রপশ্যন্তি আত্মানমজরং পরম্
294.26
যোগদর্শনমেতাবদুক্তং তে তত্ত্বতো ময়া
সাংখ্যজ্ঞানং প্রবক্ষ্যামি পরিসংখ্যানিদর্শনম্
294.27
অব্যক্তমাহুঃ প্রকৃতিং পরাং প্রকৃতিবাদিনঃ
তস্মান্মহত্সমুত্পন্নং দ্বিতীয়ং রাজসত্তম
294.28
অহংকারস্তু মহতস্তৃতীয়মিতি নঃ শ্রুতম্
পঞ্চ ভূতান্যহংকারাদাহুঃ সাংখ্যানুদর্শিনঃ
294.29
এতাঃ প্রকৃতয়স্ত্বষ্টৌ বিকারাশ্চাপি ষোডশ
পঞ্চ চৈব বিশেষা বৈ তথা পঞ্চেন্দ্রিয়াণি চ
294.30
এতাবদেব তত্ত্বানাং সাংখ্যমাহুর্মনীষিণঃ
সাংখ্যে বিধিবিধানজ্ঞা নিত্যং সাংখ্যপথে রতাঃ
294.31
যস্মাদ্যদভিজায়েত তত্তত্রৈব প্রলীয়তে
লীয়ন্তে প্রতিলোমানি সৃজ্যন্তে চান্তরাত্মনা
294.32
অনুলোমেন জায়ন্তে লীয়ন্তে প্রতিলোমতঃ
গুণা গুণেষু সততং সাগরস্যোর্ময়ো যথা
294.33
সর্গপ্রলয় এতাবান্প্রকৃতের্নৃপসত্তম
একত্বং প্রলয়ে চাস্য বহুত্বং চ যদাসৃজৎ
এবমেব চ রাজেন্দ্র বিজ্ঞেয়ং জ্ঞেয়চিন্তকৈঃ
294.34
অধিষ্ঠাতারমব্যক্তমস্যাপ্যেতন্নিদর্শনম্
একত্বং চ বহুত্বং চ প্রকৃতেরনু তত্ত্ববান্
একত্বং প্রলয়ে চাস্য বহুত্বং চ প্রবর্তনাৎ
294.35
বহুধাত্মা প্রকুর্বীত প্রকৃতিং প্রসবাত্মিকাম্
তচ্চ ক্ষেত্রং মহানাত্মা পঞ্চবিংশোঽধিতিষ্ঠতি
294.36
অধিষ্ঠাতেতি রাজেন্দ্র প্রোচ্যতে যতিসত্তমৈঃ
অধিষ্ঠানাদধিষ্ঠাতা ক্ষেত্রাণামিতি নঃ শ্রুতম্
294.37
ক্ষেত্রং জানাতি চাব্যক্তং ক্ষেত্রজ্ঞ ইতি চোচ্যতে
অব্যক্তিকে পুরে শেতে পুরুষশ্চেতি কথ্যতে
294.38
অন্যদেব চ ক্ষেত্রং স্যাদন্যঃ ক্ষেত্রজ্ঞ উচ্যতে
ক্ষেত্রমব্যক্তমিত্যুক্তং জ্ঞাতা বৈ পঞ্চবিংশকঃ
294.39
অন্যদেব চ জ্ঞানং স্যাদন্যজ্জ্ঞেয়ং তদুচ্যতে
জ্ঞানমব্যক্তমিত্যুক্তং জ্ঞেয়ো বৈ পঞ্চবিংশকঃ
294.40
অব্যক্তং ক্ষেত্রমিত্যুক্তং তথা সত্ত্বং তথেশ্বরম্
অনীশ্বরমতত্ত্বং চ তত্ত্বং তত্পঞ্চবিংশকম্
294.41
সাংখ্যদর্শনমেতাবত্পরিসংখ্যানদর্শনম্
সাংখ্যং প্রকুরুতে চৈব প্রকৃতিং চ প্রচক্ষতে
294.42
তত্ত্বানি চ চতুর্বিংশত্পরিসংখ্যায় তত্ত্বতঃ
সাংখ্যাঃ সহ প্রকৃত্যা তু নিস্তত্ত্বঃ পঞ্চবিংশকঃ
294.43
পঞ্চবিংশোঽপ্রবুদ্ধাত্মা বুধ্যমান ইতি স্মৃতঃ
যদা তু বুধ্যতেঽঽত্মানং তদা ভবতি কেবলঃ
294.44
সম্যগ্দর্শনমেতাবদ্ভাষিতং তব তত্ত্বতঃ
এবমেতদ্বিজানন্তঃ সাম্যতাং প্রতিয়ান্ত্যুত
294.45
সম্যঙ্নিদর্শনং নাম প্রত্যক্ষং প্রকৃতেস্তথা
গুণতত্ত্বান্যথৈতানি নির্গুণোঽন্যস্তথা ভবেৎ
294.46
ন ত্বেবং বর্তমানানামাবৃত্তির্বিদ্যতে পুনঃ
বিদ্যতেঽক্ষরভাবত্বাদপরস্পরমব্যয়ম্
294.47
পশ্যেরন্নেকমতয়ো ন সম্যক্তেষু দর্শনম্
তেঽব্যক্তং প্রতিপদ্যন্তে পুনঃ পুনররিংদম
294.48
সর্বমেতদ্বিজানন্তো ন সর্বস্য প্রবোধনাৎ
ব্যক্তীভূতা ভবিষ্যন্তি ব্যক্তস্য বশবর্তিনঃ
294.49
সর্বমব্যক্তমিত্যুক্তমসর্বঃ পঞ্চবিংশকঃ
য এনমভিজানন্তি ন ভয়ং তেষু বিদ্যতে