Utshovঅধ্যায় 293
293.1
বসিষ্ঠ উবাচ
এবমপ্রতিবুদ্ধত্বাদবুদ্ধজনসেবনাৎ
সর্গকোটিসহস্রাণি পতনান্তানি গচ্ছতি
293.2
ধাম্না ধামসহস্রাণি মরণান্তানি গচ্ছতি
তির্যগ্যোনৌ মনুষ্যত্বে দেবলোকে তথৈব চ
293.3
চন্দ্রমা ইব কোশানাং পুনস্তত্র সহস্রশঃ
লীয়তেঽপ্রতিবুদ্ধত্বাদেবমেষ হ্যবুদ্ধিমান্
293.4
কলাঃ পঞ্চদশা যোনিস্তদ্ধাম ইতি পঠ্যতে
নিত্যমেতদ্বিজানীহি সোমঃ ষোডশমী কলা
293.5
কলায়াং জায়তেঽজস্রং পুনঃ পুনরবুদ্ধিমান্
ধাম তস্যোপয়ুঞ্জন্তি ভূয় এব তু জায়তে
293.6
ষোডশী তু কলা সূক্ষ্মা স সোম উপধার্যতাম্
ন তূপয়ুজ্যতে দেবৈর্দেবানুপয়ুনক্তি সা
293.7
এবং তাং ক্ষপয়িত্বা হি জায়তে নৃপসত্তম
সা হ্যস্য প্রকৃতির্দৃষ্টা তত্ক্ষয়ান্মোক্ষ উচ্যতে
293.8
তদেবং ষোডশকলং দেহমব্যক্তসংজ্ঞকম্
মমায়মিতি মন্বানস্তত্রৈব পরিবর্ততে
293.9
পঞ্চবিংশস্তথৈবাত্মা তস্যৈবা প্রতিবোধনাৎ
বিমলস্য বিশুদ্ধস্য শুদ্ধানিলনিষেবণাৎ
293.10
অশুদ্ধ এব শুদ্ধাত্মা তাদৃগ্ভবতি পার্থিব
অবুদ্ধসেবনাচ্চাপি বুদ্ধোঽপ্যবুধতাং ব্রজেৎ
293.11
তথৈবাপ্রতিবুদ্ধোঽপি জ্ঞেয়ো নৃপতিসত্তম
প্রকৃতেস্ত্রিগুণায়াস্তু সেবনাত্প্রাকৃতো ভবেৎ
293.12
করালজনক উবাচ
অক্ষরক্ষরয়োরেষ দ্বয়োঃ সংবন্ধ ইষ্যতে
স্ত্রীপুংসোর্বাপি ভগবন্সংবন্ধস্তদ্বদুচ্যতে
293.13
ঋতে ন পুরুষেণেহ স্ত্রী গর্ভং ধারয়ত্যুত
ঋতে স্ত্রিয়ং ন পুরুষো রূপং নির্বর্তয়েত্তথা
293.14
অন্যোন্যস্যাভিসংবন্ধাদন্যোন্যগুণসংশ্রয়াৎ
রূপং নির্বর্তয়ত্যেতদেবং সর্বাসু যোনিষু
293.15
রত্যর্থমভিসংরোধাদন্যোন্যগুণসংশ্রয়াৎ
ঋতৌ নির্বর্ততে রূপং তদ্বক্ষ্যামি নিদর্শনম্
293.16
যে গুণাঃ পুরুষস্যেহ যে চ মাতৃগুণাস্তথা
অস্থি স্নায়ু চ মজ্জা চ জানীমঃ পিতৃতো দ্বিজ
293.17
ত্বঙ্মাংসং শোণিতং চৈব মাতৃজান্যপি শুশ্রুম
এবমেতদ্দ্বিজশ্রেষ্ঠ বেদশাস্ত্রেষু পঠ্যতে
293.18
প্রমাণং যচ্চ বেদোক্তং শাস্ত্রোক্তং যচ্চ পঠ্যতে
বেদশাস্ত্রপ্রমাণং চ প্রমাণং তত্সনাতনম্
293.19
এবমেবাভিসংবদ্ধৌ নিত্যং প্রকৃতিপূরুষৌ
পশ্যামি ভগবংস্তস্মান্মোক্ষধর্মো ন বিদ্যতে
293.20
অথ বানন্তরকৃতং কিংচিদেব নিদর্শনম্
তন্মমাচক্ষ্ব তত্ত্বেন প্রত্যক্ষো হ্যসি সর্বথা
293.21
মোক্ষকামা বয়ং চাপি কাঙ্ক্ষামো যদনাময়ম্
অদেহমজরং দিব্যমতীন্দ্রিয়মনীশ্বরম্
293.22
বসিষ্ঠ উবাচ
যদেতদুক্তং ভবতা বেদশাস্ত্রনিদর্শনম্
এবমেতদ্যথা চৈতন্ন গৃহ্ণাতি তথা ভবান্
293.23
ধার্যতে হি ত্বয়া গ্রন্থ উভয়োর্বেদশাস্ত্রয়োঃ
ন তু গ্রন্থস্য তত্ত্বজ্ঞো যথাবত্ত্বং নরেশ্বর
293.24
যো হি বেদে চ শাস্ত্রে চ গ্রন্থধারণতত্পরঃ
ন চ গ্রন্থার্থতত্ত্বজ্ঞস্তস্য তদ্ধারণং বৃথা
293.25
ভারং স বহতে তস্য গ্রন্থস্যার্থং ন বেত্তি যঃ
যস্তু গ্রন্থার্থতত্ত্বজ্ঞো নাস্য গ্রন্থাগমো বৃথা
293.26
গ্রন্থস্যার্থং চ পৃষ্টঃ সংস্তাদৃশো বক্তুমর্হতি
যথা তত্ত্বাভিগমনাদর্থং তস্য স বিন্দতি
293.27
যস্তু সংসত্সু কথয়েদ্গ্রন্থার্থং স্থূলবুদ্ধিমান্
স কথং মন্দবিজ্ঞানো গ্রন্থং বক্ষ্যতি নির্ণয়াৎ
293.28
নির্ণয়ং চাপি ছিদ্রাত্মা ন তং বক্ষ্যতি তত্ত্বতঃ
সোপহাসাত্মতামেতি যস্মাচ্চৈবাত্মবানপি
293.29
তস্মাত্ত্বং শৃণু রাজেন্দ্র যথৈতদনুদৃশ্যতে
যাথাতথ্যেন সাংখ্যেষু যোগেষু চ মহাত্মসু
293.30
যদেব যোগাঃ পশ্যন্তি সাংখ্যৈস্তদনুগম্যতে
একং সাংখ্যং চ যোগং চ যঃ পশ্যতি স বুদ্ধিমান্
293.31
ত্বঙ্মাংসং রুধিরং মেদঃ পিত্তং মজ্জাস্থি স্নায়ু চ
এতদৈন্দ্রিয়কং তাত যদ্ভবানিদমাহ বৈ
293.32
দ্রব্যাদ্দ্রব্যস্য নিষ্পত্তিরিন্দ্রিয়াদিন্দ্রিয়ং তথা
দেহাদ্দেহমবাপ্নোতি বীজাদ্বীজং তথৈব চ
293.33
নিরিন্দ্রিয়স্যাবীজস্য নির্দ্রব্যস্যাস্য দেহিনঃ
কথং গুণা ভবিষ্যন্তি নির্গুণত্বান্মহাত্মনঃ
293.34
গুণা গুণেষু জায়ন্তে তত্রৈব নিবিশন্তি চ
এবং গুণাঃ প্রকৃতিতো জায়ন্তে চ ন সন্তি চ
293.35
ত্বঙ্মাংসং রুধিরং মেদঃ পিত্তং মজ্জাস্থি স্নায়ু চ
অষ্টৌ তান্যথ শুক্রেণ জানীহি প্রাকৃতানি বৈ
293.36
পুমাংশ্চৈবাপুমাংশ্চৈব ত্রৈলিঙ্গ্যং প্রাকৃতং স্মৃতম্
নৈব পুমান্পুমাংশ্চৈব স লিঙ্গীত্যভিধীয়তে
293.37
অলিঙ্গা প্রকৃতির্লিঙ্গৈরুপলভ্যতি সাত্মজৈঃ
যথা পুষ্পফলৈর্নিত্যমৃতবো মূর্তয়স্তথা
293.38
এবমপ্যনুমানেন হ্যলিঙ্গমুপলভ্যতে
পঞ্চবিংশতিমস্তাত লিঙ্গেষ্বনিয়তাত্মকঃ
293.39
অনাদিনিধনোঽনন্তঃ সর্বদর্শী নিরাময়ঃ
কেবলং ত্বভিমানিত্বাদ্গুণেষ্বগুণ উচ্যতে
293.40
গুণা গুণবতঃ সন্তি নির্গুণস্য কুতো গুণাঃ
তস্মাদেবং বিজানন্তি যে জনা গুণদর্শিনঃ
293.41
যদা ত্বেষ গুণান্সর্বান্প্রাকৃতানভিমন্যতে
তদা স গুণবানেব পরমেণানুপশ্যতি
293.42
যত্তদ্বুদ্ধেঃ পরং প্রাহুঃ সাংখ্যা যোগাশ্চ সর্বশঃ
বুধ্যমানং মহাপ্রাজ্ঞমবুদ্ধপরিবর্জনাৎ
293.43
অপ্রবুদ্ধমথাব্যক্তং সগুণং প্রাহুরীশ্বরম্
নির্গুণং চেশ্বরং নিত্যমধিষ্ঠাতারমেব চ
293.44
প্রকৃতেশ্চ গুণানাং চ পঞ্চবিংশতিকং বুধাঃ
সাংখ্যয়োগে চ কুশলা বুধ্যন্তে পরমৈষিণঃ
293.45
যদা প্রবুদ্ধাস্ত্বব্যক্তমবস্থাজন্মভীরবঃ
বুধ্যমানং প্রবুধ্যন্তি গময়ন্তি সমং তদা
293.46
এতন্নিদর্শনং সম্যগসম্যগনুদর্শনম্
বুধ্যমানাপ্রবুদ্ধাভ্যাং পৃথক্পৃথগরিংদম
293.47
পরস্পরেণৈতদুক্তং ক্ষরাক্ষরনিদর্শনম্
একত্বমক্ষরং প্রাহুর্নানাত্বং ক্ষরমুচ্যতে
293.48
পঞ্চবিংশতিনিষ্ঠোঽয়ং যদাসম্যক্প্রবর্ততে
একত্বং দর্শনং চাস্য নানাত্বং চাপ্যদর্শনম্
293.49
তত্ত্বনিস্তত্ত্বয়োরেতত্পৃথগেব নিদর্শনম্
পঞ্চবিংশতিসর্গং তু তত্ত্বমাহুর্মনীষিণঃ
293.50
নিস্তত্ত্বং পঞ্চবিংশস্য পরমাহুর্নিদর্শনম্
বর্গস্য বর্গমাচারং তত্ত্বং তত্ত্বাত্সনাতনম্