Utshovঅধ্যায় 292
292.1
বসিষ্ঠ উবাচ
এবমপ্রতিবুদ্ধত্বাদবুদ্ধমনুবর্ততে
দেহাদ্দেহসহস্রাণি তথা সমভিপদ্যতে
292.2
তির্যগ্যোনিসহস্রেষু কদাচিদ্দেবতাস্বপি
উপপদ্যতি সংয়োগাদ্গুণৈঃ সহ গুণক্ষয়াৎ
292.3
মানুষত্বাদ্দিবং যাতি দিবো মানুষ্যমেব চ
মানুষ্যান্নিরয়স্থানমানন্ত্যং প্রতিপদ্যতে
292.4
কোশকারো যথাত্মানং কীটঃ সমনুরুন্ধতি
সূত্রতন্তুগুণৈর্নিত্যং তথায়মগুণো গুণৈঃ
292.5
দ্বংদ্বমেতি চ নির্দ্বংদ্বস্তাসু তাস্বিহ যোনিষু
শীর্ষরোগেঽক্ষিরোগে চ দন্তশূলে গলগ্রহে
292.6
জলোদরেঽর্শসাং রোগে জ্বরগণ্ডবিষূচিকে
শ্বিত্রে কুষ্ঠেঽগ্নিদাহে চ সিধ্মাপস্মারয়োরপি
292.7
যানি চান্যানি দ্বংদ্বানি প্রাকৃতানি শরীরিষু
উত্পদ্যন্তে বিচিত্রাণি তান্যেষোঽপ্যভিমন্যতে
অভিমন্যত্যভীমানাত্তথৈব সুকৃতান্যপি
292.8
একবাসাশ্চ দুর্বাসাঃ শায়ী নিত্যমধস্তথা
মণ্ডূকশায়ী চ তথা বীরাসনগতস্তথা
292.9
চীরধারণমাকাশে শয়নং স্থানমেব চ
ইষ্টকাপ্রস্তরে চৈব কণ্টকপ্রস্তরে তথা
292.10
ভস্মপ্রস্তরশায়ী চ ভূমিশয্যানুলেপনঃ
বীরস্থানাম্বুপঙ্কে চ শয়নং ফলকেষু চ
292.11
বিবিধাসু চ শয্যাসু ফলগৃদ্ধ্যান্বিতোঽফলঃ
মুঞ্জমেখলনগ্নত্বং ক্ষৌমকৃষ্ণাজিনানি চ
292.12
শাণীবালপরীধানো ব্যাঘ্রচর্মপরিচ্ছদঃ
সিংহচর্মপরীধানঃ পট্টবাসাস্তথৈব চ
292.13
কীটকাবসনশ্চৈব চীরবাসাস্তথৈব চ
বস্ত্রাণি চান্যানি বহূন্যভিমন্যত্যবুদ্ধিমান্
292.14
ভোজনানি বিচিত্রাণি রত্নানি বিবিধানি চ
একবস্ত্রান্তরাশিত্বমেককালিকভোজনম্
292.15
চতুর্থাষ্টমকালশ্চ ষষ্ঠকালিক এব চ
ষড্রাত্রভোজনশ্চৈব তথৈবাষ্টাহভোজনঃ
292.16
সপ্তরাত্রদশাহারো দ্বাদশাহার এব চ
মাসোপবাসী মূলাশী ফলাহারস্তথৈব চ
292.17
বায়ুভক্ষোঽম্বুপিণ্যাকগোময়াদন এব চ
গোমূত্রভোজনশ্চৈব শাকপুষ্পাদ এব চ
292.18
শৈবালভোজনশ্চৈব তথাচামেন বর্তয়ন্
বর্তয়ঞ্শীর্ণপর্ণৈশ্চ প্রকীর্ণফলভোজনঃ
292.19
বিবিধানি চ কৃচ্ছ্রাণি সেবতে সুখকাঙ্ক্ষয়া
চান্দ্রায়ণানি বিধিবল্লিঙ্গানি বিবিধানি চ
292.20
চাতুরাশ্রম্যপন্থানমাশ্রয়ত্যাশ্রমানপি
উপাসীনশ্চ পাষণ্ডান্গুহাঃ শৈলাংস্তথৈব চ
292.21
বিবিক্তাশ্চ শিলাছায়াস্তথা প্রস্রবণানি চ
বিবিধানি চ জপ্যানি বিবিধানি ব্রতানি চ
292.22
নিয়মান্সুবিচিত্রাংশ্চ বিবিধানি তপাংসি চ
যজ্ঞাংশ্চ বিবিধাকারান্বিধীংশ্চ বিবিধাংস্তথা
292.23
বণিক্পথং দ্বিজক্ষত্রং বৈশ্যশূদ্রং তথৈব চ
দানং চ বিবিধাকারং দীনান্ধকৃপণেষ্বপি
292.24
অভিমন্যত্যসংবোধাত্তথৈব ত্রিবিধান্গুণান্
সত্ত্বং রজস্তমশ্চৈব ধর্মার্থৌ কাম এব চ
প্রকৃত্যাত্মানমেবাত্মা এবং প্রবিভজত্যুত
292.25
স্বধাকারবষট্কারৌ স্বাহাকারনমস্ক্রিয়াঃ
যাজনাধ্যাপনং দানং তথৈবাহুঃ প্রতিগ্রহম্
যজনাধ্যয়নে চৈব যচ্চান্যদপি কিংচন
292.26
জন্মমৃত্যুবিবাদে চ তথা বিশসনেঽপি চ
শুভাশুভময়ং সর্বমেতদাহুঃ ক্রিয়াপথম্
292.27
প্রকৃতিঃ কুরুতে দেবী মহাপ্রলয়মেব চ
দিবসান্তে গুণানেতানভ্যেত্যৈকোঽবতিষ্ঠতি
292.28
রশ্মিজালমিবাদিত্যস্তত্কালেন নিয়চ্ছতি
এবমেষোঽসকৃত্সর্বং ক্রীডার্থমভিমন্যতে
292.29
আত্মরূপগুণানেতান্বিবিধান্হৃদয়প্রিয়ান্
এবমেব বিকুর্বাণঃ সর্গপ্রলয়কর্মণী
292.30
ক্রিয়াক্রিয়াপথে রক্তস্ত্রিগুণস্ত্রিগুণাতিগঃ
ক্রিয়াক্রিয়াপথোপেতস্তথা তদিতি মন্যতে
292.31
এবং দ্বংদ্বান্যথৈতানি বর্তন্তে মম নিত্যশঃ
মমৈবৈতানি জায়ন্তে বাধন্তে তানি মামিতি
292.32
নিস্তর্তব্যান্যথৈতানি সর্বাণীতি নরাধিপ
মন্যতেঽয়ং হ্যবুদ্ধিত্বাত্তথৈব সুকৃতান্যপি
292.33
ভোক্তব্যানি ময়ৈতানি দেবলোকগতেন বৈ
ইহৈব চৈনং ভোক্ষ্যামি শুভাশুভফলোদয়ম্
292.34
সুখমেব চ কর্তব্যং সকৃত্কৃত্বা সুখং মম
যাবদন্তং চ মে সৌখ্যং জাত্যাং জাত্যাং ভবিষ্যতি
292.35
ভবিষ্যতি চ মে দুঃখং কৃতেনেহাপ্যনন্তকম্
মহদ্দুঃখং হি মানুষ্যং নিরয়ে চাপি মজ্জনম্
292.36
নিরয়াচ্চাপি মানুষ্যং কালেনৈষ্যাম্যহং পুনঃ
মনুষ্যত্বাচ্চ দেবত্বং দেবত্বাত্পৌরুষং পুনঃ
মনুষ্যত্বাচ্চ নিরয়ং পর্যায়েণোপগচ্ছতি
292.37
য এবং বেত্তি বৈ নিত্যং নিরাত্মাত্মগুণৈর্বৃতঃ
তেন দেবমনুষ্যেষু নিরয়ে চোপপদ্যতে
292.38
মমত্বেনাবৃতো নিত্যং তত্রৈব পরিবর্ততে
সর্গকোটিসহস্রাণি মরণান্তাসু মূর্তিষু
292.39
য এবং কুরুতে কর্ম শুভাশুভফলাত্মকম্
স এব ফলমশ্নাতি ত্রিষু লোকেষু মূর্তিমান্
292.40
প্রকৃতিঃ কুরুতে কর্ম শুভাশুভফলাত্মকম্
প্রকৃতিশ্চ তদশ্নাতি ত্রিষু লোকেষু কামগা
292.41
তির্যগ্যোনৌ মনুষ্যত্বে দেবলোকে তথৈব চ
ত্রীণি স্থানানি চৈতানি জানীয়াত্প্রাকৃতানি হ
292.42
অলিঙ্গাং প্রকৃতিং ত্বাহুর্লিঙ্গৈরনুমিমীমহে
তথৈব পৌরুষং লিঙ্গমনুমানাদ্ধি পশ্যতি
292.43
স লিঙ্গান্তরমাসাদ্য প্রাকৃতং লিঙ্গমব্রণম্
ব্রণদ্বারাণ্যধিষ্ঠায় কর্মাণ্যাত্মনি মন্যতে
292.44
শ্রোত্রাদীনি তু সর্বাণি পঞ্চ কর্মেন্দ্রিয়াণি চ
বাগাদীনি প্রবর্তন্তে গুণেষ্বেব গুণৈঃ সহ
অহমেতানি বৈ কুর্বন্মমৈতানীন্দ্রিয়াণি চ
292.45
নিরিন্দ্রিয়োঽভিমন্যেত ব্রণবানস্মি নির্ব্রণঃ
অলিঙ্গো লিঙ্গমাত্মানমকালঃ কালমাত্মনঃ
292.46
অসত্ত্বং সত্ত্বমাত্মানমতত্ত্বং তত্ত্বমাত্মনঃ
অমৃত্যুর্মৃত্যুমাত্মানমচরশ্চরমাত্মনঃ
292.47
অক্ষেত্রঃ ক্ষেত্রমাত্মানমসর্গঃ সর্গমাত্মনঃ
অতপাস্তপ আত্মানমগতির্গতিমাত্মনঃ
292.48
অভবো ভবমাত্মানমভয়ো ভয়মাত্মনঃ
অক্ষরঃ ক্ষরমাত্মানমবুদ্ধিস্ত্বভিমন্যতে