Utshovঅধ্যায় 291
291.1
যুধিষ্ঠির উবাচ
কিং তদক্ষরমিত্যুক্তং যস্মান্নাবর্ততে পুনঃ
কিং চ তত্ক্ষরমিত্যুক্তং যস্মাদাবর্ততে পুনঃ
291.2
অক্ষরক্ষরয়োর্ব্যক্তিমিচ্ছাম্যরিনিষূদন
উপলব্ধুং মহাবাহো তত্ত্বেন কুরুনন্দন
291.3
ত্বং হি জ্ঞাননিধির্বিপ্রৈরুচ্যসে বেদপারগৈঃ
ঋষিভিশ্চ মহাভাগৈর্যতিভিশ্চ মহাত্মভিঃ
291.4
শেষমল্পং দিনানাং তে দক্ষিণায়নভাস্করে
আবৃত্তে ভগবত্যর্কে গন্তাসি পরমাং গতিম্
291.5
ত্বয়ি প্রতিগতে শ্রেয়ঃ কুতঃ শ্রোষ্যামহে বয়ম্
কুরুবংশপ্রদীপস্ত্বং জ্ঞানদ্রব্যেণ দীপ্যসে
291.6
তদেতচ্ছ্রোতুমিচ্ছামি ত্বত্তঃ কুরুকুলোদ্বহ
ন তৃপ্যামীহ রাজেন্দ্র শৃণ্বন্নমৃতমীদৃশম্
291.7
ভীষ্ম উবাচ
অত্র তে বর্তয়িষ্যেঽহমিতিহাসং পুরাতনম্
বসিষ্ঠস্য চ সংবাদং করালজনকস্য চ
291.8
বসিষ্ঠং শ্রেষ্ঠমাসীনমৃষীণাং ভাস্করদ্যুতিম্
পপ্রচ্ছ জনকো রাজা জ্ঞানং নৈঃশ্রেয়সং পরম্
291.9
পরমধ্যাত্মকুশলমধ্যাত্মগতিনিশ্চয়ম্
মৈত্রাবরুণিমাসীনমভিবাদ্য কৃতাঞ্জলিঃ
291.10
স্বক্ষরং প্রশ্রিতং বাক্যং মধুরং চাপ্যনুল্বণম্
পপ্রচ্ছর্ষিবরং রাজা করালজনকঃ পুরা
291.11
ভগবঞ্শ্রোতুমিচ্ছামি পরং ব্রহ্ম সনাতনম্
যস্মান্ন পুনরাবৃত্তিমাপ্নুবন্তি মনীষিণঃ
291.12
যচ্চ তত্ক্ষরমিত্যুক্তং যত্রেদং ক্ষরতে জগৎ
যচ্চাক্ষরমিতি প্রোক্তং শিবং ক্ষেম্যমনাময়ম্
291.13
বসিষ্ঠ উবাচ
শ্রূয়তাং পৃথিবীপাল ক্ষরতীদং যথা জগৎ
যন্ন ক্ষরতি পূর্বেণ যাবত্কালেন চাপ্যথ
291.14
যুগং দ্বাদশসাহস্রং কল্পং বিদ্ধি চতুর্গুণম্
দশকল্পশতাবৃত্তং তদহর্ব্রাহ্মমুচ্যতে
রাত্রিশ্চৈতাবতী রাজন্যস্যান্তে প্রতিবুধ্যতে
291.15
সৃজত্যনন্তকর্মাণং মহান্তং ভূতমগ্রজম্
মূর্তিমন্তমমূর্তাত্মা বিশ্বং শংভুঃ স্বয়ংভুবঃ
অণিমা লঘিমা প্রাপ্তিরীশানং জ্যোতিরব্যয়ম্
291.16
সর্বতঃপাণিপাদান্তং সর্বতোক্ষিশিরোমুখম্
সর্বতঃশ্রুতিমল্লোকে সর্বমাবৃত্য তিষ্ঠতি
291.17
হিরণ্যগর্ভো ভগবানেষ বুদ্ধিরিতি স্মৃতঃ
মহানিতি চ যোগেষু বিরিঞ্চ ইতি চাপ্যুত
291.18
সাংখ্যে চ পঠ্যতে শাস্ত্রে নামভির্বহুধাত্মকঃ
বিচিত্ররূপো বিশ্বাত্মা একাক্ষর ইতি স্মৃতঃ
291.19
বৃতং নৈকাত্মকং যেন কৃত্স্নং ত্রৈলোক্যমাত্মনা
তথৈব বহুরূপত্বাদ্বিশ্বরূপ ইতি স্মৃতঃ
291.20
এষ বৈ বিক্রিয়াপন্নঃ সৃজত্যাত্মানমাত্মনা
অহংকারং মহাতেজাঃ প্রজাপতিমহংকৃতম্
291.21
অব্যক্তাদ্ব্যক্তমুত্পন্নং বিদ্যাসর্গং বদন্তি তম্
মহান্তং চাপ্যহংকারমবিদ্যাসর্গমেব চ
291.22
অবিধিশ্চ বিধিশ্চৈব সমুত্পন্নৌ তথৈকতঃ
বিদ্যাবিদ্যেতি বিখ্যাতে শ্রুতিশাস্ত্রার্থচিন্তকৈঃ
291.23
ভূতসর্গমহংকারাত্তৃতীয়ং বিদ্ধি পার্থিব
অহংকারেষু ভূতেষু চতুর্থং বিদ্ধি বৈকৃতম্
291.24
বায়ুর্জ্যোতিরথাকাশমাপোঽথ পৃথিবী তথা
শব্দঃ স্পর্শশ্চ রূপং চ রসো গন্ধস্তথৈব চ
291.25
এবং যুগপদুত্পন্নং দশবর্গমসংশয়ম্
পঞ্চমং বিদ্ধি রাজেন্দ্র ভৌতিকং সর্গমর্থবৎ
291.26
শ্রোত্রং ত্বক্চক্ষুষী জিহ্বা ঘ্রাণমেব চ পঞ্চমম্
বাক্চ হস্তৌ চ পাদৌ চ পায়ুর্মেঢ্রং তথৈব চ
291.27
বুদ্ধীন্দ্রিয়াণি চৈতানি তথা কর্মেন্দ্রিয়াণি চ
সংভূতানীহ যুগপন্মনসা সহ পার্থিব
291.28
এষা তত্ত্বচতুর্বিংশা সর্বাকৃতিষু বর্ততে
যাং জ্ঞাত্বা নাভিশোচন্তি ব্রাহ্মণাস্তত্ত্বদর্শিনঃ
291.29
এতদ্দেহং সমাখ্যাতং ত্রৈলোক্যে সর্বদেহিষু
বেদিতব্যং নরশ্রেষ্ঠ সদেবনরদানবে
291.30
সয়ক্ষভূতগন্ধর্বে সকিংনরমহোরগে
সচারণপিশাচে বৈ সদেবর্ষিনিশাচরে
291.31
সদংশকীটমশকে সপূতিকৃমিমূষকে
শুনি শ্বপাকে বৈণেয়ে সচণ্ডালে সপুল্কসে
291.32
হস্ত্যশ্বখরশার্দূলে সবৃক্ষে গবি চৈব হ
যচ্চ মূর্তিময়ং কিংচিত্সর্বত্রৈতন্নিদর্শনম্
291.33
জলে ভুবি তথাকাশে নান্যত্রেতি বিনিশ্চয়ঃ
স্থানং দেহবতামস্তি ইত্যেবমনুশুশ্রুম
291.34
কৃত্স্নমেতাবতস্তাত ক্ষরতে ব্যক্তসংজ্ঞকম্
অহন্যহনি ভূতাত্মা ততঃ ক্ষর ইতি স্মৃতঃ
291.35
এতদক্ষরমিত্যুক্তং ক্ষরতীদং যথা জগৎ
জগন্মোহাত্মকং প্রাহুরব্যক্তং ব্যক্তসংজ্ঞকম্
291.36
মহাংশ্চৈবাগ্রজো নিত্যমেতত্ক্ষরনিদর্শনম্
কথিতং তে মহারাজ যস্মান্নাবর্ততে পুনঃ
291.37
পঞ্চবিংশতিমো বিষ্ণুর্নিস্তত্ত্বস্তত্ত্বসংজ্ঞকঃ
তত্ত্বসংশ্রয়ণাদেতত্তত্ত্বমাহুর্মনীষিণঃ
291.38
যদমূর্ত্যসৃজদ্ব্যক্তং তত্তন্মূর্ত্যধিতিষ্ঠতি
চতুর্বিংশতিমো ব্যক্তো হ্যমূর্তঃ পঞ্চবিংশকঃ
291.39
স এব হৃদি সর্বাসু মূর্তিষ্বাতিষ্ঠতেঽঽত্মবান্
চেতয়ংশ্চেতনো নিত্যঃ সর্বমূর্তিরমূর্তিমান্
291.40
সর্গপ্রলয়ধর্মিণ্যা অসর্গপ্রলয়াত্মকঃ
গোচরে বর্ততে নিত্যং নির্গুণো গুণসংজ্ঞকঃ
291.41
এবমেষ মহানাত্মা সর্গপ্রলয়কোবিদঃ
বিকুর্বাণঃ প্রকৃতিমানভিমন্যত্যবুদ্ধিমান্
291.42
তমঃসত্ত্বরজোয়ুক্তস্তাসু তাস্বিহ যোনিষু
লীয়তেঽপ্রতিবুদ্ধত্বাদবুদ্ধজনসেবনাৎ
291.43
সহবাসো নিবাসাত্মা নান্যোঽহমিতি মন্যতে
যোঽহং সোঽহমিতি হ্যুক্ত্বা গুণাননু নিবর্ততে
291.44
তমসা তামসান্ভাবান্বিবিধান্প্রতিপদ্যতে
রজসা রাজসাংশ্চৈব সাত্ত্বিকান্সত্ত্বসংশ্রয়াৎ
291.45
শুক্ললোহিতকৃষ্ণানি রূপাণ্যেতানি ত্রীণি তু
সর্বাণ্যেতানি রূপাণি জানীহি প্রাকৃতানি বৈ
291.46
তামসা নিরয়ং যান্তি রাজসা মানুষাংস্তথা
সাত্ত্বিকা দেবলোকায় গচ্ছন্তি সুখভাগিনঃ
291.47
নিষ্কৈবল্যেন পাপেন তির্যগ্যোনিমবাপ্নুয়াৎ
পুণ্যপাপেন মানুষ্যং পুণ্যেনৈকেন দেবতাঃ
291.48
এবমব্যক্তবিষয়ং ক্ষরমাহুর্মনীষিণঃ
পঞ্চবিংশতিমো যোঽয়ং জ্ঞানাদেব প্রবর্ততে