Utshovঅধ্যায় 290
290.1
যুধিষ্ঠির উবাচ
সম্যক্ত্বয়ায়ং নৃপতে বর্ণিতঃ শিষ্টসংমতঃ
যোগমার্গো যথান্যায়ং শিষ্যায়েহ হিতৈষিণা
290.2
সাংখ্যে ত্বিদানীং কার্ত্স্ন্যেন বিধিং প্রব্রূহি পৃচ্ছতে
ত্রিষু লোকেষু যজ্জ্ঞানং সর্বং তদ্বিদিতং হি তে
290.3
ভীষ্ম উবাচ
শৃণু মে ত্বমিদং শুদ্ধং সাংখ্যানাং বিদিতাত্মনাম্
বিহিতং যতিভির্বুদ্ধৈঃ কপিলাদিভিরীশ্বরৈঃ
290.4
যস্মিন্ন বিভ্রমাঃ কেচিদ্দৃশ্যন্তে মনুজর্ষভ
গুণাশ্চ যস্মিন্বহবো দোষহানিশ্চ কেবলা
290.5
জ্ঞানেন পরিসংখ্যায় সদোষান্বিষয়ান্নৃপ
মানুষান্দুর্জয়ান্কৃত্স্নান্পৈশাচান্বিষয়াংস্তথা
290.6
রাক্ষসান্বিষয়াঞ্জ্ঞাত্বা যক্ষাণাং বিষয়াংস্তথা
বিষয়ানৌরগাঞ্জ্ঞাত্বা গান্ধর্ববিষয়াংস্তথা
290.7
পিতৄণাং বিষয়াঞ্জ্ঞাত্বা তির্যক্ষু চরতাং নৃপ
সুপর্ণবিষয়াঞ্জ্ঞাত্বা মরুতাং বিষয়াংস্তথা
290.8
রাজর্ষিবিষয়াঞ্জ্ঞাত্বা ব্রহ্মর্ষিবিষয়াংস্তথা
আসুরান্বিষয়াঞ্জ্ঞাত্বা বৈশ্বদেবাংস্তথৈব চ
290.9
দেবর্ষিবিষয়াঞ্জ্ঞাত্বা যোগানামপি চেশ্বরান্
বিষয়াংশ্চ প্রজেশানাং ব্রহ্মণো বিষয়াংস্তথা
290.10
আয়ুষশ্চ পরং কালং লোকে বিজ্ঞায় তত্ত্বতঃ
সুখস্য চ পরং তত্ত্বং বিজ্ঞায় বদতাং বর
290.11
প্রাপ্তে কালে চ যদ্দুঃখং পততাং বিষয়ৈষিণাম্
তির্যক্চ পততাং দুঃখং পততাং নরকে চ যৎ
290.12
স্বর্গস্য চ গুণান্কৃত্স্নান্দোষান্সর্বাংশ্চ ভারত
বেদবাদে চ যে দোষা গুণা যে চাপি বৈদিকাঃ
290.13
জ্ঞানয়োগে চ যে দোষা গুণা যোগে চ যে নৃপ
সাংখ্যজ্ঞানে চ যে দোষাস্তথৈব চ গুণা নৃপ
290.14
সত্ত্বং দশগুণং জ্ঞাত্বা রজো নবগুণং তথা
তমশ্চাষ্টগুণং জ্ঞাত্বা বুদ্ধিং সপ্তগুণাং তথা
290.15
ষড্গুণং চ নভো জ্ঞাত্বা মনঃ পঞ্চগুণং তথা
বুদ্ধিং চতুর্গুণাং জ্ঞাত্বা তমশ্চ ত্রিগুণং মহৎ
290.16
দ্বিগুণং চ রজো জ্ঞাত্বা সত্ত্বমেকগুণং পুনঃ
মার্গং বিজ্ঞায় তত্ত্বেন প্রলয়ে প্রেক্ষণং তথা
290.17
জ্ঞানবিজ্ঞানসংপন্নাঃ কারণৈর্ভাবিতাঃ শুভৈঃ
প্রাপ্নুবন্তি শুভং মোক্ষং সূক্ষ্মা ইব নভঃ পরম্
290.18
রূপেণ দৃষ্টিং সংয়ুক্তাং ঘ্রাণং গন্ধগুণেন চ
শব্দে সক্তং তথা শ্রোত্রং জিহ্বাং রসগুণেষু চ
290.19
তনুং স্পর্শে তথা সক্তাং বায়ুং নভসি চাশ্রিতম্
মোহং তমসি সংসক্তং লোভমর্থেষু সংশ্রিতম্
290.20
বিষ্ণুং ক্রান্তে বলে শক্রং কোষ্ঠে সক্তং তথানলম্
অপ্সু দেবীং তথা সক্তামপস্তেজসি চাশ্রিতাঃ
290.21
তেজো বায়ৌ তু সংসক্তং বায়ুং নভসি চাশ্রিতম্
নভো মহতি সংয়ুক্তং মহদ্বুদ্ধৌ চ সংশ্রিতম্
290.22
বুদ্ধিং তমসি সংসক্তাং তমো রজসি চাশ্রিতম্
রজঃ সত্ত্বে তথা সক্তং সত্ত্বং সক্তং তথাত্মনি
290.23
সক্তমাত্মানমীশে চ দেবে নারায়ণে তথা
দেবং মোক্ষে চ সংসক্তং মোক্ষং সক্তং তু ন ক্বচিৎ
290.24
জ্ঞাত্বা সত্ত্বয়ুতং দেহং বৃতং ষোডশভির্গুণৈঃ
স্বভাবং চেতনাং চৈব জ্ঞাত্বা বৈ দেহমাশ্রিতে
290.25
মধ্যস্থমেকমাত্মানং পাপং যস্মিন্ন বিদ্যতে
দ্বিতীয়ং কর্ম বিজ্ঞায় নৃপতে বিষয়ৈষিণাম্
290.26
ইন্দ্রিয়াণীন্দ্রিয়ার্থাংশ্চ সর্বানাত্মনি সংশ্রিতান্
প্রাণাপানৌ সমানং চ ব্যানোদানৌ চ তত্ত্বতঃ
290.27
অবাক্চৈবানিলং জ্ঞাত্বা প্রবহং চানিলং পুনঃ
সপ্ত বাতাংস্তথা শেষান্সপ্তধা বিধিবত্পুনঃ
290.28
প্রজাপতীনৃষীংশ্চৈব মার্গাংশ্চ সুবহূন্বরান্
সপ্তর্ষীংশ্চ বহূঞ্জ্ঞাত্বা রাজর্ষীংশ্চ পরংতপ
290.29
সুরর্ষীন্মহতশ্চান্যান্মহর্ষীন্সূর্যসংনিভান্
ঐশ্বর্যাচ্চ্যাবিতাঞ্জ্ঞাত্বা কালেন মহতা নৃপ
290.30
মহতাং ভূতসংঘানাং শ্রুত্বা নাশং চ পার্থিব
গতিং চাপ্যশুভাং জ্ঞাত্বা নৃপতে পাপকর্মণাম্
290.31
বৈতরণ্যাং চ যদ্দুঃখং পতিতানাং যমক্ষয়ে
যোনীষু চ বিচিত্রাসু সংসারানশুভাংস্তথা
290.32
জঠরে চাশুভে বাসং শোণিতোদকভাজনে
শ্লেষ্মমূত্রপুরীষে চ তীব্রগন্ধসমন্বিতে
290.33
শুক্রশোণিতসংঘাতে মজ্জাস্নায়ুপরিগ্রহে
সিরাশতসমাকীর্ণে নবদ্বারে পুরেঽশুচৌ
290.34
বিজ্ঞায়াহিতমাত্মানং যোগাংশ্চ বিবিধান্নৃপ
তামসানাং চ জন্তূনাং রমণীয়াবৃতাত্মনাম্
290.35
সাত্ত্বিকানাং চ জন্তূনাং কুত্সিতং ভরতর্ষভ
গর্হিতং মহতামর্থে সাংখ্যানাং বিদিতাত্মনাম্
290.36
উপপ্লবাংস্তথা ঘোরাঞ্শশিনস্তেজসস্তথা
তারাণাং পতনং দৃষ্ট্বা নক্ষত্রাণাং চ পর্যয়ম্
290.37
দ্বংদ্বানাং বিপ্রয়োগং চ বিজ্ঞায় কৃপণং নৃপ
অন্যোন্যভক্ষণং দৃষ্ট্বা ভূতানামপি চাশুভম্
290.38
বাল্যে মোহং চ বিজ্ঞায় ক্ষয়ং দেহস্য চাশুভম্
রাগে মোহে চ সংপ্রাপ্তে ক্বচিত্সত্ত্বং সমাশ্রিতম্
290.39
সহস্রেষু নরঃ কশ্চিন্মোক্ষবুদ্ধিং সমাশ্রিতঃ
দুর্লভত্বং চ মোক্ষস্য বিজ্ঞায় শ্রুতিপূর্বকম্
290.40
বহুমানমলব্ধেষু লব্ধে মধ্যস্থতাং পুনঃ
বিষয়াণাং চ দৌরাত্ম্যং বিজ্ঞায় নৃপতে পুনঃ
290.41
গতাসূনাং চ কৌন্তেয় দেহান্দৃষ্ট্বা তথাশুভান্
বাসং কুলেষু জন্তূনাং দুঃখং বিজ্ঞায় ভারত
290.42
ব্রহ্মঘ্নানাং গতিং জ্ঞাত্বা পতিতানাং সুদারুণাম্
সুরাপানে চ সক্তানাং ব্রাহ্মণানাং দুরাত্মনাম্
গুরুদারপ্রসক্তানাং গতিং বিজ্ঞায় চাশুভাম্
290.43
জননীষু চ বর্তন্তে যে ন সম্যগ্যুধিষ্ঠির
সদেবকেষু লোকেষু যে ন বর্তন্তি মানবাঃ
290.44
তেন জ্ঞানেন বিজ্ঞায় গতিং চাশুভকর্মণাম্
তির্যগ্যোনিগতানাং চ বিজ্ঞায় গতয়ঃ পৃথক্
290.45
বেদবাদাংস্তথা চিত্রানৃতূনাং পর্যয়াংস্তথা
ক্ষয়ং সংবত্সরাণাং চ মাসানাং প্রক্ষয়ং তথা
290.46
পক্ষক্ষয়ং তথা দৃষ্ট্বা দিবসানাং চ সংক্ষয়ম্
ক্ষয়ং বৃদ্ধিং চ চন্দ্রস্য দৃষ্ট্বা প্রত্যক্ষতস্তথা
290.47
বৃদ্ধিং দৃষ্ট্বা সমুদ্রাণাং ক্ষয়ং তেষাং তথা পুনঃ
ক্ষয়ং ধনানাং চ তথা পুনর্বৃদ্ধিং তথৈব চ
290.48
সংয়োগানাং ক্ষয়ং দৃষ্ট্বা যুগানাং চ বিশেষতঃ
ক্ষয়ং চ দৃষ্ট্বা শৈলানাং ক্ষয়ং চ সরিতাং তথা
290.49
বর্ণানাং চ ক্ষয়ং দৃষ্ট্বা ক্ষয়ান্তং চ পুনঃ পুনঃ
জরামৃত্যুং তথা জন্ম দৃষ্ট্বা দুঃখানি চৈব হ
290.50
দেহদোষাংস্তথা জ্ঞাত্বা তেষাং দুঃখং চ তত্ত্বতঃ
দেহবিক্লবতাং চৈব সম্যগ্বিজ্ঞায় ভারত
290.51
আত্মদোষাংশ্চ বিজ্ঞায় সর্বানাত্মনি সংশ্রিতান্
স্বদেহাদুত্থিতান্গন্ধাংস্তথা বিজ্ঞায় চাশুভান্
290.52
যুধিষ্ঠির উবাচ
কান্স্বগাত্রোদ্ভবান্দোষান্পশ্যস্যমিতবিক্রম
এতন্মে সংশয়ং কৃত্স্নং বক্তুমর্হসি তত্ত্বতঃ
290.53
ভীষ্ম উবাচ
পঞ্চ দোষান্প্রভো দেহে প্রবদন্তি মনীষিণঃ
মার্গজ্ঞাঃ কাপিলাঃ সাংখ্যাঃ শৃণু তানরিসূদন
290.54
কামক্রোধৌ ভয়ং নিদ্রা পঞ্চমঃ শ্বাস উচ্যতে
এতে দোষাঃ শরীরেষু দৃশ্যন্তে সর্বদেহিনাম্
290.55
ছিন্দন্তি ক্ষময়া ক্রোধং কামং সংকল্পবর্জনাৎ
সত্ত্বসংশীলনান্নিদ্রামপ্রমাদাদ্ভয়ং তথা
ছিন্দন্তি পঞ্চমং শ্বাসং লঘ্বাহারতয়া নৃপ
290.56
গুণান্গুণশতৈর্জ্ঞাত্বা দোষান্দোষশতৈরপি
হেতূন্হেতুশতৈশ্চিত্রৈশ্চিত্রান্বিজ্ঞায় তত্ত্বতঃ
290.57
অপাং ফেনোপমং লোকং বিষ্ণোর্মায়াশতৈর্বৃতম্
চিত্তভিত্তিপ্রতীকাশং নলসারমনর্থকম্
290.58
তমঃ শ্বভ্রনিভং দৃষ্ট্বা বর্ষবুদ্বুদসংনিভম্
নাশপ্রায়ং সুখাদ্ধীনং নাশোত্তরমভাবগম্
রজস্তমসি সংমগ্নং পঙ্কে দ্বিপমিবাবশম্
290.59
সাংখ্যা রাজন্মহাপ্রাজ্ঞাস্ত্যক্ত্বা দেহং প্রজাকৃতম্
জ্ঞানজ্ঞেয়েন সাংখ্যেন ব্যাপিনা মহতা নৃপ
290.60
রাজসানশুভান্গন্ধাংস্তামসাংশ্চ তথাবিধান্
পুণ্যাংশ্চ সাত্ত্বিকান্গন্ধান্স্পর্শজান্দেহসংশ্রিতান্
ছিত্ত্বাশু জ্ঞানশস্ত্রেণ তপোদণ্ডেন ভারত
290.61
ততো দুঃখোদকং ঘোরং চিন্তাশোকমহাহ্রদম্
ব্যাধিমৃত্যুমহাগ্রাহং মহাভয়মহোরগম্
290.62
তমঃকূর্মং রজোমীনং প্রজ্ঞয়া সংতরন্ত্যুত
স্নেহপঙ্কং জরাদুর্গং স্পর্শদ্বীপমরিংদম
290.63
কর্মাগাধং সত্যতীরং স্থিতব্রতমিদং নৃপ
হিংসাশীঘ্রমহাবেগং নানারসমহাকরম্
290.64
নানাপ্রীতিমহারত্নং দুঃখজ্বরসমীরণম্
শোকতৃষ্ণামহাবর্তং তীক্ষ্ণব্যাধিমহাগজম্
290.65
অস্থিসংঘাতসংঘাটং শ্লেষ্মফেনমরিংদম
দানমুক্তাকরং ভীমং শোণিতহ্রদবিদ্রুমম্
290.66
হসিতোত্ক্রুষ্টনির্ঘোষং নানাজ্ঞানসুদুস্তরম্
রোদনাশ্রুমলক্ষারং সঙ্গত্যাগপরায়ণম্
290.67
পুনরাজন্মলোকৌঘং পুত্রবান্ধবপত্তনম্
অহিংসাসত্যমর্যাদং প্রাণত্যাগমহোর্মিণম্
290.68
বেদান্তগমনদ্বীপং সর্বভূতদয়োদধিম্
মোক্ষদুষ্প্রাপবিষয়ং বডবামুখসাগরম্
290.69
তরন্তি মুনয়ঃ সিদ্ধা জ্ঞানয়োগেন ভারত
তীর্ত্বা চ দুস্তরং জন্ম বিশন্তি বিমলং নভঃ
290.70
ততস্তান্সুকৃতীন্সাংখ্যান্সূর্যো বহতি রশ্মিভিঃ
পদ্মতন্তুবদাবিশ্য প্রবহন্বিষয়ান্নৃপ
290.71
তত্র তান্প্রবহো বায়ুঃ প্রতিগৃহ্ণাতি ভারত
বীতরাগান্যতীন্সিদ্ধান্বীর্যয়ুক্তাংস্তপোধনান্
290.72
সূক্ষ্মঃ শীতঃ সুগন্ধী চ সুখস্পর্শশ্চ ভারত
সপ্তানাং মরুতাং শ্রেষ্ঠো লোকান্গচ্ছতি যঃ শুভান্
স তান্বহতি কৌন্তেয় নভসঃ পরমাং গতিম্
290.73
নভো বহতি লোকেশ রজসঃ পরমাং গতিম্
রজো বহতি রাজেন্দ্র সত্ত্বস্য পরমাং গতিম্
290.74
সত্ত্বং বহতি শুদ্ধাত্মন্পরং নারায়ণং প্রভুম্
প্রভুর্বহতি শুদ্ধাত্মা পরমাত্মানমাত্মনা
290.75
পরমাত্মানমাসাদ্য তদ্ভূতায়তনামলাঃ
অমৃতত্বায় কল্পন্তে ন নিবর্তন্তি চাভিভো
পরমা সা গতিঃ পার্থ নির্দ্বংদ্বানাং মহাত্মনাম্
290.76
যুধিষ্ঠির উবাচ
স্থানমুত্তমমাসাদ্য ভগবন্তং স্থিরব্রতাঃ
আজন্মমরণং বা তে স্মরন্ত্যুত ন বানঘ
290.77
যদত্র তথ্যং তন্মে ত্বং যথাবদ্বক্তুমর্হসি
ত্বদৃতে মানবং নান্যং প্রষ্টুমর্হামি কৌরব
290.78
মোক্ষদোষো মহানেষ প্রাপ্য সিদ্ধিং গতানৃষীন্
যদি তত্রৈব বিজ্ঞানে বর্তন্তে যতয়ঃ পরে
290.79
প্রবৃত্তিলক্ষণং ধর্মং পশ্যামি পরমং নৃপ
মগ্নস্য হি পরে জ্ঞানে কিং নু দুঃখতরং ভবেৎ
290.80
ভীষ্ম উবাচ
যথান্যায়ং ত্বয়া তাত প্রশ্নঃ পৃষ্টঃ সুসংকটঃ
বুদ্ধানামপি সংমোহঃ প্রশ্নেঽস্মিন্ভরতর্ষভ
অত্রাপি তত্ত্বং পরমং শৃণু সম্যঙ্ময়েরিতম্
290.81
বুদ্ধিশ্চ পরমা যত্র কাপিলানাং মহাত্মনাম্
ইন্দ্রিয়াণ্যপি বুধ্যন্তে স্বদেহং দেহিনো নৃপ
কারণান্যাত্মনস্তানি সূক্ষ্মঃ পশ্যতি তৈস্তু সঃ
290.82
আত্মনা বিপ্রহীণানি কাষ্ঠকুড্যসমানি তু
বিনশ্যন্তি ন সংদেহঃ ফেনা ইব মহার্ণবে
290.83
ইন্দ্রিয়ৈঃ সহ সুপ্তস্য দেহিনঃ শত্রুতাপন
সূক্ষ্মশ্চরতি সর্বত্র নভসীব সমীরণঃ
290.84
স পশ্যতি যথান্যায়ং স্পর্শান্স্পৃশতি চাভিভো
বুধ্যমানো যথাপূর্বমখিলেনেহ ভারত
290.85
ইন্দ্রিয়াণীহ সর্বাণি স্বে স্বে স্থানে যথাবিধি
অনীশত্বাত্প্রলীয়ন্তে সর্পা হতবিষা ইব
290.86
ইন্দ্রিয়াণাং তু সর্বেষাং স্বস্থানেষ্বেব সর্বশঃ
আক্রম্য গতয়ঃ সূক্ষ্মাশ্চরত্যাত্মা ন সংশয়ঃ
290.87
সত্ত্বস্য চ গুণান্কৃত্স্নান্রজসশ্চ গুণান্পুনঃ
গুণাংশ্চ তমসঃ সর্বান্গুণান্বুদ্ধেশ্চ ভারত
290.88
গুণাংশ্চ মনসস্তদ্বন্নভসশ্চ গুণাংস্তথা
গুণান্বায়োশ্চ ধর্মাত্মংস্তেজসশ্চ গুণান্পুনঃ
290.89
অপাং গুণাংস্তথা পার্থ পার্থিবাংশ্চ গুণানপি
সর্বাত্মনা গুণৈর্ব্যাপ্য ক্ষেত্রজ্ঞঃ স যুধিষ্ঠির
290.90
আত্মা চ যাতি ক্ষেত্রজ্ঞং কর্মণী চ শুভাশুভে
শিষ্যা ইব মহাত্মানমিন্দ্রিয়াণি চ তং বিভো
290.91
প্রকৃতিং চাপ্যতিক্রম্য গচ্ছত্যাত্মানমব্যয়ম্
পরং নারায়ণাত্মানং নির্দ্বংদ্বং প্রকৃতেঃ পরম্
290.92
বিমুক্তঃ পুণ্যপাপেভ্যঃ প্রবিষ্টস্তমনাময়ম্
পরমাত্মানমগুণং ন নিবর্ততি ভারত
290.93
শিষ্টং ত্বত্র মনস্তাত ইন্দ্রিয়াণি চ ভারত
আগচ্ছন্তি যথাকালং গুরোঃ সংদেশকারিণঃ
290.94
শক্যং চাল্পেন কালেন শান্তিং প্রাপ্তুং গুণার্থিনা
এবং যুক্তেন কৌন্তেয় যুক্তজ্ঞানেন মোক্ষিণা
290.95
সাংখ্যা রাজন্মহাপ্রাজ্ঞা গচ্ছন্তি পরমাং গতিম্
জ্ঞানেনানেন কৌন্তেয় তুল্যং জ্ঞানং ন বিদ্যতে
290.96
অত্র তে সংশয়ো মা ভূজ্জ্ঞানং সাংখ্যং পরং মতম্
অক্ষরং ধ্রুবমব্যক্তং পূর্বং ব্রহ্ম সনাতনম্
290.97
অনাদিমধ্যনিধনং নির্দ্বংদ্বং কর্তৃ শাশ্বতম্
কূটস্থং চৈব নিত্যং চ যদ্বদন্তি শমাত্মকাঃ
290.98
যতঃ সর্বাঃ প্রবর্তন্তে সর্গপ্রলয়বিক্রিয়াঃ
যচ্চ শংসন্তি শাস্ত্রেষু বদন্তি পরমর্ষয়ঃ
290.99
সর্বে বিপ্রাশ্চ দেবাশ্চ তথাগমবিদো জনাঃ
ব্রহ্মণ্যং পরমং দেবমনন্তং পরতোঽচ্যুতম্
290.100
প্রার্থয়ন্তশ্চ তং বিপ্রা বদন্তি গুণবুদ্ধয়ঃ
সম্যগ্যুক্তাস্তথা যোগাঃ সাংখ্যাশ্চামিতদর্শনাঃ
290.101
অমূর্তেস্তস্য কৌন্তেয় সাংখ্যং মূর্তিরিতি শ্রুতিঃ
অভিজ্ঞানানি তস্যাহুর্মতং হি ভরতর্ষভ
290.102
দ্বিবিধানীহ ভূতানি পৃথিব্যাং পৃথিবীপতে
জঙ্গমাগমসংজ্ঞানি জঙ্গমং তু বিশিষ্যতে
290.103
জ্ঞানং মহদ্যদ্ধি মহত্সু রাজ;ন্বেদেষু সাংখ্যেষু তথৈব যোগে
যচ্চাপি দৃষ্টং বিবিধং পুরাণং; সাংখ্যাগতং তন্নিখিলং নরেন্দ্র
290.104
যচ্চেতিহাসেষু মহত্সু দৃষ্টং; যচ্চার্থশাস্ত্রে নৃপ শিষ্টজুষ্টে
জ্ঞানং চ লোকে যদিহাস্তি কিংচি;ত্সাংখ্যাগতং তচ্চ মহন্মহাত্মন্
290.105
শমশ্চ দৃষ্টঃ পরমং বলং চ; জ্ঞানং চ সূক্ষ্মং চ যথাবদুক্তম্
তপাংসি সূক্ষ্মাণি সুখানি চৈব; সাংখ্যে যথাবদ্বিহিতানি রাজন্
290.106
বিপর্যয়ে তস্য হি পার্থ দেবা;ন্গচ্ছন্তি সাংখ্যাঃ সততং সুখেন
তাংশ্চানুসংচার্য ততঃ কৃতার্থাঃ; পতন্তি বিপ্রেষু যতেষু ভূয়ঃ
290.107
হিত্বা চ দেহং প্রবিশন্তি মোক্ষং; দিবৌকসো দ্যামিব পার্থ সাংখ্যাঃ
ততোঽধিকং তেঽভিরতা মহার্হে; সাংখ্যে দ্বিজাঃ পার্থিব শিষ্টজুষ্টে
290.108
তেষাং ন তির্যগ্গমনং হি দৃষ্টং; নাবাগ্গতিঃ পাপকৃতাং নিবাসঃ
ন চাবুধানামপি তে দ্বিজাতয়ো; যে জ্ঞানমেতন্নৃপতেঽনুরক্তাঃ
290.109
সাংখ্যং বিশালং পরমং পুরাণং; মহার্ণবং বিমলমুদারকান্তম্
কৃত্স্নং চ সাংখ্যং নৃপতে মহাত্মা; নারায়ণো ধারয়তেঽপ্রমেয়ম্
290.110
এতন্ময়োক্তং নরদেব তত্ত্বং; নারায়ণো বিশ্বমিদং পুরাণম্
স সর্গকালে চ করোতি সর্গং; সংহারকালে চ তদত্তি ভূয়ঃ