Utshovঅধ্যায় 289
289.1
যুধিষ্ঠির উবাচ
সাংখ্যে যোগে চ মে তাত বিশেষং বক্তুমর্হসি
তব সর্বজ্ঞ সর্বং হি বিদিতং কুরুসত্তম
289.2
ভীষ্ম উবাচ
সাংখ্যাঃ সাংখ্যং প্রশংসন্তি যোগা যোগং দ্বিজাতয়ঃ
বদন্তি কারণৈঃ শ্রৈষ্ঠ্যং স্বপক্ষোদ্ভাবনায় বৈ
289.3
অনীশ্বরঃ কথং মুচ্যেদিত্যেবং শত্রুকর্শন
বদন্তি কারণৈঃ শ্রৈষ্ঠ্যং যোগাঃ সম্যঙ্মনীষিণঃ
289.4
বদন্তি কারণং চেদং সাংখ্যাঃ সম্যগ্দ্বিজাতয়ঃ
বিজ্ঞায়েহ গতীঃ সর্বা বিরক্তো বিষয়েষু যঃ
289.5
ঊর্ধ্বং স দেহাত্সুব্যক্তং বিমুচ্যেদিতি নান্যথা
এতদাহুর্মহাপ্রাজ্ঞাঃ সাংখ্যং বৈ মোক্ষদর্শনম্
289.6
স্বপক্ষে কারণং গ্রাহ্যং সমর্থং বচনং হিতম্
শিষ্টানাং হি মতং গ্রাহ্যং ত্বদ্বিধৈঃ শিষ্টসংমতৈঃ
289.7
প্রত্যক্ষহেতবো যোগাঃ সাংখ্যাঃ শাস্ত্রবিনিশ্চয়াঃ
উভে চৈতে মতে তত্ত্বে মম তাত যুধিষ্ঠির
289.8
উভে চৈতে মতে জ্ঞানে নৃপতে শিষ্টসংমতে
অনুষ্ঠিতে যথাশাস্ত্রং নয়েতাং পরমাং গতিম্
289.9
তুল্যং শৌচং তয়োর্যুক্তং দয়া ভূতেষু চানঘ
ব্রতানাং ধারণং তুল্যং দর্শনং ন সমং তয়োঃ
289.10
যুধিষ্ঠির উবাচ
যদি তুল্যং ব্রতং শৌচং দয়া চাত্র পিতামহ
তুল্যং ন দর্শনং কস্মাত্তন্মে ব্রূহি পিতামহ
289.11
ভীষ্ম উবাচ
রাগং মোহং তথা স্নেহং কামং ক্রোধং চ কেবলম্
যোগাচ্ছিত্ত্বাদিতো দোষান্পঞ্চৈতান্প্রাপ্নুবন্তি তৎ
289.12
যথা চানিমিষাঃ স্থূলা জালং ছিত্ত্বা পুনর্জলম্
প্রাপ্নুবন্তি তথা যোগাস্তত্পদং বীতকল্মষাঃ
289.13
তথৈব বাগুরাং ছিত্ত্বা বলবন্তো যথা মৃগাঃ
প্রাপ্নুয়ুর্বিমলং মার্গং বিমুক্তাঃ সর্ববন্ধনৈঃ
289.14
লোভজানি তথা রাজন্বন্ধনানি বলান্বিতাঃ
ছিত্ত্বা যোগাঃ পরং মার্গং গচ্ছন্তি বিমলাঃ শিবম্
289.15
অবলাশ্চ মৃগা রাজন্বাগুরাসু তথাপরে
বিনশ্যন্তি ন সংদেহস্তদ্বদ্যোগবলাদৃতে
289.16
বলহীনাশ্চ কৌন্তেয় যথা জালগতা ঝষাঃ
অন্তং গচ্ছন্তি রাজেন্দ্র তথা যোগাঃ সুদুর্বলাঃ
289.17
যথা চ শকুনাঃ সূক্ষ্মাঃ প্রাপ্য জালমরিংদম
তত্র সক্তা বিপদ্যন্তে মুচ্যন্তে চ বলান্বিতাঃ
289.18
কর্মজৈর্বন্ধনৈর্বদ্ধাস্তদ্বদ্যোগাঃ পরংতপ
অবলা বৈ বিনশ্যন্তি মুচ্যন্তে চ বলান্বিতাঃ
289.19
অল্পকশ্চ যথা রাজন্বহ্নিঃ শাম্যতি দুর্বলঃ
আক্রান্ত ইন্ধনৈঃ স্থূলৈস্তদ্বদ্যোগোঽবলঃ প্রভো
289.20
স এব চ যদা রাজন্বহ্নির্জাতবলঃ পুনঃ
সমীরণয়ুতঃ কৃত্স্নাং দহেত্ক্ষিপ্রং মহীমপি
289.21
তদ্বজ্জাতবলো যোগী দীপ্ততেজা মহাবলঃ
অন্তকাল ইবাদিত্যঃ কৃত্স্নং সংশোষয়েজ্জগৎ
289.22
দুর্বলশ্চ যথা রাজন্স্রোতসা হ্রিয়তে নরঃ
বলহীনস্তথা যোগো বিষয়ৈর্হ্রিয়তেঽবশঃ
289.23
তদেব চ যথা স্রোতো বিষ্টম্ভয়তি বারণঃ
তদ্বদ্যোগবলং লব্ধ্বা ব্যূহতে বিষয়ান্বহূন্
289.24
বিশন্তি চাবশাঃ পার্থ যোগা যোগবলান্বিতাঃ
প্রজাপতীনৃষীন্দেবান্মহাভূতানি চেশ্বরাঃ
289.25
ন যমো নান্তকঃ ক্রুদ্ধো ন মৃত্যুর্ভীমবিক্রমঃ
ঈশতে নৃপতে সর্বে যোগস্যামিততেজসঃ
289.26
আত্মনাং চ সহস্রাণি বহূনি ভরতর্ষভ
যোগঃ কুর্যাদ্বলং প্রাপ্য তৈশ্চ সর্বৈর্মহীং চরেৎ
289.27
প্রাপ্নুয়াদ্বিষয়াংশ্চৈব পুনশ্চোগ্রং তপশ্চরেৎ
সংক্ষিপেচ্চ পুনঃ পার্থ সূর্যস্তেজোগুণানিব
289.28
বলস্থস্য হি যোগস্য বন্ধনেশস্য পার্থিব
বিমোক্ষপ্রভবিষ্ণুত্বমুপপন্নমসংশয়ম্
289.29
বলানি যোগে প্রোক্তানি ময়ৈতানি বিশাং পতে
নিদর্শনার্থং সূক্ষ্মাণি বক্ষ্যামি চ পুনস্তব
289.30
আত্মনশ্চ সমাধানে ধারণাং প্রতি চাভিভো
নিদর্শনানি সূক্ষ্মাণি শৃণু মে ভরতর্ষভ
289.31
অপ্রমত্তো যথা ধন্বী লক্ষ্যং হন্তি সমাহিতঃ
যুক্তঃ সম্যক্তথা যোগী মোক্ষং প্রাপ্নোত্যসংশয়ম্
289.32
স্নেহপূর্ণে যথা পাত্রে মন আধায় নিশ্চলম্
পুরুষো যত্ত আরোহেত্সোপানং যুক্তমানসঃ
289.33
যুক্ত্বা তথায়মাত্মানং যোগঃ পার্থিব নিশ্চলম্
করোত্যমলমাত্মানং ভাস্করোপমদর্শনম্
289.34
যথা চ নাবং কৌন্তেয় কর্ণধারঃ সমাহিতঃ
মহার্ণবগতাং শীঘ্রং নয়েত্পার্থিব পত্তনম্
289.35
তদ্বদাত্মসমাধানং যুক্ত্বা যোগেন তত্ত্ববিৎ
দুর্গমং স্থানমাপ্নোতি হিত্বা দেহমিমং নৃপ
289.36
সারথিশ্চ যথা যুক্ত্বা সদশ্বান্সুসমাহিতঃ
দেশমিষ্টং নয়ত্যাশু ধন্বিনং পুরুষর্ষভ
289.37
তথৈব নৃপতে যোগী ধারণাসু সমাহিতঃ
প্রাপ্নোত্যাশু পরং স্থানং লক্ষং মুক্ত ইবাশুগঃ
289.38
আবেশ্যাত্মনি চাত্মানং যোগী তিষ্ঠতি যোঽচলঃ
পাপং হন্তেব মীনানাং পদমাপ্নোতি সোঽজরম্
289.39
নাভ্যাং কণ্ঠে চ শীর্ষে চ হৃদি বক্ষসি পার্শ্বয়োঃ
দর্শনে স্পর্শনে চাপি ঘ্রাণে চামিতবিক্রম
289.40
স্থানেষ্বেতেষু যো যোগী মহাব্রতসমাহিতঃ
আত্মনা সূক্ষ্মমাত্মানং যুঙ্ক্তে সম্যগ্বিশাং পতে
289.41
স শীঘ্রমমলপ্রজ্ঞঃ কর্ম দগ্ধ্বা শুভাশুভম্
উত্তমং যোগমাস্থায় যদীচ্ছতি বিমুচ্যতে
289.42
যুধিষ্ঠির উবাচ
আহারান্কীদৃশান্কৃত্বা কানি জিত্বা চ ভারত
যোগী বলমবাপ্নোতি তদ্ভবান্বক্তুমর্হতি
289.43
ভীষ্ম উবাচ
কণানাং ভক্ষণে যুক্তঃ পিণ্যাকস্য চ ভক্ষণে
স্নেহানাং বর্জনে যুক্তো যোগী বলমবাপ্নুয়াৎ
289.44
ভুঞ্জানো যাবকং রূক্ষং দীর্ঘকালমরিংদম
একারামো বিশুদ্ধাত্মা যোগী বলমবাপ্নুয়াৎ
289.45
পক্ষান্মাসানৃতূংশ্চিত্রান্সংচরংশ্চ গুহাস্তথা
অপঃ পীত্বা পয়োমিশ্রা যোগী বলমবাপ্নুয়াৎ
289.46
অখণ্ডমপি বা মাসং সততং মনুজেশ্বর
উপোষ্য সম্যক্শুদ্ধাত্মা যোগী বলমবাপ্নুয়াৎ
289.47
কামং জিত্বা তথা ক্রোধং শীতোষ্ণে বর্ষমেব চ
ভয়ং নিদ্রাং তথা শ্বাসং পৌরুষং বিষয়াংস্তথা
289.48
অরতিং দুর্জয়াং চৈব ঘোরাং তৃষ্ণাং চ পার্থিব
স্পর্শান্সর্বাংস্তথা তন্দ্রীং দুর্জয়াং নৃপসত্তম
289.49
দীপয়ন্তি মহাত্মানঃ সূক্ষ্মমাত্মানমাত্মনা
বীতরাগা মহাপ্রাজ্ঞা ধ্যানাধ্যয়নসংপদা
289.50
দুর্গস্ত্বেষ মতঃ পন্থা ব্রাহ্মণানাং বিপশ্চিতাম্
ন কশ্চিদ্ব্রজতি হ্যস্মিন্ক্ষেমেণ ভরতর্ষভ
289.51
যথা কশ্চিদ্বনং ঘোরং বহুসর্পসরীসৃপম্
শ্বভ্রবত্তোয়হীনং চ দুর্গমং বহুকণ্টকম্
289.52
অভক্তমটবীপ্রায়ং দাবদগ্ধমহীরুহম্
পন্থানং তস্করাকীর্ণং ক্ষেমেণাভিপতেদ্যুবা
289.53
যোগমার্গং তথাসাদ্য যঃ কশ্চিদ্ভজতে দ্বিজঃ
ক্ষেমেণোপরমেন্মার্গাদ্বহুদোষো হি স স্মৃতঃ
289.54
সুস্থেয়ং ক্ষুরধারাসু নিশিতাসু মহীপতে
ধারণাসু তু যোগস্য দুঃস্থেয়মকৃতাত্মভিঃ
289.55
বিপন্না ধারণাস্তাত নয়ন্তি নশুভাং গতিম্
নেতৃহীনা যথা নাবঃ পুরুষানর্ণবে নৃপ
289.56
যস্তু তিষ্ঠতি কৌন্তেয় ধারণাসু যথাবিধি
মরণং জন্ম দুঃখং চ সুখং চ স বিমুঞ্চতি
289.57
নানাশাস্ত্রেষু নিষ্পন্নং যোগেষ্বিদমুদাহৃতম্
পরং যোগং তু যত্কৃত্স্নং নিশ্চিতং তদ্দ্বিজাতিষু
289.58
পরং হি তদ্ব্রহ্ম মহন্মহাত্ম;ন্ব্রহ্মাণমীশং বরদং চ বিষ্ণুম্
ভবং চ ধর্মং চ ষডাননং চ; ষড্ব্রহ্মপুত্রাংশ্চ মহানুভাবান্
289.59
তমশ্চ কষ্টং সুমহদ্রজশ্চ; সত্ত্বং চ শুদ্ধং প্রকৃতিং পরাং চ
সিদ্ধিং চ দেবীং বরুণস্য পত্নীং; তেজশ্চ কৃত্স্নং সুমহচ্চ ধৈর্যম্
289.60
তারাধিপং বৈ বিমলং সতারং; বিশ্বাংশ্চ দেবানুরগান্পিতৄংশ্চ
শৈলাংশ্চ কৃত্স্নানুদধীংশ্চ ঘোরা;ন্নদীশ্চ সর্বাঃ সবনান্ঘনাংশ্চ
289.61
নাগান্নগান্যক্ষগণান্দিশশ্চ; গন্ধর্বসংঘান্পুরুষান্স্ত্রিয়শ্চ
পরস্পরং প্রাপ্য মহান্মহাত্মা; বিশেত যোগী নচিরাদ্বিমুক্তঃ
289.62
কথা চ যেয়ং নৃপতে প্রসক্তা; দেবে মহাবীর্যমতৌ শুভেয়ম্
যোগান্স সর্বানভিভূয় মর্ত্যা;ন্নারায়ণাত্মা কুরুতে মহাত্মা