UtshovChapter 306
306.1
याज्ञवल्क्य उवाच
अव्यक्तस्थं परं यत्तत्पृष्टस्तेऽहं नराधिप
परं गुह्यमिमं प्रश्नं शृणुष्वावहितो नृप
Yagyavalkya uvacha
Avyaktastham param yattatprishtasteham naradhipa
Param guhyamimam prashnam shrinushvavahito nripa
306.2
यथार्षेणेह विधिना चरतावमतेन ह
मयादित्यादवाप्तानि यजूंषि मिथिलाधिप
Yatharsheneha vidhina charatavamatena ha
Mayadityadavaptani yajunshi mithiladhipa
306.3
महता तपसा देवस्तपिष्ठः सेवितो मया
प्रीतेन चाहं विभुना सूर्येणोक्तस्तदानघ
Mahata tapasa devastapishthah sevito maya
Pritena chaham vibhuna suryenoktastadanagha
306.4
वरं वृणीष्व विप्रर्षे यदिष्टं ते सुदुर्लभम्
तत्ते दास्यामि प्रीतात्मा मत्प्रसादो हि दुर्लभः
Varam vrinishva viprarshe yadishtam te sudurlabham
Tatte dasyami pritatma matprasado hi durlabhah
306.5
ततः प्रणम्य शिरसा मयोक्तस्तपतां वरः
यजूंषि नोपयुक्तानि क्षिप्रमिच्छामि वेदितुम्
Tatah pranamya shirasa mayoktastapatam varah
Yajunshi nopayuktani kshipramichchhami veditum
306.6
ततो मां भगवानाह वितरिष्यामि ते द्विज
सरस्वतीह वाग्भूता शरीरं ते प्रवेक्ष्यति
Tato mam bhagavanaha vitarishyami te dvija
Sarasvatiha vagbhuta shariram te pravekshyati
306.7
ततो मामाह भगवानास्यं स्वं विवृतं कुरु
विवृतं च ततो मेऽऽस्यं प्रविष्टा च सरस्वती
Tato mamaha bhagavanasyam svam vivritam kuru
Vivritam cha tato mesyam pravishta cha sarasvati
306.8
ततो विदह्यमानोऽहं प्रविष्टोऽम्भस्तदानघ
अविज्ञानादमर्षाच्च भास्करस्य महात्मनः
Tato vidahyamanoham pravishtombhastadanagha
Avigyanadamarshachcha bhaskarasya mahatmanah
306.9
ततो विदह्यमानं मामुवाच भगवान्रविः
मुहूर्तं सह्यतां दाहस्ततः शीतीभविष्यसि
Tato vidahyamanam mamuvacha bhagavanravih
Muhurtam sahyatam dahastatah shitibhavishyasi
306.10
शीतीभूतं च मां दृष्ट्वा भगवानाह भास्करः
प्रतिष्ठास्यति ते वेदः सोत्तरः सखिलो द्विज
Shitibhutam cha mam drishtva bhagavanaha bhaskarah
Pratishthasyati te vedah sottarah sakhilo dvija
306.11
कृत्स्नं शतपथं चैव प्रणेष्यसि द्विजर्षभ
तस्यान्ते चापुनर्भावे बुद्धिस्तव भविष्यति
Kritsnam shatapatham chaiva praneshyasi dvijarshabha
Tasyante chapunarbhave buddhistava bhavishyati
306.12
प्राप्स्यसे च यदिष्टं तत्सांख्ययोगेप्सितं पदम्
एतावदुक्त्वा भगवानस्तमेवाभ्यवर्तत
Prapsyase cha yadishtam tatsankhyayogepsitam padam
Etavaduktva bhagavanastamevabhyavartata
306.13
ततोऽनुव्याहृतं श्रुत्वा गते देवे विभावसौ
गृहमागत्य संहृष्टोऽचिन्तयं वै सरस्वतीम्
Tatonuvyahritam shrutva gate deve vibhavasau
Grihamagatya sanhrishtochintayam vai sarasvatim
306.14
ततः प्रवृत्तातिशुभा स्वरव्यञ्जनभूषिता
ओंकारमादितः कृत्वा मम देवी सरस्वती
Tatah pravrittatishubha svaravyanjanabhushita
Onkaramaditah kritva mama devi sarasvati
306.15
ततोऽहमर्घ्यं विधिवत्सरस्वत्यै न्यवेदयम्
तपतां च वरिष्ठाय निषण्णस्तत्परायणः
Tatohamarghyam vidhivatsarasvatyai nyavedayam
Tapatam cha varishthaya nishannastatparayanah
306.16
ततः शतपथं कृत्स्नं सरहस्यं ससंग्रहम्
चक्रे सपरिशेषं च हर्षेण परमेण ह
Tatah shatapatham kritsnam sarahasyam sasangraham
Chakre saparishesham cha harshena paramena ha
306.17
कृत्वा चाध्ययनं तेषां शिष्याणां शतमुत्तमम्
विप्रियार्थं सशिष्यस्य मातुलस्य महात्मनः
Kritva chadhyayanam tesham shishyanam shatamuttamam
Vipriyartham sashishyasya matulasya mahatmanah
306.18
ततः सशिष्येण मया सूर्येणेव गभस्तिभिः
व्याप्तो यज्ञो महाराज पितुस्तव महात्मनः
Tatah sashishyena maya suryeneva gabhastibhih
Vyapto yagyo maharaja pitustava mahatmanah
306.19
मिषतो देवलस्यापि ततोऽर्धं हृतवानहम्
स्ववेददक्षिणायाथ विमर्दे मातुलेन ह
Mishato devalasyapi tatordham hritavanaham
Svavedadakshinayatha vimarde matulena ha
306.20
सुमन्तुनाथ पैलेन तथा जैमिनिना च वै
पित्रा ते मुनिभिश्चैव ततोऽहमनुमानितः
Sumantunatha pailena tatha jaiminina cha vai
Pitra te munibhishchaiva tatohamanumanitah
306.21
दश पञ्च च प्राप्तानि यजूंष्यर्कान्मयानघ
तथैव लोमहर्षाच्च पुराणमवधारितम्
Dasha pancha cha praptani yajunshyarkanmayanagha
Tathaiva lomaharshachcha puranamavadharitam
306.22
बीजमेतत्पुरस्कृत्य देवीं चैव सरस्वतीम्
सूर्यस्य चानुभावेन प्रवृत्तोऽहं नराधिप
Bijametatpuraskritya devim chaiva sarasvatim
Suryasya chanubhavena pravrittoham naradhipa
306.23
कर्तुं शतपथं वेदमपूर्वं कारितं च मे
यथाभिलषितं मार्गं तथा तच्चोपपादितम्
Kartum shatapatham vedamapurvam karitam cha me
Yathabhilashitam margam tatha tachchopapaditam
306.24
शिष्याणामखिलं कृत्स्नमनुज्ञातं ससंग्रहम्
सर्वे च शिष्याः शुचयो गताः परमहर्षिताः
Shishyanamakhilam kritsnamanugyatam sasangraham
Sarve cha shishyah shuchayo gatah paramaharshitah
306.25
शाखाः पञ्चदशेमास्तु विद्या भास्करदर्शिताः
प्रतिष्ठाप्य यथाकामं वेद्यं तदनुचिन्तयम्
Shakhah panchadashemastu vidya bhaskaradarshitah
Pratishthapya yathakamam vedyam tadanuchintayam
306.26
किमत्र ब्रह्मण्यमृतं किं च वेद्यमनुत्तमम्
चिन्तये तत्र चागत्य गन्धर्वो मामपृच्छत
Kimatra brahmanyamritam kim cha vedyamanuttamam
Chintaye tatra chagatya gandharvo mamaprichchhata
306.27
विश्वावसुस्ततो राजन्वेदान्तज्ञानकोविदः
चतुर्विंशतिकान्प्रश्नान्पृष्ट्वा वेदस्य पार्थिव
पञ्चविंशतिमं प्रश्नं पप्रच्छान्वीक्षिकीं तथा
Vishvavasustato rajanvedantagyanakovidah
Chaturvinshatikanprashnanprishtva vedasya parthiva
Panchavinshatimam prashnam paprachchhanvikshikim tatha
306.28
विश्वाविश्वं तथाश्वाश्वं मित्रं वरुणमेव च
ज्ञानं ज्ञेयं तथाज्ञो ज्ञः कस्तपा अतपास्तथा
सूर्यादः सूर्य इति च विद्याविद्ये तथैव च
Vishvavishvam tathashvashvam mitram varunameva cha
Gyanam gyeyam tathagyo gyah kastapa atapastatha
Suryadah surya iti cha vidyavidye tathaiva cha
306.29
वेद्यावेद्यं तथा राजन्नचलं चलमेव च
अपूर्वमक्षयं क्षय्यमेतत्प्रश्नमनुत्तमम्
Vedyavedyam tatha rajannachalam chalameva cha
Apurvamakshayam kshayyametatprashnamanuttamam
306.30
अथोक्तश्च मया राजन्राजा गन्धर्वसत्तमः
पृष्टवाननुपूर्वेण प्रश्नमुत्तममर्थवत्
Athoktashcha maya rajanraja gandharvasattamah
Prishtavananupurvena prashnamuttamamarthavat
306.31
मुहूर्तं मृष्यतां तावद्यावदेनं विचिन्तये
बाढमित्येव कृत्वा स तूष्णीं गन्धर्व आस्थितः
Muhurtam mrishyatam tavadyavadenam vichintaye
Badhamityeva kritva sa tushnim gandharva asthitah
306.32
ततोऽन्वचिन्तयमहं भूयो देवीं सरस्वतीम्
मनसा स च मे प्रश्नो दध्नो घृतमिवोद्धृतम्
Tatonvachintayamaham bhuyo devim sarasvatim
Manasa sa cha me prashno dadhno ghritamivoddhritam
306.33
तत्रोपनिषदं चैव परिशेषं च पार्थिव
मथ्नामि मनसा तात दृष्ट्वा चान्वीक्षिकीं पराम्
Tatropanishadam chaiva parishesham cha parthiva
Mathnami manasa tata drishtva chanvikshikim param
306.34
चतुर्थी राजशार्दूल विद्यैषा सांपरायिकी
उदीरिता मया तुभ्यं पञ्चविंशेऽधि धिष्ठिता
Chaturthi rajashardula vidyaisha samparayiki
Udirita maya tubhyam panchavinshedhi dhishthita
306.35
अथोक्तस्तु मया राजन्राजा विश्वावसुस्तदा
श्रूयतां यद्भवानस्मान्प्रश्नं संपृष्टवानिह
Athoktastu maya rajanraja vishvavasustada
Shruyatam yadbhavanasmanprashnam samprishtavaniha
306.36
विश्वाविश्वेति यदिदं गन्धर्वेन्द्रानुपृच्छसि
विश्वाव्यक्तं परं विद्याद्भूतभव्यभयंकरम्
Vishvavishveti yadidam gandharvendranuprichchhasi
Vishvavyaktam param vidyadbhutabhavyabhayankaram
306.37
त्रिगुणं गुणकर्तृत्वादविश्वो निष्कलस्तथा
अश्वस्तथैव मिथुनमेवमेवानुदृश्यते
Trigunam gunakartritvadavishvo nishkalastatha
Ashvastathaiva mithunamevamevanudrishyate
306.38
अव्यक्तं प्रकृतिं प्राहुः पुरुषेति च निर्गुणम्
तथैव मित्रं पुरुषं वरुणं प्रकृतिं तथा
Avyaktam prakritim prahuh purusheti cha nirgunam
Tathaiva mitram purusham varunam prakritim tatha
306.39
ज्ञानं तु प्रकृतिं प्राहुर्ज्ञेयं निष्कलमेव च
अज्ञश्च ज्ञश्च पुरुषस्तस्मान्निष्कल उच्यते
Gyanam tu prakritim prahurgyeyam nishkalameva cha
Agyashcha gyashcha purushastasmannishkala uchyate
306.40
कस्तपा अतपाः प्रोक्तः कोऽसौ पुरुष उच्यते
तपाः प्रकृतिरित्याहुरतपा निष्कलः स्मृतः
Kastapa atapah proktah kosau purusha uchyate
Tapah prakritirityahuratapa nishkalah smritah
306.41
तथैवावेद्यमव्यक्तं वेद्यः पुरुष उच्यते
चलाचलमिति प्रोक्तं त्वया तदपि मे शृणु
Tathaivavedyamavyaktam vedyah purusha uchyate
Chalachalamiti proktam tvaya tadapi me shrinu
306.42
चलां तु प्रकृतिं प्राहुः कारणं क्षेपसर्गयोः
अक्षेपसर्गयोःकर्ता निश्चलः पुरुषः स्मृतः
Chalam tu prakritim prahuh karanam kshepasargayoh
Akshepasargayohkarta nishchalah purushah smritah
306.43
अजावुभावप्रजौ च अक्षयौ चाप्युभावपि
अजौ नित्यावुभौ प्राहुरध्यात्मगतिनिश्चयाः
Ajavubhavaprajau cha akshayau chapyubhavapi
Ajau nityavubhau prahuradhyatmagatinishchayah
306.44
अक्षयत्वात्प्रजनने अजमत्राहुरव्ययम्
अक्षयं पुरुषं प्राहुः क्षयो ह्यस्य न विद्यते
Akshayatvatprajanane ajamatrahuravyayam
Akshayam purusham prahuh kshayo hyasya na vidyate
306.45
गुणक्षयत्वात्प्रकृतिः कर्तृत्वादक्षयं बुधाः
एषा तेऽऽन्वीक्षिकी विद्या चतुर्थी सांपरायिकी
Gunakshayatvatprakritih kartritvadakshayam budhah
Esha tenvikshiki vidya chaturthi samparayiki
306.46
विद्योपेतं धनं कृत्वा कर्मणा नित्यकर्मणि
एकान्तदर्शना वेदाः सर्वे विश्वावसो स्मृताः
Vidyopetam dhanam kritva karmana nityakarmani
Ekantadarshana vedah sarve vishvavaso smritah
306.47
जायन्ते च म्रियन्ते च यस्मिन्नेते यतश्च्युताः
वेदार्थं ये न जानन्ति वेद्यं गन्धर्वसत्तम
Jayante cha mriyante cha yasminnete yatashchyutah
Vedartham ye na jananti vedyam gandharvasattama
306.48
साङ्गोपाङ्गानपि यदि पञ्च वेदानधीयते
वेदवेद्यं न जानीते वेदभारवहो हि सः
Sangopanganapi yadi pancha vedanadhiyate
Vedavedyam na janite vedabharavaho hi sah
306.49
यो घृतार्थी खरीक्षीरं मथेद्गन्धर्वसत्तम
विष्ठां तत्रानुपश्येत न मण्डं नापि वा घृतम्
Yo ghritarthi kharikshiram mathedgandharvasattama
Vishtham tatranupashyeta na mandam napi va ghritam
306.50
तथा वेद्यमवेद्यं च वेदविद्यो न विन्दति
स केवलं मूढमतिर्ज्ञानभारवहः स्मृतः
Tatha vedyamavedyam cha vedavidyo na vindati
Sa kevalam mudhamatirgyanabharavahah smritah
306.51
द्रष्टव्यौ नित्यमेवैतौ तत्परेणान्तरात्मना
यथास्य जन्मनिधने न भवेतां पुनः पुनः
Drashtavyau nityamevaitau tatparenantaratmana
Yathasya janmanidhane na bhavetam punah punah
306.52
अजस्रं जन्मनिधनं चिन्तयित्वा त्रयीमिमाम्
परित्यज्य क्षयमिह अक्षयं धर्ममास्थितः
Ajasram janmanidhanam chintayitva trayimimam
Parityajya kshayamiha akshayam dharmamasthitah
306.53
यदा तु पश्यतेऽत्यन्तमहन्यहनि काश्यप
तदा स केवलीभूतः षड्विंशमनुपश्यति
Yada tu pashyatetyantamahanyahani kashyapa
Tada sa kevalibhutah shadvinshamanupashyati
306.54
अन्यश्च शश्वदव्यक्तस्तथान्यः पञ्चविंशकः
तस्य द्वावनुपश्येत तमेकमिति साधवः
Anyashcha shashvadavyaktastathanyah panchavinshakah
Tasya dvavanupashyeta tamekamiti sadhavah
306.55
तेनैतन्नाभिजानन्ति पञ्चविंशकमच्युतम्
जन्ममृत्युभयाद्योगाः सांख्याश्च परमैषिणः
Tenaitannabhijananti panchavinshakamachyutam
Janmamrityubhayadyogah sankhyashcha paramaishinah
306.56
विश्वावसुरुवाच
पञ्चविंशं यदेतत्ते प्रोक्तं ब्राह्मणसत्तम
तथा तन्न तथा वेति तद्भवान्वक्तुमर्हति
Vishvavasuruvacha
Panchavinsham yadetatte proktam brahmanasattama
Tatha tanna tatha veti tadbhavanvaktumarhati
306.57
जैगीषव्यस्यासितस्य देवलस्य च मे श्रुतम्
पराशरस्य विप्रर्षेर्वार्षगण्यस्य धीमतः
Jaigishavyasyasitasya devalasya cha me shrutam
Parasharasya viprarshervarshaganyasya dhimatah
306.58
भिक्षोः पञ्चशिखस्याथ कपिलस्य शुकस्य च
गौतमस्यार्ष्टिषेणस्य गर्गस्य च महात्मनः
Bhikshoh panchashikhasyatha kapilasya shukasya cha
Gautamasyarshtishenasya gargasya cha mahatmanah
306.59
नारदस्यासुरेश्चैव पुलस्त्यस्य च धीमतः
सनत्कुमारस्य ततः शुक्रस्य च महात्मनः
Naradasyasureshchaiva pulastyasya cha dhimatah
Sanatkumarasya tatah shukrasya cha mahatmanah
306.60
कश्यपस्य पितुश्चैव पूर्वमेव मया श्रुतम्
तदनन्तरं च रुद्रस्य विश्वरूपस्य धीमतः
Kashyapasya pitushchaiva purvameva maya shrutam
Tadanantaram cha rudrasya vishvarupasya dhimatah
306.61
दैवतेभ्यः पितृभ्यश्च दैत्येभ्यश्च ततस्ततः
प्राप्तमेतन्मया कृत्स्नं वेद्यं नित्यं वदन्त्युत
Daivatebhyah pitribhyashcha daityebhyashcha tatastatah
Praptametanmaya kritsnam vedyam nityam vadantyuta
306.62
तस्मात्तद्वै भवद्बुद्ध्या श्रोतुमिच्छामि ब्राह्मण
भवान्प्रबर्हः शास्त्राणां प्रगल्भश्चातिबुद्धिमान्
Tasmattadvai bhavadbuddhya shrotumichchhami brahmana
Bhavanprabarhah shastranam pragalbhashchatibuddhiman
306.63
न तवाविदितं किंचिद्भवाञ्श्रुतिनिधिः स्मृतः
कथ्यते देवलोके च पितृलोके च ब्राह्मण
Na tavaviditam kinchidbhavanshrutinidhih smritah
Kathyate devaloke cha pitriloke cha brahmana
306.64
ब्रह्मलोकगताश्चैव कथयन्ति महर्षयः
पतिश्च तपतां शश्वदादित्यस्तव भाषते
Brahmalokagatashchaiva kathayanti maharshayah
Patishcha tapatam shashvadadityastava bhashate
306.65
सांख्यज्ञानं त्वया ब्रह्मन्नवाप्तं कृत्स्नमेव च
तथैव योगज्ञानं च याज्ञवल्क्य विशेषतः
Sankhyagyanam tvaya brahmannavaptam kritsnameva cha
Tathaiva yogagyanam cha yagyavalkya visheshatah
306.66
निःसंदिग्धं प्रबुद्धस्त्वं बुध्यमानश्चराचरम्
श्रोतुमिच्छामि तज्ज्ञानं घृतं मण्डमयं यथा
Nihsandigdham prabuddhastvam budhyamanashcharacharam
Shrotumichchhami tajgyanam ghritam mandamayam yatha
306.67
याज्ञवल्क्य उवाच
कृत्स्नधारिणमेव त्वां मन्ये गन्धर्वसत्तम
जिज्ञाससि च मां राजंस्तन्निबोध यथाश्रुतम्
Yagyavalkya uvacha
Kritsnadharinameva tvam manye gandharvasattama
Jigyasasi cha mam rajanstannibodha yathashrutam
306.68
अबुध्यमानां प्रकृतिं बुध्यते पञ्चविंशकः
न तु बुध्यति गन्धर्व प्रकृतिः पञ्चविंशकम्
Abudhyamanam prakritim budhyate panchavinshakah
Na tu budhyati gandharva prakritih panchavinshakam
306.69
अनेनाप्रतिबोधेन प्रधानं प्रवदन्ति तम्
सांख्ययोगाश्च तत्त्वज्ञा यथाश्रुतिनिदर्शनात्
Anenapratibodhena pradhanam pravadanti tam
Sankhyayogashcha tattvagya yathashrutinidarshanat
306.70
पश्यंस्तथैवापश्यंश्च पश्यत्यन्यस्तथानघ
षड्विंशः पञ्चविंशं च चतुर्विंशं च पश्यति
न तु पश्यति पश्यंस्तु यश्चैनमनुपश्यति
Pashyanstathaivapashyanshcha pashyatyanyastathanagha
Shadvinshah panchavinsham cha chaturvinsham cha pashyati
Na tu pashyati pashyanstu yashchainamanupashyati
306.71
पञ्चविंशोऽभिमन्येत नान्योऽस्ति परमो मम
न चतुर्विंशकोऽग्राह्यो मनुजैर्ज्ञानदर्शिभिः
Panchavinshobhimanyeta nanyosti paramo mama
Na chaturvinshakograhyo manujairgyanadarshibhih
306.72
मत्स्येवोदकमन्वेति प्रवर्तति प्रवर्तनात्
यथैव बुध्यते मत्स्यस्तथैषोऽप्यनुबुध्यते
सस्नेहः सहवासाच्च साभिमानश्च नित्यशः
Matsyevodakamanveti pravartati pravartanat
Yathaiva budhyate matsyastathaishopyanubudhyate
Sasnehah sahavasachcha sabhimanashcha nityashah
306.73
स निमज्जति कालस्य यदैकत्वं न बुध्यते
उन्मज्जति हि कालस्य ममत्वेनाभिसंवृतः
Sa nimajjati kalasya yadaikatvam na budhyate
Unmajjati hi kalasya mamatvenabhisanvritah
306.74
यदा तु मन्यतेऽन्योऽहमन्य एष इति द्विजः
तदा स केवलीभूतः षड्विंशमनुपश्यति
Yada tu manyatenyohamanya esha iti dvijah
Tada sa kevalibhutah shadvinshamanupashyati
306.75
अन्यश्च राजन्नवरस्तथान्यः पञ्चविंशकः
तत्स्थत्वादनुपश्यन्ति एक एवेति साधवः
Anyashcha rajannavarastathanyah panchavinshakah
Tatsthatvadanupashyanti eka eveti sadhavah
306.76
तेनैतन्नाभिनन्दन्ति पञ्चविंशकमच्युतम्
जन्ममृत्युभयाद्भीता योगाः सांख्याश्च काश्यप
षड्विंशमनुपश्यन्ति शुचयस्तत्परायणाः
Tenaitannabhinandanti panchavinshakamachyutam
Janmamrityubhayadbhita yogah sankhyashcha kashyapa
Shadvinshamanupashyanti shuchayastatparayanah
306.77
यदा स केवलीभूतः षड्विंशमनुपश्यति
तदा स सर्वविद्विद्वान्न पुनर्जन्म विन्दति
Yada sa kevalibhutah shadvinshamanupashyati
Tada sa sarvavidvidvanna punarjanma vindati
306.78
एवमप्रतिबुद्धश्च बुध्यमानश्च तेऽनघ
बुद्धश्चोक्तो यथातत्त्वं मया श्रुतिनिदर्शनात्
Evamapratibuddhashcha budhyamanashcha tenagha
Buddhashchokto yathatattvam maya shrutinidarshanat
306.79
पश्यापश्यं योऽनुपश्येत्क्षेमं तत्त्वं च काश्यप
केवलाकेवलं चाद्यं पञ्चविंशात्परं च यत्
Pashyapashyam yonupashyetkshemam tattvam cha kashyapa
Kevalakevalam chadyam panchavinshatparam cha yat
306.80
विश्वावसुरुवाच
तथ्यं शुभं चैतदुक्तं त्वया भोः; सम्यक्क्षेम्यं देवताद्यं यथावत्
स्वस्त्यक्षयं भवतश्चास्तु नित्यं; बुद्ध्या सदा बुद्धियुक्तं नमस्ते
Vishvavasuruvacha
Tathyam shubham chaitaduktam tvaya bhoh; samyakkshemyam devatadyam yathavat
Svastyakshayam bhavatashchastu nityam; buddhya sada buddhiyuktam namaste
306.81
याज्ञवल्क्य उवाच
एवमुक्त्वा संप्रयातो दिवं स; विभ्राजन्वै श्रीमता दर्शनेन
तुष्टश्च तुष्ट्या परयाभिनन्द्य; प्रदक्षिणं मम कृत्वा महात्मा
Yagyavalkya uvacha
Evamuktva samprayato divam sa; vibhrajanvai shrimata darshanena
Tushtashcha tushtya parayabhinandya; pradakshinam mama kritva mahatma
306.82
ब्रह्मादीनां खेचराणां क्षितौ च; ये चाधस्तात्संवसन्ते नरेन्द्र
तत्रैव तद्दर्शनं दर्शयन्वै; सम्यक्क्षेम्यं ये पथं संश्रिता वै
Brahmadinam khecharanam kshitau cha; ye chadhastatsanvasante narendra
Tatraiva taddarshanam darshayanvai; samyakkshemyam ye patham sanshrita vai
306.83
सांख्याः सर्वे सांख्यधर्मे रताश्च; तद्वद्योगा योगधर्मे रताश्च
ये चाप्यन्ये मोक्षकामा मनुष्या;स्तेषामेतद्दर्शनं ज्ञानदृष्टम्
Sankhyah sarve sankhyadharme ratashcha; tadvadyoga yogadharme ratashcha
Ye chapyanye mokshakama manushya;steshametaddarshanam gyanadrishtam
306.84
ज्ञानान्मोक्षो जायते पूरुषाणां; नास्त्यज्ञानादेवमाहुर्नरेन्द्र
तस्माज्ज्ञानं तत्त्वतोऽन्वेषितव्यं; येनात्मानं मोक्षयेज्जन्ममृत्योः
Gyananmoksho jayate purushanam; nastyagyanadevamahurnarendra
Tasmajgyanam tattvatonveshitavyam; yenatmanam mokshayejjanmamrityoh
306.85
प्राप्य ज्ञानं ब्राह्मणात्क्षत्रियाद्वा; वैश्याच्छूद्रादपि नीचादभीक्ष्णम्
श्रद्धातव्यं श्रद्दधानेन नित्यं; न श्रद्धिनं जन्ममृत्यू विशेताम्
Prapya gyanam brahmanatkshatriyadva; vaishyachchhudradapi nichadabhikshnam
Shraddhatavyam shraddadhanena nityam; na shraddhinam janmamrityu vishetam
306.86
सर्वे वर्णा ब्राह्मणा ब्रह्मजाश्च; सर्वे नित्यं व्याहरन्ते च ब्रह्म
तत्त्वं शास्त्रं ब्रह्मबुद्ध्या ब्रवीमि; सर्वं विश्वं ब्रह्म चैतत्समस्तम्
Sarve varna brahmana brahmajashcha; sarve nityam vyaharante cha brahma
Tattvam shastram brahmabuddhya bravimi; sarvam vishvam brahma chaitatsamastam
306.87
ब्रह्मास्यतो ब्राह्मणाः संप्रसूता; बाहुभ्यां वै क्षत्रियाः संप्रसूताः
नाभ्यां वैश्याः पादतश्चापि शूद्राः; सर्वे वर्णा नान्यथा वेदितव्याः
Brahmasyato brahmanah samprasuta; bahubhyam vai kshatriyah samprasutah
Nabhyam vaishyah padatashchapi shudrah; sarve varna nanyatha veditavyah
306.88
अज्ञानतः कर्मयोनिं भजन्ते; तां तां राजंस्ते यथा यान्त्यभावम्
तथा वर्णा ज्ञानहीनाः पतन्ते; घोरादज्ञानात्प्राकृतं योनिजालम्
Agyanatah karmayonim bhajante; tam tam rajanste yatha yantyabhavam
Tatha varna gyanahinah patante; ghoradagyanatprakritam yonijalam
306.89
तस्माज्ज्ञानं सर्वतो मार्गितव्यं; सर्वत्रस्थं चैतदुक्तं मया ते
तस्थौ ब्रह्मा तस्थिवांश्चापरो य;स्तस्मै नित्यं मोक्षमाहुर्द्विजेन्द्राः
Tasmajgyanam sarvato margitavyam; sarvatrastham chaitaduktam maya te
Tasthau brahma tasthivanshchaparo ya;stasmai nityam mokshamahurdvijendrah
306.90
यत्ते पृष्टं तन्मया चोपदिष्टं; याथातथ्यं तद्विशोको भवस्व
राजन्गच्छस्वैतदर्थस्य पारं; सम्यक्प्रोक्तं स्वस्ति तेऽस्त्वत्र नित्यम्
Yatte prishtam tanmaya chopadishtam; yathatathyam tadvishoko bhavasva
Rajangachchhasvaitadarthasya param; samyakproktam svasti testvatra nityam
306.91
भीष्म उवाच
स एवमनुशास्तस्तु याज्ञवल्क्येन धीमता
प्रीतिमानभवद्राजा मिथिलाधिपतिस्तदा
Bhishma uvacha
Sa evamanushastastu yagyavalkyena dhimata
Pritimanabhavadraja mithiladhipatistada
306.92
गते मुनिवरे तस्मिन्कृते चापि प्रदक्षिणे
दैवरातिर्नरपतिरासीनस्तत्र मोक्षवित्
Gate munivare tasminkrite chapi pradakshine
Daivaratirnarapatirasinastatra mokshavit
306.93
गोकोटिं स्पर्शयामास हिरण्यस्य तथैव च
रत्नाञ्जलिमथैकं च ब्राह्मणेभ्यो ददौ तदा
Gokotim sparshayamasa hiranyasya tathaiva cha
Ratnanjalimathaikam cha brahmanebhyo dadau tada
306.94
विदेहराज्यं च तथा प्रतिष्ठाप्य सुतस्य वै
यतिधर्ममुपासंश्चाप्यवसन्मिथिलाधिपः
Videharajyam cha tatha pratishthapya sutasya vai
Yatidharmamupasanshchapyavasanmithiladhipah
306.95
सांख्यज्ञानमधीयानो योगशास्त्रं च कृत्स्नशः
धर्माधर्मौ च राजेन्द्र प्राकृतं परिगर्हयन्
Sankhyagyanamadhiyano yogashastram cha kritsnashah
Dharmadharmau cha rajendra prakritam parigarhayan
306.96
अनन्तमिति कृत्वा स नित्यं केवलमेव च
धर्माधर्मौ पुण्यपापे सत्यासत्ये तथैव च
Anantamiti kritva sa nityam kevalameva cha
Dharmadharmau punyapape satyasatye tathaiva cha
306.97
जन्ममृत्यू च राजेन्द्र प्राकृतं तदचिन्तयत्
ब्रह्माव्यक्तस्य कर्मेदमिति नित्यं नराधिप
Janmamrityu cha rajendra prakritam tadachintayat
Brahmavyaktasya karmedamiti nityam naradhipa
306.98
पश्यन्ति योगाः सांख्याश्च स्वशास्त्रकृतलक्षणाः
इष्टानिष्टवियुक्तं हि तस्थौ ब्रह्म परात्परम्
नित्यं तमाहुर्विद्वांसः शुचिस्तस्माच्छुचिर्भव
Pashyanti yogah sankhyashcha svashastrakritalakshanah
Ishtanishtaviyuktam hi tasthau brahma paratparam
Nityam tamahurvidvansah shuchistasmachchhuchirbhava
306.99
दीयते यच्च लभते दत्तं यच्चानुमन्यते
ददाति च नरश्रेष्ठ प्रतिगृह्णाति यच्च ह
ददात्यव्यक्तमेवैतत्प्रतिगृह्णाति तच्च वै
Diyate yachcha labhate dattam yachchanumanyate
Dadati cha narashreshtha pratigrihnati yachcha ha
Dadatyavyaktamevaitatpratigrihnati tachcha vai
306.100
आत्मा ह्येवात्मनो ह्येकः कोऽन्यस्त्वत्तोऽधिको भवेत्
एवं मन्यस्व सततमन्यथा मा विचिन्तय
Atma hyevatmano hyekah konyastvattodhiko bhavet
Evam manyasva satatamanyatha ma vichintaya
306.101
यस्याव्यक्तं न विदितं सगुणं निर्गुणं पुनः
तेन तीर्थानि यज्ञाश्च सेवितव्याविपश्चिता
Yasyavyaktam na viditam sagunam nirgunam punah
Tena tirthani yagyashcha sevitavyavipashchita
306.102
न स्वाध्यायैस्तपोभिर्वा यज्ञैर्वा कुरुनन्दन
लभतेऽव्यक्तसंस्थानं ज्ञात्वाव्यक्तं महीपते
Na svadhyayaistapobhirva yagyairva kurunandana
Labhatevyaktasansthanam gyatvavyaktam mahipate
306.103
तथैव महतः स्थानमाहंकारिकमेव च
अहंकारात्परं चापि स्थानानि समवाप्नुयात्
Tathaiva mahatah sthanamahankarikameva cha
Ahankaratparam chapi sthanani samavapnuyat
306.104
ये त्वव्यक्तात्परं नित्यं जानते शास्त्रतत्पराः
जन्ममृत्युवियुक्तं च वियुक्तं सदसच्च यत्
Ye tvavyaktatparam nityam janate shastratatparah
Janmamrityuviyuktam cha viyuktam sadasachcha yat
306.105
एतन्मयाप्तं जनकात्पुरस्ता;त्तेनापि चाप्तं नृप याज्ञवल्क्यात्
ज्ञानं विशिष्टं न तथा हि यज्ञा; ज्ञानेन दुर्गं तरते न यज्ञैः
Etanmayaptam janakatpurasta;ttenapi chaptam nripa yagyavalkyat
Gyanam vishishtam na tatha hi yagya; gyanena durgam tarate na yagyaih
306.106
दुर्गं जन्म निधनं चापि राज;न्न भूतिकं ज्ञानविदो वदन्ति
यज्ञैस्तपोभिर्नियमैर्व्रतैश्च; दिवं समासाद्य पतन्ति भूमौ
Durgam janma nidhanam chapi raja;nna bhutikam gyanavido vadanti
Yagyaistapobhirniyamairvrataishcha; divam samasadya patanti bhumau
306.107
तस्मादुपासस्व परं महच्छुचि; शिवं विमोक्षं विमलं पवित्रम्
क्षेत्रज्ञवित्पार्थिव ज्ञानयज्ञ;मुपास्य वै तत्त्वमृषिर्भविष्यसि
Tasmadupasasva param mahachchhuchi; shivam vimoksham vimalam pavitram
Kshetragyavitparthiva gyanayagya;mupasya vai tattvamrishirbhavishyasi
306.108
उपनिषदमुपाकरोत्तदा वै; जनकनृपस्य पुरा हि याज्ञवल्क्यः
यदुपगणितशाश्वताव्ययं त;च्छुभममृतत्वमशोकमृच्छतीति
Upanishadamupakarottada vai; janakanripasya pura hi yagyavalkyah
Yadupaganitashashvatavyayam ta;chchhubhamamritatvamashokamrichchhatiti