Utshovঅধ্যায় 324
324.1
যুধিষ্ঠির উবাচ
যদা ভক্তো ভগবত আসীদ্রাজা মহাবসুঃ
কিমর্থং স পরিভ্রষ্টো বিবেশ বিবরং ভুবঃ
324.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ঋষীণাং চৈব সংবাদং ত্রিদশানাং চ ভারত
324.3
অজেন যষ্টব্যমিতি দেবাঃ প্রাহুর্দ্বিজোত্তমান্
স চ ছাগো হ্যজো জ্ঞেয়ো নান্যঃ পশুরিতি স্থিতিঃ
324.4
ঋষয় ঊচুঃ
বীজৈর্যজ্ঞেষু যষ্টব্যমিতি বৈ বৈদিকী শ্রুতিঃ
অজসংজ্ঞানি বীজানি ছাগং ন ঘ্নন্তুমর্হথ
324.5
নৈষ ধর্মঃ সতাং দেবা যত্র বধ্যেত বৈ পশুঃ
ইদং কৃতয়ুগং শ্রেষ্ঠং কথং বধ্যেত বৈ পশুঃ
324.6
ভীষ্ম উবাচ
তেষাং সংবদতামেবমৃষীণাং বিবুধৈঃ সহ
মার্গাগতো নৃপশ্রেষ্ঠস্তং দেশং প্রাপ্তবান্বসুঃ
অন্তরিক্ষচরঃ শ্রীমান্সমগ্রবলবাহনঃ
324.7
তং দৃষ্ট্বা সহসায়ান্তং বসুং তে ত্বন্তরিক্ষগম্
ঊচুর্দ্বিজাতয়ো দেবানেষ ছেত্স্যতি সংশয়ম্
324.8
যজ্বা দানপতিঃ শ্রেষ্ঠঃ সর্বভূতহিতপ্রিয়ঃ
কথং স্বিদন্যথা ব্রূয়াদ্বাক্যমেষ মহান্বসুঃ
324.9
এবং তে সংবিদং কৃত্বা বিবুধা ঋষয়স্তথা
অপৃচ্ছন্সহসাভ্যেত্য বসুং রাজানমন্তিকাৎ
324.10
ভো রাজন্কেন যষ্টব্যমজেনাহোস্বিদৌষধৈঃ
এতন্নঃ সংশয়ং ছিন্ধি প্রমাণং নো ভবান্মতঃ
324.11
স তান্কৃতাঞ্জলির্ভূত্বা পরিপপ্রচ্ছ বৈ বসুঃ
কস্য বঃ কো মতঃ পক্ষো ব্রূত সত্যং সমাগতাঃ
324.12
ঋষয় ঊচুঃ
ধান্যৈর্যষ্টব্যমিত্যেষ পক্ষোঽস্মাকং নরাধিপ
দেবানাং তু পশুঃ পক্ষো মতো রাজন্বদস্ব নঃ
324.13
ভীষ্ম উবাচ
দেবানাং তু মতং জ্ঞাত্বা বসুনা পক্ষসংশ্রয়াৎ
ছাগেনাজেন যষ্টব্যমেবমুক্তং বচস্তদা
324.14
কুপিতাস্তে ততঃ সর্বে মুনয়ঃ সূর্যবর্চসঃ
ঊচুর্বসুং বিমানস্থং দেবপক্ষার্থবাদিনম্
324.15
সুরপক্ষো গৃহীতস্তে যস্মাত্তস্মাদ্দিবঃ পত
অদ্য প্রভৃতি তে রাজন্নাকাশে বিহতা গতিঃ
অস্মচ্ছাপাভিঘাতেন মহীং ভিত্ত্বা প্রবেক্ষ্যসি
324.16
ততস্তস্মিন্মুহূর্তেঽথ রাজোপরিচরস্তদা
অধো বৈ সংবভূবাশু ভূমের্বিবরগো নৃপঃ
স্মৃতিস্ত্বেনং ন প্রজহৌ তদা নারায়ণাজ্ঞয়া
324.17
দেবাস্তু সহিতাঃ সর্বে বসোঃ শাপবিমোক্ষণম্
চিন্তয়ামাসুরব্যগ্রাঃ সুকৃতং হি নৃপস্য তৎ
324.18
অনেনাস্মত্কৃতে রাজ্ঞা শাপঃ প্রাপ্তো মহাত্মনা
অস্য প্রতিপ্রিয়ং কার্যং সহিতৈর্নো দিবৌকসঃ
324.19
ইতি বুদ্ধ্যা ব্যবস্যাশু গত্বা নিশ্চয়মীশ্বরাঃ
ঊচুস্তং হৃষ্টমনসো রাজোপরিচরং তদা
324.20
ব্রহ্মণ্যদেবং ত্বং ভক্তঃ সুরাসুরগুরুং হরিম্
কামং স তব তুষ্টাত্মা কুর্যাচ্ছাপবিমোক্ষণম্
324.21
মাননা তু দ্বিজাতীনাং কর্তব্যা বৈ মহাত্মনাম্
অবশ্যং তপসা তেষাং ফলিতব্যং নৃপোত্তম
324.22
যতস্ত্বং সহসা ভ্রষ্ট আকাশান্মেদিনীতলম্
একং ত্বনুগ্রহং তুভ্যং দদ্মো বৈ নৃপসত্তম
324.23
যাবত্ত্বং শাপদোষেণ কালমাসিষ্যসেঽনঘ
ভূমের্বিবরগো ভূত্বা তাবন্তং কালমাপ্স্যসি
যজ্ঞেষু সুহুতাং বিপ্রৈর্বসোর্ধারাং মহাত্মভিঃ
324.24
প্রাপ্স্যসেঽস্মদনুধ্যানান্মা চ ত্বাং গ্লানিরাস্পৃশেৎ
ন ক্ষুত্পিপাসে রাজেন্দ্র ভূমেশ্ছিদ্রে ভবিষ্যতঃ
324.25
বসোর্ধারানুপীতত্বাত্তেজসাপ্যায়িতেন চ
স দেবোঽস্মদ্বরাত্প্রীতো ব্রহ্মলোকং হি নেষ্যতি
324.26
এবং দত্ত্বা বরং রাজ্ঞে সর্বে তত্র দিবৌকসঃ
গতাঃ স্বভবনং দেবা ঋষয়শ্চ তপোধনাঃ
324.27
চক্রে চ সততং পূজাং বিষ্বক্সেনায় ভারত
জপ্যং জগৌ চ সততং নারায়ণমুখোদ্গতম্
324.28
তত্রাপি পঞ্চভির্যজ্ঞৈঃ পঞ্চকালানরিংদম
অয়জদ্ধরিং সুরপতিং ভূমের্বিবরগোঽপি সন্
324.29
ততোঽস্য তুষ্টো ভগবান্ভক্ত্যা নারায়ণো হরিঃ
অনন্যভক্তস্য সতস্তত্পরস্য জিতাত্মনঃ
324.30
বরদো ভগবান্বিষ্ণুঃ সমীপস্থং দ্বিজোত্তমম্
গরুত্মন্তং মহাবেগমাবভাষে স্ময়ন্নিব
324.31
দ্বিজোত্তম মহাভাগ গম্যতাং বচনান্মম
সম্রাড্রাজা বসুর্নাম ধর্মাত্মা মাং সমাশ্রিতঃ
324.32
ব্রাহ্মণানাং প্রকোপেন প্রবিষ্টো বসুধাতলম্
মানিতাস্তে তু বিপ্রেন্দ্রাস্ত্বং তু গচ্ছ দ্বিজোত্তম
324.33
ভূমের্বিবরসংগুপ্তং গরুডেহ মমাজ্ঞয়া
অধশ্চরং নৃপশ্রেষ্ঠং খেচরং কুরু মাচিরম্
324.34
গরুত্মানথ বিক্ষিপ্য পক্ষৌ মারুতবেগবান্
বিবেশ বিবরং ভূমের্যত্রাস্তে বাগ্যতো বসুঃ
324.35
তত এনং সমুত্ক্ষিপ্য সহসা বিনতাসুতঃ
উত্পপাত নভস্তূর্ণং তত্র চৈনমমুঞ্চত
324.36
তস্মিন্মুহূর্তে সংজজ্ঞে রাজোপরিচরঃ পুনঃ
সশরীরো গতশ্চৈব ব্রহ্মলোকং নৃপোত্তমঃ
324.37
এবং তেনাপি কৌন্তেয় বাগ্দোষাদ্দেবতাজ্ঞয়া
প্রাপ্তা গতিরয়জ্বার্হা দ্বিজশাপান্মহাত্মনা
324.38
কেবলং পুরুষস্তেন সেবিতো হরিরীশ্বরঃ
ততঃ শীঘ্রং জহৌ শাপং ব্রহ্মলোকমবাপ চ
324.39
এতত্তে সর্বমাখ্যাতং তে ভূতা মানবা যথা
নারদোঽপি যথা শ্বেতং দ্বীপং স গতবানৃষিঃ
তত্তে সর্বং প্রবক্ষ্যামি শৃণুষ্বৈকমনা নৃপ