Utshovঅধ্যায় 287
287.1
ভীষ্ম উবাচ
পুনরেব তু পপ্রচ্ছ জনকো মিথিলাধিপঃ
পরাশরং মহাত্মানং ধর্মে পরমনিশ্চয়ম্
287.2
কিং শ্রেয়ঃ কা গতির্ব্রহ্মন্কিং কৃতং ন বিনশ্যতি
ক্ব গতো ন নিবর্তেত তন্মে ব্রূহি মহামুনে
287.3
পরাশর উবাচ
অসঙ্গঃ শ্রেয়সো মূলং জ্ঞানং জ্ঞানগতিঃ পরা
চীর্ণং তপো ন প্রণশ্যেদ্বাপঃ ক্ষেত্রে ন নশ্যতি
287.4
ছিত্ত্বাধর্মময়ং পাশং যদা ধর্মেঽভিরজ্যতে
দত্ত্বাভয়কৃতং দানং তদা সিদ্ধিমবাপ্নুয়াৎ
287.5
যো দদাতি সহস্রাণি গবামশ্বশতানি চ
অভয়ং সর্বভূতেভ্যস্তদ্দানমতিবর্ততে
287.6
বসন্বিষয়মধ্যেঽপি ন বসত্যেব বুদ্ধিমান্
সংবসত্যেব দুর্বুদ্ধিরসত্সু বিষয়েষ্বপি
287.7
নাধর্মঃ শ্লিষ্যতে প্রাজ্ঞমাপঃ পুষ্করপর্ণবৎ
অপ্রাজ্ঞমধিকং পাপং শ্লিষ্যতে জতু কাষ্ঠবৎ
287.8
নাধর্মঃ কারণাপেক্ষী কর্তারমভিমুঞ্চতি
কর্তা খলু যথাকালং তত্সর্বমভিপদ্যতে
ন ভিদ্যন্তে কৃতাত্মান আত্মপ্রত্যয়দর্শিনঃ
287.9
বুদ্ধিকর্মেন্দ্রিয়াণাং হি প্রমত্তো যো ন বুধ্যতে
শুভাশুভেষু সক্তাত্মা প্রাপ্নোতি সুমহদ্ভয়ম্
287.10
বীতরাগো জিতক্রোধঃ সম্যগ্ভবতি যঃ সদা
বিষয়ে বর্তমানোঽপি ন স পাপেন যুজ্যতে
287.11
মর্যাদায়াং ধর্মসেতুর্নিবদ্ধো নৈব সীদতি
পুষ্টস্রোত ইবায়ত্তঃ স্ফীতো ভবতি সংচয়ঃ
287.12
যথা ভানুগতং তেজো মণিঃ শুদ্ধঃ সমাধিনা
আদত্তে রাজশার্দূল তথা যোগঃ প্রবর্ততে
287.13
যথা তিলানামিহ পুষ্পসংশ্রয়া;ত্পৃথক্পৃথগ্যাতি গুণোঽতিসৌম্যতাম্
তথা নরাণাং ভুবি ভাবিতাত্মনাং; যথাশ্রয়ং সত্ত্বগুণঃ প্রবর্ততে
287.14
জহাতি দারানিহতে ন সংপদঃ; সদশ্বয়ানং বিবিধাশ্চ যাঃ ক্রিয়াঃ
ত্রিবিষ্টপে জাতমতির্যদা নর;স্তদাস্য বুদ্ধির্বিষয়েষু ভিদ্যতে
287.15
প্রসক্তবুদ্ধির্বিষয়েষু যো নরো; যো বুধ্যতে হ্যাত্মহিতং কদা চ ন
স সর্বভাবানুগতেন চেতসা; নৃপামিষেণেব ঝষো বিকৃষ্যতে
287.16
সংঘাতবান্মর্ত্যলোকঃ পরস্পরমপাশ্রিতঃ
কদলীগর্ভনিঃসারো নৌরিবাপ্সু নিমজ্জতি
287.17
ন ধর্মকালঃ পুরুষস্য নিশ্চিতো; ন চাপি মৃত্যুঃ পুরুষং প্রতীক্ষতে
ক্রিয়া হি ধর্মস্য সদৈব শোভনা; যদা নরো মৃত্যুমুখেঽভিবর্ততে
287.18
যথান্ধঃ স্বগৃহে যুক্তো হ্যভ্যাসাদেব গচ্ছতি
তথা যুক্তেন মনসা প্রাজ্ঞো গচ্ছতি তাং গতিম্
287.19
মরণং জন্মনি প্রোক্তং জন্ম বৈ মরণাশ্রিতম্
অবিদ্বান্মোক্ষধর্মেষু বদ্ধো ভ্রমতি চক্রবৎ
287.20
যথা মৃণালোঽনুগতমাশু মুঞ্চতি কর্দমম্
তথাত্মা পুরুষস্যেহ মনসা পরিমুচ্যতে
মনঃ প্রণয়তেঽঽত্মানং স এনমভিয়ুঞ্জতি
287.21
পরার্থে বর্তমানস্তু স্বকার্যং যোঽভিমন্যতে
ইন্দ্রিয়ার্থেষু সক্তঃ সন্স্বকার্যাত্পরিহীয়তে
287.22
অধস্তির্যগ্গতিং চৈব স্বর্গে চৈব পরাং গতিম্
প্রাপ্নোতি স্বকৃতৈরাত্মা প্রাজ্ঞস্যেহেতরস্য চ
287.23
মৃন্ময়ে ভাজনে পক্বে যথা বৈ ন্যস্যতে দ্রবঃ
তথা শরীরং তপসা তপ্তং বিষয়মশ্নুতে
287.24
বিষয়ানশ্নুতে যস্তু ন স ভোক্ষ্যত্যসংশয়ম্
যস্তু ভোগাংস্ত্যজেদাত্মা স বৈ ভোক্তুং ব্যবস্যতি
287.25
নীহারেণ হি সংবীতঃ শিশ্নোদরপরায়ণঃ
জাত্যন্ধ ইব পন্থানমাবৃতাত্মা ন বুধ্যতে
287.26
বণিগ্যথা সমুদ্রাদ্বৈ যথার্থং লভতে ধনম্
তথা মর্ত্যার্ণবে জন্তোঃ কর্মবিজ্ঞানতো গতিঃ
287.27
অহোরাত্রময়ে লোকে জরারূপেণ সংচরন্
মৃত্যুর্গ্রসতি ভূতানি পবনং পন্নগো যথা
287.28
স্বয়ং কৃতানি কর্মাণি জাতো জন্তুঃ প্রপদ্যতে
নাকৃতং লভতে কশ্চিত্কিংচিদত্র প্রিয়াপ্রিয়ম্
287.29
শয়ানং যান্তমাসীনং প্রবৃত্তং বিষয়েষু চ
শুভাশুভানি কর্মাণি প্রপদ্যন্তে নরং সদা
287.30
ন হ্যন্যত্তীরমাসাদ্য পুনস্তর্তুং ব্যবস্যতি
দুর্লভো দৃশ্যতে হ্যস্য বিনিপাতো মহার্ণবে
287.31
যথা ভারাবসক্তা হি নৌর্মহাম্ভসি তন্তুনা
তথা মনোঽভিয়োগাদ্বৈ শরীরং প্রতিকর্ষতি
287.32
যথা সমুদ্রমভিতঃ সংস্যূতাঃ সরিতোঽপরাঃ
তথাদ্যা প্রকৃতির্যোগাদভিসংস্যূয়তে সদা
287.33
স্নেহপাশৈর্বহুবিধৈরাসক্তমনসো নরাঃ
প্রকৃতিস্থা বিষীদন্তি জলে সৈকতবেশ্মবৎ
287.34
শরীরগৃহসংস্থস্য শৌচতীর্থস্য দেহিনঃ
বুদ্ধিমার্গপ্রয়াতস্য সুখং ত্বিহ পরত্র চ
287.35
বিস্তরাঃ ক্লেশসংয়ুক্তাঃ সংক্ষেপাস্তু সুখাবহাঃ
পরার্থং বিস্তরাঃ সর্বে ত্যাগমাত্মহিতং বিদুঃ
287.36
সংকল্পজো মিত্রবর্গো জ্ঞাতয়ঃ কারণাত্মকাঃ
ভার্যা দাসাশ্চ পুত্রাশ্চ স্বমর্থমনুয়ুঞ্জতে
287.37
ন মাতা ন পিতা কিংচিত্কস্যচিত্প্রতিপদ্যতে
দানপথ্যোদনো জন্তুঃ স্বকর্মফলমশ্নুতে
287.38
মাতা পুত্রঃ পিতা ভ্রাতা ভার্যা মিত্রজনস্তথা
অষ্টাপদপদস্থানে ত্বক্ষমুদ্রেব ন্যস্যতে
287.39
সর্বাণি কর্মাণি পুরা কৃতানি; শুভাশুভান্যাত্মনো যান্তি জন্তোঃ
উপস্থিতং কর্মফলং বিদিত্বা; বুদ্ধিং তথা চোদয়তেঽন্তরাত্মা
287.40
ব্যবসায়ং সমাশ্রিত্য সহায়ান্যোঽধিগচ্ছতি
ন তস্য কশ্চিদারম্ভঃ কদাচিদবসীদতি
287.41
অদ্বৈধমনসং যুক্তং শূরং ধীরং বিপশ্চিতম্
ন শ্রীঃ সংত্যজতে নিত্যমাদিত্যমিব রশ্ময়ঃ
287.42
আস্তিক্যব্যবসায়াভ্যামুপায়াদ্বিস্ময়াদ্ধিয়া
যমারভত্যনিন্দ্যাত্মা ন সোঽর্থঃ পরিসীদতি
287.43
সর্বঃ স্বানি শুভাশুভানি নিয়তং কর্মাণি জন্তুঃ স্বয়ং; গর্ভাত্সংপ্রতিপদ্যতে তদুভয়ং যত্তেন পূর্বং কৃতম্
মৃত্যুশ্চাপরিহারবান্সমগতিঃ কালেন বিচ্ছেদিতা; দারোশ্চূর্ণমিবাশ্মসারবিহিতং কর্মান্তিকং প্রাপয়েৎ
287.44
স্বরূপতামাত্মকৃতং চ বিস্তরং; কুলান্বয়ং দ্রব্যসমৃদ্ধিসংচয়ম্
নরো হি সর্বো লভতে যথাকৃতং; শুভাশুভেনাত্মকৃতেন কর্মণা
287.45
ভীষ্ম উবাচ
ইত্যুক্তো জনকো রাজন্যথাতথ্যং মনীষিণা
শ্রুত্বা ধর্মবিদাং শ্রেষ্ঠঃ পরাং মুদমবাপ হ