Utshovঅধ্যায় 286
286.1
পরাশর উবাচ
পিতা সখায়ো গুরবঃ স্ত্রিয়শ্চ; ন নির্গুণা নাম ভবন্তি লোকে
অনন্যভক্তাঃ প্রিয়বাদিনশ্চ; হিতাশ্চ বশ্যাশ্চ তথৈব রাজন্
286.2
পিতা পরং দৈবতং মানবানাং; মাতুর্বিশিষ্টং পিতরং বদন্তি
জ্ঞানস্য লাভং পরমং বদন্তি; জিতেন্দ্রিয়ার্থাঃ পরমাপ্নুবন্তি
286.3
রণাজিরে যত্র শরাগ্নিসংস্তরে; নৃপাত্মজো ঘাতমবাপ্য দহ্যতে
প্রয়াতি লোকানমরৈঃ সুদুর্লভা;ন্নিষেবতে স্বর্গফলং যথাসুখম্
286.4
শ্রান্তং ভীতং ভ্রষ্টশস্ত্রং রুদন্তং; পরাঙ্মুখং পরিবর্হৈশ্চ হীনম্
অনুদ্যতং রোগিণং যাচমানং; ন বৈ হিংস্যাদ্বালবৃদ্ধৌ চ রাজন্
286.5
পরিবর্হৈঃ সুসংপন্নমুদ্যতং তুল্যতাং গতম্
অতিক্রমেত নৃপতিঃ সংগ্রামে ক্ষত্রিয়াত্মজম্
286.6
তুল্যাদিহ বধঃ শ্রেয়ান্বিশিষ্টাচ্চেতি নিশ্চয়ঃ
নিহীনাত্কাতরাচ্চৈব নৃপাণাং গর্হিতো বধঃ
286.7
পাপাত্পাপসমাচারান্নিহীনাচ্চ নরাধিপ
পাপ এব বধঃ প্রোক্তো নরকায়েতি নিশ্চয়ঃ
286.8
ন কশ্চিত্ত্রাতি বৈ রাজন্দিষ্টান্তবশমাগতম্
সাবশেষায়ুষং চাপি কশ্চিদেবাপকর্ষতি
286.9
স্নিগ্ধৈশ্চ ক্রিয়মাণানি কর্মাণীহ নিবর্তয়েৎ
হিংসাত্মকানি কর্মাণি নায়ুরিচ্ছেত্পরায়ুষা
286.10
গৃহস্থানাং তু সর্বেষাং বিনাশমভিকাঙ্ক্ষতাম্
নিধনং শোভনং তাত পুলিনেষু ক্রিয়াবতাম্
286.11
আয়ুষি ক্ষয়মাপন্নে পঞ্চত্বমুপগচ্ছতি
নাকারণাত্তদ্ভবতি কারণৈরুপপাদিতম্
286.12
তথা শরীরং ভবতি দেহাদ্যেনোপপাদিতম্
অধ্বানং গতকশ্চায়ং প্রাপ্তশ্চায়ং গৃহাদ্গৃহম্
286.13
দ্বিতীয়ং কারণং তত্র নান্যত্কিংচন বিদ্যতে
তদ্দেহং দেহিনাং যুক্তং মোক্ষভূতেষু বর্ততে
286.14
সিরাস্নায্বস্থিসংঘাতং বীভত্সামেধ্যসংকুলম্
ভূতানামিন্দ্রিয়াণাং চ গুণানাং চ সমাগমম্
286.15
ত্বগন্তং দেহমিত্যাহুর্বিদ্বাংসোঽধ্যাত্মচিন্তকাঃ
গুণৈরপি পরিক্ষীণং শরীরং মর্ত্যতাং গতম্
286.16
শরীরিণা পরিত্যক্তং নিশ্চেষ্টং গতচেতনম্
ভূতৈঃ প্রকৃতিমাপন্নৈস্ততো ভূমৌ নিমজ্জতি
286.17
ভাবিতং কর্ময়োগেন জায়তে তত্র তত্র হ
ইদং শরীরং বৈদেহ ম্রিয়তে যত্র তত্র হ
তত্স্বভাবোঽপরো দৃষ্টো বিসর্গঃ কর্মণস্তথা
286.18
ন জায়তে তু নৃপতে কংচিত্কালময়ং পুনঃ
পরিভ্রমতি ভূতাত্মা দ্যামিবাম্বুধরো মহান্
286.19
স পুনর্জায়তে রাজন্প্রাপ্যেহায়তনং নৃপ
মনসঃ পরমো হ্যাত্মা ইন্দ্রিয়েভ্যঃ পরং মনঃ
286.20
দ্বিবিধানাং চ ভূতানাং জঙ্গমাঃ পরমা নৃপ
জঙ্গমানামপি তথা দ্বিপদাঃ পরমা মতাঃ
দ্বিপদানামপি তথা দ্বিজা বৈ পরমাঃ স্মৃতাঃ
286.21
দ্বিজানামপি রাজেন্দ্র প্রজ্ঞাবন্তঃ পরা মতাঃ
প্রাজ্ঞানামাত্মসংবুদ্ধাঃ সংবুদ্ধানামমানিনঃ
286.22
জাতমন্বেতি মরণং নৃণামিতি বিনিশ্চয়ঃ
অন্তবন্তি হি কর্মাণি সেবন্তে গুণতঃ প্রজাঃ
286.23
আপন্নে তূত্তরাং কাষ্ঠাং সূর্যে যো নিধনং ব্রজেৎ
নক্ষত্রে চ মুহূর্তে চ পুণ্যে রাজন্স পুণ্যকৃৎ
286.24
অয়োজয়িত্বা ক্লেশেন জনং প্লাব্য চ দুষ্কৃতম্
মৃত্যুনাপ্রাকৃতেনেহ কর্ম কৃত্বাত্মশক্তিতঃ
286.25
বিষমুদ্বন্ধনং দাহো দস্যুহস্তাত্তথা বধঃ
দংষ্ট্রিভ্যশ্চ পশুভ্যশ্চ প্রাকৃতো বধ উচ্যতে
286.26
ন চৈভিঃ পুণ্যকর্মাণো যুজ্যন্তে নাভিসংধিজৈঃ
এবংবিধৈশ্চ বহুভিরপরৈঃ প্রাকৃতৈরপি
286.27
ঊর্ধ্বং হিত্বা প্রতিষ্ঠন্তে প্রাণাঃ পুণ্যকৃতাং নৃপ
মধ্যতো মধ্যপুণ্যানামধো দুষ্কৃতকর্মণাম্
286.28
একঃ শত্রুর্ন দ্বিতীয়োঽস্তি শত্রু;রজ্ঞানতুল্যঃ পুরুষস্য রাজন্
যেনাবৃতঃ কুরুতে সংপ্রয়ুক্তো; ঘোরাণি কর্মাণি সুদারুণানি
286.29
প্রবোধনার্থং শ্রুতিধর্ময়ুক্তং; বৃদ্ধানুপাস্যং চ ভবেত যস্য
প্রয়ত্নসাধ্যো হি স রাজপুত্র; প্রজ্ঞাশরেণোন্মথিতঃ পরৈতি
286.30
অধীত্য বেদাংস্তপসা ব্রহ্মচারী; যজ্ঞাঞ্শক্ত্যা সংনিসৃজ্যেহ পঞ্চ
বনং গচ্ছেত্পুরুষো ধর্মকামঃ; শ্রেয়শ্চিত্বা স্থাপয়িত্বা স্ববংশম্
286.31
উপভোগৈরপি ত্যক্তং নাত্মানমবসাদয়েৎ
চণ্ডালত্বেঽপি মানুষ্যং সর্বথা তাত দুর্লভম্
286.32
ইয়ং হি যোনিঃ প্রথমা যাং প্রাপ্য জগতীপতে
আত্মা বৈ শক্যতে ত্রাতুং কর্মভিঃ শুভলক্ষণৈঃ
286.33
কথং ন বিপ্রণশ্যেম যোনিতোঽস্যা ইতি প্রভো
কুর্বন্তি ধর্মং মনুজাঃ শ্রুতিপ্রামাণ্যদর্শনাৎ
286.34
যো দুর্লভতরং প্রাপ্য মানুষ্যমিহ বৈ নরঃ
ধর্মাবমন্তা কামাত্মা ভবেত্স খলু বঞ্চ্যতে
286.35
যস্তু প্রীতিপুরোগেণ চক্ষুষা তাত পশ্যতি
দীপোপমানি ভূতানি যাবদর্চির্ন নশ্যতি
286.36
সান্ত্বেনানুপ্রদানেন প্রিয়বাদেন চাপ্যুত
সমদুঃখসুখো ভূত্বা স পরত্র মহীয়তে
286.37
দানং ত্যাগঃ শোভনা মূর্তিরদ্ভ্যো; ভূয়ঃ প্লাব্যং তপসা বৈ শরীরম্
সরস্বতীনৈমিষপুষ্করেষু; যে চাপ্যন্যে পুণ্যদেশাঃ পৃথিব্যাম্
286.38
গৃহেষু যেষামসবঃ পতন্তি; তেষামথো নির্হরণং প্রশস্তম্
যানেন বৈ প্রাপণং চ শ্মশানে; শৌচেন নূনং বিধিনা চৈব দাহঃ
286.39
ইষ্টিঃ পুষ্টির্যজনং যাজনং চ; দানং পুণ্যানাং কর্মণাং চ প্রয়োগঃ
শক্ত্যা পিত্র্যং যচ্চ কিংচিত্প্রশস্তং; সর্বাণ্যাত্মার্থে মানবো যঃ করোতি
286.40
ধর্মশাস্ত্রাণি বেদাশ্চ ষডঙ্গানি নরাধিপ
শ্রেয়সোঽর্থে বিধীয়ন্তে নরস্যাক্লিষ্টকর্মণঃ
286.41
ভীষ্ম উবাচ
এতদ্বৈ সর্বমাখ্যাতং মুনিনা সুমহাত্মনা
বিদেহরাজায় পুরা শ্রেয়সোঽর্থে নরাধিপ