Utshovঅধ্যায় 285
285.1
জনক উবাচ
বর্ণো বিশেষবর্ণানাং মহর্ষে কেন জায়তে
এতদিচ্ছাম্যহং শ্রোতুং তদ্ব্রূহি বদতাং বর
285.2
যদেতজ্জায়তেঽপত্যং স এবায়মিতি শ্রুতিঃ
কথং ব্রাহ্মণতো জাতো বিশেষগ্রহণং গতঃ
285.3
পরাশর উবাচ
এবমেতন্মহারাজ যেন জাতঃ স এব সঃ
তপসস্ত্বপকর্ষেণ জাতিগ্রহণতাং গতঃ
285.4
সুক্ষেত্রাচ্চ সুবীজাচ্চ পুণ্যো ভবতি সংভবঃ
অতোঽন্যতরতো হীনাদবরো নাম জায়তে
285.5
বক্ত্রাদ্ভুজাভ্যামূরুভ্যাং পদ্ভ্যাং চৈবাথ জজ্ঞিরে
সৃজতঃ প্রজাপতের্লোকানিতি ধর্মবিদো বিদুঃ
285.6
মুখজা ব্রাহ্মণাস্তাত বাহুজাঃ ক্ষত্রবন্ধবঃ
ঊরুজা ধনিনো রাজন্পাদজাঃ পরিচারকাঃ
285.7
চতুর্ণামেব বর্ণানামাগমঃ পুরুষর্ষভ
অতোঽন্যে ত্বতিরিক্তা যে তে বৈ সংকরজাঃ স্মৃতাঃ
285.8
ক্ষত্রজাতিরথাম্বষ্ঠা উগ্রা বৈদেহকাস্তথা
শ্বপাকাঃ পুল্কসাঃ স্তেনা নিষাদাঃ সূতমাগধাঃ
285.9
আয়োগাঃ করণা ব্রাত্যাশ্চণ্ডালাশ্চ নরাধিপ
এতে চতুর্ভ্যো বর্ণেভ্যো জায়ন্তে বৈ পরস্পরম্
285.10
জনক উবাচ
ব্রহ্মণৈকেন জাতানাং নানাত্বং গোত্রতঃ কথম্
বহূনীহ হি লোকে বৈ গোত্রাণি মুনিসত্তম
285.11
যত্র তত্র কথং জাতাঃ স্বয়োনিং মুনয়ো গতাঃ
শূদ্রয়োনৌ সমুত্পন্না বিয়োনৌ চ তথাপরে
285.12
পরাশর উবাচ
রাজন্নৈতদ্ভবেদ্গ্রাহ্যমপকৃষ্টেন জন্মনা
মহাত্মনাং সমুত্পত্তিস্তপসা ভাবিতাত্মনাম্
285.13
উত্পাদ্য পুত্রান্মুনয়ো নৃপতে যত্র তত্র হ
স্বেনৈব তপসা তেষামৃষিত্বং বিদধুঃ পুনঃ
285.14
পিতামহশ্চ মে পূর্বমৃশ্যশৃঙ্গশ্চ কাশ্যপঃ
বটস্তাণ্ড্যঃ কৃপশ্চৈব কক্ষীবান্কমঠাদয়ঃ
285.15
যবক্রীতশ্চ নৃপতে দ্রোণশ্চ বদতাং বরঃ
আয়ুর্মতঙ্গো দত্তশ্চ দ্রুপদো মত্স্য এব চ
285.16
এতে স্বাং প্রকৃতিং প্রাপ্তা বৈদেহ তপসোঽঽশ্রয়াৎ
প্রতিষ্ঠিতা বেদবিদো দমে তপসি চৈব হি
285.17
মূলগোত্রাণি চত্বারি সমুত্পন্নানি পার্থিব
অঙ্গিরাঃ কশ্যপশ্চৈব বসিষ্ঠো ভৃগুরেব চ
285.18
কর্মতোঽন্যানি গোত্রাণি সমুত্পন্নানি পার্থিব
নামধেয়ানি তপসা তানি চ গ্রহণং সতাম্
285.19
জনক উবাচ
বিশেষধর্মান্বর্ণানাং প্রব্রূহি ভগবন্মম
তথা সামান্যধর্মাংশ্চ সর্বত্র কুশলো হ্যসি
285.20
পরাশর উবাচ
প্রতিগ্রহো যাজনং চ তথৈবাধ্যাপনং নৃপ
বিশেষধর্মো বিপ্রাণাং রক্ষা ক্ষত্রস্য শোভনা
285.21
কৃষিশ্চ পাশুপাল্যং চ বাণিজ্যং চ বিশামপি
দ্বিজানাং পরিচর্যা চ শূদ্রকর্ম নরাধিপ
285.22
বিশেষধর্মা নৃপতে বর্ণানাং পরিকীর্তিতাঃ
ধর্মান্সাধারণাংস্তাত বিস্তরেণ শৃণুষ্ব মে
285.23
আনৃশংস্যমহিংসা চাপ্রমাদঃ সংবিভাগিতা
শ্রাদ্ধকর্মাতিথেয়ং চ সত্যমক্রোধ এব চ
285.24
স্বেষু দারেষু সংতোষঃ শৌচং নিত্যানসূয়তা
আত্মজ্ঞানং তিতিক্ষা চ ধর্মাঃ সাধারণা নৃপ
285.25
ব্রাহ্মণাঃ ক্ষত্রিয়া বৈশ্যাস্ত্রয়ো বর্ণা দ্বিজাতয়ঃ
অত্র তেষামধীকারো ধর্মেষু দ্বিপদাং বর
285.26
বিকর্মাবস্থিতা বর্ণাঃ পতন্তি নৃপতে ত্রয়ঃ
উন্নমন্তি যথাসন্তমাশ্রিত্যেহ স্বকর্মসু
285.27
ন চাপি শূদ্রঃ পততীতি নিশ্চয়ো; ন চাপি সংস্কারমিহার্হতীতি বা
শ্রুতিপ্রবৃত্তং ন চ ধর্মমাপ্নুতে; ন চাস্য ধর্মে প্রতিষেধনং কৃতম্
285.28
বৈদেহকং শূদ্রমুদাহরন্তি; দ্বিজা মহারাজ শ্রুতোপপন্নাঃ
অহং হি পশ্যামি নরেন্দ্র দেবং; বিশ্বস্য বিষ্ণুং জগতঃ প্রধানম্
285.29
সতাং বৃত্তমনুষ্ঠায় নিহীনা উজ্জিহীর্ষবঃ
মন্ত্রবর্জং ন দুষ্যন্তি কুর্বাণাঃ পৌষ্টিকীঃ ক্রিয়াঃ
285.30
যথা যথা হি সদ্বৃত্তমালম্বন্তীতরে জনাঃ
তথা তথা সুখং প্রাপ্য প্রেত্য চেহ চ শেরতে
285.31
জনক উবাচ
কিং কর্ম দূষয়ত্যেনমথ জাতির্মহামুনে
সংদেহো মে সমুত্পন্নস্তন্মে ব্যাখ্যাতুমর্হসি
285.32
পরাশর উবাচ
অসংশয়ং মহারাজ উভয়ং দোষকারকম্
কর্ম চৈব হি জাতিশ্চ বিশেষং তু নিশাময়
285.33
জাত্যা চ কর্মণা চৈব দুষ্টং কর্ম নিষেবতে
জাত্যা দুষ্টশ্চ যঃ পাপং ন করোতি স পূরুষঃ
285.34
জাত্যা প্রধানং পুরুষং কুর্বাণং কর্ম ধিক্কৃতম্
কর্ম তদ্দূষয়ত্যেনং তস্মাত্কর্ম নশোভনম্
285.35
জনক উবাচ
কানি কর্মাণি ধর্ম্যাণি লোকেঽস্মিন্দ্বিজসত্তম
ন হিংসন্তীহ ভূতানি ক্রিয়মাণানি সর্বদা
285.36
পরাশর উবাচ
শৃণু মেঽত্র মহারাজ যন্মাং ত্বং পরিপৃচ্ছসি
যানি কর্মাণ্যহিংস্রাণি নরং ত্রায়ন্তি সর্বদা
285.37
সংন্যস্যাগ্নীনুপাসীনাঃ পশ্যন্তি বিগতজ্বরাঃ
নৈঃশ্রেয়সং ধর্মপথং সমারুহ্য যথাক্রমম্
285.38
প্রশ্রিতা বিনয়োপেতা দমনিত্যাঃ সুসংশিতাঃ
প্রয়ান্তি স্থানমজরং সর্বকর্মবিবর্জিতাঃ
285.39
সর্বে বর্ণা ধর্মকার্যাণি সম্য;ক্কৃত্বা রাজন্সত্যবাক্যানি চোক্ত্বা
ত্যক্ত্বাধর্মং দারুণং জীবলোকে; যান্তি স্বর্গং নাত্র কার্যো বিচারঃ