Utshovঅধ্যায় 284
284.1
পরাশর উবাচ
এষ ধর্মবিধিস্তাত গৃহস্থস্য প্রকীর্তিতঃ
তপোবিধিং তু বক্ষ্যামি তন্মে নিগদতঃ শৃণু
284.2
প্রায়েণ হি গৃহস্থস্য মমত্বং নাম জায়তে
সঙ্গাগতং নরশ্রেষ্ঠ ভাবৈস্তামসরাজসৈঃ
284.3
গৃহাণ্যাশ্রিত্য গাবশ্চ ক্ষেত্রাণি চ ধনানি চ
দারাঃ পুত্রাশ্চ ভৃত্যাশ্চ ভবন্তীহ নরস্য বৈ
284.4
এবং তস্য প্রবৃত্তস্য নিত্যমেবানুপশ্যতঃ
রাগদ্বেষৌ বিবর্ধেতে হ্যনিত্যত্বমপশ্যতঃ
284.5
রাগদ্বেষাভিভূতং চ নরং দ্রব্যবশানুগম্
মোহজাতা রতির্নাম সমুপৈতি নরাধিপ
284.6
কৃতার্থো ভোগতো ভূত্বা স বৈ রতিপরায়ণঃ
লাভং গ্রাম্যসুখাদন্যং রতিতো নানুপশ্যতি
284.7
ততো লোভাভিভূতাত্মা সঙ্গাদ্বর্ধয়তে জনম্
পুষ্ট্যর্থং চৈব তস্যেহ জনস্যার্থং চিকীর্ষতি
284.8
স জানন্নপি চাকার্যমর্থার্থং সেবতে নরঃ
বালস্নেহপরীতাত্মা তত্ক্ষয়াচ্চানুতপ্যতে
284.9
ততো মানেন সংপন্নো রক্ষন্নাত্মপরাজয়ম্
করোতি যেন ভোগী স্যামিতি তস্মাদ্বিনশ্যতি
284.10
তপো হি বুদ্ধিয়ুক্তানাং শাশ্বতং ব্রহ্মদর্শনম্
অন্বিচ্ছতাং শুভং কর্ম নরাণাং ত্যজতাং সুখম্
284.11
স্নেহায়তননাশাচ্চ ধননাশাচ্চ পার্থিব
আধিব্যাধিপ্রতাপাচ্চ নির্বেদমুপগচ্ছতি
284.12
নির্বেদাদাত্মসংবোধঃ সংবোধাচ্ছাস্ত্রদর্শনম্
শাস্ত্রার্থদর্শনাদ্রাজংস্তপ এবানুপশ্যতি
284.13
দুর্লভো হি মনুষ্যেন্দ্র নরঃ প্রত্যবমর্শবান্
যো বৈ প্রিয়সুখে ক্ষীণে তপঃ কর্তুং ব্যবস্যতি
284.14
তপঃ সর্বগতং তাত হীনস্যাপি বিধীয়তে
জিতেন্দ্রিয়স্য দান্তস্য স্বর্গমার্গপ্রদেশকম্
284.15
প্রজাপতিঃ প্রজাঃ পূর্বমসৃজত্তপসা বিভুঃ
ক্বচিত্ক্বচিদ্ব্রতপরো ব্রতান্যাস্থায় পার্থিব
284.16
আদিত্যা বসবো রুদ্রাস্তথৈবাগ্ন্যশ্বিমারুতাঃ
বিশ্বেদেবাস্তথা সাধ্যাঃ পিতরোঽথ মরুদ্গণাঃ
284.17
যক্ষরাক্ষসগন্ধর্বাঃ সিদ্ধাশ্চান্যে দিবৌকসঃ
সংসিদ্ধাস্তপসা তাত যে চান্যে স্বর্গবাসিনঃ
284.18
যে চাদৌ ব্রহ্মণা সৃষ্টা ব্রাহ্মণাস্তপসা পুরা
তে ভাবয়ন্তঃ পৃথিবীং বিচরন্তি দিবং তথা
284.19
মর্ত্যলোকে চ রাজানো যে চান্যে গৃহমেধিনঃ
মহাকুলেষু দৃশ্যন্তে তত্সর্বং তপসঃ ফলম্
284.20
কৌশিকানি চ বস্ত্রাণি শুভান্যাভরণানি চ
বাহনাসনয়ানানি সর্বং তত্তপসঃ ফলম্
284.21
মনোনুকূলাঃ প্রমদা রূপবত্যঃ সহস্রশঃ
বাসঃ প্রাসাদপৃষ্ঠে চ তত্সর্বং তপসঃ ফলম্
284.22
শয়নানি চ মুখ্যানি ভোজ্যানি বিবিধানি চ
অভিপ্রেতানি সর্বাণি ভবন্তি কৃতকর্মণাম্
284.23
নাপ্রাপ্যং তপসা কিংচিত্ত্রৈলোক্যেঽস্মিন্পরংতপ
উপভোগপরিত্যাগঃ ফলান্যকৃতকর্মণাম্
284.24
সুখিতো দুঃখিতো বাপি নরো লোভং পরিত্যজেৎ
অবেক্ষ্য মনসা শাস্ত্রং বুদ্ধ্যা চ নৃপসত্তম
284.25
অসংতোষোঽসুখায়ৈব লোভাদিন্দ্রিয়বিভ্রমঃ
ততোঽস্য নশ্যতি প্রজ্ঞা বিদ্যেবাভ্যাসবর্জিতা
284.26
নষ্টপ্রজ্ঞো যদা ভবতি তদা ন্যায়ং ন পশ্যতি
তস্মাত্সুখক্ষয়ে প্রাপ্তে পুমানুগ্রং তপশ্চরেৎ
284.27
যদিষ্টং তত্সুখং প্রাহুর্দ্বেষ্যং দুঃখমিহোচ্যতে
কৃতাকৃতস্য তপসঃ ফলং পশ্যস্ব যাদৃশম্
284.28
নিত্যং ভদ্রাণি পশ্যন্তি বিষয়াংশ্চোপভুঞ্জতে
প্রাকাশ্যং চৈব গচ্ছন্তি কৃত্বা নিষ্কল্মষং তপঃ
284.29
অপ্রিয়াণ্যবমানাংশ্চ দুঃখং বহুবিধাত্মকম্
ফলার্থী সত্পথত্যক্তঃ প্রাপ্নোতি বিষয়াত্মকম্
284.30
ধর্মে তপসি দানে চ বিচিকিত্সাস্য জায়তে
স কৃত্বা পাপকান্যেব নিরয়ং প্রতিপদ্যতে
284.31
সুখে তু বর্তমানো বৈ দুঃখে বাপি নরোত্তম
স্ববৃত্তাদ্যো ন চলতি শাস্ত্রচক্ষুঃ স মানবঃ
284.32
ইষুপ্রপাতমাত্রং হি স্পর্শয়োগে রতিঃ স্মৃতা
রসনে দর্শনে ঘ্রাণে শ্রবণে চ বিশাং পতে
284.33
ততোঽস্য জায়তে তীব্রা বেদনা তত্ক্ষয়াত্পুনঃ
বুধা যেন প্রশংসন্তি মোক্ষং সুখমনুত্তমম্
284.34
ততঃ ফলার্থং চরতি ভবন্তি জ্যায়সো গুণাঃ
ধর্মবৃত্ত্যা চ সততং কামার্থাভ্যাং ন হীয়তে
284.35
অপ্রয়ত্নাগতাঃ সেব্যা গৃহস্থৈর্বিষয়াঃ সদা
প্রয়ত্নেনোপগম্যশ্চ স্বধর্ম ইতি মে মতিঃ
284.36
মানিনাং কুলজাতানাং নিত্যং শাস্ত্রার্থচক্ষুষাম্
ধর্মক্রিয়াবিয়ুক্তানামশক্ত্যা সংবৃতাত্মনাম্
284.37
ক্রিয়মাণং যদা কর্ম নাশং গচ্ছতি মানুষম্
তেষাং নান্যদৃতে লোকে তপসঃ কর্ম বিদ্যতে
284.38
সর্বাত্মনা তু কুর্বীত গৃহস্থঃ কর্মনিশ্চয়ম্
দাক্ষ্যেণ হব্যকব্যার্থং স্বধর্মং বিচরেন্নৃপ
284.39
যথা নদীনদাঃ সর্বে সাগরে যান্তি সংস্থিতিম্
এবমাশ্রমিণঃ সর্বে গৃহস্থে যান্তি সংস্থিতিম্