অধ্যায় 283

283.1

পরাশর উবাচ
প্রতিগ্রহাগতা বিপ্রে ক্ষত্রিয়ে শস্ত্রনির্জিতাঃ
বৈশ্যে ন্যায়ার্জিতাশ্চৈব শূদ্রে শুশ্রূষয়ার্জিতাঃ
স্বল্পাপ্যর্থাঃ প্রশস্যন্তে ধর্মস্যার্থে মহাফলাঃ

283.2

নিত্যং ত্রয়াণাং বর্ণানাং শূদ্রঃ শুশ্রূষুরুচ্যতে
ক্ষত্রধর্মা বৈশ্যধর্মা নাবৃত্তিঃ পততি দ্বিজঃ
শূদ্রকর্মা যদা তু স্যাত্তদা পততি বৈ দ্বিজঃ

283.3

বাণিজ্যং পাশুপাল্যং চ তথা শিল্পোপজীবনম্
শূদ্রস্যাপি বিধীয়ন্তে যদা বৃত্তির্ন জায়তে

283.4

রঙ্গাবতরণং চৈব তথা রূপোপজীবনম্
মদ্যমাংসোপজীব্যং চ বিক্রয়ো লোহচর্মণোঃ

283.5

অপূর্বিণা ন কর্তব্যং কর্ম লোকে বিগর্হিতম্
কৃতপূর্বিণস্তু ত্যজতো মহান্ধর্ম ইতি শ্রুতিঃ

283.6

সংসিদ্ধঃ পুরুষো লোকে যদাচরতি পাপকম্
মদেনাভিপ্লুতমনাস্তচ্চ নগ্রাহ্যমুচ্যতে

283.7

শ্রূয়ন্তে হি পুরাণে বৈ প্রজা ধিগ্দণ্ডশাসনাঃ
দান্তা ধর্মপ্রধানাশ্চ ন্যায়ধর্মানুবর্তকাঃ

283.8

ধর্ম এব সদা নৄণামিহ রাজন্প্রশস্যতে
ধর্মবৃদ্ধা গুণানেব সেবন্তে হি নরা ভুবি

283.9

তং ধর্মমসুরাস্তাত নামৃষ্যন্ত জনাধিপ
বিবর্ধমানাঃ ক্রমশস্তত্র তেঽন্বাবিশন্প্রজাঃ

283.10

তেষাং দর্পঃ সমভবত্প্রজানাং ধর্মনাশনঃ
দর্পাত্মনাং ততঃ ক্রোধঃ পুনস্তেষামজায়ত

283.11

ততঃ ক্রোধাভিভূতানাং বৃত্তং লজ্জাসমন্বিতম্
হ্রীশ্চৈবাপ্যনশদ্রাজংস্ততো মোহো ব্যজায়ত

283.12

ততো মোহপরীতাস্তে নাপশ্যন্ত যথা পুরা
পরস্পরাবমর্দেন বর্তয়ন্তি যথাসুখম্

283.13

তান্প্রাপ্য তু স ধিগ্দণ্ডো নকারণমতোঽভবৎ
ততোঽভ্যগচ্ছন্দেবাংশ্চ ব্রাহ্মণাংশ্চাবমন্য হ

283.14

এতস্মিন্নেব কালে তু দেবা দেববরং শিবম্
অগচ্ছঞ্শরণং বীরং বহুরূপং গণাধিপম্

283.15

তেন স্ম তে গগনগাঃ সপুরাঃ পাতিতাঃ ক্ষিতৌ
তিস্রোঽপ্যেকেন বাণেন দেবাপ্যায়িততেজসা

283.16

তেষামধিপতিস্ত্বাসীদ্ভীমো ভীমপরাক্রমঃ
দেবতানাং ভয়করঃ স হতঃ শূলপাণিনা

283.17

তস্মিন্হতেঽথ স্বং ভাবং প্রত্যপদ্যন্ত মানবাঃ
প্রাবর্তন্ত চ বেদা বৈ শাস্ত্রাণি চ যথা পুরা

283.18

ততোঽভ্যষিঞ্চন্রাজ্যেন দেবানাং দিবি বাসবম্
সপ্তর্ষয়শ্চান্বয়ুঞ্জন্নরাণাং দণ্ডধারণে

283.19

সপ্তর্ষীণামথোর্ধ্বং চ বিপৃথুর্নাম পার্থিবঃ
রাজানঃ ক্ষত্রিয়াশ্চৈব মণ্ডলেষু পৃথক্পৃথক্

283.20

মহাকুলেষু যে জাতা বৃত্তাঃ পূর্বতরাশ্চ যে
তেষামথাসুরো ভাবো হৃদয়ান্নাপসর্পতি

283.21

তস্মাত্তেনৈব ভাবেন সানুষঙ্গেন পার্থিবাঃ
আসুরাণ্যেব কর্মাণি ন্যষেবন্ভীমবিক্রমাঃ

283.22

প্রত্যতিষ্ঠংশ্চ তেষ্বেব তান্যেব স্থাপয়ন্তি চ
ভজন্তে তানি চাদ্যাপি যে বালিশতমা নরাঃ

283.23

তস্মাদহং ব্রবীমি ত্বাং রাজন্সংচিন্ত্য শাস্ত্রতঃ
সংসিদ্ধাধিগমং কুর্যাত্কর্ম হিংসাত্মকং ত্যজেৎ

283.24

ন সংকরেণ দ্রবিণং বিচিন্বীত বিচক্ষণঃ
ধর্মার্থং ন্যায়মুত্সৃজ্য ন তত্কল্যাণমুচ্যতে

283.25

স ত্বমেবংবিধো দান্তঃ ক্ষত্রিয়ঃ প্রিয়বান্ধবঃ
প্রজা ভৃত্যাংশ্চ পুত্রাংশ্চ স্বধর্মেণানুপালয়

283.26

ইষ্টানিষ্টসমায়োগো বৈরং সৌহার্দমেব চ
অথ জাতিসহস্রাণি বহূনি পরিবর্ততে

283.27

তস্মাদ্গুণেষু রজ্যেথা মা দোষেষু কদাচন
নির্গুণো যো হি দুর্বুদ্ধিরাত্মনঃ সোঽরিরুচ্যতে

283.28

মানুষেষু মহারাজ ধর্মাধর্মৌ প্রবর্ততঃ
ন তথান্যেষু ভূতেষু মনুষ্যরহিতেষ্বিহ

283.29

ধর্মশীলো নরো বিদ্বানীহকোঽনীহকোঽপি বা
আত্মভূতঃ সদা লোকে চরেদ্ভূতান্যহিংসয়ন্

283.30

যদা ব্যপেতহৃল্লেখং মনো ভবতি তস্য বৈ
নানৃতং চৈব ভবতি তদা কল্যাণমৃচ্ছতি

Contains text from DharmicData, made available under the Open Database License (ODbL). Simple meanings are written by AI and can contain mistakes.