অধ্যায় 282

282.1

পরাশর উবাচ
বৃত্তিঃ সকাশাদ্বর্ণেভ্যস্ত্রিভ্যো হীনস্য শোভনা
প্রীত্যোপনীতা নির্দিষ্টা ধর্মিষ্ঠান্কুরুতে সদা

বৃত্তিশ্চেন্নাস্তি শূদ্রস্য পিতৃপৈতামহী ধ্রুবা
ন বৃত্তিং পরতো মার্গেচ্ছুশ্রূষাং তু প্রয়োজয়েৎ

সদ্ভিস্তু সহ সংসর্গঃ শোভতে ধর্মদর্শিভিঃ
নিত্যং সর্বাস্ববস্থাসু নাসদ্ভিরিতি মে মতিঃ

যথোদয়গিরৌ দ্রব্যং সংনিকর্ষেণ দীপ্যতে
তথা সত্সংনিকর্ষেণ হীনবর্ণোঽপি দীপ্যতে

যাদৃশেন হি বর্ণেন ভাব্যতে শুক্লমম্বরম্
তাদৃশং কুরুতে রূপমেতদেবমবৈহি মে

তস্মাদ্গুণেষু রজ্যেথা মা দোষেষু কদাচন
অনিত্যমিহ মর্ত্যানাং জীবিতং হি চলাচলম্

সুখে বা যদি বা দুঃখে বর্তমানো বিচক্ষণঃ
যশ্চিনোতি শুভান্যেব স ভদ্রাণীহ পশ্যতি

ধর্মাদপেতং যত্কর্ম যদ্যপি স্যান্মহাফলম্
ন তত্সেবেত মেধাবী ন তদ্ধিতমিহোচ্যতে

যো হৃত্বা গোসহস্রাণি নৃপো দদ্যাদরক্ষিতা
স শব্দমাত্রফলভাগ্রাজা ভবতি তস্করঃ

স্বয়ংভূরসৃজচ্চাগ্রে ধাতারং লোকপূজিতম্
ধাতাসৃজত্পুত্রমেকং প্রজানাং ধারণে রতম্

তমর্চয়িত্বা বৈশ্যস্তু কুর্যাদত্যর্থমৃদ্ধিমৎ
রক্ষিতব্যং তু রাজন্যৈরুপয়োজ্যং দ্বিজাতিভিঃ

অজিহ্মৈরশঠক্রোধৈর্হব্যকব্যপ্রয়োক্তৃভিঃ
শূদ্রৈর্নির্মার্জনং কার্যমেবং ধর্মো ন নশ্যতি

অপ্রনষ্টে ততো ধর্মে ভবন্তি সুখিতাঃ প্রজাঃ
সুখেন তাসাং রাজেন্দ্র মোদন্তে দিবি দেবতাঃ

তস্মাদ্যো রক্ষতি নৃপঃ স ধর্মেণাভিপূজ্যতে
অধীতে চাপি যো বিপ্রো বৈশ্যো যশ্চার্জনে রতঃ

যশ্চ শুশ্রূষতে শূদ্রঃ সততং নিয়তেন্দ্রিয়ঃ
অতোঽন্যথা মনুষ্যেন্দ্র স্বধর্মাত্পরিহীয়তে

প্রাণসংতাপনির্দিষ্টাঃ কাকিণ্যোঽপি মহাফলাঃ
ন্যায়েনোপার্জিতা দত্তাঃ কিমুতান্যাঃ সহস্রশঃ

সত্কৃত্য তু দ্বিজাতিভ্যো যো দদাতি নরাধিপ
যাদৃশং তাদৃশং নিত্যমশ্নাতি ফলমূর্জিতম্

অভিগম্য দত্তং তুষ্ট্যা যদ্ধন্যমাহুরভিষ্টুতম্
যাচিতেন তু যদ্দত্তং তদাহুর্মধ্যমং বুধাঃ

অবজ্ঞয়া দীয়তে যত্তথৈবাশ্রদ্ধয়াপি চ
তদাহুরধমং দানং মুনয়ঃ সত্যবাদিনঃ

অতিক্রমে মজ্জমানো বিবিধেন নরঃ সদা
তথা প্রয়ত্নং কুর্বীত যথা মুচ্যেত সংশয়াৎ

দমেন শোভতে বিপ্রঃ ক্ষত্রিয়ো বিজয়েন তু
ধনেন বৈশ্যঃ শূদ্রস্তু নিত্যং দাক্ষ্যেণ শোভতে