অধ্যায় 281

281.1

পরাশর উবাচ
কঃ কস্য চোপকুরুতে কশ্চ কস্মৈ প্রয়চ্ছতি
প্রাণী করোত্যয়ং কর্ম সর্বমাত্মার্থমাত্মনা

গৌরবেণ পরিত্যক্তং নিঃস্নেহং পরিবর্জয়েৎ
সোদর্যং ভ্রাতরমপি কিমুতান্যং পৃথগ্জনম্

বিশিষ্টস্য বিশিষ্টাচ্চ তুল্যৌ দানপ্রতিগ্রহৌ
তয়োঃ পুণ্যতরং দানং তদ্দ্বিজস্য প্রয়চ্ছতঃ

ন্যায়াগতং ধনং বর্ণৈর্ন্যায়েনৈব বিবর্ধিতম্
সংরক্ষ্যং যত্নমাস্থায় ধর্মার্থমিতি নিশ্চয়ঃ

ন ধর্মার্থী নৃশংসেন কর্মণা ধনমর্জয়েৎ
শক্তিতঃ সর্বকার্যাণি কুর্যান্নর্দ্ধিমনুস্মরেৎ

অপো হি প্রয়তঃ শীতাস্তাপিতা জ্বলনেন বা
শক্তিতোঽতিথয়ে দত্ত্বা ক্ষুধার্তায়াশ্নুতে ফলম্

রন্তিদেবেন লোকেষ্টা সিদ্ধিঃ প্রাপ্তা মহাত্মনা
ফলপত্রৈরথো মূলৈর্মুনীনর্চিতবানসৌ

তৈরেব ফলপত্রৈশ্চ স মাঠরমতোষয়ৎ
তস্মাল্লেভে পরং স্থানং শৈব্যোঽপি পৃথিবীপতিঃ

দেবতাতিথিভৃত্যেভ্যঃ পিতৃভ্যোঽথাত্মনস্তথা
ঋণবাঞ্জায়তে মর্ত্যস্তস্মাদনৃণতাং ব্রজেৎ

স্বাধ্যায়েন মহর্ষিভ্যো দেবেভ্যো যজ্ঞকর্মণা
পিতৃভ্যঃ শ্রাদ্ধদানেন নৃণামভ্যর্চনেন চ

বাচঃ শেষাবহার্যেণ পালনেনাত্মনোঽপি চ
যথাবদ্ভৃত্যবর্গস্য চিকীর্ষেদ্ধর্মমাদিতঃ

প্রয়ত্নেন চ সংসিদ্ধা ধনৈরপি বিবর্জিতাঃ
সম্যগ্ঘুত্বা হুতবহং মুনয়ঃ সিদ্ধিমাগতাঃ

বিশ্বামিত্রস্য পুত্রত্বমৃচীকতনয়োঽগমৎ
ঋগ্ভিঃ স্তুত্বা মহাভাগো দেবান্বৈ যজ্ঞভাগিনঃ

গতঃ শুক্রত্বমুশনা দেবদেবপ্রসাদনাৎ
দেবীং স্তুত্বা তু গগনে মোদতে তেজসা বৃতঃ

অসিতো দেবলশ্চৈব তথা নারদপর্বতৌ
কক্ষীবাঞ্জামদগ্ন্যশ্চ রামস্তাণ্ড্যস্তথাংশুমান্

বসিষ্ঠো জমদগ্নিশ্চ বিশ্বামিত্রোঽত্রিরেব চ
ভরদ্বাজো হরিশ্মশ্রুঃ কুণ্ডধারঃ শ্রুতশ্রবাঃ

এতে মহর্ষয়ঃ স্তুত্বা বিষ্ণুমৃগ্ভিঃ সমাহিতাঃ
লেভিরে তপসা সিদ্ধিং প্রসাদাত্তস্য ধীমতঃ

অনর্হাশ্চার্হতাং প্রাপ্তাঃ সন্তঃ স্তুত্বা তমেব হ
ন তু বৃদ্ধিমিহান্বিচ্ছেত্কর্ম কৃত্বা জুগুপ্সিতম্

যেঽর্থা ধর্মেণ তে সত্যা যেঽধর্মেণ ধিগস্তু তান্
ধর্মং বৈ শাশ্বতং লোকে ন জহ্যাদ্ধনকাঙ্ক্ষয়া

আহিতাগ্নির্হি ধর্মাত্মা যঃ স পুণ্যকৃদুত্তমঃ
বেদা হি সর্বে রাজেন্দ্র স্থিতাস্ত্রিষ্বগ্নিষু প্রভো

স চাপ্যগ্ন্যাহিতো বিপ্রঃ ক্রিয়া যস্য ন হীয়তে
শ্রেয়ো হ্যনাহিতাগ্নিত্বমগ্নিহোত্রং ন নিষ্ক্রিয়ম্

অগ্নিরাত্মা চ মাতা চ পিতা জনয়িতা তথা
গুরুশ্চ নরশার্দূল পরিচর্যা যথাতথম্

মানং ত্যক্ত্বা যো নরো বৃদ্ধসেবী; বিদ্বান্ক্লীবঃ পশ্যতি প্রীতিয়োগাৎ
দাক্ষ্যেণাহীনো ধর্ময়ুক্তো নদান্তো; লোকেঽস্মিন্বৈ পূজ্যতে সদ্ভিরার্যঃ