Utshovঅধ্যায় 8
8.1
বৈশংপায়ন উবাচ
বিদুরস্য তু তদ্বাক্যং নিশম্য কুরুসত্তমঃ
পুত্রশোকাভিসংতপ্তঃ পপাত ভুবি মূর্ছিতঃ
8.2
তং তথা পতিতং ভূমৌ নিঃসংজ্ঞং প্রেক্ষ্য বান্ধবাঃ
কৃষ্ণদ্বৈপায়নশ্চৈব ক্ষত্তা চ বিদুরস্তথা
8.3
সংজয়ঃ সুহৃদশ্চান্যে দ্বাঃস্থা যে চাস্য সংমতাঃ
জলেন সুখশীতেন তালবৃন্তৈশ্চ ভারত
8.4
পস্পৃশুশ্চ করৈর্গাত্রং বীজমানাশ্চ যত্নতঃ
অন্বাসন্সুচিরং কালং ধৃতরাষ্ট্রং তথাগতম্
8.5
অথ দীর্ঘস্য কালস্য লব্ধসংজ্ঞো মহীপতিঃ
বিললাপ চিরং কালং পুত্রাধিভিরভিপ্লুতঃ
8.6
ধিগস্তু খলু মানুষ্যং মানুষ্যে চ পরিগ্রহম্
যতোমূলানি দুঃখানি সংভবন্তি মুহুর্মুহুঃ
8.7
পুত্রনাশেঽর্থনাশে চ জ্ঞাতিসংবন্ধিনামপি
প্রাপ্যতে সুমহদ্দুঃখং বিষাগ্নিপ্রতিমং বিভো
8.8
যেন দহ্যন্তি গাত্রাণি যেন প্রজ্ঞা বিনশ্যতি
যেনাভিভূতঃ পুরুষো মরণং বহু মন্যতে
8.9
তদিদং ব্যসনং প্রাপ্তং ময়া ভাগ্যবিপর্যয়াৎ
তচ্চৈবাহং করিষ্যামি অদ্যৈব দ্বিজসত্তম
8.10
ইত্যুক্ত্বা তু মহাত্মানং পিতরং ব্রহ্মবিত্তমম্
ধৃতরাষ্ট্রোঽভবন্মূঢঃ শোকং চ পরমং গতঃ
অভূচ্চ তূষ্ণীং রাজাসৌ ধ্যায়মানো মহীপতে
8.11
তস্য তদ্বচনং শ্রুত্বা কৃষ্ণদ্বৈপায়নঃ প্রভুঃ
পুত্রশোকাভিসংতপ্তং পুত্রং বচনমব্রবীৎ
8.12
ধৃতরাষ্ট্র মহাবাহো যত্ত্বাং বক্ষ্যামি তচ্ছৃণু
শ্রুতবানসি মেধাবী ধর্মার্থকুশলস্তথা
8.13
ন তেঽস্ত্যবিদিতং কিংচিদ্বেদিতব্যং পরংতপ
অনিত্যতাং হি মর্ত্যানাং বিজানাসি ন সংশয়ঃ
8.14
অধ্রুবে জীবলোকে চ স্থানে বাশাশ্বতে সতি
জীবিতে মরণান্তে চ কস্মাচ্ছোচসি ভারত
8.15
প্রত্যক্ষং তব রাজেন্দ্র বৈরস্যাস্য সমুদ্ভবঃ
পুত্রং তে কারণং কৃত্বা কালয়োগেন কারিতঃ
8.16
অবশ্যং ভবিতব্যে চ কুরূণাং বৈশসে নৃপ
কস্মাচ্ছোচসি তাঞ্শূরান্গতান্পরমিকাং গতিম্
8.17
জানতা চ মহাবাহো বিদুরেণ মহাত্মনা
যতিতং সর্বয়ত্নেন শমং প্রতি জনেশ্বর
8.18
ন চ দৈবকৃতো মার্গঃ শক্যো ভূতেন কেনচিৎ
ঘটতাপি চিরং কালং নিয়ন্তুমিতি মে মতিঃ
8.19
দেবতানাং হি যত্কার্যং ময়া প্রত্যক্ষতঃ শ্রুতম্
তত্তেঽহং সংপ্রবক্ষ্যামি কথং স্থৈর্যং ভবেত্তব
8.20
পুরাহং ত্বরিতো যাতঃ সভামৈন্দ্রীং জিতক্লমঃ
অপশ্যং তত্র চ তদা সমবেতান্দিবৌকসঃ
নারদপ্রমুখাংশ্চাপি সর্বান্দেবঋষীংস্তথা
8.21
তত্র চাপি ময়া দৃষ্টা পৃথিবী পৃথিবীপতে
কার্যার্থমুপসংপ্রাপ্তা দেবতানাং সমীপতঃ
8.22
উপগম্য তদা ধাত্রী দেবানাহ সমাগতান্
যত্কার্যং মম যুষ্মাভির্ব্রহ্মণঃ সদনে তদা
প্রতিজ্ঞাতং মহাভাগাস্তচ্ছীঘ্রং সংবিধীয়তাম্
8.23
তস্যাস্তদ্বচনং শ্রুত্বা বিষ্ণুর্লোকনমস্কৃতঃ
উবাচ প্রহসন্বাক্যং পৃথিবীং দেবসংসদি
8.24
ধৃতরাষ্ট্রস্য পুত্রাণাং যস্তু জ্যেষ্ঠঃ শতস্য বৈ
দুর্যোধন ইতি খ্যাতঃ স তে কার্যং করিষ্যতি
তং চ প্রাপ্য মহীপালং কৃতকৃত্যা ভবিষ্যসি
8.25
তস্যার্থে পৃথিবীপালাঃ কুরুক্ষেত্রে সমাগতাঃ
অন্যোন্যং ঘাতয়িষ্যন্তি দৃঢৈঃ শস্ত্রৈঃ প্রহারিণঃ
8.26
ততস্তে ভবিতা দেবি ভারস্য যুধি নাশনম্
গচ্ছ শীঘ্রং স্বকং স্থানং লোকান্ধারয় শোভনে
8.27
স এষ তে সুতো রাজঁল্লোকসংহারকারণাৎ
কলেরংশঃ সমুত্পন্নো গান্ধার্যা জঠরে নৃপ
8.28
অমর্ষী চপলশ্চাপি ক্রোধনো দুষ্প্রসাধনঃ
দৈবয়োগাত্সমুত্পন্না ভ্রাতরশ্চাস্য তাদৃশাঃ
8.29
শকুনির্মাতুলশ্চৈব কর্ণশ্চ পরমঃ সখা
সমুত্পন্না বিনাশার্থং পৃথিব্যাং সহিতা নৃপাঃ
এতমর্থং মহাবাহো নারদো বেদ তত্ত্বতঃ
8.30
আত্মাপরাধাত্পুত্রাস্তে বিনষ্টাঃ পৃথিবীপতে
মা তাঞ্শোচস্ব রাজেন্দ্র ন হি শোকেঽস্তি কারণম্
8.31
ন হি তে পাণ্ডবাঃ স্বল্পমপরাধ্যন্তি ভারত
পুত্রাস্তব দুরাত্মানো যৈরিয়ং ঘাতিতা মহী
8.32
নারদেন চ ভদ্রং তে পূর্বমেব ন সংশয়ঃ
যুধিষ্ঠিরস্য সমিতৌ রাজসূয়ে নিবেদিতম্
8.33
পাণ্ডবাঃ কৌরবাশ্চৈব সমাসাদ্য পরস্পরম্
ন ভবিষ্যন্তি কৌন্তেয় যত্তে কৃত্যং তদাচর
8.34
নারদস্য বচঃ শ্রুত্বা তদাশোচন্ত পাণ্ডবাঃ
এতত্তে সর্বমাখ্যাতং দেবগুহ্যং সনাতনম্
8.35
কথং তে শোকনাশঃ স্যাত্প্রাণেষু চ দয়া প্রভো
স্নেহশ্চ পাণ্ডুপুত্রেষু জ্ঞাত্বা দৈবকৃতং বিধিম্
8.36
এষ চার্থো মহাবাহো পূর্বমেব ময়া শ্রুতঃ
কথিতো ধর্মরাজস্য রাজসূয়ে ক্রতূত্তমে
8.37
যতিতং ধর্মপুত্রেণ ময়া গুহ্যে নিবেদিতে
অবিগ্রহে কৌরবাণাং দৈবং তু বলবত্তরম্
8.38
অনতিক্রমণীয়ো হি বিধী রাজন্কথংচন
কৃতান্তস্য হি ভূতেন স্থাবরেণ ত্রসেন চ
8.39
ভবান্ধর্মপরো যত্র বুদ্ধিশ্রেষ্ঠশ্চ ভারত
মুহ্যতে প্রাণিনাং জ্ঞাত্বা গতিং চাগতিমেব চ
8.40
ত্বাং তু শোকেন সংতপ্তং মুহ্যমানং মুহুর্মুহুঃ
জ্ঞাত্বা যুধিষ্ঠিরো রাজা প্রাণানপি পরিত্যজেৎ
8.41
কৃপালুর্নিত্যশো বীরস্তির্যগ্যোনিগতেষ্বপি
স কথং ত্বয়ি রাজেন্দ্র কৃপাং বৈ ন করিষ্যতি
8.42
মম চৈব নিয়োগেন বিধেশ্চাপ্যনিবর্তনাৎ
পাণ্ডবানাং চ কারুণ্যাত্প্রাণান্ধারয় ভারত
8.43
এবং তে বর্তমানস্য লোকে কীর্তির্ভবিষ্যতি
ধর্মশ্চ সুমহাংস্তাত তপ্তং স্যাচ্চ তপশ্চিরাৎ
8.44
পুত্রশোকসমুত্পন্নং হুতাশং জ্বলিতং যথা
প্রজ্ঞাম্ভসা মহারাজ নির্বাপয় সদা সদা
8.45
এতচ্ছ্রুত্বা তু বচনং ব্যাসস্যামিততেজসঃ
মুহূর্তং সমনুধ্যায় ধৃতরাষ্ট্রোঽভ্যভাষত
8.46
মহতা শোকজালেন প্রণুন্নোঽস্মি দ্বিজোত্তম
নাত্মানমববুধ্যামি মুহ্যমানো মুহুর্মুহুঃ
8.47
ইদং তু বচনং শ্রুত্বা তব দৈবনিয়োগজম্
ধারয়িষ্যাম্যহং প্রাণান্যতিষ্যে চ নশোচিতুম্
8.48
এতচ্ছ্রুত্বা তু বচনং ব্যাসঃ সত্যবতীসুতঃ
ধৃতরাষ্ট্রস্য রাজেন্দ্র তত্রৈবান্তরধীয়ত