অধ্যায় 9

9.1

জনমেজয় উবাচ
গতে ভগবতি ব্যাসে ধৃতরাষ্ট্রো মহীপতিঃ
কিমচেষ্টত বিপ্রর্ষে তন্মে ব্যাখ্যাতুমর্হসি

বৈশংপায়ন উবাচ
এতচ্ছ্রুত্বা নরশ্রেষ্ঠ চিরং ধ্যাত্বা ত্বচেতনঃ
সংজয়ং যোজয়েত্যুক্ত্বা বিদুরং প্রত্যভাষত

ক্ষিপ্রমানয় গান্ধারীং সর্বাশ্চ ভরতস্ত্রিয়ঃ
বধূং কুন্তীমুপাদায় যাশ্চান্যাস্তত্র যোষিতঃ

এবমুক্ত্বা স ধর্মাত্মা বিদুরং ধর্মবিত্তমম্
শোকবিপ্রহতজ্ঞানো যানমেবান্বপদ্যত

গান্ধারী চৈব শোকার্তা ভর্তুর্বচনচোদিতা
সহ কুন্ত্যা যতো রাজা সহ স্ত্রীভিরুপাদ্রবৎ

তাঃ সমাসাদ্য রাজানং ভৃশং শোকসমন্বিতাঃ
আমন্ত্র্যান্যোন্যমীয়ুঃ স্ম ভৃশমুচ্চুক্রুশুস্ততঃ

তাঃ সমাশ্বাসয়ত্ক্ষত্তা তাভ্যশ্চার্ততরঃ স্বয়ম্
অশ্রুকণ্ঠীঃ সমারোপ্য ততোঽসৌ নির্যয়ৌ পুরাৎ

ততঃ প্রণাদঃ সংজজ্ঞে সর্বেষু কুরুবেশ্মসু
আকুমারং পুরং সর্বমভবচ্ছোককর্শিতম্

অদৃষ্টপূর্বা যা নার্যঃ পুরা দেবগণৈরপি
পৃথগ্জনেন দৃশ্যন্ত তাস্তদা নিহতেশ্বরাঃ

প্রকীর্য কেশান্সুশুভান্ভূষণান্যবমুচ্য চ
একবস্ত্রধরা নার্যঃ পরিপেতুরনাথবৎ

শ্বেতপর্বতরূপেভ্যো গৃহেভ্যস্তাস্ত্বপাক্রমন্
গুহাভ্য ইব শৈলানাং পৃষত্যো হতয়ূথপাঃ

তান্যুদীর্ণানি নারীণাং তদা বৃন্দান্যনেকশঃ
শোকার্তান্যদ্রবন্রাজন্কিশোরীণামিবাঙ্গনে

প্রগৃহ্য বাহূন্ক্রোশন্ত্যঃ পুত্রান্ভ্রাতৄন্পিতৄনপি
দর্শয়ন্তীব তা হ স্ম যুগান্তে লোকসংক্ষয়ম্

বিলপন্ত্যো রুদন্ত্যশ্চ ধাবমানাস্ততস্ততঃ
শোকেনাভ্যাহতজ্ঞানাঃ কর্তব্যং ন প্রজজ্ঞিরে

ব্রীডাং জগ্মুঃ পুরা যাঃ স্ম সখীনামপি যোষিতঃ
তা একবস্ত্রা নির্লজ্জাঃ শ্বশ্রূণাং পুরতোঽভবন্

পরস্পরং সুসূক্ষ্মেষু শোকেষ্বাশ্বাসয়ন্স্ম যাঃ
তাঃ শোকবিহ্বলা রাজন্নুপৈক্ষন্ত পরস্পরম্

তাভিঃ পরিবৃতো রাজা রুদতীভিঃ সহস্রশঃ
নির্যয়ৌ নগরাদ্দীনস্তূর্ণমায়োধনং প্রতি

শিল্পিনো বণিজো বৈশ্যাঃ সর্বকর্মোপজীবিনঃ
তে পার্থিবং পুরস্কৃত্য নির্যয়ুর্নগরাদ্বহিঃ

তাসাং বিক্রোশমানানামার্তানাং কুরুসংক্ষয়ে
প্রাদুরাসীন্মহাঞ্শব্দো ব্যথয়ন্ভুবনান্যুত

যুগান্তকালে সংপ্রাপ্তে ভূতানাং দহ্যতামিব
অভাবঃ স্যাদয়ং প্রাপ্ত ইতি ভূতানি মেনিরে

ভৃশমুদ্বিগ্নমনসস্তে পৌরাঃ কুরুসংক্ষয়ে
প্রাক্রোশন্ত মহারাজ স্বনুরক্তাস্তদা ভৃশম্