অধ্যায় 10

10.1

বৈশংপায়ন উবাচ
ক্রোশমাত্রং ততো গত্বা দদৃশুস্তান্মহারথান্
শারদ্বতং কৃপং দ্রৌণিং কৃতবর্মাণমেব চ

তে তু দৃষ্ট্বৈব রাজানং প্রজ্ঞাচক্ষুষমীশ্বরম্
অশ্রুকণ্ঠা বিনিঃশ্বস্য রুদন্তমিদমব্রুবন্

পুত্রস্তব মহারাজ কৃত্বা কর্ম সুদুষ্করম্
গতঃ সানুচরো রাজঞ্শক্রলোকং মহীপতিঃ

দুর্যোধনবলান্মুক্তা বয়মেব ত্রয়ো রথাঃ
সর্বমন্যত্পরিক্ষীণং সৈন্যং তে ভরতর্ষভ

ইত্যেবমুক্ত্বা রাজানং কৃপঃ শারদ্বতস্তদা
গান্ধারীং পুত্রশোকার্তামিদং বচনমব্রবীৎ

অভীতা যুধ্যমানাস্তে ঘ্নন্তঃ শত্রুগণান্বহূন্
বীরকর্মাণি কুর্বাণাঃ পুত্রাস্তে নিধনং গতাঃ

ধ্রুবং সংপ্রাপ্য লোকাংস্তে নির্মলাঞ্শস্ত্রনির্জিতান্
ভাস্বরং দেহমাস্থায় বিহরন্ত্যমরা ইব

ন হি কশ্চিদ্ধি শূরাণাং যুধ্যমানঃ পরাঙ্মুখঃ
শস্ত্রেণ নিধনং প্রাপ্তো ন চ কশ্চিত্কৃতাঞ্জলিঃ

এতাং তাং ক্ষত্রিয়স্যাহুঃ পুরাণাং পরমাং গতিম্
শস্ত্রেণ নিধনং সংখ্যে তান্ন শোচিতুমর্হসি

ন চাপি শত্রবস্তেষামৃধ্যন্তে রাজ্ঞি পাণ্ডবাঃ
শৃণু যত্কৃতমস্মাভিরশ্বত্থামপুরোগমৈঃ

অধর্মেণ হতং শ্রুত্বা ভীমসেনেন তে সুতম্
সুপ্তং শিবিরমাবিশ্য পাণ্ডূনাং কদনং কৃতম্

পাঞ্চালা নিহতাঃ সর্বে ধৃষ্টদ্যুম্নপুরোগমাঃ
দ্রুপদস্যাত্মজাশ্চৈব দ্রৌপদেয়াশ্চ পাতিতাঃ

তথা বিশসনং কৃত্বা পুত্রশত্রুগণস্য তে
প্রাদ্রবাম রণে স্থাতুং ন হি শক্যামহে ত্রয়ঃ

তে হি শূরা মহেষ্বাসাঃ ক্ষিপ্রমেষ্যন্তি পাণ্ডবাঃ
অমর্ষবশমাপন্না বৈরং প্রতিজিহীর্ষবঃ

নিহতানাত্মজাঞ্শ্রুত্বা প্রমত্তান্পুরুষর্ষভাঃ
নিনীষন্তঃ পদং শূরাঃ ক্ষিপ্রমেব যশস্বিনি

পাণ্ডূনাং কিল্বিষং কৃত্বা সংস্থাতুং নোত্সহামহে
অনুজানীহি নো রাজ্ঞি মা চ শোকে মনঃ কৃথাঃ

রাজংস্ত্বমনুজানীহি ধৈর্যমাতিষ্ঠ চোত্তমম্
নিষ্ঠান্তং পশ্য চাপি ত্বং ক্ষত্রধর্মং চ কেবলম্

ইত্যেবমুক্ত্বা রাজানং কৃত্বা চাভিপ্রদক্ষিণম্
কৃপশ্চ কৃতবর্মা চ দ্রোণপুত্রশ্চ ভারত

অবেক্ষমাণা রাজানং ধৃতরাষ্ট্রং মনীষিণম্
গঙ্গামনু মহাত্মানস্তূর্ণমশ্বানচোদয়ন্

অপক্রম্য তু তে রাজন্সর্ব এব মহারথাঃ
আমন্ত্র্যান্যোন্যমুদ্বিগ্নাস্ত্রিধা তে প্রয়য়ুস্ততঃ

জগাম হাস্তিনপুরং কৃপঃ শারদ্বতস্তদা
স্বমেব রাষ্ট্রং হার্দিক্যো দ্রৌণির্ব্যাসাশ্রমং যয়ৌ

এবং তে প্রয়য়ুর্বীরা বীক্ষমাণাঃ পরস্পরম্
ভয়ার্তাঃ পাণ্ডুপুত্রাণামাগস্কৃত্বা মহাত্মনাম্

সমেত্য বীরা রাজানং তদা ত্বনুদিতে রবৌ
বিপ্রজগ্মুর্মহারাজ যথেচ্ছকমরিংদমাঃ