UtshovChapter 10
10.1
वैशंपायन उवाच
क्रोशमात्रं ततो गत्वा ददृशुस्तान्महारथान्
शारद्वतं कृपं द्रौणिं कृतवर्माणमेव च
Vaishampayana uvacha
Kroshamatram tato gatva dadrishustanmaharathan
Sharadvatam kripam draunim kritavarmanameva cha
10.2
ते तु दृष्ट्वैव राजानं प्रज्ञाचक्षुषमीश्वरम्
अश्रुकण्ठा विनिःश्वस्य रुदन्तमिदमब्रुवन्
Te tu drishtvaiva rajanam pragyachakshushamishvaram
Ashrukantha vinihshvasya rudantamidamabruvan
10.3
पुत्रस्तव महाराज कृत्वा कर्म सुदुष्करम्
गतः सानुचरो राजञ्शक्रलोकं महीपतिः
Putrastava maharaja kritva karma sudushkaram
Gatah sanucharo rajanshakralokam mahipatih
10.4
दुर्योधनबलान्मुक्ता वयमेव त्रयो रथाः
सर्वमन्यत्परिक्षीणं सैन्यं ते भरतर्षभ
Duryodhanabalanmukta vayameva trayo rathah
Sarvamanyatparikshinam sainyam te bharatarshabha
10.5
इत्येवमुक्त्वा राजानं कृपः शारद्वतस्तदा
गान्धारीं पुत्रशोकार्तामिदं वचनमब्रवीत्
Ityevamuktva rajanam kripah sharadvatastada
Gandharim putrashokartamidam vachanamabravit
10.6
अभीता युध्यमानास्ते घ्नन्तः शत्रुगणान्बहून्
वीरकर्माणि कुर्वाणाः पुत्रास्ते निधनं गताः
Abhita yudhyamanaste ghnantah shatrugananbahun
Virakarmani kurvanah putraste nidhanam gatah
10.7
ध्रुवं संप्राप्य लोकांस्ते निर्मलाञ्शस्त्रनिर्जितान्
भास्वरं देहमास्थाय विहरन्त्यमरा इव
Dhruvam samprapya lokanste nirmalanshastranirjitan
Bhasvaram dehamasthaya viharantyamara iva
10.8
न हि कश्चिद्धि शूराणां युध्यमानः पराङ्मुखः
शस्त्रेण निधनं प्राप्तो न च कश्चित्कृताञ्जलिः
Na hi kashchiddhi shuranam yudhyamanah paranmukhah
Shastrena nidhanam prapto na cha kashchitkritanjalih
10.9
एतां तां क्षत्रियस्याहुः पुराणां परमां गतिम्
शस्त्रेण निधनं संख्ये तान्न शोचितुमर्हसि
Etam tam kshatriyasyahuh puranam paramam gatim
Shastrena nidhanam sankhye tanna shochitumarhasi
10.10
न चापि शत्रवस्तेषामृध्यन्ते राज्ञि पाण्डवाः
शृणु यत्कृतमस्माभिरश्वत्थामपुरोगमैः
Na chapi shatravasteshamridhyante ragyi pandavah
Shrinu yatkritamasmabhirashvatthamapurogamaih
10.11
अधर्मेण हतं श्रुत्वा भीमसेनेन ते सुतम्
सुप्तं शिबिरमाविश्य पाण्डूनां कदनं कृतम्
Adharmena hatam shrutva bhimasenena te sutam
Suptam shibiramavishya pandunam kadanam kritam
10.12
पाञ्चाला निहताः सर्वे धृष्टद्युम्नपुरोगमाः
द्रुपदस्यात्मजाश्चैव द्रौपदेयाश्च पातिताः
Panchala nihatah sarve dhrishtadyumnapurogamah
Drupadasyatmajashchaiva draupadeyashcha patitah
10.13
तथा विशसनं कृत्वा पुत्रशत्रुगणस्य ते
प्राद्रवाम रणे स्थातुं न हि शक्यामहे त्रयः
Tatha vishasanam kritva putrashatruganasya te
Pradravama rane sthatum na hi shakyamahe trayah
10.14
ते हि शूरा महेष्वासाः क्षिप्रमेष्यन्ति पाण्डवाः
अमर्षवशमापन्ना वैरं प्रतिजिहीर्षवः
Te hi shura maheshvasah kshiprameshyanti pandavah
Amarshavashamapanna vairam pratijihirshavah
10.15
निहतानात्मजाञ्श्रुत्वा प्रमत्तान्पुरुषर्षभाः
निनीषन्तः पदं शूराः क्षिप्रमेव यशस्विनि
Nihatanatmajanshrutva pramattanpurusharshabhah
Ninishantah padam shurah kshiprameva yashasvini
10.16
पाण्डूनां किल्बिषं कृत्वा संस्थातुं नोत्सहामहे
अनुजानीहि नो राज्ञि मा च शोके मनः कृथाः
Pandunam kilbisham kritva sansthatum notsahamahe
Anujanihi no ragyi ma cha shoke manah krithah
10.17
राजंस्त्वमनुजानीहि धैर्यमातिष्ठ चोत्तमम्
निष्ठान्तं पश्य चापि त्वं क्षत्रधर्मं च केवलम्
Rajanstvamanujanihi dhairyamatishtha chottamam
Nishthantam pashya chapi tvam kshatradharmam cha kevalam
10.18
इत्येवमुक्त्वा राजानं कृत्वा चाभिप्रदक्षिणम्
कृपश्च कृतवर्मा च द्रोणपुत्रश्च भारत
Ityevamuktva rajanam kritva chabhipradakshinam
Kripashcha kritavarma cha dronaputrashcha bharata
10.19
अवेक्षमाणा राजानं धृतराष्ट्रं मनीषिणम्
गङ्गामनु महात्मानस्तूर्णमश्वानचोदयन्
Avekshamana rajanam dhritarashtram manishinam
Gangamanu mahatmanasturnamashvanachodayan
10.20
अपक्रम्य तु ते राजन्सर्व एव महारथाः
आमन्त्र्यान्योन्यमुद्विग्नास्त्रिधा ते प्रययुस्ततः
Apakramya tu te rajansarva eva maharathah
Amantryanyonyamudvignastridha te prayayustatah
10.21
जगाम हास्तिनपुरं कृपः शारद्वतस्तदा
स्वमेव राष्ट्रं हार्दिक्यो द्रौणिर्व्यासाश्रमं ययौ
Jagama hastinapuram kripah sharadvatastada
Svameva rashtram hardikyo draunirvyasashramam yayau
10.22
एवं ते प्रययुर्वीरा वीक्षमाणाः परस्परम्
भयार्ताः पाण्डुपुत्राणामागस्कृत्वा महात्मनाम्
Evam te prayayurvira vikshamanah parasparam
Bhayartah panduputranamagaskritva mahatmanam
10.23
समेत्य वीरा राजानं तदा त्वनुदिते रवौ
विप्रजग्मुर्महाराज यथेच्छकमरिंदमाः
Sametya vira rajanam tada tvanudite ravau
Viprajagmurmaharaja yathechchhakamarindamah