অধ্যায় 7

7.1

ধৃতরাষ্ট্র উবাচ
অহোঽভিহিতমাখ্যানং ভবতা তত্ত্বদর্শিনা
ভূয় এব তু মে হর্ষঃ শ্রোতুং বাগমৃতং তব

বিদুর উবাচ
শৃণু ভূয়ঃ প্রবক্ষ্যামি মার্গস্যৈতস্য বিস্তরম্
যচ্ছ্রুত্বা বিপ্রমুচ্যন্তে সংসারেভ্যো বিচক্ষণাঃ

যথা তু পুরুষো রাজন্দীর্ঘমধ্বানমাস্থিতঃ
ক্বচিত্ক্বচিচ্ছ্রমাত্স্থাতা কুরুতে বাসমেব বা

এবং সংসারপর্যায়ে গর্ভবাসেষু ভারত
কুর্বন্তি দুর্বুধা বাসং মুচ্যন্তে তত্র পণ্ডিতাঃ

তস্মাদধ্বানমেবৈতমাহুঃ শাস্ত্রবিদো জনাঃ
যত্তু সংসারগহনং বনমাহুর্মনীষিণঃ

সোঽয়ং লোকসমাবর্তো মর্ত্যানাং ভরতর্ষভ
চরাণাং স্থাবরাণাং চ গৃধ্যেত্তত্র ন পণ্ডিতঃ

শারীরা মানসাশ্চৈব মর্ত্যানাং যে তু ব্যাধয়ঃ
প্রত্যক্ষাশ্চ পরোক্ষাশ্চ তে ব্যালাঃ কথিতা বুধৈঃ

ক্লিশ্যমানাশ্চ তৈর্নিত্যং হন্যমানাশ্চ ভারত
স্বকর্মভির্মহাব্যালৈর্নোদ্বিজন্ত্যল্পবুদ্ধয়ঃ

অথাপি তৈর্বিমুচ্যেত ব্যাধিভিঃ পুরুষো নৃপ
আবৃণোত্যেব তং পশ্চাজ্জরা রূপবিনাশিনী

শব্দরূপরসস্পর্শৈর্গন্ধৈশ্চ বিবিধৈরপি
মজ্জমানং মহাপঙ্কে নিরালম্বে সমন্ততঃ

সংবত্সরর্তবো মাসাঃ পক্ষাহোরাত্রসংধয়ঃ
ক্রমেণাস্য প্রলুম্পন্তি রূপমায়ুস্তথৈব চ

এতে কালস্য নিধয়ো নৈতাঞ্জানন্তি দুর্বুধাঃ
অত্রাভিলিখিতান্যাহুঃ সর্বভূতানি কর্মণা

রথং শরীরং ভূতানাং সত্ত্বমাহুস্তু সারথিম্
ইন্দ্রিয়াণি হয়ানাহুঃ কর্ম বুদ্ধিশ্চ রশ্ময়ঃ

তেষাং হয়ানাং যো বেগং ধাবতামনুধাবতি
স তু সংসারচক্রেঽস্মিংশ্চক্রবত্পরিবর্ততে

যস্তান্যময়তে বুদ্ধ্যা স যন্তা ন নিবর্ততে
যাম্যমাহূ রথং হ্যেনং মুহ্যন্তে যেন দুর্বুধাঃ

স চৈতত্প্রাপ্নুতে রাজন্যত্ত্বং প্রাপ্তো নরাধিপ
রাজ্যনাশং সুহৃন্নাশং সুতনাশং চ ভারত

অনুতর্ষুলমেবৈতদ্দুঃখং ভবতি ভারত
সাধুঃ পরমদুঃখানাং দুঃখভৈষজ্যমাচরেৎ

ন বিক্রমো ন চাপ্যর্থো ন মিত্রং ন সুহৃজ্জনঃ
তথোন্মোচয়তে দুঃখাদ্যথাত্মা স্থিরসংয়মঃ

তস্মান্মৈত্রং সমাস্থায় শীলমাপদ্য ভারত
দমস্ত্যাগোঽপ্রমাদশ্চ তে ত্রয়ো ব্রহ্মণো হয়াঃ

শীলরশ্মিসমায়ুক্তে স্থিতো যো মানসে রথে
ত্যক্ত্বা মৃত্যুভয়ং রাজন্ব্রহ্মলোকং স গচ্ছতি