Utshovঅধ্যায় 6
6.1
ধৃতরাষ্ট্র উবাচ
অহো খলু মহদ্দুঃখং কৃচ্ছ্রবাসং বসত্যসৌ
কথং তস্য রতিস্তত্র তুষ্টির্বা বদতাং বর
6.2
স দেশঃ ক্ব নু যত্রাসৌ বসতে ধর্মসংকটে
কথং বা স বিমুচ্যেত নরস্তস্মান্মহাভয়াৎ
6.3
এতন্মে সর্বমাচক্ষ্ব সাধু চেষ্টামহে তথা
কৃপা মে মহতী জাতা তস্যাভ্যুদ্ধরণেন হি
6.4
বিদুর উবাচ
উপমানমিদং রাজন্মোক্ষবিদ্ভিরুদাহৃতম্
সুগতিং বিন্দতে যেন পরলোকেষু মানবঃ
6.5
যত্তদুচ্যতি কান্তারং মহত্সংসার এব সঃ
বনং দুর্গং হি যত্ত্বেতত্সংসারগহনং হি তৎ
6.6
যে চ তে কথিতা ব্যালা ব্যাধয়স্তে প্রকীর্তিতাঃ
যা সা নারী বৃহত্কায়া অধিতিষ্ঠতি তত্র বৈ
তামাহুস্তু জরাং প্রাজ্ঞা বর্ণরূপবিনাশিনীম্
6.7
যস্তত্র কূপো নৃপতে স তু দেহঃ শরীরিণাম্
যস্তত্র বসতেঽধস্তান্মহাহিঃ কাল এব সঃ
অন্তকঃ সর্বভূতানাং দেহিনাং সর্বহার্যসৌ
6.8
কূপমধ্যে চ যা জাতা বল্লী যত্র স মানবঃ
প্রতানে লম্বতে সা তু জীবিতাশা শরীরিণাম্
6.9
স যস্তু কূপবীনাহে তং বৃক্ষং পরিসর্পতি
ষড্বক্ত্রঃ কুঞ্জরো রাজন্স তু সংবত্সরঃ স্মৃতঃ
মুখানি ঋতবো মাসাঃ পাদা দ্বাদশ কীর্তিতাঃ
6.10
যে তু বৃক্ষং নিকৃন্তন্তি মূষকাঃ সততোত্থিতাঃ
রাত্র্যহানি তু তান্যাহুর্ভূতানাং পরিচিন্তকাঃ
যে তে মধুকরাস্তত্র কামাস্তে পরিকীর্তিতাঃ
6.11
যাস্তু তা বহুশো ধারাঃ স্রবন্তি মধুনিস্রবম্
তাংস্তু কামরসান্বিদ্যাদ্যত্র মজ্জন্তি মানবাঃ
6.12
এবং সংসারচক্রস্য পরিবৃত্তিং স্ম যে বিদুঃ
তে বৈ সংসারচক্রস্য পাশাংশ্ছিন্দন্তি বৈ বুধাঃ