অধ্যায় 5

5.1

ধৃতরাষ্ট্র উবাচ
যদিদং ধর্মগহনং বুদ্ধ্যা সমনুগম্যতে
এতদ্বিস্তরশঃ সর্বং বুদ্ধিমার্গং প্রশংস মে

বিদুর উবাচ
অত্র তে বর্তয়িষ্যামি নমস্কৃত্বা স্বয়ংভুবে
যথা সংসারগহনং বদন্তি পরমর্ষয়ঃ

কশ্চিন্মহতি সংসারে বর্তমানো দ্বিজঃ কিল
বনং দুর্গমনুপ্রাপ্তো মহত্ক্রব্যাদসংকুলম্

সিংহব্যাঘ্রগজাকারৈরতিঘোরৈর্মহাশনৈঃ
সমন্তাত্সংপরিক্ষিপ্তং মৃত্যোরপি ভয়প্রদম্

তদস্য দৃষ্ট্বা হৃদয়মুদ্বেগমগমত্পরম্
অভ্যুচ্ছ্রয়শ্চ রোম্ণাং বৈ বিক্রিয়াশ্চ পরংতপ

স তদ্বনং ব্যনুসরন্বিপ্রধাবনিতস্ততঃ
বীক্ষমাণো দিশঃ সর্বাঃ শরণং ক্ব ভবেদিতি

স তেষাং ছিদ্রমন্বিচ্ছন্প্রদ্রুতো ভয়পীডিতঃ
ন চ নির্যাতি বৈ দূরং ন চ তৈর্বিপ্রয়ুজ্যতে

অথাপশ্যদ্বনং ঘোরং সমন্তাদ্বাগুরাবৃতম্
বাহুভ্যাং সংপরিষ্বক্তং স্ত্রিয়া পরমঘোরয়া

পঞ্চশীর্ষধরৈর্নাগৈঃ শৈলৈরিব সমুন্নতৈঃ
নভঃস্পৃশৈর্মহাবৃক্ষৈঃ পরিক্ষিপ্তং মহাবনম্

বনমধ্যে চ তত্রাভূদুদপানঃ সমাবৃতঃ
বল্লীভিস্তৃণছন্নাভির্গূঢাভিরভিসংবৃতঃ

পপাত স দ্বিজস্তত্র নিগূঢে সলিলাশয়ে
বিলগ্নশ্চাভবত্তস্মিঁল্লতাসংতানসংকটে

পনসস্য যথা জাতং বৃন্তবদ্ধং মহাফলম্
স তথা লম্বতে তত্র ঊর্ধ্বপাদো হ্যধঃশিরাঃ

অথ তত্রাপি চান্যোঽস্য ভূয়ো জাত উপদ্রবঃ
কূপবীনাহবেলায়ামপশ্যত মহাগজম্

ষড্বক্ত্রং কৃষ্ণশবলং দ্বিষট্কপদচারিণম্
ক্রমেণ পরিসর্পন্তং বল্লীবৃক্ষসমাবৃতম্

তস্য চাপি প্রশাখাসু বৃক্ষশাখাবলম্বিনঃ
নানারূপা মধুকরা ঘোররূপা ভয়াবহাঃ
আসতে মধু সংভৃত্য পূর্বমেব নিকেতজাঃ

ভূয়ো ভূয়ঃ সমীহন্তে মধূনি ভরতর্ষভ
স্বাদনীয়ানি ভূতানাং ন যৈর্বালোঽপি তৃপ্যতে

তেষাং মধূনাং বহুধা ধারা প্রস্রবতে সদা
তাং লম্বমানঃ স পুমান্ধারাং পিবতি সর্বদা
ন চাস্য তৃষ্ণা বিরতা পিবমানস্য সংকটে

অভীপ্সতি চ তাং নিত্যমতৃপ্তঃ স পুনঃ পুনঃ
ন চাস্য জীবিতে রাজন্নির্বেদঃ সমজায়ত

তত্রৈব চ মনুষ্যস্য জীবিতাশা প্রতিষ্ঠিতা
কৃষ্ণাঃ শ্বেতাশ্চ তং বৃক্ষং কুট্টয়ন্তি স্ম মূষকাঃ

ব্যালৈশ্চ বনদুর্গান্তে স্ত্রিয়া চ পরমোগ্রয়া
কূপাধস্তাচ্চ নাগেন বীনাহে কুঞ্জরেণ চ

বৃক্ষপ্রপাতাচ্চ ভয়ং মূষকেভ্যশ্চ পঞ্চমম্
মধুলোভান্মধুকরৈঃ ষষ্ঠমাহুর্মহদ্ভয়ম্

এবং স বসতে তত্র ক্ষিপ্তঃ সংসারসাগরে
ন চৈব জীবিতাশায়াং নির্বেদমুপগচ্ছতি