অধ্যায় 4

4.1

ধৃতরাষ্ট্র উবাচ
কথং সংসারগহনং বিজ্ঞেয়ং বদতাং বর
এতদিচ্ছাম্যহং শ্রোতুং তত্ত্বমাখ্যাহি পৃচ্ছতঃ

বিদুর উবাচ
জন্মপ্রভৃতি ভূতানাং ক্রিয়াঃ সর্বাঃ শৃণু প্রভো
পূর্বমেবেহ কললে বসতে কিংচিদন্তরম্

ততঃ স পঞ্চমেঽতীতে মাসে মাংসং প্রকল্পয়েৎ
ততঃ সর্বাঙ্গসংপূর্ণো গর্ভো মাসে প্রজায়তে

অমেধ্যমধ্যে বসতি মাংসশোণিতলেপনে
ততস্তু বায়ুবেগেন ঊর্ধ্বপাদো হ্যধঃশিরাঃ

যোনিদ্বারমুপাগম্য বহূন্ক্লেশান্সমৃচ্ছতি
যোনিসংপীডনাচ্চৈব পূর্বকর্মভিরন্বিতঃ

তস্মান্মুক্তঃ স সংসারাদন্যান্পশ্যত্যুপদ্রবান্
গ্রহাস্তমুপসর্পন্তি সারমেয়া ইবামিষম্

ততঃ প্রাপ্তোত্তরে কালে ব্যাধয়শ্চাপি তং তথা
উপসর্পন্তি জীবন্তং বধ্যমানং স্বকর্মভিঃ

বদ্ধমিন্দ্রিয়পাশৈস্তং সঙ্গস্বাদুভিরাতুরম্
ব্যসনান্যুপবর্তন্তে বিবিধানি নরাধিপ
বধ্যমানশ্চ তৈর্ভূয়ো নৈব তৃপ্তিমুপৈতি সঃ

অয়ং ন বুধ্যতে তাবদ্যমলোকমথাগতম্
যমদূতৈর্বিকৃষ্যংশ্চ মৃত্যুং কালেন গচ্ছতি

বাগ্ঘীনস্য চ যন্মাত্রমিষ্টানিষ্টং কৃতং মুখে
ভূয় এবাত্মনাত্মানং বধ্যমানমুপেক্ষতে

অহো বিনিকৃতো লোকো লোভেন চ বশীকৃতঃ
লোভক্রোধমদোন্মত্তো নাত্মানমববুধ্যতে

কুলীনত্বেন রমতে দুষ্কুলীনান্বিকুত্সয়ন্
ধনদর্পেণ দৃপ্তশ্চ দরিদ্রান্পরিকুত্সয়ন্

মূর্খানিতি পরানাহ নাত্মানং সমবেক্ষতে
শিক্ষাং ক্ষিপতি চান্যেষাং নাত্মানং শাস্তুমিচ্ছতি

অধ্রুবে জীবলোকেঽস্মিন্যো ধর্মমনুপালয়ন্
জন্মপ্রভৃতি বর্তেত প্রাপ্নুয়াত্পরমাং গতিম্

এবং সর্বং বিদিত্বা বৈ যস্তত্ত্বমনুবর্ততে
স প্রমোক্ষায় লভতে পন্থানং মনুজাধিপ