অধ্যায় 3

3.1

ধৃতরাষ্ট্র উবাচ
সুভাষিতৈর্মহাপ্রাজ্ঞ শোকোঽয়ং বিগতো মম
ভুয় এব তু বাক্যানি শ্রোতুমিচ্ছামি তত্ত্বতঃ

অনিষ্টানাং চ সংসর্গাদিষ্টানাং চ বিবর্জনাৎ
কথং হি মানসৈর্দুঃখৈঃ প্রমুচ্যন্তেঽত্র পণ্ডিতাঃ

বিদুর উবাচ
যতো যতো মনো দুঃখাত্সুখাদ্বাপি প্রমুচ্যতে
ততস্ততঃ শমং লব্ধ্বা সুগতিং বিন্দতে বুধঃ

অশাশ্বতমিদং সর্বং চিন্ত্যমানং নরর্ষভ
কদলীসংনিভো লোকঃ সারো হ্যস্য ন বিদ্যতে

গৃহাণ্যেব হি মর্ত্যানামাহুর্দেহানি পণ্ডিতাঃ
কালেন বিনিয়ুজ্যন্তে সত্ত্বমেকং তু শোভনম্

যথা জীর্ণমজীর্ণং বা বস্ত্রং ত্যক্ত্বা তু বৈ নরঃ
অন্যদ্রোচয়তে বস্ত্রমেবং দেহাঃ শরীরিণাম্

বৈচিত্রবীর্য বাসং হি দুঃখং বা যদি বা সুখম্
প্রাপ্নুবন্তীহ ভূতানি স্বকৃতেনৈব কর্মণা

কর্মণা প্রাপ্যতে স্বর্গং সুখং দুঃখং চ ভারত
ততো বহতি তং ভারমবশঃ স্ববশোঽপি বা

যথা চ মৃন্ময়ং ভাণ্ডং চক্রারূঢং বিপদ্যতে
কিংচিত্প্রক্রিয়মাণং বা কৃতমাত্রমথাপি বা

ছিন্নং বাপ্যবরোপ্যন্তমবতীর্ণমথাপি বা
আর্দ্রং বাপ্যথ বা শুষ্কং পচ্যমানমথাপি বা

অবতার্যমাণমাপাকাদুদ্ধৃতং বাপি ভারত
অথ বা পরিভুজ্যন্তমেবং দেহাঃ শরীরিণাম্

গর্ভস্থো বা প্রসূতো বাপ্যথ বা দিবসান্তরঃ
অর্ধমাসগতো বাপি মাসমাত্রগতোঽপি বা

সংবত্সরগতো বাপি দ্বিসংবত্সর এব বা
যৌবনস্থোঽপি মধ্যস্থো বৃদ্ধো বাপি বিপদ্যতে

প্রাক্কর্মভিস্তু ভূতানি ভবন্তি ন ভবন্তি চ
এবং সাংসিদ্ধিকে লোকে কিমর্থমনুতপ্যসে

যথা চ সলিলে রাজন্ক্রীডার্থমনুসংচরন্
উন্মজ্জেচ্চ নিমজ্জেচ্চ কিংচিত্সত্ত্বং নরাধিপ

এবং সংসারগহনাদুন্মজ্জননিমজ্জনাৎ
কর্মভোগেন বধ্যন্তঃ ক্লিশ্যন্তে যেঽল্পবুদ্ধয়ঃ

যে তু প্রাজ্ঞাঃ স্থিতাঃ সত্যে সংসারান্তগবেষিণঃ
সমাগমজ্ঞা ভূতানাং তে যান্তি পরমাং গতিম্