অধ্যায় 2

2.1

বৈশংপায়ন উবাচ
ততোঽমৃতসমৈর্বাক্যৈর্হ্লাদয়ন্পুরুষর্ষভম্
বৈচিত্রবীর্যং বিদুরো যদুবাচ নিবোধ তৎ

বিদুর উবাচ
উত্তিষ্ঠ রাজন্কিং শেষে ধারয়াত্মানমাত্মনা
স্থিরজঙ্গমমর্ত্যানাং সর্বেষামেষ নির্ণয়ঃ

সর্বে ক্ষয়ান্তা নিচয়াঃ পতনান্তাঃ সমুচ্ছ্রয়াঃ
সংয়োগা বিপ্রয়োগান্তা মরণান্তং হি জীবিতম্

যদা শূরং চ ভীরুং চ যমঃ কর্ষতি ভারত
তত্কিং ন যোত্স্যন্তি হি তে ক্ষত্রিয়াঃ ক্ষত্রিয়র্ষভ

অয়ুধ্যমানো ম্রিয়তে যুধ্যমানশ্চ জীবতি
কালং প্রাপ্য মহারাজ ন কশ্চিদতিবর্ততে

ন চাপ্যেতান্হতান্যুদ্ধে রাজঞ্শোচিতুমর্হসি
প্রমাণং যদি শাস্ত্রাণি গতাস্তে পরমাং গতিম্

সর্বে স্বাধ্যায়বন্তো হি সর্বে চ চরিতব্রতাঃ
সর্বে চাভিমুখাঃ ক্ষীণাস্তত্র কা পরিদেবনা

অদর্শনাদাপতিতাঃ পুনশ্চাদর্শনং গতাঃ
ন তে তব ন তেষাং ত্বং তত্র কা পরিদেবনা

হতোঽপি লভতে স্বর্গং হত্বা চ লভতে যশঃ
উভয়ং নো বহুগুণং নাস্তি নিষ্ফলতা রণে

তেষাং কামদুঘাঁল্লোকানিন্দ্রঃ সংকল্পয়িষ্যতি
ইন্দ্রস্যাতিথয়ো হ্যেতে ভবন্তি পুরুষর্ষভ

ন যজ্ঞৈর্দক্ষিণাবদ্ভির্ন তপোভির্ন বিদ্যয়া
স্বর্গং যান্তি তথা মর্ত্যা যথা শূরা রণে হতাঃ

মাতাপিতৃসহস্রাণি পুত্রদারশতানি চ
সংসারেষ্বনুভূতানি কস্য তে কস্য বা বয়ম্

শোকস্থানসহস্রাণি ভয়স্থানশতানি চ
দিবসে দিবসে মূঢমাবিশন্তি ন পণ্ডিতম্

ন কালস্য প্রিয়ঃ কশ্চিন্ন দ্বেষ্যঃ কুরুসত্তম
ন মধ্যস্থঃ ক্বচিত্কালঃ সর্বং কালঃ প্রকর্ষতি

অনিত্যং জীবিতং রূপং যৌবনং দ্রব্যসংচয়ঃ
আরোগ্যং প্রিয়সংবাসো গৃধ্যেদেষু ন পণ্ডিতঃ

ন জানপদিকং দুঃখমেকঃ শোচিতুমর্হসি
অপ্যভাবেন যুজ্যেত তচ্চাস্য ন নিবর্ততে

অশোচন্প্রতিকুর্বীত যদি পশ্যেত্পরাক্রমম্
ভৈষজ্যমেতদ্দুঃখস্য যদেতন্নানুচিন্তয়েৎ
চিন্ত্যমানং হি ন ব্যেতি ভূয়শ্চাপি বিবর্ধতে

অনিষ্টসংপ্রয়োগাচ্চ বিপ্রয়োগাত্প্রিয়স্য চ
মনুষ্যা মানসৈর্দুঃখৈর্যুজ্যন্তে যেঽল্পবুদ্ধয়ঃ

নার্থো ন ধর্মো ন সুখং যদেতদনুশোচসি
ন চ নাপৈতি কার্যার্থাত্ত্রিবর্গাচ্চৈব ভ্রশ্যতে

অন্যামন্যাং ধনাবস্থাং প্রাপ্য বৈশেষিকীং নরাঃ
অসংতুষ্টাঃ প্রমুহ্যন্তি সংতোষং যান্তি পণ্ডিতাঃ

প্রজ্ঞয়া মানসং দুঃখং হন্যাচ্ছারীরমৌষধৈঃ
এতজ্জ্ঞানস্য সামর্থ্যং ন বালৈঃ সমতামিয়াৎ

শয়ানং চানুশয়তি তিষ্ঠন্তং চানুতিষ্ঠতি
অনুধাবতি ধাবন্তং কর্ম পূর্বকৃতং নরম্

যস্যাং যস্যামবস্থায়াং যত্করোতি শুভাশুভম্
তস্যাং তস্যামবস্থায়াং তত্তত্ফলমুপাশ্নুতে