অধ্যায় 1

1.1

জনমেজয় উবাচ
হতে দুর্যোধনে চৈব হতে সৈন্যে চ সর্বশঃ
ধৃতরাষ্ট্রো মহারাজঃ শ্রুত্বা কিমকরোন্মুনে

1.2

তথৈব কৌরবো রাজা ধর্মপুত্রো মহামনাঃ
কৃপপ্রভৃতয়শ্চৈব কিমকুর্বত তে ত্রয়ঃ

1.3

অশ্বত্থাম্নঃ শ্রুতং কর্ম শাপশ্চান্যোন্যকারিতঃ
বৃত্তান্তমুত্তরং ব্রূহি যদভাষত সংজয়ঃ

1.4

বৈশংপায়ন উবাচ
হতে পুত্রশতে দীনং ছিন্নশাখমিব দ্রুমম্
পুত্রশোকাভিসংতপ্তং ধৃতরাষ্ট্রং মহীপতিম্

1.5

ধ্যানমূকত্বমাপন্নং চিন্তয়া সমভিপ্লুতম্
অভিগম্য মহাপ্রাজ্ঞঃ সংজয়ো বাক্যমব্রবীৎ

1.6

কিং শোচসি মহারাজ নাস্তি শোকে সহায়তা
অক্ষৌহিণ্যো হতাশ্চাষ্টৌ দশ চৈব বিশাং পতে
নির্জনেয়ং বসুমতী শূন্যা সংপ্রতি কেবলা

1.7

নানাদিগ্ভ্যঃ সমাগম্য নানাদেশ্যা নরাধিপাঃ
সহিতাস্তব পুত্রেণ সর্বে বৈ নিধনং গতাঃ

1.8

পিতৄণাং পুত্রপৌত্রাণাং জ্ঞাতীনাং সুহৃদাং তথা
গুরূণাং চানুপূর্ব্যেণ প্রেতকার্যাণি কারয়

1.9

বৈশংপায়ন উবাচ
তচ্ছ্রুত্বা করুণং বাক্যং পুত্রপৌত্রবধার্দিতঃ
পপাত ভুবি দুর্ধর্ষো বাতাহত ইব দ্রুমঃ

1.10

ধৃতরাষ্ট্র উবাচ
হতপুত্রো হতামাত্যো হতসর্বসুহৃজ্জনঃ
দুঃখং নূনং ভবিষ্যামি বিচরন্পৃথিবীমিমাম্

1.11

কিং নু বন্ধুবিহীনস্য জীবিতেন মমাদ্য বৈ
লূনপক্ষস্য ইব মে জরাজীর্ণস্য পক্ষিণঃ

1.12

হৃতরাজ্যো হতসুহৃদ্ধতচক্ষুশ্চ বৈ তথা
ন ভ্রাজিষ্যে মহাপ্রাজ্ঞ ক্ষীণরশ্মিরিবাংশুমান্

1.13

ন কৃতং সুহৃদাং বাক্যং জামদগ্ন্যস্য জল্পতঃ
নারদস্য চ দেবর্ষেঃ কৃষ্ণদ্বৈপায়নস্য চ

1.14

সভামধ্যে তু কৃষ্ণেন যচ্ছ্রেয়োঽভিহিতং মম
অলং বৈরেণ তে রাজন্পুত্রঃ সংগৃহ্যতামিতি

1.15

তচ্চ বাক্যমকৃত্বাহং ভৃশং তপ্যামি দুর্মতিঃ
ন হি শ্রোতাস্মি ভীষ্মস্য ধর্ময়ুক্তং প্রভাষিতম্

1.16

দুর্যোধনস্য চ তথা বৃষভস্যেব নর্দতঃ
দুঃশাসনবধং শ্রুত্বা কর্ণস্য চ বিপর্যয়ম্
দ্রোণসূর্যোপরাগং চ হৃদয়ং মে বিদীর্যতে

1.17

ন স্মরাম্যাত্মনঃ কিংচিত্পুরা সংজয় দুষ্কৃতম্
যস্যেদং ফলমদ্যেহ ময়া মূঢেন ভুজ্যতে

1.18

নূনং হ্যপকৃতং কিংচিন্ময়া পূর্বেষু জন্মসু
যেন মাং দুঃখভাগেষু ধাতা কর্মসু যুক্তবান্

1.19

পরিণামশ্চ বয়সঃ সর্ববন্ধুক্ষয়শ্চ মে
সুহৃন্মিত্রবিনাশশ্চ দৈবয়োগাদুপাগতঃ
কোঽন্যোঽস্তি দুঃখিততরো ময়া লোকে পুমানিহ

1.20

তন্মামদ্যৈব পশ্যন্তু পাণ্ডবাঃ সংশিতব্রতম্
বিবৃতং ব্রহ্মলোকস্য দীর্ঘমধ্বানমাস্থিতম্

1.21

বৈশংপায়ন উবাচ
তস্য লালপ্যমানস্য বহুশোকং বিচিন্বতঃ
শোকাপহং নরেন্দ্রস্য সংজয়ো বাক্যমব্রবীৎ

1.22

শোকং রাজন্ব্যপনুদ শ্রুতাস্তে বেদনিশ্চয়াঃ
শাস্ত্রাগমাশ্চ বিবিধা বৃদ্ধেভ্যো নৃপসত্তম
সৃঞ্জয়ে পুত্রশোকার্তে যদূচুর্মুনয়ঃ পুরা

1.23

তথা যৌবনজং দর্পমাস্থিতে তে সুতে নৃপ
ন ত্বয়া সুহৃদাং বাক্যং ব্রুবতামবধারিতম্
স্বার্থশ্চ ন কৃতঃ কশ্চিল্লুব্ধেন ফলগৃদ্ধিনা

1.24

তব দুঃশাসনো মন্ত্রী রাধেয়শ্চ দুরাত্মবান্
শকুনিশ্চৈব দুষ্টাত্মা চিত্রসেনশ্চ দুর্মতিঃ
শল্যশ্চ যেন বৈ সর্বং শল্যভূতং কৃতং জগৎ

1.25

কুরুবৃদ্ধস্য ভীষ্মস্য গান্ধার্যা বিদুরস্য চ
ন কৃতং বচনং তেন তব পুত্রেণ ভারত

1.26

ন ধর্মঃ সত্কৃতঃ কশ্চিন্নিত্যং যুদ্ধমিতি ব্রুবন্
ক্ষপিতাঃ ক্ষত্রিয়াঃ সর্বে শত্রূণাং বর্ধিতং যশঃ

1.27

মধ্যস্থো হি ত্বমপ্যাসীর্ন ক্ষমং কিংচিদুক্তবান্
ধূর্ধরেণ ত্বয়া ভারস্তুলয়া ন সমং ধৃতঃ

1.28

আদাবেব মনুষ্যেণ বর্তিতব্যং যথা ক্ষমম্
যথা নাতীতমর্থং বৈ পশ্চাত্তাপেন যুজ্যতে

1.29

পুত্রগৃদ্ধ্যা ত্বয়া রাজন্প্রিয়ং তস্য চিকীর্ষতা
পশ্চাত্তাপমিদং প্রাপ্তং ন ত্বং শোচিতুমর্হসি

1.30

মধু যঃ কেবলং দৃষ্ট্বা প্রপাতং নানুপশ্যতি
স ভ্রষ্টো মধুলোভেন শোচত্যেব যথা ভবান্

1.31

অর্থান্ন শোচন্প্রাপ্নোতি ন শোচন্বিন্দতে সুখম্
ন শোচঞ্শ্রিয়মাপ্নোতি ন শোচন্বিন্দতে পরম্

1.32

স্বয়মুত্পাদয়িত্বাগ্নিং বস্ত্রেণ পরিবেষ্টয়েৎ
দহ্যমানো মনস্তাপং ভজতে ন স পণ্ডিতঃ

1.33

ত্বয়ৈব সসুতেনায়ং বাক্যবায়ুসমীরিতঃ
লোভাজ্যেন চ সংসিক্তো জ্বলিতঃ পার্থপাবকঃ

1.34

তস্মিন্সমিদ্ধে পতিতাঃ শলভা ইব তে সুতাঃ
তান্কেশবার্চির্নির্দগ্ধান্ন ত্বং শোচিতুমর্হসি

1.35

যচ্চাশ্রুপাতকলিলং বদনং বহসে নৃপ
অশাস্ত্রদৃষ্টমেতদ্ধি ন প্রশংসন্তি পণ্ডিতাঃ

1.36

বিস্ফুলিঙ্গা ইব হ্যেতান্দহন্তি কিল মানবান্
জহীহি মন্যুং বুদ্ধ্যা বৈ ধারয়াত্মানমাত্মনা

1.37

এবমাশ্বাসিতস্তেন সংজয়েন মহাত্মনা
বিদুরো ভূয় এবাহ বুদ্ধিপূর্বং পরংতপ

Contains text from DharmicData, made available under the Open Database License (ODbL). Simple meanings are written by AI and can contain mistakes.