Utshovঅধ্যায় 26
26.1
বাসুদেব উবাচ
উত্তিষ্ঠোত্তিষ্ঠ গান্ধারি মা চ শোকে মনঃ কৃথাঃ
তবৈব হ্যপরাধেন কুরবো নিধনং গতাঃ
26.2
যা ত্বং পুত্রং দুরাত্মানমীর্ষুমত্যন্তমানিনম্
দুর্যোধনং পুরস্কৃত্য দুষ্কৃতং সাধু মন্যসে
26.3
নিষ্ঠুরং বৈরপরুষং বৃদ্ধানাং শাসনাতিগম্
কথমাত্মকৃতং দোষং ময্যাধাতুমিহেচ্ছসি
26.4
মৃতং বা যদি বা নষ্টং যোঽতীতমনুশোচতি
দুঃখেন লভতে দুঃখং দ্বাবনর্থৌ প্রপদ্যতে
26.5
তপোর্থীয়ং ব্রাহ্মণী ধত্ত গর্ভং; গৌর্বোঢারং ধাবিতারং তুরংগী
শূদ্রা দাসং পশুপালং তু বৈশ্যা; বধার্থীয়ং ত্বদ্বিধা রাজপুত্রী
26.6
বৈশংপায়ন উবাচ
তচ্ছ্রুত্বা বাসুদেবস্য পুনরুক্তং বচোঽপ্রিয়ম্
তূষ্ণীং বভূব গান্ধারী শোকব্যাকুললোচনা
26.7
ধৃতরাষ্ট্রস্তু রাজর্ষির্নিগৃহ্যাবুদ্ধিজং তমঃ
পর্যপৃচ্ছত ধর্মাত্মা ধর্মরাজং যুধিষ্ঠিরম্
26.8
জীবতাং পরিমাণজ্ঞঃ সৈন্যানামসি পাণ্ডব
হতানাং যদি জানীষে পরিমাণং বদস্ব মে
26.9
যুধিষ্ঠির উবাচ
দশায়ুতানাময়ুতং সহস্রাণি চ বিংশতিঃ
কোট্যঃ ষষ্টিশ্চ ষট্চৈব যেঽস্মিন্রাজমৃধে হতাঃ
26.10
অলক্ষ্যাণাং তু বীরাণাং সহস্রাণি চতুর্দশ
দশ চান্যানি রাজেন্দ্র শতং ষষ্টিশ্চ পঞ্চ চ
26.11
ধৃতরাষ্ট্র উবাচ
যুধিষ্ঠির গতিং কাং তে গতাঃ পুরুষসত্তমাঃ
আচক্ষ্ব মে মহাবাহো সর্বজ্ঞো হ্যসি মে মতঃ
26.12
যুধিষ্ঠির উবাচ
যৈর্হুতানি শরীরাণি হৃষ্টৈঃ পরমসংয়ুগে
দেবরাজসমাঁল্লোকান্গতাস্তে সত্যবিক্রমাঃ
26.13
যে ত্বহৃষ্টেন মনসা মর্তব্যমিতি ভারত
যুধ্যমানা হতাঃ সংখ্যে তে গন্ধর্বৈঃ সমাগতাঃ
26.14
যে তু সংগ্রামভূমিষ্ঠা যাচমানাঃ পরাঙ্মুখাঃ
শস্ত্রেণ নিধনং প্রাপ্তা গতাস্তে গুহ্যকান্প্রতি
26.15
পীড্যমানাঃ পরৈর্যে তু হীয়মানা নিরায়ুধাঃ
হ্রীনিষেধা মহাত্মানঃ পরানভিমুখা রণে
26.16
ছিদ্যমানাঃ শিতৈঃ শস্ত্রৈঃ ক্ষত্রধর্মপরায়ণাঃ
গতাস্তে ব্রহ্মসদনং হতা বীরাঃ সুবর্চসঃ
26.17
যে তত্র নিহতা রাজন্নন্তরায়োধনং প্রতি
যথা কথংচিত্তে রাজন্সংপ্রাপ্তা উত্তরান্কুরূন্
26.18
ধৃতরাষ্ট্র উবাচ
কেন জ্ঞানবলেনৈবং পুত্র পশ্যসি সিদ্ধবৎ
তন্মে বদ মহাবাহো শ্রোতব্যং যদি বৈ ময়া
26.19
যুধিষ্ঠির উবাচ
নিদেশাদ্ভবতঃ পূর্বং বনে বিচরতা ময়া
তীর্থয়াত্রাপ্রসঙ্গেন সংপ্রাপ্তোঽয়মনুগ্রহঃ
26.20
দেবর্ষির্লোমশো দৃষ্টস্ততঃ প্রাপ্তোঽস্ম্যনুস্মৃতিম্
দিব্যং চক্ষুরপি প্রাপ্তং জ্ঞানয়োগেন বৈ পুরা
26.21
ধৃতরাষ্ট্র উবাচ
যেঽত্রানাথা জনস্যাস্য সনাথা যে চ ভারত
কচ্চিত্তেষাং শরীরাণি ধক্ষ্যন্তি বিধিপূর্বকম্
26.22
ন যেষাং সন্তি কর্তারো ন চ যেঽত্রাহিতাগ্নয়ঃ
বয়ং চ কস্য কুর্যামো বহুত্বাত্তাত কর্মণঃ
26.23
যান্সুপর্ণাশ্চ গৃধ্রাশ্চ বিকর্ষন্তি ততস্ততঃ
তেষাং তু কর্মণা লোকা ভবিষ্যন্তি যুধিষ্ঠির
26.24
বৈশংপায়ন উবাচ
এবমুক্তো মহাপ্রাজ্ঞঃ কুন্তীপুত্রো যুধিষ্ঠিরঃ
আদিদেশ সুধর্মাণং ধৌম্যং সূতং চ সংজয়ম্
26.25
বিদুরং চ মহাবুদ্ধিং যুয়ুত্সুং চৈব কৌরবম্
ইন্দ্রসেনমুখাংশ্চৈব ভৃত্যান্সূতাংশ্চ সর্বশঃ
26.26
ভবন্তঃ কারয়ন্ত্বেষাং প্রেতকার্যাণি সর্বশঃ
যথা চানাথবত্কিংচিচ্ছরীরং ন বিনশ্যতি
26.27
শাসনাদ্ধর্মরাজস্য ক্ষত্তা সূতশ্চ সংজয়ঃ
সুধর্মা ধৌম্যসহিত ইন্দ্রসেনাদয়স্তথা
26.28
চন্দনাগুরুকাষ্ঠানি তথা কালীয়কান্যুত
ঘৃতং তৈলং চ গন্ধাংশ্চ ক্ষৌমাণি বসনানি চ
26.29
সমাহৃত্য মহার্হাণি দারূণাং চৈব সংচয়ান্
রথাংশ্চ মৃদিতাংস্তত্র নানাপ্রহরণানি চ
26.30
চিতাঃ কৃত্বা প্রয়ত্নেন যথামুখ্যান্নরাধিপান্
দাহয়ামাসুরব্যগ্রা বিধিদৃষ্টেন কর্মণা
26.31
দুর্যোধনং চ রাজানং ভ্রাতৄংশ্চাস্য শতাধিকান্
শল্যং শলং চ রাজানং ভূরিশ্রবসমেব চ
26.32
জয়দ্রথং চ রাজানমভিমন্যুং চ ভারত
দৌঃশাসনিং লক্ষ্মণং চ ধৃষ্টকেতুং চ পার্থিবম্
26.33
বৃহন্তং সোমদত্তং চ সৃঞ্জয়াংশ্চ শতাধিকান্
রাজানং ক্ষেমধন্বানং বিরাটদ্রুপদৌ তথা
26.34
শিখণ্ডিনং চ পাঞ্চাল্যং ধৃষ্টদ্যুম্নং চ পার্ষতম্
যুধামন্যুং চ বিক্রান্তমুত্তমৌজসমেব চ
26.35
কৌসল্যং দ্রৌপদেয়াংশ্চ শকুনিং চাপি সৌবলম্
অচলং বৃষকং চৈব ভগদত্তং চ পার্থিবম্
26.36
কর্ণং বৈকর্তনং চৈব সহপুত্রমমর্ষণম্
কেকয়াংশ্চ মহেষ্বাসাংস্ত্রিগর্তাংশ্চ মহারথান্
26.37
ঘটোত্কচং রাক্ষসেন্দ্রং বকভ্রাতরমেব চ
অলম্বুসং চ রাজানং জলসংধং চ পার্থিবম্
26.38
অন্যাংশ্চ পার্থিবান্রাজঞ্শতশোঽথ সহস্রশঃ
ঘৃতধারাহুতৈর্দীপ্তৈঃ পাবকৈঃ সমদাহয়ন্
26.39
পিতৃমেধাশ্চ কেষাংচিদবর্তন্ত মহাত্মনাম্
সামভিশ্চাপ্যগায়ন্ত তেঽন্বশোচ্যন্ত চাপরৈঃ
26.40
সাম্নামৃচাং চ নাদেন স্ত্রীণাং চ রুদিতস্বনৈঃ
কশ্মলং সর্বভূতানাং নিশায়াং সমপদ্যত
26.41
তে বিধূমাঃ প্রদীপ্তাশ্চ দীপ্যমানাশ্চ পাবকাঃ
নভসীবান্বদৃশ্যন্ত গ্রহাস্তন্বভ্রসংবৃতাঃ
26.42
যে চাপ্যনাথাস্তত্রাসন্নানাদেশসমাগতাঃ
তাংশ্চ সর্বান্সমানায্য রাশীন্কৃত্বা সহস্রশঃ
26.43
চিত্বা দারুভিরব্যগ্রঃ প্রভূতৈঃ স্নেহতাপিতৈঃ
দাহয়ামাস বিদুরো ধর্মরাজস্য শাসনাৎ
26.44
কারয়িত্বা ক্রিয়াস্তেষাং কুরুরাজো যুধিষ্ঠিরঃ
ধৃতরাষ্ট্রং পুরস্কৃত্য গঙ্গামভিমুখোঽগমৎ