Utshovঅধ্যায় 25
25.1
গান্ধার্যুবাচ
কাম্বোজং পশ্য দুর্ধর্ষং কাম্বোজাস্তরণোচিতম্
শয়ানমৃষভস্কন্ধং হতং পাংসুশু মাধব
25.2
যস্য ক্ষতজসংদিগ্ধৌ বাহূ চন্দনরূষিতৌ
অবেক্ষ্য কৃপণং ভার্যা বিলপত্যতিদুঃখিতা
25.3
ইমৌ তৌ পরিঘপ্রখ্যৌ বাহূ শুভতলাঙ্গুলী
যয়োর্বিবরমাপন্নাং ন রতির্মাং পুরাজহৎ
25.4
কাং গতিং নু গমিষ্যামি ত্বয়া হীনা জনেশ্বর
দূরবন্ধুরনাথেব অতীব মধুরস্বরা
25.5
আতপে ক্লাম্যমানানাং বিবিধানামিব স্রজাম্
ক্লান্তানামপি নারীণাং ন শ্রীর্জহতি বৈ তনুম্
25.6
শয়ানমভিতঃ শূরং কালিঙ্গং মধুসূদন
পশ্য দীপ্তাঙ্গদয়ুগপ্রতিবদ্ধমহাভুজম্
25.7
মাগধানামধিপতিং জয়ত্সেনং জনার্দন
পরিবার্য প্ররুদিতা মাগধ্যঃ পশ্য যোষিতঃ
25.8
আসামায়তনেত্রাণাং সুস্বরাণাং জনার্দন
মনঃশ্রুতিহরো নাদো মনো মোহয়তীব মে
25.9
প্রকীর্ণসর্বাভরণা রুদন্ত্যঃ শোককর্শিতাঃ
স্বাস্তীর্ণশয়নোপেতা মাগধ্যঃ শেরতে ভুবি
25.10
কোসলানামধিপতিং রাজপুত্রং বৃহদ্বলম্
ভর্তারং পরিবার্যৈতাঃ পৃথক্প্ররুদিতাঃ স্ত্রিয়ঃ
25.11
অস্য গাত্রগতান্বাণান্কার্ষ্ণিবাহুবলার্পিতান্
উদ্ধরন্ত্যসুখাবিষ্টা মূর্ছমানাঃ পুনঃ পুনঃ
25.12
আসাং সর্বানবদ্যানামাতপেন পরিশ্রমাৎ
প্রম্লাননলিনাভানি ভান্তি বক্ত্রাণি মাধব
25.13
দ্রোণেন নিহতাঃ শূরাঃ শেরতে রুচিরাঙ্গদাঃ
দ্রোণেনাভিমুখাঃ সর্বে ভ্রাতরঃ পঞ্চ কেকয়াঃ
25.14
তপ্তকাঞ্চনবর্মাণস্তাম্রধ্বজরথস্রজঃ
ভাসয়ন্তি মহীং ভাসা জ্বলিতা ইব পাবকাঃ
25.15
দ্রোণেন দ্রুপদং সংখ্যে পশ্য মাধব পাতিতম্
মহাদ্বিপমিবারণ্যে সিংহেন মহতা হতম্
25.16
পাঞ্চালরাজ্ঞো বিপুলং পুণ্ডরীকাক্ষ পাণ্ডুরম্
আতপত্রং সমাভাতি শরদীব দিবাকরঃ
25.17
এতাস্তু দ্রুপদং বৃদ্ধং স্নুষা ভার্যাশ্চ দুঃখিতাঃ
দগ্ধ্বা গচ্ছন্তি পাঞ্চাল্যং রাজানমপসব্যতঃ
25.18
ধৃষ্টকেতুং মহেষ্বাসং চেদিপুংগবমঙ্গনাঃ
দ্রোণেন নিহতং শূরং হরন্তি হৃতচেতসঃ
25.19
দ্রোণাস্ত্রমভিহত্যৈষ বিমর্দে মধুসূদন
মহেষ্বাসো হতঃ শেতে নদ্যা হৃত ইব দ্রুমঃ
25.20
এষ চেদিপতিঃ শূরো ধৃষ্টকেতুর্মহারথঃ
শেতে বিনিহতঃ সংখ্যে হত্বা শত্রূন্সহস্রশঃ
25.21
বিতুদ্যমানং বিহগৈস্তং ভার্যাঃ প্রত্যুপস্থিতাঃ
চেদিরাজং হৃষীকেশ হতং সবলবান্ধবম্
25.22
দাশার্হীপুত্রজং বীরং শয়ানং সত্যবিক্রমম্
আরোপ্যাঙ্কে রুদন্ত্যেতাশ্চেদিরাজবরাঙ্গনাঃ
25.23
অস্য পুত্রং হৃষীকেশ সুবক্ত্রং চারুকুণ্ডলম্
দ্রোণেন সমরে পশ্য নিকৃত্তং বহুধা শরৈঃ
25.24
পিতরং নূনমাজিস্থং যুধ্যমানং পরৈঃ সহ
নাজহাত্পৃষ্ঠতো বীরমদ্যাপি মধুসূদন
25.25
এবং মমাপি পুত্রস্য পুত্রঃ পিতরমন্বগাৎ
দুর্যোধনং মহাবাহো লক্ষ্মণঃ পরবীরহা
25.26
বিন্দানুবিন্দাবাবন্ত্যৌ পতিতৌ পশ্য মাধব
হিমান্তে পুষ্পিতৌ শালৌ মরুতা গলিতাবিব
25.27
কাঞ্চনাঙ্গদবর্মাণৌ বাণখড্গধনুর্ধরৌ
ঋষভপ্রতিরূপাক্ষৌ শয়ানৌ বিমলস্রজৌ
25.28
অবধ্যাঃ পাণ্ডবাঃ কৃষ্ণ সর্ব এব ত্বয়া সহ
যে মুক্তা দ্রোণভীষ্মাভ্যাং কর্ণাদ্বৈকর্তনাত্কৃপাৎ
25.29
দুর্যোধনাদ্দ্রোণসুতাত্সৈন্ধবাচ্চ মহারথাৎ
সোমদত্তাদ্বিকর্ণাচ্চ শূরাচ্চ কৃতবর্মণঃ
যে হন্যুঃ শস্ত্রবেগেন দেবানপি নরর্ষভাঃ
25.30
ত ইমে নিহতাঃ সংখ্যে পশ্য কালস্য পর্যয়ম্
নাতিভারোঽস্তি দৈবস্য ধ্রুবং মাধব কশ্চন
যদিমে নিহতাঃ শূরাঃ ক্ষত্রিয়ৈঃ ক্ষত্রিয়র্ষভাঃ
25.31
তদৈব নিহতাঃ কৃষ্ণ মম পুত্রাস্তরস্বিনঃ
যদৈবাকৃতকামস্ত্বমুপপ্লব্যং গতঃ পুনঃ
25.32
শংতনোশ্চৈব পুত্রেণ প্রাজ্ঞেন বিদুরেণ চ
তদৈবোক্তাস্মি মা স্নেহং কুরুষ্বাত্মসুতেষ্বিতি
25.33
তয়োর্ন দর্শনং তাত মিথ্যা ভবিতুমর্হতি
অচিরেণৈব মে পুত্রা ভস্মীভূতা জনার্দন
25.34
বৈশংপায়ন উবাচ
ইত্যুক্ত্বা ন্যপতদ্ভূমৌ গান্ধারী শোককর্শিতা
দুঃখোপহতবিজ্ঞানা ধৈর্যমুত্সৃজ্য ভারত
25.35
ততঃ কোপপরীতাঙ্গী পুত্রশোকপরিপ্লুতা
জগাম শৌরিং দোষেণ গান্ধারী ব্যথিতেন্দ্রিয়া
25.36
গান্ধার্যুবাচ
পাণ্ডবা ধার্তরাষ্ট্রাশ্চ দ্রুগ্ধাঃ কৃষ্ণ পরস্পরম্
উপেক্ষিতা বিনশ্যন্তস্ত্বয়া কস্মাজ্জনার্দন
25.37
শক্তেন বহুভৃত্যেন বিপুলে তিষ্ঠতা বলে
উভয়ত্র সমর্থেন শ্রুতবাক্যেন চৈব হ
25.38
ইচ্ছতোপেক্ষিতো নাশঃ কুরূণাং মধুসূদন
যস্মাত্ত্বয়া মহাবাহো ফলং তস্মাদবাপ্নুহি
25.39
পতিশুশ্রূষয়া যন্মে তপঃ কিংচিদুপার্জিতম্
তেন ত্বাং দুরবাপাত্মঞ্শপ্স্যে চক্রগদাধর
25.40
যস্মাত্পরস্পরং ঘ্নন্তো জ্ঞাতয়ঃ কুরুপাণ্ডবাঃ
উপেক্ষিতাস্তে গোবিন্দ তস্মাজ্জ্ঞাতীন্বধিষ্যসি
25.41
ত্বমপ্যুপস্থিতে বর্ষে ষট্ত্রিংশে মধুসূদন
হতজ্ঞাতির্হতামাত্যো হতপুত্রো বনেচরঃ
কুত্সিতেনাভ্যুপায়েন নিধনং সমবাপ্স্যসি
25.42
তবাপ্যেবং হতসুতা নিহতজ্ঞাতিবান্ধবাঃ
স্ত্রিয়ঃ পরিপতিষ্যন্তি যথৈতা ভরতস্ত্রিয়ঃ
25.43
বৈশংপায়ন উবাচ
তচ্ছ্রুত্বা বচনং ঘোরং বাসুদেবো মহামনাঃ
উবাচ দেবীং গান্ধারীমীষদভ্যুত্স্ময়ন্নিব
25.44
সংহর্তা বৃষ্ণিচক্রস্য নান্যো মদ্বিদ্যতে শুভে
জানেঽহমেতদপ্যেবং চীর্ণং চরসি ক্ষত্রিয়ে
25.45
অবধ্যাস্তে নরৈরন্যৈরপি বা দেবদানবৈঃ
পরস্পরকৃতং নাশমতঃ প্রাপ্স্যন্তি যাদবাঃ
25.46
ইত্যুক্তবতি দাশার্হে পাণ্ডবাস্ত্রস্তচেতসঃ
বভূবুর্ভৃশসংবিগ্না নিরাশাশ্চাপি জীবিতে