Utshovঅধ্যায় 24
24.1
গান্ধার্যুবাচ
সোমদত্তসুতং পশ্য যুয়ুধানেন পাতিতম্
বিতুদ্যমানং বিহগৈর্বহুভির্মাধবান্তিকে
24.2
পুত্রশোকাভিসংতপ্তঃ সোমদত্তো জনার্দন
যুয়ুধানং মহেষ্বাসং গর্হয়ন্নিব দৃশ্যতে
24.3
অসৌ তু ভূরিশ্রবসো মাতা শোকপরিপ্লুতা
আশ্বাসয়তি ভর্তারং সোমদত্তমনিন্দিতা
24.4
দিষ্ট্যা নেদং মহারাজ দারুণং ভরতক্ষয়ম্
কুরুসংক্রন্দনং ঘোরং যুগান্তমনুপশ্যসি
24.5
দিষ্ট্যা যূপধ্বজং বীরং পুত্রং ভূরিসহস্রদম্
অনেকক্রতুয়জ্বানং নিহতং নাদ্য পশ্যসি
24.6
দিষ্ট্যা স্নুষাণামাক্রন্দে ঘোরং বিলপিতং বহু
ন শৃণোষি মহারাজ সারসীনামিবার্ণবে
24.7
একবস্ত্রানুসংবীতাঃ প্রকীর্ণাসিতমূর্ধজাঃ
স্নুষাস্তে পরিধাবন্তি হতাপত্যা হতেশ্বরাঃ
24.8
শ্বাপদৈর্ভক্ষ্যমাণং ত্বমহো দিষ্ট্যা ন পশ্যসি
ছিন্নবাহুং নরব্যাঘ্রমর্জুনেন নিপাতিতম্
24.9
শলং বিনিহতং সংখ্যে ভূরিশ্রবসমেব চ
স্নুষাশ্চ বিধবাঃ সর্বা দিষ্ট্যা নাদ্যেহ পশ্যসি
24.10
দিষ্ট্যা তত্কাঞ্চনং ছত্রং যূপকেতোর্মহাত্মনঃ
বিনিকীর্ণং রথোপস্থে সৌমদত্তের্ন পশ্যসি
24.11
অমূস্তু ভূরিশ্রবসো ভার্যাঃ সাত্যকিনা হতম্
পরিবার্যানুশোচন্তি ভর্তারমসিতেক্ষণাঃ
24.12
এতা বিলপ্য বহুলং ভর্তৃশোকেন কর্শিতাঃ
পতন্ত্যভিমুখা ভূমৌ কৃপণং বত কেশব
24.13
বীভত্সুরতিবীভত্সং কর্মেদমকরোত্কথম্
প্রমত্তস্য যদচ্ছৈত্সীদ্বাহুং শূরস্য যজ্বনঃ
24.14
ততঃ পাপতরং কর্ম কৃতবানপি সাত্যকিঃ
যস্মাত্প্রায়োপবিষ্টস্য প্রাহার্ষীত্সংশিতাত্মনঃ
24.15
একো দ্বাভ্যাং হতঃ শেষে ত্বমধর্মেণ ধার্মিকঃ
ইতি যূপধ্বজস্যৈতাঃ স্ত্রিয়ঃ ক্রোশন্তি মাধব
24.16
ভার্যা যূপধ্বজস্যৈষা করসংমিতমধ্যমা
কৃত্বোত্সঙ্গে ভুজং ভর্তুঃ কৃপণং পর্যদেবয়ৎ
24.17
অয়ং স রশনোত্কর্ষী পীনস্তনবিমর্দনঃ
নাভ্যূরুজঘনস্পর্শী নীবীবিস্রংসনঃ করঃ
24.18
বাসুদেবস্য সাংনিধ্যে পার্থেনাক্লিষ্টকর্মণা
যুধ্যতঃ সমরেঽন্যেন প্রমত্তস্য নিপাতিতঃ
24.19
কিং নু বক্ষ্যসি সংসত্সু কথাসু চ জনার্দন
অর্জুনস্য মহত্কর্ম স্বয়ং বা স কিরীটবান্
24.20
ইত্যেবং গর্হয়িত্বৈষা তূষ্ণীমাস্তে বরাঙ্গনা
তামেতামনুশোচন্তি সপত্ন্যঃ স্বামিব স্নুষাম্
24.21
গান্ধাররাজঃ শকুনির্বলবান্সত্যবিক্রমঃ
নিহতঃ সহদেবেন ভাগিনেয়েন মাতুলঃ
24.22
যঃ পুরা হেমদণ্ডাভ্যাং ব্যজনাভ্যাং স্ম বীজ্যতে
স এষ পক্ষিভিঃ পক্ষৈঃ শয়ান উপবীজ্যতে
24.23
যঃ স্ম রূপাণি কুরুতে শতশোঽথ সহস্রশঃ
তস্য মায়াবিনো মায়া দগ্ধাঃ পাণ্ডবতেজসা
24.24
মায়য়া নিকৃতিপ্রজ্ঞো জিতবান্যো যুধিষ্ঠিরম্
সভায়াং বিপুলং রাজ্যং স পুনর্জীবিতং জিতঃ
24.25
শকুন্তাঃ শকুনিং কৃষ্ণ সমন্তাত্পর্যুপাসতে
কিতবং মম পুত্রাণাং বিনাশায়োপশিক্ষিতম্
24.26
এতেনৈতন্মহদ্বৈরং প্রসক্তং পাণ্ডবৈঃ সহ
বধায় মম পুত্রাণামাত্মনঃ সগণস্য চ
24.27
যথৈব মম পুত্রাণাং লোকাঃ শস্ত্রজিতাঃ প্রভো
এবমস্যাপি দুর্বুদ্ধের্লোকাঃ শস্ত্রেণ বৈ জিতাঃ
24.28
কথং চ নায়ং তত্রাপি পুত্রান্মে ভ্রাতৃভিঃ সহ
বিরোধয়েদৃজুপ্রজ্ঞাননৃজুর্মধুসূদন