Utshovঅধ্যায় 23
23.1
গান্ধার্যুবাচ
এষ শল্যো হতঃ শেতে সাক্ষান্নকুলমাতুলঃ
ধর্মজ্ঞেন সতা তাত ধর্মরাজেন সংয়ুগে
23.2
যস্ত্বয়া স্পর্ধতে নিত্যং সর্বত্র পুরুষর্ষভ
স এষ নিহতঃ শেতে মদ্ররাজো মহারথঃ
23.3
যেন সংগৃহ্ণতা তাত রথমাধিরথের্যুধি
জয়ার্থং পাণ্ডুপুত্রাণাং তথা তেজোবধঃ কৃতঃ
23.4
অহো ধিক্পশ্য শল্যস্য পূর্ণচন্দ্রসুদর্শনম্
মুখং পদ্মপলাশাক্ষং বডৈরাদষ্টমব্রণম্
23.5
এষা চামীকরাভস্য তপ্তকাঞ্চনসপ্রভা
আস্যাদ্বিনিঃসৃতা জিহ্বা ভক্ষ্যতে কৃষ্ণ পক্ষিভিঃ
23.6
যুধিষ্ঠিরেণ নিহতং শল্যং সমিতিশোভনম্
রুদন্ত্যঃ পর্যুপাসন্তে মদ্ররাজকুলস্ত্রিয়ঃ
23.7
এতাঃ সুসূক্ষ্মবসনা মদ্ররাজং নরর্ষভম্
ক্রোশন্ত্যভিসমাসাদ্য ক্ষত্রিয়াঃ ক্ষত্রিয়র্ষভম্
23.8
শল্যং নিপতিতং নার্যঃ পরিবার্যাভিতঃ স্থিতাঃ
বাশিতা গৃষ্টয়ঃ পঙ্কে পরিমগ্নমিবর্ষভম্
23.9
শল্যং শরণদং শূরং পশ্যৈনং রথসত্তমম্
শয়ানং বীরশয়নে শরৈর্বিশকলীকৃতম্
23.10
এষ শৈলালয়ো রাজা ভগদত্তঃ প্রতাপবান্
গজাঙ্কুশধরঃ শ্রেষ্ঠঃ শেতে ভুবি নিপাতিতঃ
23.11
যস্য রুক্মময়ী মালা শিরস্যেষা বিরাজতে
শ্বাপদৈর্ভক্ষ্যমাণস্য শোভয়ন্তীব মূর্ধজান্
23.12
এতেন কিল পার্থস্য যুদ্ধমাসীত্সুদারুণম্
লোমহর্ষণমত্যুগ্রং শক্রস্য বলিনা যথা
23.13
যোধয়িত্বা মহাবাহুরেষ পার্থং ধনংজয়ম্
সংশয়ং গময়িত্বা চ কুন্তীপুত্রেণ পাতিতঃ
23.14
যস্য নাস্তি সমো লোকে শৌর্যে বীর্যে চ কশ্চন
স এষ নিহতঃ শেতে ভীষ্মো ভীষ্মকৃদাহবে
23.15
পশ্য শাংতনবং কৃষ্ণ শয়ানং সূর্যবর্চসম্
যুগান্ত ইব কালেন পাতিতং সূর্যমম্বরাৎ
23.16
এষ তপ্ত্বা রণে শত্রূঞ্শস্ত্রতাপেন বীর্যবান্
নরসূর্যোঽস্তমভ্যেতি সূর্যোঽস্তমিব কেশব
23.17
শরতল্পগতং বীরং ধর্মে দেবাপিনা সমম্
শয়ানং বীরশয়নে পশ্য শূরনিষেবিতে
23.18
কর্ণিনালীকনারাচৈরাস্তীর্য শয়নোত্তমম্
আবিশ্য শেতে ভগবান্স্কন্দঃ শরবণং যথা
23.19
অতূলপূর্ণং গাঙ্গেয়স্ত্রিভির্বাণৈঃ সমন্বিতম্
উপধায়োপধানাগ্র্যং দত্তং গাণ্ডীবধন্বনা
23.20
পালয়ানঃ পিতুঃ শাস্ত্রমূর্ধ্বরেতা মহায়শাঃ
এষ শাংতনবঃ শেতে মাধবাপ্রতিমো যুধি
23.21
ধর্মাত্মা তাত ধর্মজ্ঞঃ পারংপর্যেণ নির্ণয়ে
অমর্ত্য ইব মর্ত্যঃ সন্নেষ প্রাণানধারয়ৎ
23.22
নাস্তি যুদ্ধে কৃতী কশ্চিন্ন বিদ্বান্ন পরাক্রমী
যত্র শাংতনবো ভীষ্মঃ শেতেঽদ্য নিহতঃ পরৈঃ
23.23
স্বয়মেতেন শূরেণ পৃচ্ছ্যমানেন পাণ্ডবৈঃ
ধর্মজ্ঞেনাহবে মৃত্যুরাখ্যাতঃ সত্যবাদিনা
23.24
প্রনষ্টঃ কুরুবংশশ্চ পুনর্যেন সমুদ্ধৃতঃ
স গতঃ কুরুভিঃ সার্ধং মহাবুদ্ধিঃ পরাভবম্
23.25
ধর্মেষু কুরবঃ কং নু পরিপ্রক্ষ্যন্তি মাধব
গতে দেবব্রতে স্বর্গং দেবকল্পে নরর্ষভে
23.26
অর্জুনস্য বিনেতারমাচার্যং সাত্যকেস্তথা
তং পশ্য পতিতং দ্রোণং কুরূণাং গুরুসত্তমম্
23.27
অস্ত্রং চতুর্বিধং বেদ যথৈব ত্রিদশেশ্বরঃ
ভার্গবো বা মহাবীর্যস্তথা দ্রোণোঽপি মাধব
23.28
যস্য প্রসাদাদ্বীভত্সুঃ পাণ্ডবঃ কর্ম দুষ্করম্
চকার স হতঃ শেতে নৈনমস্ত্রাণ্যপালয়ন্
23.29
যং পুরোধায় কুরব আহ্বয়ন্তি স্ম পাণ্ডবান্
সোঽয়ং শস্ত্রভৃতাং শ্রেষ্ঠো দ্রোণঃ শস্ত্রৈঃ পৃথক্কৃতঃ
23.30
যস্য নির্দহতঃ সেনাং গতিরগ্নেরিবাভবৎ
স ভূমৌ নিহতঃ শেতে শান্তার্চিরিব পাবকঃ
23.31
ধনুর্মুষ্টিরশীর্ণশ্চ হস্তাবাপশ্চ মাধব
দ্রোণস্য নিহতস্যাপি দৃশ্যতে জীবতো যথা
23.32
বেদা যস্মাচ্চ চত্বারঃ সর্বাস্ত্রাণি চ কেশব
অনপেতানি বৈ শূরাদ্যথৈবাদৌ প্রজাপতেঃ
23.33
বন্দনার্হাবিমৌ তস্য বন্দিভির্বন্দিতৌ শুভৌ
গোমায়বো বিকর্ষন্তি পাদৌ শিষ্যশতার্চিতৌ
23.34
দ্রোণং দ্রুপদপুত্রেণ নিহতং মধুসূদন
কৃপী কৃপণমন্বাস্তে দুঃখোপহতচেতনা
23.35
তাং পশ্য রুদতীমার্তাং মুক্তকেশীমধোমুখীম্
হতং পতিমুপাসন্তীং দ্রোণং শস্ত্রভৃতাং বরম্
23.36
বাণৈর্ভিন্নতনুত্রাণং ধৃষ্টদ্যুম্নেন কেশব
উপাস্তে বৈ মৃধে দ্রোণং জটিলা ব্রহ্মচারিণী
23.37
প্রেতকৃত্যে চ যততে কৃপী কৃপণমাতুরা
হতস্য সমরে ভর্তুঃ সুকুমারী যশস্বিনী
23.38
অগ্নীনাহৃত্য বিধিবচ্চিতাং প্রজ্বাল্য সর্বশঃ
দ্রোণমাধায় গায়ন্তি ত্রীণি সামানি সামগাঃ
23.39
কিরন্তি চ চিতামেতে জটিলা ব্রহ্মচারিণঃ
ধনুর্ভিঃ শক্তিভিশ্চৈব রথনীডৈশ্চ মাধব
23.40
শস্ত্রৈশ্চ বিবিধৈরন্যৈর্ধক্ষ্যন্তে ভূরিতেজসম্
ত এতে দ্রোণমাধায় শংসন্তি চ রুদন্তি চ
23.41
সামভিস্ত্রিভিরন্তঃস্থৈরনুশংসন্তি চাপরে
অগ্নাবগ্নিমিবাধায় দ্রোণং হুত্বা হুতাশনে
23.42
গচ্ছন্ত্যভিমুখা গঙ্গাং দ্রোণশিষ্যা দ্বিজাতয়ঃ
অপসব্যাং চিতিং কৃত্বা পুরস্কৃত্য কৃপীং তদা