অধ্যায় 22

22.1

গান্ধার্যুবাচ
আবন্ত্যং ভীমসেনেন ভক্ষয়ন্তি নিপাতিতম্
গৃধ্রগোমায়বঃ শূরং বহুবন্ধুমবন্ধুবৎ

তং পশ্য কদনং কৃত্বা শত্রূণাং মধুসূদন
শয়ানং বীরশয়নে রুধিরেণ সমুক্ষিতম্

তং সৃগালাশ্চ কঙ্কাশ্চ ক্রব্যাদাশ্চ পৃথগ্বিধাঃ
তেন তেন বিকর্ষন্তি পশ্য কালস্য পর্যয়ম্

শয়ানং বীরশয়নে বীরমাক্রন্দসারিণম্
আবন্ত্যমভিতো নার্যো রুদত্যঃ পর্যুপাসতে

প্রাতিপীয়ং মহেষ্বাসং হতং ভল্লেন বাহ্লিকম্
প্রসুপ্তমিব শার্দূলং পশ্য কৃষ্ণ মনস্বিনম্

অতীব মুখবর্ণোঽস্য নিহতস্যাপি শোভতে
সোমস্যেবাভিপূর্ণস্য পৌর্ণমাস্যাং সমুদ্যতঃ

পুত্রশোকাভিতপ্তেন প্রতিজ্ঞাং পরিরক্ষতা
পাকশাসনিনা সংখ্যে বার্দ্ধক্ষত্রির্নিপাতিতঃ

একাদশ চমূর্জিত্বা রক্ষ্যমাণং মহাত্মনা
সত্যং চিকীর্ষতা পশ্য হতমেনং জয়দ্রথম্

সিন্ধুসৌবীরভর্তারং দর্পপূর্ণং মনস্বিনম্
ভক্ষয়ন্তি শিবা গৃধ্রা জনার্দন জয়দ্রথম্

সংরক্ষ্যমাণং ভার্যাভিরনুরক্তাভিরচ্যুত
ভষন্তো ব্যপকর্ষন্তি গহনং নিম্নমন্তিকাৎ

তমেতাঃ পর্যুপাসন্তে রক্ষমাণা মহাভুজম্
সিন্ধুসৌবীরগান্ধারকাম্বোজয়বনস্ত্রিয়ঃ

যদা কৃষ্ণামুপাদায় প্রাদ্রবত্কেকয়ৈঃ সহ
তদৈব বধ্যঃ পাণ্ডূনাং জনার্দন জয়দ্রথঃ

দুঃশলাং মানয়দ্ভিস্তু যদা মুক্তো জয়দ্রথঃ
কথমদ্য ন তাং কৃষ্ণ মানয়ন্তি স্ম তে পুনঃ

সৈষা মম সুতা বালা বিলপন্তী সুদুঃখিতা
প্রমাপয়তি চাত্মানমাক্রোশতি চ পাণ্ডবান্

কিং নু দুঃখতরং কৃষ্ণ পরং মম ভবিষ্যতি
যত্সুতা বিধবা বালা স্নুষাশ্চ নিহতেশ্বরাঃ

অহো ধিগ্দুঃশলাং পশ্য বীতশোকভয়ামিব
শিরো ভর্তুরনাসাদ্য ধাবমানামিতস্ততঃ

বারয়ামাস যঃ সর্বান্পাণ্ডবান্পুত্রগৃদ্ধিনঃ
স হত্বা বিপুলাঃ সেনাঃ স্বয়ং মৃত্যুবশং গতঃ

তং মত্তমিব মাতঙ্গং বীরং পরমদুর্জয়ম্
পরিবার্য রুদন্ত্যেতাঃ স্ত্রিয়শ্চন্দ্রোপমাননাঃ