অধ্যায় 21

21.1

গান্ধার্যুবাচ
এষ বৈকর্তনঃ শেতে মহেষ্বাসো মহারথঃ
জ্বলিতানলবত্সংখ্যে সংশান্তঃ পার্থতেজসা

পশ্য বৈকর্তনং কর্ণং নিহত্যাতিরথান্বহূন্
শোণিতৌঘপরীতাঙ্গং শয়ানং পতিতং ভুবি

অমর্ষী দীর্ঘরোষশ্চ মহেষ্বাসো মহারথঃ
রণে বিনিহতঃ শেতে শূরো গাণ্ডীবধন্বনা

যং স্ম পাণ্ডবসংত্রাসান্মম পুত্রা মহারথাঃ
প্রায়ুধ্যন্ত পুরস্কৃত্য মাতঙ্গা ইব যূথপম্

শার্দূলমিব সিংহেন সমরে সব্যসাচিনা
মাতঙ্গমিব মত্তেন মাতঙ্গেন নিপাতিতম্

সমেতাঃ পুরুষব্যাঘ্র নিহতং শূরমাহবে
প্রকীর্ণমূর্ধজাঃ পত্ন্যো রুদত্যঃ পর্যুপাসতে

উদ্বিগ্নঃ সততং যস্মাদ্ধর্মরাজো যুধিষ্ঠিরঃ
ত্রয়োদশ সমা নিদ্রাং চিন্তয়ন্নাধ্যগচ্ছত

অনাধৃষ্যঃ পরৈর্যুদ্ধে শত্রুভির্মঘবানিব
যুগান্তাগ্নিরিবার্চিষ্মান্হিমবানিব চ স্থিরঃ

স ভূত্বা শরণং বীরো ধার্তরাষ্ট্রস্য মাধব
ভূমৌ বিনিহতঃ শেতে বাতরুগ্ণ ইব দ্রুমঃ

পশ্য কর্ণস্য পত্নীং ত্বং বৃষসেনস্য মাতরম্
লালপ্যমানাঃ করুণং রুদতীং পতিতাং ভুবি

আচার্যশাপোঽনুগতো ধ্রুবং ত্বাং; যদগ্রসচ্চক্রমিয়ং ধরা তে
ততঃ শরেণাপহৃতং শিরস্তে; ধনংজয়েনাহবে শত্রুমধ্যে

অহো ধিগেষা পতিতা বিসংজ্ঞা; সমীক্ষ্য জাম্বূনদবদ্ধনিষ্কম্
কর্ণং মহাবাহুমদীনসত্ত্বং; সুষেণমাতা রুদতী ভৃশার্তা

অল্পাবশেষো হি কৃতো মহাত্মা; শরীরভক্ষৈঃ পরিভক্ষয়দ্ভিঃ
দ্রষ্টুং ন সংপ্রীতিকরঃ শশীব; কৃষ্ণশ্য পক্ষস্য চতুর্দশাহে

সাবর্তমানা পতিতা পৃথিব্যা;মুত্থায় দীনা পুনরেব চৈষা
কর্ণস্য বক্ত্রং পরিজিঘ্রমাণা; রোরূয়তে পুত্রবধাভিতপ্তা