Utshovঅধ্যায় 20
20.1
গান্ধার্যুবাচ
অধ্যর্ধগুণমাহুর্যং বলে শৌর্যে চ মাধব
পিত্রা ত্বয়া চ দাশার্হ দৃপ্তং সিংহমিবোত্কটম্
20.2
যো বিভেদ চমূমেকো মম পুত্রস্য দুর্ভিদাম্
স ভূত্বা মৃত্যুরন্যেষাং স্বয়ং মৃত্যুবশং গতঃ
20.3
তস্যোপলক্ষয়ে কৃষ্ণ কার্ষ্ণেরমিততেজসঃ
অভিমন্যোর্হতস্যাপি প্রভা নৈবোপশাম্যতি
20.4
এষা বিরাটদুহিতা স্নুষা গাণ্ডীবধন্বনঃ
আর্তা বালা পতিং বীরং শোচ্যা শোচত্যনিন্দিতা
20.5
তমেষা হি সমাসাদ্য ভার্যা ভর্তারমন্তিকে
বিরাটদুহিতা কৃষ্ণ পাণিনা পরিমার্জতি
20.6
তস্য বক্ত্রমুপাঘ্রায় সৌভদ্রস্য যশস্বিনী
বিবুদ্ধকমলাকারং কম্বুবৃত্তশিরোধরম্
20.7
কাম্যরূপবতী চৈষা পরিষ্বজতি ভামিনী
লজ্জমানা পুরেবৈনং মাধ্বীকমদমূর্ছিতা
20.8
তস্য ক্ষতজসংদিগ্ধং জাতরূপপরিষ্কৃতম্
বিমুচ্য কবচং কৃষ্ণ শরীরমভিবীক্ষতে
20.9
অবেক্ষমাণা তং বালা কৃষ্ণ ত্বামভিভাষতে
অয়ং তে পুণ্ডরীকাক্ষ সদৃশাক্ষো নিপাতিতঃ
20.10
বলে বীর্যে চ সদৃশস্তেজসা চৈব তেঽনঘ
রূপেণ চ তবাত্যর্থং শেতে ভুবি নিপাতিতঃ
20.11
অত্যন্তসুকুমারস্য রাঙ্কবাজিনশায়িনঃ
কচ্চিদদ্য শরীরং তে ভূমৌ ন পরিতপ্যতে
20.12
মাতঙ্গভুজবর্ষ্মাণৌ জ্যাক্ষেপকঠিনত্বচৌ
কাঞ্চনাঙ্গদিনৌ শেষে নিক্ষিপ্য বিপুলৌ ভুজৌ
20.13
ব্যায়ম্য বহুধা নূনং সুখসুপ্তঃ শ্রমাদিব
এবং বিলপতীমার্তাং ন হি মামভিভাষসে
20.14
আর্যামার্য সুভদ্রাং ত্বমিমাংশ্চ ত্রিদশোপমান্
পিতৄন্মাং চৈব দুঃখার্তাং বিহায় ক্ব গমিষ্যসি
20.15
তস্য শোণিতসংদিগ্ধান্কেশানুন্নাম্য পাণিনা
উত্সঙ্গে বক্ত্রমাধায় জীবন্তমিব পৃচ্ছতি
স্বস্রীয়ং বাসুদেবস্য পুত্রং গাণ্ডীবধন্বনঃ
20.16
কথং ত্বাং রণমধ্যস্থং জঘ্নুরেতে মহারথাঃ
ধিগস্তু ক্রূরকর্তৄংস্তান্কৃপকর্ণজয়দ্রথান্
20.17
দ্রোণদ্রৌণায়নী চোভৌ যৈরসি ব্যসনীকৃতঃ
রথর্ষভাণাং সর্বেষাং কথমাসীত্তদা মনঃ
20.18
বালং ত্বাং পরিবার্যৈকং মম দুঃখায় জঘ্নুষাম্
কথং নু পাণ্ডবানাং চ পাঞ্চালানাং চ পশ্যতাম্
ত্বং বীর নিধনং প্রাপ্তো নাথবান্সন্ননাথবৎ
20.19
দৃষ্ট্বা বহুভিরাক্রন্দে নিহতং ত্বামনাথবৎ
বীরঃ পুরুষশার্দূলঃ কথং জীবতি পাণ্ডবঃ
20.20
ন রাজ্যলাভো বিপুলঃ শত্রূণাং বা পরাভবঃ
প্রীতিং দাস্যতি পার্থানাং ত্বামৃতে পুষ্করেক্ষণ
20.21
তব শস্ত্রজিতাঁল্লোকান্ধর্মেণ চ দমেন চ
ক্ষিপ্রমন্বাগমিষ্যামি তত্র মাং প্রতিপালয়
20.22
দুর্মরং পুনরপ্রাপ্তে কালে ভবতি কেনচিৎ
যদহং ত্বাং রণে দৃষ্ট্বা হতং জীবামি দুর্ভগা
20.23
কামিদানীং নরব্যাঘ্র শ্লক্ষ্ণয়া স্মিতয়া গিরা
পিতৃলোকে সমেত্যান্যাং মামিবামন্ত্রয়িষ্যসি
20.24
নূনমপ্সরসাং স্বর্গে মনাংসি প্রমথিষ্যসি
পরমেণ চ রূপেণ গিরা চ স্মিতপূর্বয়া
20.25
প্রাপ্য পুণ্যকৃতাঁল্লোকানপ্সরোভিঃ সমেয়িবান্
সৌভদ্র বিহরন্কালে স্মরেথাঃ সুকৃতানি মে
20.26
এতাবানিহ সংবাসো বিহিতস্তে ময়া সহ
ষণ্মাসান্সপ্তমে মাসি ত্বং বীর নিধনং গতঃ
20.27
ইত্যুক্তবচনামেতামপকর্ষন্তি দুঃখিতাম্
উত্তরাং মোঘসংকল্পাং মত্স্যরাজকুলস্ত্রিয়ঃ
20.28
উত্তরামপকৃষ্যৈনামার্তামার্ততরাঃ স্বয়ম্
বিরাটং নিহতং দৃষ্ট্বা ক্রোশন্তি বিলপন্তি চ
20.29
দ্রোণাস্ত্রশরসংকৃত্তং শয়ানং রুধিরোক্ষিতম্
বিরাটং বিতুদন্ত্যেতে গৃধ্রগোমায়ুবায়সাঃ
20.30
বিতুদ্যমানং বিহগৈর্বিরাটমসিতেক্ষণাঃ
ন শক্নুবন্তি বিবশা নিবর্তয়িতুমাতুরাঃ
20.31
আসামাতপতপ্তানামায়াসেন চ যোষিতাম্
শ্রমেণ চ বিবর্ণানাং রূপাণাং বিগতং বপুঃ
20.32
উত্তরং চাভিমন্যুং চ কাম্বোজং চ সুদক্ষিণম্
শিশূনেতান্হতান্পশ্য লক্ষ্মণং চ সুদর্শনম্
আয়োধনশিরোমধ্যে শয়ানং পশ্য মাধব