অধ্যায় 19

19.1

গান্ধার্যুবাচ
এষ মাধব পুত্রো মে বিকর্ণঃ প্রাজ্ঞসংমতঃ
ভূমৌ বিনিহতঃ শেতে ভীমেন শতধা কৃতঃ

গজমধ্যগতঃ শেতে বিকর্ণো মধুসূদন
নীলমেঘপরিক্ষিপ্তঃ শরদীব দিবাকরঃ

অস্য চাপগ্রহেণৈষ পাণিঃ কৃতকিণো মহান্
কথংচিচ্ছিদ্যতে গৃধ্রৈরত্তুকামৈস্তলত্রবান্

অস্য ভার্যামিষপ্রেপ্সূন্গৃধ্রানেতাংস্তপস্বিনী
বারয়ত্যনিশং বালা ন চ শক্নোতি মাধব

যুবা বৃন্দারকঃ শূরো বিকর্ণঃ পুরুষর্ষভ
সুখোচিতঃ সুখার্হশ্চ শেতে পাংসুষু মাধব

কর্ণিনালীকনারাচৈর্ভিন্নমর্মাণমাহবে
অদ্যাপি ন জহাত্যেনং লক্ষ্মীর্ভরতসত্তমম্

এষ সংগ্রামশূরেণ প্রতিজ্ঞাং পালয়িষ্যতা
দুর্মুখোঽভিমুখঃ শেতে হতোঽরিগণহা রণে

তস্যৈতদ্বদনং কৃষ্ণ শ্বাপদৈরর্ধভক্ষিতম্
বিভাত্যভ্যধিকং তাত সপ্তম্যামিব চন্দ্রমাঃ

শূরস্য হি রণে কৃষ্ণ যস্যাননমথেদৃশম্
স কথং নিহতোঽমিত্রৈঃ পাংসূন্গ্রসতি মে সুতঃ

যস্যাহবমুখে সৌম্য স্থাতা নৈবোপপদ্যতে
স কথং দুর্মুখোঽমিত্রৈর্হতো বিবুধলোকজিৎ

চিত্রসেনং হতং ভূমৌ শয়ানং মধুসূদন
ধার্তরাষ্ট্রমিমং পশ্য প্রতিমানং দনুষ্মতাম্

তং চিত্রমাল্যাভরণং যুবত্যঃ শোককর্শিতাঃ
ক্রব্যাদসংঘৈঃ সহিতা রুদন্ত্যঃ পর্যুপাসতে

স্ত্রীণাং রুদিতনির্ঘোষঃ শ্বাপদানাং চ গর্জিতম্
চিত্ররূপমিদং কৃষ্ণ বিচিত্রং প্রতিভাতি মে

যুবা বৃন্দারকো নিত্যং প্রবরস্ত্রীনিষেবিতঃ
বিবিংশতিরসৌ শেতে ধ্বস্তঃ পাংসুষু মাধব

শরসংকৃত্তবর্মাণং বীরং বিশসনে হতম্
পরিবার্যাসতে গৃধ্রাঃ পরিবিংশা বিবিংশতিম্

প্রবিশ্য সমরে বীরঃ পাণ্ডবানামনীকিনীম্
আবিশ্য শয়নে শেতে পুনঃ সত্পুরুষোচিতম্

স্মিতোপপন্নং সুনসং সুভ্রু তারাধিপোপমম্
অতীব শুভ্রং বদনং পশ্য কৃষ্ণ বিবিংশতেঃ

যং স্ম তং পর্যুপাসন্তে বসুং বাসবয়োষিতঃ
ক্রীডন্তমিব গন্ধর্বং দেবকন্যাঃ সহস্রশঃ

হন্তারং বীরসেনানাং শূরং সমিতিশোভনম্
নিবর্হণমমিত্রাণাং দুঃসহং বিষহেত কঃ

দুঃসহস্যৈতদাভাতি শরীরং সংবৃতং শরৈঃ
গিরিরাত্মরুহৈঃ ফুল্লৈঃ কর্ণিকারৈরিবাবৃতঃ

শাতকৌম্ভ্যা স্রজা ভাতি কবচেন চ ভাস্বতা
অগ্নিনেব গিরিঃ শ্বেতো গতাসুরপি দুঃসহঃ