Utshovঅধ্যায় 18
18.1
গান্ধার্যুবাচ
পশ্য মাধব পুত্রান্মে শতসংখ্যাঞ্জিতক্লমান্
গদয়া ভীমসেনেন ভূয়িষ্ঠং নিহতান্রণে
18.2
ইদং দুঃখতরং মেঽদ্য যদিমা মুক্তমূর্ধজাঃ
হতপুত্রা রণে বালাঃ পরিধাবন্তি মে স্নুষাঃ
18.3
প্রাসাদতলচারিণ্যশ্চরণৈর্ভূষণান্বিতৈঃ
আপন্না যত্স্পৃশন্তীমা রুধিরার্দ্রাং বসুংধরাম্
18.4
গৃধ্রানুত্সারয়ন্ত্যশ্চ গোমায়ূন্বায়সাংস্তথা
শোকেনার্তা বিঘূর্ণন্ত্যো মত্তা ইব চরন্ত্যুত
18.5
এষান্যা ত্বনবদ্যাঙ্গী করসংমিতমধ্যমা
ঘোরং তদ্বৈশসং দৃষ্ট্বা নিপতত্যতিদুঃখিতা
18.6
দৃষ্ট্বা মে পার্থিবসুতামেতাং লক্ষ্মণমাতরম্
রাজপুত্রীং মহাবাহো মনো ন ব্যুপশাম্যতি
18.7
ভ্রাতৄংশ্চান্যাঃ পতীংশ্চান্যাঃ পুত্রাংশ্চ নিহতান্ভুবি
দৃষ্ট্বা পরিপতন্ত্যেতাঃ প্রগৃহ্য সুভুজা ভুজান্
18.8
মধ্যমানাং তু নারীণাং বৃদ্ধানাং চাপরাজিত
আক্রন্দং হতবন্ধূনাং দারুণে বৈশসে শৃণু
18.9
রথনীডানি দেহাংশ্চ হতানাং গজবাজিনাম্
আশ্রিতাঃ শ্রমমোহার্তাঃ স্থিতাঃ পশ্য মহাবল
18.10
অন্যা চাপহৃতং কায়াচ্চারুকুণ্ডলমুন্নসম্
স্বস্য বন্ধোঃ শিরঃ কৃষ্ণ গৃহীত্বা পশ্য তিষ্ঠতি
18.11
পূর্বজাতিকৃতং পাপং মন্যে নাল্পমিবানঘ
এতাভিরনবদ্যাভির্ময়া চৈবাল্পমেধয়া
18.12
তদিদং ধর্মরাজেন যাতিতং নো জনার্দন
ন হি নাশোঽস্তি বার্ষ্ণেয় কর্মণোঃ শুভপাপয়োঃ
18.13
প্রত্যগ্রবয়সঃ পশ্য দর্শনীয়কুচোদরাঃ
কুলেষু জাতা হ্রীমত্যঃ কৃষ্ণপক্ষাক্ষিমূর্ধজাঃ
18.14
হংসগদ্গদভাষিণ্যো দুঃখশোকপ্রমোহিতাঃ
সারস্য ইব বাশন্ত্যঃ পতিতাঃ পশ্য মাধব
18.15
ফুল্লপদ্মপ্রকাশানি পুণ্ডরীকাক্ষ যোষিতাম্
অনবদ্যানি বক্ত্রাণি তপত্যসুখরশ্মিবান্
18.16
ঈর্ষূণাং মম পুত্রাণাং বাসুদেবাবরোধনম্
মত্তমাতঙ্গদর্পাণাং পশ্যন্ত্যদ্য পৃথগ্জনাঃ
18.17
শতচন্দ্রাণি চর্মাণি ধ্বজাংশ্চাদিত্যসংনিভান্
রৌক্মাণি চৈব বর্মাণি নিষ্কানপি চ কাঞ্চনান্
18.18
শীর্ষত্রাণানি চৈতানি পুত্রাণাং মে মহীতলে
পশ্য দীপ্তানি গোবিন্দ পাবকান্সুহুতানিব
18.19
এষ দুঃশাসনঃ শেতে শূরেণামিত্রঘাতিনা
পীতশোণিতসর্বাঙ্গো ভীমসেনেন পাতিতঃ
18.20
গদয়া বীরঘাতিন্যা পশ্য মাধব মে সুতম্
দ্যূতক্লেশাননুস্মৃত্য দ্রৌপদ্যা চোদিতেন চ
18.21
উক্তা হ্যনেন পাঞ্চালী সভায়াং দ্যূতনির্জিতা
প্রিয়ং চিকীর্ষতা ভ্রাতুঃ কর্ণস্য চ জনার্দন
18.22
সহৈব সহদেবেন নকুলেনার্জুনেন চ
দাসভার্যাসি পাঞ্চালি ক্ষিপ্রং প্রবিশ নো গৃহান্
18.23
ততোঽহমব্রুবং কৃষ্ণ তদা দুর্যোধনং নৃপম্
মৃত্যুপাশপরিক্ষিপ্তং শকুনিং পুত্র বর্জয়
18.24
নিবোধৈনং সুদুর্বুদ্ধিং মাতুলং কলহপ্রিয়ম্
ক্ষিপ্রমেনং পরিত্যজ্য পুত্র শাম্যস্ব পাণ্ডবৈঃ
18.25
ন বুধ্যসে ত্বং দুর্বুদ্ধে ভীমসেনমমর্ষণম্
বাঙ্নারাচৈস্তুদংস্তীক্ষ্ণৈরুল্কাভিরিব কুঞ্জরম্
18.26
তানেষ রভসঃ ক্রূরো বাক্শল্যানবধারয়ন্
উত্সসর্জ বিষং তেষু সর্পো গোবৃষভেষ্বিব
18.27
এষ দুঃশাসনঃ শেতে বিক্ষিপ্য বিপুলৌ ভুজৌ
নিহতো ভীমসেনেন সিংহেনেব মহর্ষভঃ
18.28
অত্যর্থমকরোদ্রৌদ্রং ভীমসেনোঽত্যমর্ষণঃ
দুঃশাসনস্য যত্ক্রুদ্ধোঽপিবচ্ছোণিতমাহবে