Utshovঅধ্যায় 17
17.1
বৈশংপায়ন উবাচ
ততো দুর্যোধনং দৃষ্ট্বা গান্ধারী শোককর্শিতা
সহসা ন্যপতদ্ভূমৌ ছিন্নেব কদলী বনে
17.2
সা তু লব্ধ্বা পুনঃ সংজ্ঞাং বিক্রুশ্য চ পুনঃ পুনঃ
দুর্যোধনমভিপ্রেক্ষ্য শয়ানং রুধিরোক্ষিতম্
17.3
পরিষ্বজ্য চ গান্ধারী কৃপণং পর্যদেবয়ৎ
হা হা পুত্রেতি শোকার্তা বিললাপাকুলেন্দ্রিয়া
17.4
সুগূঢজত্রু বিপুলং হারনিষ্কনিষেবিতম্
বারিণা নেত্রজেনোরঃ সিঞ্চন্তী শোকতাপিতা
সমীপস্থং হৃষীকেশমিদং বচনমব্রবীৎ
17.5
উপস্থিতেঽস্মিন্সংগ্রামে জ্ঞাতীনাং সংক্ষয়ে বিভো
মাময়ং প্রাহ বার্ষ্ণেয় প্রাঞ্জলির্নৃপসত্তমঃ
অস্মিঞ্জ্ঞাতিসমুদ্ধর্ষে জয়মম্বা ব্রবীতু মে
17.6
ইত্যুক্তে জানতী সর্বমহং স্বং ব্যসনাগমম্
অব্রুবং পুরুষব্যাঘ্র যতো ধর্মস্ততো জয়ঃ
17.7
যথা ন যুধ্যমানস্ত্বং সংপ্রমুহ্যসি পুত্রক
ধ্রুবং শস্ত্রজিতাঁল্লোকান্প্রাপ্তাস্যমরবদ্বিভো
17.8
ইত্যেবমব্রুবং পূর্বং নৈনং শোচামি বৈ প্রভো
ধৃতরাষ্ট্রং তু শোচামি কৃপণং হতবান্ধবম্
17.9
অমর্ষণং যুধাং শ্রেষ্ঠং কৃতাস্ত্রং যুদ্ধদুর্মদম্
শয়ানং বীরশয়নে পশ্য মাধব মে সুতম্
17.10
যোঽয়ং মূর্ধাবসিক্তানামগ্রে যাতি পরংতপঃ
সোঽয়ং পাংসুষু শেতেঽদ্য পশ্য কালস্য পর্যয়ম্
17.11
ধ্রুবং দুর্যোধনো বীরো গতিং নসুলভাং গতঃ
তথা হ্যভিমুখঃ শেতে শয়নে বীরসেবিতে
17.12
যং পুরা পর্যুপাসীনা রময়ন্তি মহীক্ষিতঃ
মহীতলস্থং নিহতং গৃধ্রাস্তং পর্যুপাসতে
17.13
যং পুরা ব্যজনৈরগ্র্যৈরুপবীজন্তি যোষিতঃ
তমদ্য পক্ষব্যজনৈরুপবীজন্তি পক্ষিণঃ
17.14
এষ শেতে মহাবাহুর্বলবান্সত্যবিক্রমঃ
সিংহেনেব দ্বিপঃ সংখ্যে ভীমসেনেন পাতিতঃ
17.15
পশ্য দুর্যোধনং কৃষ্ণ শয়ানং রুধিরোক্ষিতম্
নিহতং ভীমসেনেন গদামুদ্যম্য ভারত
17.16
অক্ষৌহিণীর্মহাবাহুর্দশ চৈকাং চ কেশব
অনয়দ্যঃ পুরা সংখ্যে সোঽনয়ান্নিধনং গতঃ
17.17
এষ দুর্যোধনঃ শেতে মহেষ্বাসো মহারথঃ
শার্দূল ইব সিংহেন ভীমসেনেন পাতিতঃ
17.18
বিদুরং হ্যবমন্যৈষ পিতরং চৈব মন্দভাক্
বালো বৃদ্ধাবমানেন মন্দো মৃত্যুবশং গতঃ
17.19
নিঃসপত্না মহী যস্য ত্রয়োদশ সমাঃ স্থিতা
স শেতে নিহতো ভূমৌ পুত্রো মে পৃথিবীপতিঃ
17.20
অপশ্যং কৃষ্ণ পৃথিবীং ধার্তরাষ্ট্রানুশাসনাৎ
পূর্ণাং হস্তিগবাশ্বস্য বার্ষ্ণেয় ন তু তচ্চিরম্
17.21
তামেবাদ্য মহাবাহো পশ্যাম্যন্যানুশাসনাৎ
হীনাং হস্তিগবাশ্বেন কিং নু জীবামি মাধব
17.22
ইদং কৃচ্ছ্রতরং পশ্য পুত্রস্যাপি বধান্মম
যদিমাঃ পর্যুপাসন্তে হতাঞ্শূরান্রণে স্ত্রিয়ঃ
17.23
প্রকীর্ণকেশাং সুশ্রোণীং দুর্যোধনভুজাঙ্কগাম্
রুক্মবেদীনিভাং পশ্য কৃষ্ণ লক্ষ্মণমাতরম্
17.24
নূনমেষা পুরা বালা জীবমানে মহাভুজে
ভুজাবাশ্রিত্য রমতে সুভুজস্য মনস্বিনী
17.25
কথং তু শতধা নেদং হৃদয়ং মম দীর্যতে
পশ্যন্ত্যা নিহতং পুত্রং পুত্রেণ সহিতং রণে
17.26
পুত্রং রুধিরসংসিক্তমুপজিঘ্রত্যনিন্দিতা
দুর্যোধনং তু বামোরূঃ পাণিনা পরিমার্জতি
17.27
কিং নু শোচতি ভর্তারং পুত্রং চৈষা মনস্বিনী
তথা হ্যবস্থিতা ভাতি পুত্রং চাপ্যভিবীক্ষ্য সা
17.28
স্বশিরঃ পঞ্চশাখাভ্যামভিহত্যায়তেক্ষণা
পতত্যুরসি বীরস্য কুরুরাজস্য মাধব
17.29
পুণ্ডরীকনিভা ভাতি পুণ্ডরীকান্তরপ্রভা
মুখং বিমৃজ্য পুত্রস্য ভর্তুশ্চৈব তপস্বিনী
17.30
যদি চাপ্যাগমাঃ সন্তি যদি বা শ্রুতয়স্তথা
ধ্রুবং লোকানবাপ্তোঽয়ং নৃপো বাহুবলার্জিতান্