Utshovঅধ্যায় 16
16.1
বৈশংপায়ন উবাচ
এবমুক্ত্বা তু গান্ধারী কুরূণামাবিকর্তনম্
অপশ্যত্তত্র তিষ্ঠন্তী সর্বং দিব্যেন চক্ষুষা
16.2
পতিব্রতা মহাভাগা সমানব্রতচারিণী
উগ্রেণ তপসা যুক্তা সততং সত্যবাদিনী
16.3
বরদানেন কৃষ্ণস্য মহর্ষেঃ পুণ্যকর্মণঃ
দিব্যজ্ঞানবলোপেতা বিবিধং পর্যদেবয়ৎ
16.4
দদর্শ সা বুদ্ধিমতী দূরাদপি যথান্তিকে
রণাজিরং নৃবীরাণামদ্ভুতং লোমহর্ষণম্
16.5
অস্থিকেশপরিস্তীর্ণং শোণিতৌঘপরিপ্লুতম্
শরীরৈর্বহুসাহস্রৈর্বিনিকীর্ণং সমন্ততঃ
16.6
গজাশ্বরথয়োধানামাবৃতং রুধিরাবিলৈঃ
শরীরৈরশিরস্কৈশ্চ বিদেহৈশ্চ শিরোগণৈঃ
16.7
গজাশ্বনরবীরাণাং নিঃসত্ত্বৈরভিসংবৃতম্
সৃগালবডকাকোলকঙ্ককাকনিষেবিতম্
16.8
রক্ষসাং পুরুষাদানাং মোদনং কুররাকুলম্
অশিবাভিঃ শিবাভিশ্চ নাদিতং গৃধ্রসেবিতম্
16.9
ততো ব্যাসাভ্যনুজ্ঞাতো ধৃতরাষ্ট্রো মহীপতিঃ
পাণ্ডুপুত্রাশ্চ তে সর্বে যুধিষ্ঠিরপুরোগমাঃ
16.10
বাসুদেবং পুরস্কৃত্য হতবন্ধুং চ পার্থিবম্
কুরুস্ত্রিয়ঃ সমাসাদ্য জগ্মুরায়োধনং প্রতি
16.11
সমাসাদ্য কুরুক্ষেত্রং তাঃ স্ত্রিয়ো নিহতেশ্বরাঃ
অপশ্যন্ত হতাংস্তত্র পুত্রান্ভ্রাতৄন্পিতৄন্পতীন্
16.12
ক্রব্যাদৈর্ভক্ষ্যমাণান্বৈ গোমায়ুবডবায়সৈঃ
ভূতৈঃ পিশাচৈ রক্ষোভির্বিবিধৈশ্চ নিশাচরৈঃ
16.13
রুদ্রাক্রীডনিভং দৃষ্ট্বা তদা বিশসনং স্ত্রিয়ঃ
মহার্হেভ্যোঽথ যানেভ্যো বিক্রোশন্ত্যো নিপেতিরে
16.14
অদৃষ্টপূর্বং পশ্যন্ত্যো দুঃখার্তা ভরতস্ত্রিয়ঃ
শরীরেষ্বস্খলন্নন্যা ন্যপতংশ্চাপরা ভুবি
16.15
শ্রান্তানাং চাপ্যনাথানাং নাসীত্কাচন চেতনা
পাঞ্চালকুরুয়োষাণাং কৃপণং তদভূন্মহৎ
16.16
দুঃখোপহতচিত্তাভিঃ সমন্তাদনুনাদিতম্
দৃষ্ট্বায়োধনমত্যুগ্রং ধর্মজ্ঞা সুবলাত্মজা
16.17
ততঃ সা পুণ্ডরীকাক্ষমামন্ত্র্য পুরুষোত্তমম্
কুরূণাং বৈশসং দৃষ্ট্বা দুঃখাদ্বচনমব্রবীৎ
16.18
পশ্যৈতাঃ পুণ্ডরীকাক্ষ স্নুষা মে নিহতেশ্বরাঃ
প্রকীর্ণকেশাঃ ক্রোশন্তীঃ কুররীরিব মাধব
16.19
অমূস্ত্বভিসমাগম্য স্মরন্ত্যো ভরতর্ষভান্
পৃথগেবাভ্যধাবন্ত পুত্রান্ভ্রাতৄন্পিতৄন্পতীন্
16.20
বীরসূভির্মহাবাহো হতপুত্রাভিরাবৃতম্
ক্বচিচ্চ বীরপত্নীভির্হতবীরাভিরাকুলম্
16.21
শোভিতং পুরুষব্যাঘ্রৈর্ভীষ্মকর্ণাভিমন্যুভিঃ
দ্রোণদ্রুপদশল্যৈশ্চ জ্বলদ্ভিরিব পাবকৈঃ
16.22
কাঞ্চনৈঃ কবচৈর্নিষ্কৈর্মণিভিশ্চ মহাত্মনাম্
অঙ্গদৈর্হস্তকেয়ূরৈঃ স্রগ্ভিশ্চ সমলংকৃতম্
16.23
বীরবাহুবিসৃষ্টাভিঃ শক্তিভিঃ পরিঘৈরপি
খড্গৈশ্চ বিমলৈস্তীক্ষ্ণৈঃ সশরৈশ্চ শরাসনৈঃ
16.24
ক্রব্যাদসংঘৈর্মুদিতৈস্তিষ্ঠদ্ভিঃ সহিতৈঃ ক্বচিৎ
ক্বচিদাক্রীডমানৈশ্চ শয়ানৈরপরৈঃ ক্বচিৎ
16.25
এতদেবংবিধং বীর সংপশ্যায়োধনং বিভো
পশ্যমানা চ দহ্যামি শোকেনাহং জনার্দন
16.26
পাঞ্চালানাং কুরূণাং চ বিনাশং মধুসূদন
পঞ্চানামিব ভূতানাং নাহং বধমচিন্তয়ম্
16.27
তান্সুপর্ণাশ্চ গৃধ্রাশ্চ নিষ্কর্ষন্ত্যসৃগুক্ষিতান্
নিগৃহ্য কবচেষূগ্রা ভক্ষয়ন্তি সহস্রশঃ
16.28
জয়দ্রথস্য কর্ণস্য তথৈব দ্রোণভীষ্ময়োঃ
অভিমন্যোর্বিনাশং চ কশ্চিন্তয়িতুমর্হতি
16.29
অবধ্যকল্পান্নিহতান্দৃষ্ট্বাহং মধুসূদন
গৃধ্রকঙ্কবডশ্যেনশ্বসৃগালাদনীকৃতান্
16.30
অমর্ষবশমাপন্নান্দুর্যোধনবশে স্থিতান্
পশ্যেমান্পুরুষব্যাঘ্রান্সংশান্তান্পাবকানিব
16.31
শয়নান্যুচিতাঃ সর্বে মৃদূনি বিমলানি চ
বিপন্নাস্তেঽদ্য বসুধাং বিবৃতামধিশেরতে
16.32
বন্দিভিঃ সততং কালে স্তুবদ্ভিরভিনন্দিতাঃ
শিবানামশিবা ঘোরাঃ শৃণ্বন্তি বিবিধা গিরঃ
16.33
যে পুরা শেরতে বীরাঃ শয়নেষু যশস্বিনঃ
চন্দনাগুরুদিগ্ধাঙ্গাস্তেঽদ্য পাংসুষু শেরতে
16.34
তেষামাভরণান্যেতে গৃধ্রগোমায়ুবায়সাঃ
আক্ষিপন্ত্যশিবা ঘোরা বিনদন্তঃ পুনঃ পুনঃ
16.35
চাপানি বিশিখান্পীতান্নিস্ত্রিংশান্বিমলা গদাঃ
যুদ্ধাভিমানিনঃ প্রীতা জীবন্ত ইব বিভ্রতি
16.36
সুরূপবর্ণা বহবঃ ক্রব্যাদৈরবঘট্টিতাঃ
ঋষভপ্রতিরূপাক্ষাঃ শেরতে হরিতস্রজঃ
16.37
অপরে পুনরালিঙ্গ্য গদাঃ পরিঘবাহবঃ
শেরতেঽভিমুখাঃ শূরা দয়িতা ইব যোষিতঃ
16.38
বিভ্রতঃ কবচান্যন্যে বিমলান্যায়ুধানি চ
ন ধর্ষয়ন্তি ক্রব্যাদা জীবন্তীতি জনার্দন
16.39
ক্রব্যাদৈঃ কৃষ্যমাণানামপরেষাং মহাত্মনাম্
শাতকৌম্ভ্যঃ স্রজশ্চিত্রা বিপ্রকীর্ণাঃ সমন্ততঃ
16.40
এতে গোমায়বো ভীমা নিহতানাং যশস্বিনাম্
কণ্ঠান্তরগতান্হারানাক্ষিপন্তি সহস্রশঃ
16.41
সর্বেষ্বপররাত্রেষু যাননন্দন্ত বন্দিনঃ
স্তুতিভিশ্চ পরার্ধ্যাভিরুপচারৈশ্চ শিক্ষিতাঃ
16.42
তানিমাঃ পরিদেবন্তি দুঃখার্তাঃ পরমাঙ্গনাঃ
কৃপণং বৃষ্ণিশার্দূল দুঃখশোকার্দিতা ভৃশম্
16.43
রক্তোত্পলবনানীব বিভান্তি রুচিরাণি বৈ
মুখানি পরমস্ত্রীণাং পরিশুষ্কাণি কেশব
16.44
রুদিতোপরতা হ্যেতা ধ্যায়ন্ত্যঃ সংপরিপ্লুতাঃ
কুরুস্ত্রিয়োঽভিগচ্ছন্তি তেন তেনৈব দুঃখিতাঃ
16.45
এতান্যাদিত্যবর্ণানি তপনীয়নিভানি চ
রোষরোদনতাম্রাণি বক্ত্রাণি কুরুয়োষিতাম্
16.46
আসামপরিপূর্ণার্থং নিশম্য পরিদেবিতম্
ইতরেতরসংক্রন্দান্ন বিজানন্তি যোষিতঃ
16.47
এতা দীর্ঘমিবোচ্ছ্বস্য বিক্রুশ্য চ বিলপ্য চ
বিস্পন্দমানা দুঃখেন বীরা জহতি জীবিতম্
16.48
বহ্ব্যো দৃষ্ট্বা শরীরাণি ক্রোশন্তি বিলপন্তি চ
পাণিভিশ্চাপরা ঘ্নন্তি শিরাংসি মৃদুপাণয়ঃ
16.49
শিরোভিঃ পতিতৈর্হস্তৈঃ সর্বাঙ্গৈর্যূথশঃ কৃতৈঃ
ইতরেতরসংপৃক্তৈরাকীর্ণা ভাতি মেদিনী
16.50
বিশিরস্কানথো কায়ান্দৃষ্ট্বা ঘোরাভিনন্দিনঃ
মুহ্যন্ত্যনুচিতা নার্যো বিদেহানি শিরাংসি চ
16.51
শিরঃ কায়েন সংধায় প্রেক্ষমাণা বিচেতসঃ
অপশ্যন্ত্যো পরং তত্র নেদমস্যেতি দুঃখিতাঃ
16.52
বাহূরুচরণানন্যান্বিশিখোন্মথিতান্পৃথক্
সংদধত্যোঽসুখাবিষ্টা মূর্ছন্ত্যেতাঃ পুনঃ পুনঃ
16.53
উত্কৃত্তশিরসশ্চান্যান্বিজগ্ধান্মৃগপক্ষিভিঃ
দৃষ্ট্বা কাশ্চিন্ন জানন্তি ভর্তৄন্ভরতয়োষিতঃ
16.54
পাণিভিশ্চাপরা ঘ্নন্তি শিরাংসি মধুসূদন
প্রেক্ষ্য ভ্রাতৄন্পিতৄন্পুত্রান্পতীংশ্চ নিহতান্পরৈঃ
16.55
বাহুভিশ্চ সখড্গৈশ্চ শিরোভিশ্চ সকুণ্ডলৈঃ
অগম্যকল্পা পৃথিবী মাংসশোণিতকর্দমা
16.56
ন দুঃখেষূচিতাঃ পূর্বং দুঃখং গাহন্ত্যনিন্দিতাঃ
ভ্রাতৃভিঃ পিতৃভিঃ পুত্রৈরুপকীর্ণাং বসুংধরাম্
16.57
যূথানীব কিশোরীণাং সুকেশীনাং জনার্দন
স্নুষাণাং ধৃতরাষ্ট্রস্য পশ্য বৃন্দান্যনেকশঃ
16.58
অতো দুঃখতরং কিং নু কেশব প্রতিভাতি মে
যদিমাঃ কুর্বতে সর্বা রূপমুচ্চাবচং স্ত্রিয়ঃ
16.59
নূনমাচরিতং পাপং ময়া পূর্বেষু জন্মসু
যা পশ্যামি হতান্পুত্রান্পৌত্রান্ভ্রাতৄংশ্চ কেশব
এবমার্তা বিলপতী দদর্শ নিহতং সুতম্