অধ্যায় 15

15.1

বৈশংপায়ন উবাচ
এবমুক্ত্বা তু গান্ধারী যুধিষ্ঠিরমপৃচ্ছত
ক্ব স রাজেতি সক্রোধা পুত্রপৌত্রবধার্দিতা

তামভ্যগচ্ছদ্রাজেন্দ্রো বেপমানঃ কৃতাঞ্জলিঃ
যুধিষ্ঠির ইদং চৈনাং মধুরং বাক্যমব্রবীৎ

পুত্রহন্তা নৃশংসোঽহং তব দেবি যুধিষ্ঠিরঃ
শাপার্হঃ পৃথিবীনাশে হেতুভূতঃ শপস্ব মাম্

ন হি মে জীবিতেনার্থো ন রাজ্যেন ধনেন বা
তাদৃশান্সুহৃদো হত্বা মূঢস্যাস্য সুহৃদ্দ্রুহঃ

তমেবংবাদিনং ভীতং সংনিকর্ষগতং তদা
নোবাচ কিংচিদ্গান্ধারী নিঃশ্বাসপরমা ভৃশম্

তস্যাবনতদেহস্য পাদয়োর্নিপতিষ্যতঃ
যুধিষ্ঠিরস্য নৃপতের্ধর্মজ্ঞা ধর্মদর্শিনী
অঙ্গুল্যগ্রাণি দদৃশে দেবী পট্টান্তরেণ সা

ততঃ স কুনখীভূতো দর্শনীয়নখো নৃপঃ
তং দৃষ্ট্বা চার্জুনোঽগচ্ছদ্বাসুদেবস্য পৃষ্ঠতঃ

এবং সংচেষ্টমানাংস্তানিতশ্চেতশ্চ ভারত
গান্ধারী বিগতক্রোধা সান্ত্বয়ামাস মাতৃবৎ

তয়া তে সমনুজ্ঞাতা মাতরং বীরমাতরম্
অভ্যগচ্ছন্ত সহিতাঃ পৃথাং পৃথুলবক্ষসঃ

চিরস্য দৃষ্ট্বা পুত্রান্সা পুত্রাধিভিরভিপ্লুতা
বাষ্পমাহারয়দ্দেবী বস্ত্রেণাবৃত্য বৈ মুখম্

ততো বাষ্পং সমুত্সৃজ্য সহ পুত্রৈস্তথা পৃথা
অপশ্যদেতাঞ্শস্ত্রৌঘৈর্বহুধা পরিবিক্ষতান্

সা তানেকৈকশঃ পুত্রান্সংস্পৃশন্তী পুনঃ পুনঃ
অন্বশোচন্ত দুঃখার্তা দ্রৌপদীং চ হতাত্মজাম্
রুদতীমথ পাঞ্চালীং দদর্শ পতিতাং ভুবি

দ্রৌপদ্যুবাচ
আর্যে পৌত্রাঃ ক্ব তে সর্বে সৌভদ্রসহিতা গতাঃ
ন ত্বাং তেঽদ্যাভিগচ্ছন্তি চিরদৃষ্টাং তপস্বিনীম্
কিং নু রাজ্যেন বৈ কার্যং বিহীনায়াঃ সুতৈর্মম

বৈশংপায়ন উবাচ
তাং সমাশ্বাসয়ামাস পৃথা পৃথুললোচনা
উত্থাপ্য যাজ্ঞসেনীং তু রুদতীং শোককর্শিতাম্

তয়ৈব সহিতা চাপি পুত্রৈরনুগতা পৃথা
অভ্যগচ্ছত গান্ধারীমার্তামার্ততরা স্বয়ম্

তামুবাচাথ গান্ধারী সহ বধ্বা যশস্বিনীম্
মৈবং পুত্রীতি শোকার্তা পশ্য মামপি দুঃখিতাম্

মন্যে লোকবিনাশোঽয়ং কালপর্যায়চোদিতঃ
অবশ্যভাবী সংপ্রাপ্তঃ স্বভাবাল্লোমহর্ষণঃ

ইদং তত্সমনুপ্রাপ্তং বিদুরস্য বচো মহৎ
অসিদ্ধানুনয়ে কৃষ্ণে যদুবাচ মহামতিঃ

তস্মিন্নপরিহার্যেঽর্থে ব্যতীতে চ বিশেষতঃ
মা শুচো ন হি শোচ্যাস্তে সংগ্রামে নিধনং গতাঃ

যথৈব ত্বং তথৈবাহং কো বা মাশ্বাসয়িষ্যতি
মমৈব হ্যপরাধেন কুলমগ্র্যং বিনাশিতম্